1, 2. Kodi ni mphaso iponi yakupambulika yomwe Yahova adatipasa?

YAHOVA adatipasa mphaso yakufunika kwene-kwene, yomwe ni moyo. (Ciyambo 1:27) Iye ambafuna kuti wanthufe tikhale na moyo wabwino. Tenepo, iye adatipasa mitemo yomwe imbatipfunzisa momwe tingacitire bzakusankhula bzabwino. Timbaphatisa basa mitemo imweyi kuti itithandize ‘kusiyanisa cabwino na cakuipa.’ (Wahebereu 5:14) Tikacita bzimwebzi, timbakhala tinkubvuma kupfunzisidwa na Yahova kuti timbakumbuke bwino. Tikambakhala na moyo mwakubverana na mitemo ya Mulungu na kuwona momwe iyo ingacinjire moyo wathu, timbadzabvesesa momwe mitemoyo iliri yakufunika kwene-kwene.

² Nthawe zinango moyo ungakhale wakunesa kwene-kwene. Tingagumane na bvuto lomwe m’Bibliya mulibe lamulo lakuleweratu bzomwe tingacite na bvutolo. Mwa ciratizo, tingafunike kucita cakusankhula pa nkhani za mankhwala pabodzi na njira za ulapi zomwe zimbafunikira kuphatisa basa mulopa. Kodi tingacite tani bzakusankhula bzomwe bzimbakondwesa Yahova? M’Bibliya mumbagumanika mitemo yomwe imbatipfunzisa momwe Yahova ambawonera moyo na mulopa. Tikabvesesa mitemoyi, tin’dzakwanisa kucita bzakusankhula bzanzeru ndipo tin’dzakhala na cikumbu-mtima cakucena.  (Mimwani 2:6-11) Tsapano, mbatiwoneni inango ya mitemoyo.

3, 4. (a)  Kodi timbadziwa tani kuti Yahova ambawona kuti mulopa ngwakupambulika? (b) Kodi mulopa umbayimira ciyani?

³ Bibliya limbatipfunzisa kuti mulopa ngwakupambulika thangwe umbayimira moyo. Ndipo moyo ngwakupambulika kwa Yahova. Tinkulewa tenepo thangwe pomwe Kaini adapha m’bale wace, Yahova adamuuza kuti: ‘Mulopa wa m’bale wako ukundilirira kucokera pantsipo.’ (Ciyambo 4:10) Mulopa wa Abeli ukhayimira moyo wace, tenepo pomwe Yahova adalewa bza mulopa wa Abeli, akhathandauza moyo wa Abeliyo.

⁴ Pambuyo pa cigumula ca madzi ca mu nthawe ya Nowa, Mulungu adauza wanthu kuti angambadye nyama. Tsono iye adawauza kuti: ‘Lekani kudya nyama pabodzi na mulopa wace, omwe ni moyo wace.’ (Ciyambo 9:4) Cakutonga cimweci cikhaphata basa kwa mbadwo zentse za Nowa, kuphatanidzambo ifepano. Na bzimwebzi, bzinkuwonekeratu kuti kwa Yahova, mulopa umbayimira moyo. Ndipo ifepano tin’funika kumbawonambo mulopa ninga momwe iye ambauwonera.—Psalymo 36:9.

5, 6. Kodi Cakutonga ca Mozeji cikhalatiza tani momwe Yahova ambawonera moyo na mulopa?

⁵ Mu Cakutonga comwe adapasa Mozeji, Mulungu adalewa kuti: ‘Penu munthu ali-wentse . . . anidya mulopa uli-wentse, ndin’dzaikha nkhope yangu pa iye, ndipo ndin’dzapfudza munthu umweyo pakati pa wanthu wa mtundu wace. Thangwe moyo wa cirombo uli m’mulopa.’—Mwambo 17:10, 11.

