ONA Jezu ankulalewa na amuna akulu-akuluwa. Iwo ni apfunzisi wa mu tempwlo, ku Jeruzalemu. Ndipo mulumbwanayu ni Jezu. Iye wakula pang’ono. Tsapano ana magole 12 yakubadwa.

Apfunzisiwa wankudabwa kwene-kwene kuti Jezu ambadziwa bzizinji bza Mulungu na bzomwe bzindanembedwa m’Bibliya. Tsono thangwe ranyi Zuze na Mariya wali lini pamwepambo? Wali kuponi iwo? Mbatidziwe.

Gole liri-lense, Zuze akhabweresa banja lace ku Jeruzalemu pa cikondweso cakupambulika cakucemeredwa Paskwa. Ukhali ulendo butali kucokera ku Nazaleti mpaka ku Jeruzalemu. Palibe omwe akhana kandere-ndere, ne sitima ya pansi. M’nsiku zimwezo, bzinthu bzimwebzi kukhalibe. Wanthu wazinji wakhafamba na minyendo, wacitenga nsiku zitatu kuti wafike ku Jeruzalemu.

Tsapano banja la Zuze likhadakula. Wakhalipo azibale wa Jezu wacimuna na wacikazi kuti ambawayang’anire. Gole limwero, Zuze na Mariya wadafamba na wana wawo ulendo bwensebo, kubwerera ku Nazaleti. Iwo wakhakumbuka kuti Jezu akhali pabodzi na winangowo pa ulendopo. Tsono, pomwe wadaima pakumala kwa nsiku, iwo wadamusaya Jezu. Wadamunyang’ana pakati pa wadzinza na axamwali, tsono walibe nakundomugumanako! Tenepo, iwo wadabwerera ku Jeruzalemu, kuti wakamunyang’ane.

Pakumalizira iwo wadamugumana Jezu na Apfunzisiwa. Iye akhambawatetekera, acimbawapasambo mibvunzo. Ndipo wensewo wakhadabwa na nzeru za Jezu. Tsono Mariya adati: ‘Mwanangu, thangwe ranyi waticitira bzimwebzi? Babako na inepano tikhana thupo kwene-kwene pakufuna kukugumana.’

Jezu adatawira, aciti: ‘Thangwe ranyi mukhandinyang’ana? Mun’dziwa lini kuti bzin’funika ndikhale m’nyumba mwa Babangu?’

Inde, Jezu akhafuna kukhala komwe angadambapfunza bza Mulungu. Si momwe ifepano tin’funikambo kumbabvera? Ku Nazaleti, Jezu akhambayenda kukanamata, mdzinga uli-wense. Pakuti iye akhambakhala na tceru nthawe zense, tenepo akhambapfunza bzinthu bzizinji bza m’Bibliya. Mbatikhalembo ninga Jezu, ticimbamutewezera.