MOZEJI adafamba mpaka kufika pa phiri la Horebe kuti agumane mauswa yakudyesera mabira yace. Pamwepo, iye adawona citsamba comwe napo cikhagaka moto, ico cikhapsa lini!

Mozeji adakumbuka: ‘Cimweci n’cinthu cakudabwisa. Ndinifendera pafupi kuti ndiwone bwino-bwino.’ Pakucita bzimwebzo, fala lakucokera pa citsambaco lidati: ‘Leka kufendera pafupi. Cosa xango zako, thangwe mbuto udapondayo njakucenesedwa.’ Ni Mulungu omwe akhalewa-lewa naye mwakuphatisa basa anjo. Tenepo Mozeji adampsinkha nkhope yace.

Mulungu adati: ‘Ndawona kubonera kwa wanthu wangu ku Edjipito. Tenepo, ndinkuyenda kukawatsudzula, ndipo ndin’tumiza iwepo kuti ukatsogolere wanthu wangu pakucoka mu Edjipito mule.’ Yahova akhafuna kucosa wanthu wace, aciwabweresa m’dziko lakudeka la Kanani.

Tsono Mozeji adati: ‘Ndine yanimbo ine. Ndingabzicite tani bzimwebzo? Tsono ndiciyenda, Wajirayeriwo wan’kandibvunza kuti: “Mbani wakutuma?” Ndin’kawatawira tani?’

Mulungu adatawira, aciti: ‘Kawauze tenepa: “YAHOVA, Mulungu wa  Abalahamu, Mulungu wa Izaki na Mulungu wa Djakobi ndiye wanditumiza kuna imwepo.” Ndipo Yahova adathumizira, aciti: ‘Limweri ndiro dzina langu mpaka kale-kale.’

Ndipo Mozeji adati: ‘Tsono tiyezeze kuti iwo walibe kukhulupira kuti ndimwe mwanditumiza.’

Mulungu adabvunza: ‘N’ciani ciri m’manja mwakoco?’

Mozeji adati: ‘Ni mpsimbo’

Mulungu adati: ‘Ithuse pansipo.’ Ndipo pomwe Mozeji adathusa mpsimboyo, iyo idasanduka cinyoka. Ndipo Yahova adalatiza pomwe Mozeji cakudabwisa cinango. Iye adati: ‘Pitisa boko lako mkati mwa cakubvala cakoco.’ Mozeji adacita, ndipo pomwe adacosa boko lacelo, iro likhawoneka ningati lina matenda yakucemeredwa mapere! Patsogolo pace, Yahova adapasa Mozeji mphanvu yakucita cakudabwisa cacitatu. Pakumalizira iye adati: ‘Ukacita bzakudabwisa bzimwebzi, Wajirayeriwo wan’kakhulupira kuti ndine omwe ndakutumiza.’

Atafika ku mui, Mozeji adauza Jetro kuti: ‘Ndisiyeni ndibwerere kuna wadzinza wangu ku Edjipito kuti ndikawone momwe waliri.’ Tenepo Jetro adagoneka Mozeji, ndipo Mozeji adayamba ulendo bwace mpaka ku Edjipito.