⁶ Cakutonga ca Mozeji cikhalewa kuti munthu akapha cifuwo kuti adye, iye akhafunika kucosa mulopa wace aciufucira pantsi. Kucita bzimwebzi,  kukhalatiza kuti moyo wa ciromboco ukhabwezeredwa kwa Mulengi wace, omwe ni Yahova. (Bzakutonga 12:16; Zakiyeri 18:4) Tsono sikuti Yahova akhadikhira kuti Ajirayeriwo acite kucoseratu mulopa wentse wa ciromboco. Koma iwo akhafunika kucosa mulopayo ninga momwe angadakwanisiramo, bzomwe bzingadawacitisa kudya nyamayo na cikumbu-mtima cakucena. Mwa kulemekeza mulopa wa bzirombobzo, iwo akhalatiza kuti akhalemekeza Mpasi wa moyo, omwe ni Yahova. Ndipo Cakutonga cikhauzambo Ajirayeri kuti ambapereke bzifuwo ninga ntsembe yakupsinkhira pikado.—Onani Mafala Yakuthumizira 19 na 20.

7. Kodi Davide adalatiza tani kuti akhalemekeza mulopa?

⁷ Tingawone momwe mulopa uliri wakufunika kucokera pa cinthu comwe Davide adacita pomwe iye akhamenya nkhondo na Afiristi. Acikunda wa Davide adawona kuti Davideyo akhana nyota, tenepo iwo adayikha moyo wawo pangozi mwa kuyenda kukamutungira madzi kumbuto komwe kukhali kwa anyamadulanthaka wawo. Tsono pomwe adamupasa madziyo, Davideyo adalamba kumwa ndipo ‘adayapereka kwa Yahova.’ Davideyo adati: ‘Ndingacite lini bzimwebzo, imwe Yahova! Ndingamwe inepano mulopa wa amunawa omwe aikha moyo wawo pa ngozi kuti akwanise kutunga madziya?’ Davide adabvesesa momwe moyo na mulopa bzikhaliri bzakufunika kwa Mulungu.—2 Samuweri 23:15-17.

8, 9. Kodi Akristau wa ntsiku zino ambawona tani mulopa?

⁸ Mu nthawe ya Akristau wakuyambirira, wanthu wa Mulungu akhafunika lini pomwe kupereka ntsembe za nyama. Tsono iwo akhafunika basi kumbawona mulopa kuti ngwakupambulika. Pakhana bzakutonga bzinango bzomwe Yahova akhafuna kuti Akristau ambabvere, ndipo cibodzi mwa bzakutongabzo cikhali cakuti apitirize ‘kutcenkha . . . Mulopa.’ Kutcenkha mulopa kukhali kwakufunika kwene-kwene ninga momwe tingatcenkhere unzazi na kunamata bzifanikiso.—Mabasa 15:28, 29.

 ⁹ Mpsibodzi-bodzimbo ntsiku zino. Ninga Akristau, timbadziwa kuti Yahova ni ntsantsa ya moyo ndipo bzinthu bzentse bza moyo mpsace. Ndipo timbazindikirambo kuti mulopa ngwakupambulika ndipo umbayimira moyo. Tenepo, tin’funika kumbakumbukira mitemo ya m’Bibliya pakucita cakusankhula ciri-centse pa nkhani za mankhwala pabodzi na njira za ulapi zomwe zimbafunikira kuphatisa basa mulopa.

10, 11. (a) Kodi Mboni za Yahova zimbayiwona tani nkhani ya kuikhidwa mulopa ayai bzigawo bzinai bzikulu-bzikulu bza mulopayo? (b) Kodi ni pa nkhani ziponi zomwe Mkristau ali-wentse an’funika kucita yekha cakusankhula?

¹⁰ Mboni za Yahova zimbadziwa kuti ‘kutcenkha . . . mulopa’ kumbaphatanidza bzizinji sikuti kundolamba kudya na kumwa mulopayo. Kumbathandauza kulamba kuikhidwa mulopayo, kulamba kuucosa kuti ukoyedwe ayai kuti uikhidwe m’thupi mwa wanthu winango. Ndipo bzimbathandauzambo kusaya kubvuma kuikhidwa bzigawo bzinai bza mulopa, bzomwe ni maselula mafuira, maselula macena, maselula yakukhotesa mulopa pabodzi na madzi ya m’mulopa.

