KUNJA kwa cingalawa cire, wanthu wakhacita bza m’moyo mwawo ninga nsiku zense. Iwo walibe kukhulupira kuti cingadabwera Cigumula ca madzi. Iwo wakhasekeratu kunyanya. Tsono nthawe ing’ono-ng’ono iwo wadaleka kuseka kule.

Mwadzidzi idayamba kugwa nvula. Ikhagwa kucokera kudzulu ninga momwe madzi yambataikira mu m’golo. Nowe akhadalewa cadidi! Tsono nthawe ikhadapita kuti munthu munango pomwe apite mu cingalawoco. Msuwo udacita kufungidwa bwino na Yahova.

Nthawe ing’ono-ng’ono pansi pense pakhadampsinkhidwa na madzi. Madziyo yadasanduka mikulo mikulu-mikulu. Yakhagwesa miti, kukunkhuliza minyala mikulu-mikulu na kucita ciwowo. Wanthu wale wakhabva mantha. Wadakwira mbuto zapadzulu kwene-kwene.  Wangadandotetekera Nowe ule, wacipita mu cingalawa cire pomwe msuwo ukhali bwanzu! Tsono nthawe ikhadamala.

Madzi yale yakhandoyenda yacithumizirika. Idabvumba nsiku 40, usiku na masikati. Madziyo yadakwira m’phepete mwa mapiri, ndipo mu nthawe ing’ono-ng’ono yadampsinkha mapiri mataliletu. Tenepo, ninga momwe Mulungu akhadalewera, wadafa wanthu wense na bzirombo, kunja kwa cingalawa cire. Tsono wense womwe wakhali mkati mule, wakhadasungidwa.

Nowe na wana wace wadacita bwino kukonza cingalawa cire. Madzi yale yadacitakula, cicimbayengama padzulu pa madzipo. Ndipo nsiku inango, pomwe nvula ire idaleka kubvumba, dzuwa lidayamba kugaka. Kukhana mawonekedwe yabwino kwene-kwene! Kwense-kwense yakhali madzi yokha-yokha. Ndipo cinthu cibodzi cokha comwe cikhawoneka, cikhali cingalawaco, cicimbayengama padzulu pa madzi.

 Bzinzonzomtali bzire bzikhadafa tsapano. Palibe omwe angadapweteka pomwe wanthu. Bzense bzikhadafa pabodzi na azimamawo na wanthu winango wakuipa. Tsono, n’ciani cidacitikira azibabawo wale?

Azibaba wa bzinzonzomtali bzire, akhali lini wanthu ninga ifepano. Iwo akhali wanjo wakubwera pansi pano kudzakhala ninga wanthu. Tenepo, pomwe Cigumula cire cidabwera, iwo walibe kufa pabodzi na wanthu anango wale. Iwo wadaleka kuphatisa basa mathupi ya umunthu yomwe wakhadakonza yale, waciyenda kudzulu ninga wanjo. Tsono iwo walibe kubvumizidwa pomwe kucita mbali ya banja la wanjo wa Mulungu. Tenepo, iwo wadakhala wanjo wa Sathani. Mu Bibliya, iwo wambacemeredwa madimonyo.

Mulungu adacitisa conzi, ndipo madzi ya cibvumbi cire yadayamba kuphwa. Yitapita minyezi mixanu, cingalawa cire cidatsakamira pa phiri. Zidapita nsiku zizinji, ndipo womwe wakhali m’cingalawa mule wadanyang’anisa kunja, wacimbawona ntsonga za mapiri. Madzi yale yadayenda yaciphwa.

Patsogolo pace Nowe adabulisa khungubwe mu cingalawa cire. Mbalameyo idambuluka icikazungazunga, icibwerera pomwe, pakuti idasaya mbuto yakukhala. Idacita bzimwebzo kazinji kense, icimbabwerera kudzapuma m’cingalawamo.

Tsono Nowe akhafuna kudziwa penu madzi yale yakhadaphwa, tenepo, adacosa nkhangaiwa mu cingalawa mule, aciitumiza. Tsono nkhangaiwayo idabwererambo pakuti idasaya mbuto yakukhala. Nowe adaitumiza pomwe kaciwiri, ndipo iyo idabwerera na katsamba ka muoliva pa mulomo pace. Tenepo Nowe adadziwa kuti madzi yale yakhadaphwa. Nowe adadzatumiza pomwe kacitatu nkhangaiwa ire, ndipo iyo iribe kudzabwerera thangwe idagumana mbuto yakuuma kuti ikhale.

Mulungu adadzalewa-lewa na Nowe. Iye adati: ‘Coka m’cingalawamo. Tenga banja lako lense na bzirombobzo.’ Iwo wakhadakhala mu cingalawa cire nthawe yakuposa gole libodzi. Tenepo, ifepano tingakwanise kukumbukira momwe wense wadakondwera pakukhala pomwe kunja kwa cingalawa cire, na moyo!