ATAFA Mambo Jerobuwamu, mambo ali-wense womwe akhatonga mu umambo wa madzinza 10 ya Jirayeri, akhali wakuipa. Mambo Akabe ndiye akhali wakuipiratu pa wense. Un’dziwa thangwe ranyi? Thangwe libodzi likulu, likhali mkazi wace wakuipa, Jazabeli.

Jazabeli akhali lini Mjirayeri. Iye akhali mwana wa Mambo wa ku Sidoni. Akhambanamata mulungu wapezi, Baala, ndipo adacitisa kuti Akabe na Wajirayeri wazinji wanamatembo Baalayo. Jazabeli akhawenga Yahova, ndipo adapha wapolofeta wace wazinji. Winango wadacita kubisidwa kuti waleke kuphedwa. Jazabeli akafuna cinthu, iye akhaperatu munthuyo kuti acitenge cinthuco.

Nsiku inango Mambo Akabe akhadasunama. Tenepo, Jazabeli adamubvunza kuti: ‘Thangwe ranyi mudasunama lero?’

Akabe adatawira aciti: ‘Thangwe ra bzomwe Nabote walewa. Ine ndafuna kugula munda wace wa mpesa. Tsono iye alamba kundigulisira.’

Jazabeli adati: ‘Leka kucita thupo. Ndin’dzakukwanisira inepano.’

Tenepo Jazabeliyo adanembera matsamba akulu-akulu wa mu mzinda omwe Nabote akhakhala. Iye adati kwa iwo: ‘Tengani amuna wakuipa, wacilewa kuti Nabote watukwana Mulungu na mambo. Ndipo muphateni Nabote muciyenda naye kunja kwa mzinda, mucikamuboma na minyala, mpaka afe.’

Pomwe Jazabeli adandobva kuti Nabote akhadaphedwa, iye adati kwa Akabe: ‘Katengeni munda wa mpesa ule.’ Kodi un’tawirambo lini kuti Jazabeliyo akhafunika kupasidwa nyathwa thangwe ra cakuipaci?

Tenepo, na nthawe, Yahova adatumiza mwamuna m’bodzi, Jehu, kuti akamupase nyathwayo. Jazabeli atabva kuti Jehu akhabwera, iye adakonza-konza maso yace kuti awoneke wakudeka. Tsono Jehu atafika, aciwona Jazabeliyo pa janera, iye adakuwira amuna wakhanaye m’nyumbamo kuti: ‘Muthuseni pansi!’ Amunawo wadabvera, ninga momwe unkuwonera pa cithunzi-thunzici. Iwo wadamuthusa, aciferatu. Jazabeli, mkazi wakuipa wa mambo ule, adamalira pamwepo.