1. Mbaangasi womwe wambakhulupira bza matsenga na ufiti?

 BUKHU lakuti African Traditional Religion limbati: “Ku Afrika, bzimbafunika lini kubvunza penu ufiti ulipo. Kwa wanthu wa ku Afrika wa mkhalidwe uli-wense, ufiti n’cinthu cakufunika kwene-kwene.” Pakati pa womwe wambakhulupira bza matsenga na ufiti, pana wanthu wakupfunza na wakusaya kupfunza. Napo atsogoleri wa Cisiramu na wa magereja ya Cikristau, wambakhulupirambo ufitibo.

2. Mwakubverana na bzomwe wazinji wambakhulupira, kodi mphanvu yakucita nayo matsenga imbacokera kuponi?

² Wazinji wa mu Afrika wambakhulupira kuti iripo mphamvu inango ya uzimu yomwe in’posa mphanvu ya wanthu. Ndipo Mulungu ndiye ambaitonga mphamvu imweyo. Mizimu na anyamuya wangaphatise basa mphamvu imweyo. Ndipo wanthu winango wambadziwa momwe wangaigumanire na kuiphatisa basa pa bzinthu bzabwino (kutsikitira) ayai pa bzinthu bzakuipa (kulodza).

3. Kodi matsenga n’ciani, ndipo wanthu wambakhulupira kuti matsengayo yangacite ciani?

³ Wanthu wambacitira matsenga anyamadulanthaka wawo. Wanthu wambakhulupira kuti, womwe wambacita matsenga, wana mphamvu zakutumiza anyankalemwa-lemwa, mbalame na bzirombo bzinango kuti bzikapwete wanthu. Wanthu wambakhulupirambo kuti matsengayo ndiyo yambacitisa wanthu kumenyana, kusaya kubereka, matenda na infa.

4. Kodi wazinji wambakhulupira ciani bza ufiti, ndipo n’ciani comwe wadalewa wale womwe wadaleka ufiti?

⁴ Bzimwebzi bziribe kusiyana na ufiti. Wanthu wambalewa kuti nfiti zimbasiya mathupi yawo usiku, zicimbuluka kuti zikagumane na nfiti zinango ayai kuti zikadye nyama za wanthu womwe zapha. Pakuti mathupi ya nfitizo yambakhala yadagona pa mphasa, tenepo, womwe wambalewa bzimwebzo mbale womwe wadaleka ufiti. Mwa ciratizo, revista inango ya ku Afrika idanemba mafala ya wanthu womwe wadaleka ufiti (wazinji wakhali atsikana) womwe wadati: “Ndidapha wanthu 150 mwakucitisa ngozi za pa nseu.” “Ndidapha wana axanu mwakukongwona mulopa wawo wense.” “Ndidapha akwende wangu atatu thangwe wadalamba kundilowola.”

5. Kodi kutsikitira n’ciani, ndipo kumbacitidwa tani?

⁵ Kutsikitira ni matsenga yakubzikhotcerera  ku bzakuipa. Womwe wambatsikitira, wambabvala bzithumwa m’thupi. Iwo wambamwa ayai wambapukusira m’thupi mwawo mankhwala yakukhotcerera. M’nyumba mwawo wambabisa ayai wambafucira pansi bzinthu bzomwe wambakhulupira kuti bzina mphamvu yakuwakhotcerera. Iwo wambakhulupira tu bzinthu tomwe tumbakhala na mafala ya m’Bibliya ayai ya mu Alcorão.

6. N’ciani comwe Sathani na madimonyo wadacita kale-kale, ndipo tin’funika kumbazikumbukira tani mphanvu zawo?

⁶ N’cadidi kuti Sathani na madimonyo yace mbanyamadulanthaka wakuipa wa wanthu. Iwo wana mphamvu zakusokoneza bzakukumbuka na moyo wa wanthu, ndipo kale-kale, iwo wadapotera kuna wanthu pabodzi na bzirombo. (Mateu 12:43-45) Ifepano tingazicepse lini mphanvu zawo; tsono bzin’funika lini kukumbuka kuti iwo wana mphanvu zizinjiretu kwene-kwene.

