MBUTO ibodzi yomwe wanthu wadayenda citamala Cigumula ca Madzi cire, ikhacemeredwa Uri. Mbutoyo idadzakhala mzinda wakufunika na nyumba zabwino. Tsono wanthu wa m’mwemo wakhambanamata mirungu yakunama. Ndibzo bzomwe iwo wakhacitambo ku Babeli kule. Wanthu wa ku Uri na wa ku Babeli, wakhali lini ninga Nowe na mwanace Semu, womwe wadapitiriza kutumikira Yahova.

Pakumalizira, Nowe adadzafa wakukhulupirika, yatapita magole 350 yakucitika cigumula cire. Yatapitambo magole mawiri yokha, adadzabadwa munthuyu omwe unkumuwona pa cithunzi-thunzipa. Akhali munthu wakufunidwa kwene-kwene na Mulungu. Dzina lace akhali Abalahamu. Iye akhakhala mu mzinda wa Uri pabodzi na wadzinza wace.

Nsiku inango, Yahova adauza Abalahamu kuti: ‘Coka mu Uri, uciwasiya wadzinza wako, ndipo ndoko ku dziko linango lomwe ndin’dzakulatiza.’ Kodi Abalahamu adabvera Mulungu, acisiya moyo wense wa wofu-wofu wa ku Uri kule? Inde, adabvera. Pakuti Abalahamu akhabvera Mulungu nthawe zense, iye adadzadziwika ninga xamwali wa Mulungu.

Pomwe Abalahamu adacoka ku Uri, winango wa m’banja lace wadacoka naye pabodzi. Baba wace, Tera, na mzukulu wace Loti, wadayenda naye pabodzi. Ndipo Sara, mkazi wa Abalahamu, adayendambo. Na nthawe, iwo wadafika ku mbuto inango yakucemeredwa Haramu, ndipo kumweko Tera adafa. Iwo wakhali kutali kwene-kwene na Uri.

Patsogolo pace, Abalahamu na wadzinza wace, wadacoka ku Haramu, waciyenda ku dziko la Kanani. Kumweko Yahova adati: ‘Limweri ndiro dziko lomwe ndin’dzapasa wana wako.’ Abalahamu adakhala ku Kanani, acimbagona m’matendi.

Mulungu adayamba kumbathandiza Abalahamu, ndipo iye adakhala na mabira mazinji pabodzi na bzirombo bzinango na atumiki wazinji. Tsono iye na Sara wakhalibe wana wawo caiwo.

Pomwe Abalahamu akhana magole 99, Yahova adati: ‘Ndinkupicira kuti iwepo un’dzakhala baba wa madzinza mazinji ya wanthu.’ Tsono, kodi bzimwebzo bzingadacitika tani pakuti Abalahamu na Sara wakhadapitirira msinkhu wakubala wana?