¹¹ Bzigawo bzinayi bza mulopabzi bzingagawidwembo m’tumagawo tung’ono-tung’ono tomwe tungaphatisidwe basa mu njira zakusiyana-siyana. Mkristau ali-wentse an’funika kusankhula yekha penu angalapidwe mwakuphatisa basa tubzigawo tumwetu ayai ne. Ndipo Mkristau ali-wentse an’funikambo kusankhula yekha penu angabvume njira za ulapi zomwe zingafunike kuphatisa basa mulopa wace caiwo. Ndipo munthu ali-wentse an’funika kusankhula yekha momwe mulopa wace ungaphatisidwire basa, pakucitidwa operasau, pakuyezedwa m’thupi, ayai pakulapidwa matenda.—Onani Mafala Yakuthumizira 21.

12. (a) Thangwe ranyi bzakusankhula bzathu bzomwe timbacita bzomwe mpsakubverana na cikumbu-mtima cathu, Yahova ambawona kuti mpsakufunika? (b) Kodi tingacite tani bzakusankhula bzanzeru pa nkhani ya mtundu wa ulapi?

¹² Pa bzakusankhula bzathu bzomwe timbacita bzomwe mpsakubverana na cikumbu-mtima cathu, kodi Yahova ambawona kuti mpsakufunika? Inde ambawona kuti mpsakufunika. Bziri tenepo thangwe Yahova  ambawona kuti bzakukumbuka bzathu mpsakufunika kwene-kwene. (Werengani Mimwani 17:3; 24:12.) Tenepo, pomwe tin’funa kucita cakusankhula cakubverana na mtundu wa ulapi, tin’funika kupemba kwa Yahova kuti atitsogolere, patsogolo pace tingayambe kufufudza kuti tidziwe bzinthu bzizinji bza mtundu wa thandizolo. Tikacita bzimwebzi, tin’dzaphatisa basa cikumbu-mtima cathu cakupfunzisidwa na Bibliya kuti ticite cakusankhula. Tin’funika lini kubvunza winango bzomwe iwo angadacita bzingadakhala kuti bvutolo ndawo, ndipo wanthu winango an’funika lini kupitira cakusankhula cathu. Mkristau ‘ali-wentse an’dzanyamula mtolo wace.’—Wagalata 6:5; Waroma 14:12.

13. Kodi timbapfunza ciyani bza Yahova kucokera pa bzakutonga na mitemo yace pa nkhani ya mulopa?

¹³ Bzinthu bziri-bzentse bzomwe Yahova ambatikumbira kuti ticite, bzimbakhala bza ubwino bwathu ndipo bzimbalatiza kuti iye ambatifuna. (Psalymo 19:7-11) Tsono tin’funika lini kumbamubvera kokha thangwe rakuti bzakutonga bzace bzimbabweresa phindu kwa ifepano. Timbabvera Yahova thangwe timbamufuna. Ndipo lufoyi lathu kwa Yahova limbaticitisa kuti timbatcenkhe kuyikhidwa mulopa. (Mabasa 15:20) Ndipo kucita bzimwebzi kumbakhotcerera thanzi lathu. Wanthu azinji ntsiku zino ambadziwa ngozi yakuyikhidwa mulopa, ndipo madotolo mazinji yambadziwa kuti kucita operasau mwakusaya kuphatisa basa mulopa, n’kwabwino kwa anyakuduwala. Na bzimwebzi, bzinkuwonekeratu kuti bzakutonga bza Yahova mpsakuthandiza ndipo bzimbalatiza kuti iye ambatifuna.—Werengani Zaiya 55:9; Juwau 14:21, 23.

14, 15. (a) Kodi ni bzakutonga bziponi bzomwe Yahova adapasa wanthu wace kuti bziwakhotcerere? (b) Kodi timbalatiza tani kuti timbalemekeza moyo?

