MBALI 5
Mbani Adabvera Mulungu mu Nsiku za Nowe?
Mu nsiku za Nowe wanthu azinji akhacita bzinthu bzakuipa. Ciyambo 6:5
Adamu na Eva adadzabereka wana, ndipo dziko la pansi lidadzala na wanthu. Na nthawe, wanjo winango adaphatana na Sathani, acibwera pansi pano.
Wanjowo adabvala mathupi yaumunthu, acilowola akazi. Ndipo akaziwo adabereka bziwana bzamphanvu bzomwe bzikhacita ciwembo.
Dziko likhadadzala na wanthu omwe akhacita bzakuipa. Bibliya limbalewa kuti ‘kuipa kukhadawanda pa dziko la pansi, ndipo makumbukidwe yense ya mitima ya wanthu yakhali yakuipa yokha-yokha nthawe zensene.’
Nowe adabvera Mulungu ndipo adamanga cingalawa. Ciyambo 6:13, 14, 18, 19, 22
Tsono Nowe akhali munthu wabwino. Yahova adauza Nowe kuti akhabweresa cigumula ca madzi kuti cidzapfudze wanthu wakuipa wale.
Ndipo Mulungu adauzambo Nowe kuti akonze cingalawa cikulu, acipitisa m’mwemo banja lace pabodzi na bzirombo bzakusiyana-siyana.
Nowe adacenjeza wanthuwo bza kubwera kwa cigumulaco, tsono iwo alibe kumutetekera. Winango akhamuseka, ndipo winango akhamuwenga.
Pomwe cidamala kukonzedwa cingalawa cire, Nowe adapitisa mkati bzirombo bzire.