7. N’ciani comwe Sathani an’funa tikhulupire, ndipo kodi tingabzindendemeze tani bzimwebzo?

⁷ Sathani ngwakucenjera pakupumpsa. Iye ambapumpsa wanthu, kuti wayese kuti iye ana mphanvu zizinji kwene-kwene. Ciratizo: Tsapanopapa pomwe ikhacitika nkhondo m’dziko linango la ku Afrika, wacikunda wakhaphatisa basa mitcini yakukuzira mafala kuti wambadzidzimuse anyamadulanthaka wawo. Pomwe wakanati kuyenda kamenyana nawo, wacikundawo wakhaliza bzomwe iwo wakhadagravari bza kulira kwa mabazuka na nfuti za mphanvu. Iwo wakhafuna kuti anyamadulanthakawo wayese kuti wakhamenyedwa na anyankhondo womwe wakhana nfuti za mphanvu kwene-kwene. Bzibodzi-bodzimbo, Sathani an’funa kuti wanthu wakhulupire kuti iye ana mphanvu zakusaya malire. Iye ambafuna kugopsa wanthu kuti waleke kucita kufuna kwa Yahova koma kufuna kwace. Mbatiwoneni magunkha matatu yomwe Sathani an’funa tikhulupire.

8. Ndiponi gunkha libodzi lomwe Sathani ambamwaza?

⁸ Gunkha lakutoma lomwe Sathani ambamwaza ndakuti palibe cinthu comwe cimbacitika cokha; ciri-cense cakuipa cakusaya kucitidwa na munthu, cimbacitidwa na mphanvu ya mizimu. Mwa ciratizo, yeyezani kuti mwana wafa na malariya. Mai wace angadziwe kuti malariya ni matenda yakuyambisidwa na mbudu. Tsono iwo angakhulupirembo kuti iripo nfiti yomwe yatumiza mbuduyo kuti idzalume mwanayo.

9. Kodi Bibliya limbalatiza tani kuti Sathani ambayambisa lini mabvuto yense?

⁹ Napo Sathani ana mphanvu yakuyambisa mabvuto yanango, mpsakuphonyeka kukhulupira kuti iye ana mphanvu yakuyambisa mabvuto yense. Bibliya limbati: “si nyakuthamanga kwene-kwene ndiye an’kunda pa mapici, si wa mphanvu ndiwo wan’kunda pa nkhondo, si wa nzeru ndiwo wan’gumana cakudya, si adziwi ndiwo wan’gumana cuma, ndipo si nyacidziwiso ndiye an’funidwa, pakuti nthawe ya matsoka na bzinthu bzakusaya kudikhirika bzimbagwera wanthu wense.” (Mpalizi 9:11) Munthu omwe ankuthamanga pa mapici, iye angadziwike kuti ngwa liwiro kwene-kwene kuposa winango, tsono bzinkulewa lini kuti iye ndiye aniwina. “Bzinthu bzakusaya kudikhirika” bzingamuluzise. Pinango iye angakhukhumudwe, acigwa, ayai angadwale. Bzinthu bzimwebzi bzingacitikire ali-wense. Ni bzinthu bzomwe bzimbacitika; tingalewe lini kuti bzacitidwa na Sathani ayai na nfiti.

10. Kodi wanthu wambati nfiti zimbacita ciani, ndipo kodi tin’dziwa tani kuti bzimwebzo ni gunkha?

 ¹⁰ Gunkha laciwiri lomwe Sathani ambamwaza ndakuti nfiti zimbasiya mathupi yawo, zicimanga ulendo usiku kuti zikagumane na nfiti zinango ayai kuti zikadye nyama za wanthu. Tsono bzibvunzeni: ‘Penu nfitizo zimbacitadi bzimwebzo, n’ciani maka-maka comwe cimbasiya thupilo?’ Ninga momwe tawonera kale, munthu mpulumirayo ndiye moyo; ndipo mzimu ni mphanvu ya moyo yomwe imbacitisa kuti thupi licite bzinthu. Mzimuyo ukalekana na thupi, ungacite lini cinthu.

11. Tin’dziwa tani kuti nfiti zingasiye lini mathupi yawo, ndipo kodi imwepo munkukhulupira bzimwebzo?

¹¹ Palibe mzimu omwe ungasiye thupi kuti ucikacite cinthu cakuipa ayai cabwino. Tenepo, nfiti zimbasiya lini mathupi yawo. Nfitizo zimbacita lini bzinthu bzomwe zimbayesa kuti zimbacita.

