UMBALIDZIWA dzina la mwamuna wa mphanvu omwe adakhala kale pansi pano? Iye akhali muyeruzi, wakucemeredwa Samusoni. Yahova ndiye adapasa mphanvu Samusoniyo. Pomwe Samusoni akhanati kubadwa, Yahova adati kwa mai wace: ‘Tsapanopapa iwepo un’bala mwana mwamuna. Iye an’dzatsogolera pa kupulumusa Jirayeri kwa Wafilisiti.’

Wafilisitiwo wakhali wanthu wakuipa wakukhala ku Kanani. Iwo wakhana amuna wazinji wa nkhondo, ndipo wakhapwetekadi Wajirayeri. Nsiku ibodzi, pomwe Samusoni akhafamba mu njira, acimbayenda kwa Wafilisiti, adagumana na mphondolo. Tsono Samusoni adaipha mphondoloyo na manja yokha. Iye adaphambo Wafilisiti wazinjisa.

Patsogolo pace, Samusoni adafunisisa mkazi m’bodzi dzina lace Dalila. Atsogoleri wa ku Filisiti, m’bodzi na m’bodzi adapicira kupasa  Dalilayo kobiri 1.100 za siliva akawazimbulira bzomwe bzikhacitisa kuti Samusoni akhale na mphanvu. Dalila adazifuna kobirizo. Iye akhali lini xamwali wacadidi wa Samusoni ne wa wanthu wa Mulungu. Tenepo, iye akhandokhala acimubvunza Samusoni kuti amuuze n’ciani cikhamupasa mphanvu.

Pakumalizira, Dalila adakwanisa kuti Samusoni amuuze cinsinsi ca mphanvu zace. Iye adati: ‘Tsisi languli likanati kugwatidwa. Kutomera pomwe ndidabadwa, Mulungu adandisankhula kuti ndikhale mtumiki wace wakupambulika wakucemeredwa Nazireu. Tsisi languli licigwatidwa, inepano ndinimala mphanvu.’

Pomwe Dalila adadziwa bzimwebzo, iye adagonesa Samusoni pa minyendo pace. Ndipo iye adacemera mwamuna m’bodzi kuti adzagwate tsisi la Samusoni. Pomwe Samusoniyo adamuka, iye akhadamala mphanvu. Ndipo Wafilisiti wadabwera kudzamuphata. Iwo wadamubola maso yace, wacimusandusa kapolo.

Tsono nsiku inango Wafilisitiwo wadakhala na madyo makulu kuti wanamate mulungu wawo Dagoni. Ndipo iwo wadamucosa Samusoni m’kawoko kuti ambadzawasekese. Tsono nthawe imweyo, tsisi la Samusoni likhadakula kale. Samusoni adauza mulumbwana omwe akhamulondoza na manja, kuti: ‘Leka ndikhuye midjirikiro ya nyumbayi.’ Ndipo Samusoni adapemba kwa Yahova kuti amupase mphanvu, acimbagwinya midjirikiroyo. Iye adakuwa, aciti: ‘Mbafe Wafilisitiwa pabodzi na inepano.’ Ku madyoko kukhana Wafilisiti 3.000, ndipo pomwe Samusoni adagwinya midjirikiro ya nyumba ire, nyumbayo idagwa, wacifa wanthu wense wakuipa.