ONA momwe mulumbwanayu adasunamira! Umweyu ni Zuze. Abale wace wamugulisa kwa wanthuwa womwe wankuyenda ku Edjipito. Kumweko Zuze an’kakhala kapolo. Kodi thangwe ranyi abale wacewo wadacita cinthu cakuipaci? Thangwe iwo wambacitira nsanje Zuzeyo.

Babawo Djakobi akhamufuna kwene-kwene Zuze. Iwo adamukomera mtima mwakumukonzera mkanjo wakudeka. Pomwe abale wacewo wadawona kuti Djakobi akhamufuna kwene-kwene Zuzeyo, iwo wadamucitira nsanje na kumbamuwenga. Tsono likhalipombo thangwe linango lakumuwengera.

Zuze adakhala na maloto mawiri. M’maloto mawiriyo, abale wa Zuzeyo wakhambamugodamira. Pomwe Zuze adawadziwisa malotoyo, iwo wadamuwengeratu kwene-kwene.

Tenepo nsiku inango, abale wa Zuze wakhasamalira mabira ya babawo ku thengo. Djakobi adakumbira Zuze kuti ayende kumweko, acikawona penu wakhali bwino. Pomwe abale wacewo wadamuwona ankubwera na patali, winango wadati: ‘Mbatimupheni!’ Tsono Rubeni, omwe akhali mkulu, adati: ‘Ne, lekani kucita bzimwebzo!’ M’mbuto mwa kumupha, iwo wadandomuphata, wacimuthusa mu mcera wakuuma. Patsogolo pace, wadakhala pansi kuti wakumbuke bzomwe wacite naye.

 Pa nthawe imweyoletu, wadabwerambo wanthu wa ku Ijimayeri. Ndipo Juda adati kuna abale wacewo: ‘Mbatimuguliseni kuna Wajimayeriwa.’ Ndipo ndibzo iwo wadacita. Wadagulisa Zuze na kobiri 20 za siliva. Bzimwebzo bzikhali bzakuipa na bzakupasa nsisi kwene-kwene!

Tsono pakufika ku mui, wangadalewa ciani kuna babawo? Iwo wadapha mbuzi, ndipo wadatenga mkanjo wakudeka wa Zuzeyo, waciunyika mu mulopa wa mbuziyo kazinji-kense. Ndipo wadayenda naye mkanjoyo kuna babawo Djakobi, waciti: ‘Tagumana ici. Ciwoneni bwino-bwino kuti mudziwe penu ni mkanjo wa Zuze.’

Djakobi adawona kuti ukhalidi wa Zuze. Adayamba kulira, aciti: ‘Cirombo ca m’thengo camupha Zuze.’ Bzimwebzo ndibzo bzomwe abale wa Zuze wakhafuna kuti babawoyo akumbuke. Djakobi adasunama kwene-kwene. Iye adamulira nsiku zizinjisa. Tsono Zuze akhalibe kufa. Mbatiwone bzomwe bzidamucitikira komwe wadayenda nayeko.