12. Kodi Sathani ambacita tani kuti wanthu wayese kuti wadacita bzinthu bzomwe walibe kucita?

¹² Tsono tingayafokotoze tani mafala yakulewedwa na wale womwe wambacita ufiti? Sathani angacitise wanthu kukhulupira kuti wadacita bzinthu bzomwe iwo walibe kucita. Sathani angaphatise basa masomphenya kuti wanthu wayese kuti wankuwona, wankubva ayai wankucita cinthu comwe wankucicita lini. Mwa njira imweyi, Sathani ambafuna kupambusa wanthu pa kutumikira Yahova, waciyesa kuti Bibliya limbanama.

13. (a) Kodi kutsikitira nkwabwino? (b) Kodi Bibliya limbalewa ciani bza matsenga?

¹³ Gunkha lacitatu ndakuti kutsikitira nkwabwino. Tsono Bibliya limbasiyanisa lini kutsikitira na ufiti. Iro limbaletseratu bzensebzo. Onani bzakutonga bzomwe Yahova adapereka kwa wa Jirayeri, bzakulewa bza matsenga na womwe wambayacita:

•   “Lekani kucita bza matsenga.”—Mwambo 19:26.

•   “Mwamuna ayai mkazi omwe ambalewa-lewa na mizimu ayai penu ana mzimu wakumbalewa bzakutsogolo, bzin’funika aphedweretu.”—Mwambo 20:27.

•   “Pakati panu aleke kuwoneka munthu . . . wakucita matsenga, wakuwombeza, wanyanga, wakulodza wanzace, ali-wense wakubvunza kwa nyakulewa-lewa na mizimu.”—Bzakutonga 18:10-14.

14. Thangwe ranyi Yahova adacita bzakutonga bzakuletsa kucita bza matsenga?

 ¹⁴ Bzakutongabzi bzikhalatiziratu padeca kuti Mulungu ambafuna lini kuti wanthu wacite bza matsenga. Yahova adapereka bzakutonga bzimwebzi kwa wanthu wace, thangwe iye akhawafuna, ndipo akhafuna lini kuti iwo wakhale akapolo wa mantha na bzikhulupiro. Iye akhafuna lini kuti iwo ambapondereredwe na madimonyo.

15. Kodi Bibliya limbalatiza tani kuti Yahova ngwa mphanvu kwene-kwene kuposa Sathani?

¹⁵ Bibliya limbalewa lini cibodzi na cibodzi pa bzomwe madimonyo yangakwanise kucita ayai ne. Tsono iro limbalatiza kuti Yahova Mulungu ngwa mphanvu kwene-kwene kuposa Sathani na madimonyo yace. Yahova adathotha Sathani kudzulu. (Cibvumbulutso 12:9) Onanimbo kuti Sathani adacita kukumbira kuti amuyeze Djobi, ndipo iye adabvera pomwe Mulungu adamucenjeza kuti aleke kumupha.—Djobi 2:4-6.

16. Kodi bzin’funika tilinge yani kuti atikhotcerere?

¹⁶ Bukhu la Mimwani 18:10 limbati: “Dzina la Yahova ni nsanza yakulimba. Nyakulungama ambathamangira m’mwemo, acikhotcereredwa.” Tenepo, bzin’funika timbalinge Yahova kuti atikhotcerere. Atumiki wa Mulungu wambalinga lini bzithumwa ayai mankhwala kuti wabzikhotcerere ku bzakuipa bza Sathani na madimonyo yace. Ndipo wambagopa lini kuti nfiti zingawalodze. Atumiki wa Mulungu wambakhulupira mafala ya m’Bibliya yakuti: “Maso ya Yahova yankuyenda uku-na-uku pa dziko lense la pansi kuti alatize mphanvu zace kwa wale womwe mtima wawo ngwakusaya kugawanika.”—2 Mbiri 16:9.

17. (a) Kodi mafala ya pa Tiyago 4:7 ambatitsimikiza ciani? (b) Tsono bzin’funika ticite ciani?

¹⁷ Mukamutumikira Yahova, imwepo mungakhulupirembo bzimwebzi. Bukhu la Tiyago 4:7 limbati: “Bverani Mulungu; tsono mugazeni Dyabu, ndipo iye an’dzakuthawani.” Mukamutumikira Mulungu wacadidi, mucimubvera, imwepo mungakhulupire kuti iye an’dzakukhotcererani.