UN’DZIWA mbani mkazi omwe ali pa cinthunzi-thunziyu? Dzina lace ni Rebeka. Ndipo mwamuna omwe ankuyenda kukagumana nayeyu ni Izaki. Iye an’dzakhala mkazi wa Izaki. Kodi bzimwebzi bzidacitika tani?

Abalahamu, babace wa Izaki, akhafuna kunyang’anira mwana wace mkazi wabwino. Iye akhafuna lini kuti Izaki alowole akazi wa ku Kanani, thangwe wanthu wa ku Kananiko wakhanamata mirungu yakunama. Tenepo,  Abalahamu adacemera mtumiki wace, acimuuza kuti: ‘Ndin’funa ubwerere ku Haramu, komwe kuna wadzinza wangu, ucikatenga mkazi kuti adzakhale wa mwana wangu Izaki.’

Nthawe ibodzi-bodziyo mtumiki wa Abalahamu ule adatenga ngamira khumi, acimanga ulendo. Pomwe iye adafika pafupi na komwe wadzinza wa Abalahamu wakhakhala, iye adaima pa mcera. Kukhadadoka, ndipo ikhali nthawe yomwe akazi wa mu mzinda wakhabwera kudzatunga madzi pa mcerapo. Tenepo, mtumiki wa Abalahamu ule adapemba kwa Yahova, aciti: ‘Mkazi omwe atungire madzi inepano pabodzi na ngamirazi, umweyo akhale mkazi omwe imwe mwasankhula kuti akhale wa Izaki.’

Nthawe ing’ono-ng’ono adabwera Rebeka kudzatunga madzi. Pomwe mtumiki ule adamukumbira madzi, iye adamupasa. Patsogolo pace, iye adatunga madzi mazinji kuti ngamira za nyota zire zimwe. Likhali basa likulu pakuti ngamira zimbamwa madzi mazinji kwene-kwene.

Atamala Rebeka kucita bzimwebzo, mtumiki wa Abalahamu ule adamubvunza dzina la babace. Ndipo adamubvunzambo penu bzingadakwanisika kukagona ku mui kwawo. Mkaziyo adati: ‘Babangu dzina lawo ni Betuweri, ndipo mbuto iripo kuti mukagone nafe.’ Mtumiki wa Abalahamu ule adadziwa kuti Betuweri ni mwana wa m’bale wa Abalahamu, Naori. Tenepo iye adagodama, acitenda Yahova thangwe ra kumutsogolera kuyenda kwa wadzinza wa Abalahamu.

Usiku bumwebo, mtumiki wa Abalahamu ule adauza Betuweri na Labani, m’bale wa Rebeka bza thangwe lomwe akhadabwerera. Iwo wadabvuma kuti Rebeka ayende naye, acikalowodwa na Izaki. Kodi pomwe Rebeka adabvunzidwa penu akhafuna kuyenda, iye adati ciani? Adati: ‘Inde.’ Iye adafuna kuyenda. Tenepo mangwana yace iwo wadapakira ngamira zire, waciyamba ulendo mpaka ku Kanani.

Pomwe iwo wadafika, kukhadadoka kale. Rebeka adawona munthu ankufamba m’munda. Akhali Izaki. Iye adakomedwa kuwona Rebeka. Pakhadapita magole matatu yakufa kwa mai wace Sara, ndipo iye akhadasunama thangwe ra bzimwebzo. Tsono Izaki adamufuna kwene-kwene Rebeka, ndipo adadzakondwa pomwe.