¹⁴ Bzakutonga bza Mulungu nthawe zentse bzimbakhala bzakuthandiza kwa wanthu wace. Mwa ciratizo,  Yahova adapasa Ajirayeri cakutonga comwe cikhawakhotcerera ku ngozi. Cakutonga cibodzi cikhalewa kuti munthu ali-wentse akhafunika kumanga mpanda padzaulu pa ntsodzi ya nyumba yace, kucitira kuti munthu aleke kugwa kucokera pa ntsodzipo. (Bzakutonga 22:8) Cakutonga cinango cikhalewa bza bzifuwo. Penu munthu akhana mkono wace ukali, mweneciro wa mkonoyo akhafunika kuusamalira kuti uleke kusuntha ayai kupha munthu. (Kufuluka 21:28, 29) Mjirayeri ali-wentse omwe akhabvera lini bzakutongabzi, akhakhala na mulandu wa mulopa, mkono waceyo ukapha munthu.

¹⁵ Bzakutonga bzimwebzi bzinkulatiza kuti moyo ngwakufunika kwene-kwene kwa Yahova. Kodi tinkupfunza ciyani na bzimwebzi? Ifepano tin’funika kumbalemekezambo moyo. Timbalatiza kuti timbalemekeza moyo na momwe timbasamalirira pa muyi pathu, kandere-ndere wathu, momwe timbafambisira kandere-ndereyo na momwe timbasankhulira masenzeka yathu. Wanthu winango, maka-maka maswaka, ambakumbuka kuti palibe cinthu cakuipa comwe cingawacitikire, tenepo ambacita bzinthu bzomwe bzimbayikha moyo wawo pa ngozi. Tsono Yahova ambafuna lini kuti timbacite bzinthu bzimwebzi. Iye ambafuna kuti timbawone moyo wathu pabodzi na moyo wa wanthu winango kuti ngwakufunika.—Mpalizi 11:9, 10.

16. Kodi Yahova ambakuwona tani kucosa mimba?

¹⁶ Moyo wa munthu ali-wentse ngwakufunika kwa Yahova. Napo moyo wa mwana omwe ali m’mimba ngwakufunika kwa iye. Mwakubverana na Cakutonga ca Mozeji, munthu akapweteka mkazi wapathupi mwangozi, mpaka mkaziyo ayai mwanayo kufika pakufa, munthuyo akhamangidwa mulandu wakupha munthu. Bzimwebzi bzinkuthandauza kuti, napo cikhali lini cakulinga cace kuti aphe munthuyo, nyakuphonyayo akhafunikira kuphedwa pakulipira moyo omwe wafayo. (Werengani Kufuluka 21:22, 23.) Bzimwebzi bzinkulatiza kuti kwa Mulungu,  napo mwana ali-wentse omwe akanati kubadwa iyembo ni munthu. Kodi munkukumbuka kuti Mulunguyo ambabva tani wanthu akacosa mimba? Kodi munkumbuka kuti iye ambabva tani akambawona bzulu na bzulu bza wana omwe akanati kubadwa ankuphedwa gole liri-lentse thangwe ra kucosa mimba?

17. Kodi n’ciyani comwe cingatsangalaze munthu omwe adacosa mimba pomwe akhanati kupfunza bza Yahova?

¹⁷ Tsono tani penu mkazi adacosa mimba pomwe akhanati kupfunza momwe Yahova ambayiwonera nkhaniyi? Munthu omwe adacita pikado imweyi pomwe akhanati kupfunza bza Yahova, koma tsapano adakungula mwakucokera pantsi pa mtima, an’funika lini pomwe kubzipasa mulandu. Munthuyo angakhale na citsimikizo centse cakuti Yahova adamulekerera mwakuphatisa basa ntsembe ya Jezu. (Luka 5:32; Wayefezo 1:7) Bibliya limbati: ‘Yahova ngwantsisi . . . Ninga ku mabvadzuwa kuli kutali na ku madokero, tenepombo Iye ambafundusa bzakuphonya bzathu kutali na ife.’—Psalymo 103:8-14.

