SAULI adayezera pomwe kuphata Davide. Iye adatenga wacikunda wace wa mphanvu wakukwana 3.000, wacikanyang’ana Davide. Davide atadziwa bzimwebzo, adatumiza azondi kuti akadziwe komwe Sauli na wanthu wacewo wangadamanga tsasa usikubo. Ndipo Davide adabvunza wanthu wace awiri kuti: ‘Mbani an’dzayenda nane ku tsasa la Sauli?’

Abisai adati: ‘Ine.’ Abisai akhali mwana wa Zeruya, mpfumakazi ya Davide. Pomwe Sauli na wanthu wace wakhagona tulo, Davide na Abisai wadapita m’tsasalo mwakazizizi. Iwo wadatenga dipa la Sauli na mkombo wace wa madzi, womwe ukhali ku mbali kwa msolo wa Sauli. Palibe omwe adawawona ne kuwabva, pakuti iwo wakhadagwedwa na tulo twa mphanvu.

Tsapano ona Davide na Abisai. Iwo wacoka, wacifika mwacisungiko pa phiripa. Davide ankukuwira mkulu wa anyankhondo wa Jirayeri kuti: ‘Abineri, thangwe ranyi ulibe kukhotcerera mambo, mbuya wako? Ona! Liri kuponi dipa na mkombo wace wa madzi?’

Sauli ankumuka. Iye ankuzindikira fala la Davide, acibvunza kuti: ‘Ndiwe Davide?’ Unkuwawona Sauli na Abineri pa phomphopa?

 Davide akutawira Sauli, aciti: ‘Inde mambo, mbuya wangu.’ Ndipo Davide ankubvunza kuti: ‘Thangwe ranyi munkulinga kundiphata? Ndacita cakuipa canyi inepano? Dipa lanu iri, Mambo. Mbabwere munthu m’bodzi, adzalitenge.’

Sauli ankubvuma, aciti: ‘Ndaphonya inepano. Ndacita bzinthu mwa upsiru. Pamwepo Davide ankuyenda njira yace, ndipo Sauli ankubwerera ku mui. Tsono Davide ankuti mu mtima mwace: ‘Nsiku ibodzi, Sauli an’dzandipha basi. Ndinithawira ku dziko la Wafilisiti.’ Ndipo ndibzo iye ankucita. Davide adakwanisa kunyengeza Wafilisitiwo, aciwacitisa kukhulupira kuti iye akhali ku mbali yawo.

Patsogolo pace, Wafilisiti wadayenda kamenya nkhondo na Jirayeri. Pa nkhondoyo, Sauli na Jonatani wadaphedwa. Bzimwebzo bzidasunamisa kwene-kwene Davide, ndipo iye adanemba nyimbo yakudekeza, yomwe akhaimba kuti: ‘Ndasunama nawe, m’bale wangu Jonatani. Ndikhakufuna kwene-kwene inepano!’

Bzitamala bzimwebzo, Davide adabwerera ku Jirayeri, ku mzinda wa Hebroni. Pakhana nkhondo pakati pa wanthu womwe wadasankhula Ifibozete, mwana wa Sauli kuti akhale mambo, na wanthu wakufuna kuti Davide akhale mambo. Tsono pakumalizira wanthu wa Davide wadakunda. Davide akhana magole 30 yakubadwa pomwe adaikhidwa mambo. Iye adatonga ku Hebroni magole manomwe na pakati. Wana wace winango wakubadwa, wadacemeredwa Amoni, Abisalomu na Adoniya.

Idafika nthawe pomwe Davide na wanthu wace wadakakunda mzinda wakudeka wa Jeruzalemu. Jowabe, mwana munango wa Zeruya, mpfumakazi ya Davide, ndiye adatsogolera nkhondoyo. Tenepo Davide adabaira Jowabe mwa kumuikha mkulu wa nyankhondo wace. Tsapano Davide ankuyamba kutonga mzinda wa Jeruzalemu.