18. Thangwe ranyi tin’funika kucita bzense bzomwe tingakwanise kuti ticose ciwengo mu mtima mwathu?

¹⁸ Kulemekeza moyo kumbayambira mu mtima. Ndipo kumbaphatanidza momwe timbawonera anzathu. Mpostolo Juwau adanemba kuti: ‘Ali-wentse omwe ambawenga m’bale wace, ngwakupha munthu.’ (1 Juwau 3:15) Nthawe zinango mtima waciwengo umbayamba pang’ono na pang’ono. Ciwengo cingacitise munthu kusaya kulemekeza winango, kuwanamizira bzinthu bzakuipa, ayai kukhumba kuti munthuyo afe. Penu mu mtima mwathu timbawenga munthu munango, Yahova ambawona bzimwebzo. (Mwambo 19:16; Bzakutonga 19:18-21; Mateu 5:22) Tenepo, tikawona kuti pana munthu munango omwe timbamuwenga, tin’funika kucita nyongo yakuti ticose ciwengoco mu mtima mwathu.—Tiyago 1:14, 15; 4:1-3.

19. Kodi ni njira inango iponi yomwe tingalatizire kuti timbalemekeza moyo?

¹⁹ Pana njira inango yomwe tingalatizire kuti timbalemekeza  moyo. Pa Psalymo 11:5, timbapfunza kuti Yahova ‘ambawenga kwene-kwene ali-wentse omwe ambafuna ciwembo.’ Penu tingasankhule masenzeka ya ciwembo, tin’dzakhala tinkulatiza kuti timbafuna ciwembo. Penu timbawenga ciwembo, tin’dzabvuma lini kuti mafala, nzeru na bzithunzi-thunzi bza ciwemboco bzikhazikike m’makumbukidwe mwathu. M’mbuto mwace, tin’funa kudzaza makumbukidwe yathu na bzinthu bzakucena pabodzi na makumbukidwe ya mtendere.—Werengani Wafiripo 4:8, 9.

20-22. (a) Kodi Yahova ambaliwona tani dziko la Sathaniri? (b) Kodi atumiki wa Yahova ambalatiza tani kuti ‘ambacita lini mbali ya dziko’?

²⁰ Dziko la Sathaniri limbalemekeza lini moyo. Tenepo Yahova ambawona kuti dzikoli lina mulandu wa mulopa ayai wakupha wanthu. Kwa magole mazinji, maboma yacitisa kuti bzulu na bzulu bza wanthu aphedwe kuphatanidzambo Mboni za Yahova zizinji. Bibliya limbandendemeza maboma yamweya na bzirombo bza ukali. (Danyeri 8:3, 4, 20-22; Cibvumbulutso 13:1, 2, 7, 8) Ntsiku zino malonda yakugulisa nfuti, ni malonda yomwe yambabweresa kobiri kwene-kwene. Wanthu ambadala thangwe ra kumbagulisa bzinthu bzakuphera wanthu. Kulewa cadidi, ‘dziko lense liri m’manja mwa nyakuipayo.’—1 Juwau 5:19.

²¹ Tsono Akristau wacadidi ‘ambacita lini mbali ya dziko.’ Atumiki wa Yahova ambapitira lini nkhani za ndale ndipo ambayenda lini kukhondo. Pakuti iwo ambapha lini wanthu, tenepo ambathandizira lini kathimu kali-kentse komwe kambapha wanthu. (Juwau 15:19; 17:16) Akristau akakhala kuti ankuzunzidwa, iwo ambabwezera lini na cakuipa. Jezu adatipfunzisa kuti timbafune napo anyamadulanthaka wathu.—Mateu 5:44; Waroma 12:17-21.

 ²² Bzipembedzo bzacitisambo kuti wanthu bzulu na bzulu aphedwe. Ndipo pakulewa bza Babulo Mkulu omwe ni boma la pa dziko lentse la pantsi la bzipembedzo bzakunama, Bibliya limbati: ‘Mwa iye mwagumanika mulopa wa apolofeta, wa wanthu wakucena na wa wentse omwe adaphedwa pa dziko la pantsi.’ Ndipopa Yahova ambatiuza kuti: ‘Cokani m’mwemo wanthu wangu.’ Wanthu omwe ambanamata Yahova, ambacita lini mbali ya cipembedzo cakunama.—Cibvumbulutso 17:6; 18:2, 4, 24.

23. Kodi kucoka mu Babulo Mkulu kumbaphatanidza ciyani?

²³ Kucoka mu Babulo Mkulu kumbaphatanidza kucita bzinthu bzakulatiza kuti wasiya kukhala mu cipembedzo cakunama. Mwa ciratizo, an’funika kutsimikizira kuti akapfudzisa dzina lace kucipembedzoko. An’funikambo kuipidwa na bzinthu bzakuipa bzomwe cipembedzo cakunama cimbacita. Bzipembedzo bzakunama bzimbabvumiza na kulimbisa wanthu wawo kupitira bza ndale, kucita bza unzazi na kukhala wanthu wadyera. (Werengani Psalymo 97:10; Cibvumbulutso 18:7, 9, 11-17) Na kupita kwa nthawe, ninga bzakutewera bzace, wanthu bzulu na bzulu aluza moyo.

24, 25. Kodi kudziwa Yahova kumbatibweresera tani mtendere na cikumbu-mtima cabwino?

²⁴ Pomwe tikhanati kudziwa Yahova, mu njira iri-yentse tentsenefe tikhathandizira bzinthu bzakuipa bzomwe dziko la Sathaniri limbacita. Koma ifepano tidacinja. Tidabvuma cakulombolera ndipo tidabzipereka kwa Mulungu. Tenepo timbabzibva kuti tidapita mu ‘nyengo za mdjedjereso zakucokera kwa Yahova.’ Ifepano tina mtendere na cikumbu-mtima cabwino, thangwe timbadziwa kuti tinkukondwesa Yahova.—Mabasa 3:19; Zaiya 1:18.

 ²⁵ Napo penu m’mbuyomu tikhacita mbali ya thimu la wanthu omwe akhalemekeza lini moyo, Yahova angatilekerere mwakuphatisa basa cakulombolera. Kulewa cadidi, ifepano timbalemekeza mphaso ya Mulungu ya moyo. Timbalatiza kuti timbatenda, mwakucita bzentse bzomwe tingakwanise, kuti tithandize wanthu winango kupfunza bza Yahova, kuti acoke mu dziko la Sathaniri, acikondwa pakukhala pa uxamwali na Mulungu.—2 Wakolinto 6:1, 2.

26-28. (a) Kodi ni basa liponi lakupambulika lomwe Yahova adapasa Zakiyeri? (b) Kodi ni basa liponi lomwe Yahova ankutiuza kuti ticite ntsiku zino?

²⁶ Mu nthawe ya Ajirayeri, Yahova adauza mpolofeta Zakiyeri kuti akacenjeze wanthu wa ku Jeruzalemu kuti mzindayo ungadapfudzidwa mwakusaya kucedwa. Ndipo adamuuza pomwe kuti akapfunzise wanthuwo bzomwe akhafunikira kucita kuti apulumuke. Zakiyeri angadasaya kuyenda kukacenjeza wanthuwo, Yahova angadamumanga mulandu wa mulopa. (Zakiyeri 33:7-9) Tsono Zakiyeri adalatiza kuti akhawona moyo kukhala wakufunika kwene-kwene, ndipo adacita bzentse bzomwe adakwanisa kuti auze wanthuwo bzipsa bzabwinobzo.

²⁷ Yahova adatipasambo basa lakuti ticenjeze wanthu kuti dziko la Sathaniri lin’pfudzidwa mwakusaya kucedwa, na kuti tiwathandize kupfunza bza Yahovayo, kuti adzakhale na moyo mu dziko lipsa. (Zaiya 61:2; Mateu 24:14) Tin’funa kucita bzentse bzomwe tingakwanise kuti tiuzembo winango bzipsa bzabwinobzi. Tinkudikhirira kudzalewa ninga momwe mpostolo Paulo adalewera kuti: ‘Ine ndine wakucena pa mulandu wa mulopa wa wanthu wentse, pakuti ndiribe kukubisirani cinthu na cibodzico, koma ndidakuuzani malango yentse ya Mulungu.’—Mabasa 20:26, 27.

²⁸ Mu msolo wakutewera, tin’dzacezerana bzinthu bzinango bzomwe tingacite kuti tikhale wanthu wakucena.