1. Kodi Jezu akhana thupo na ciyani pomwe kukhadasala ntsiku ibodzi kuti aphedwe?

POMWE kukhadasala nsiku ibodzi kuti Jezu aphedwe, iye akhadziwa kuti akhadasala pang’ono kusiyana na anyakupfunza wace. Iye akhana thupo na tsogolo la anyakupfunza wacewo. Jezu adauza anyakupfunza wacewo kuti: ‘Mumbacita lini mbali ya dziko.’ (Juwau 15:19) Patsogolo pace iye adapembera anyakupfunzawo kwa Baba wace kuti: ‘Iwo ambacita lini mbali ya dziko, ninga momwe ine ndimbacita lini mbali ya dziko.’ (Juwau 17:15, 16) Kodi Jezu akhathandauza ciyani na mafalaya?

2. Kodi Jezu akhathandauza ciyani na mafala yakuti ‘dziko’?

² Pomwe Jezu adalewa bza ‘dziko’ iye akhathandauza wanthu omwe ambadziwa lini Mulungu ndipo ankutongedwa na Sathani. (Juwau 14:30; Wayefezo 2:2; Tiyago 4:4; 1 Juwau 5:19) Kodi tingacite tani kuti tileke kucita ‘mbali ya dziko’? Mu msolo uno, tin’cezerana bzinthu bzinango bzomwe tingacite. (1) Timbakhale wakukhulupirika ku Umambo bwa Mulungu ndipo tireke kumbapitira nkhani za ndale. (2) Timbatcenkhe mzimu wa dziko. (3) Timbabvale na kubzidekesa mwakuthemera. (4) Kuwona kobiri mwacikati-kati na (5) Kubvala bzifuzo bzentse bza nkhondo.—Onani Mafala Yakuthumizira 16.

3. Kodi Jezu adabzipitisa mu ndale?

³ Pomwe Jezu akhali pa dziko la pantsi, iye adawona kuti wanthu akhana mabvuto mazinji ndipo moyo wawo ukhali wakunesa kwene-kwene. Iye adawasamalira ndipo akhafuna kuwathandiza. Kodi iye adakhala mtsogoleri wa ndale? Nee. Iye akhadziwa kuti bzomwe wanthu akhafuna ni Umambo bwa Mulungu ayai boma lace. Jezu ndiye omwe angadadzakhala Mambo wa Umambobo, ndipo nkhani ikulu ya upalizi bwace ikhali ya Umambo bwa Mulungu. (Danyeri 7:13, 14; Luka 4:43; 17:20, 21) Jezu alibe kubzipitisa mu ndale. Pomwe Jezu akhalewalewa na mtongi waciroma Ponsiyo Pirato, iye adati: ‘Umambo bwangu bumbacita lini mbali ya dzikoli.’ (Juwau 18:36) Anyakupfunza wace alibe kupitirambo nkhani za ndale. Bukhu linango lacingerezi lidati: “Akristau wakuyambirira akhabvuma lini kukhala na udindo ku ndale.” (On the Road to Civilization) Ntsiku zino Akristau wacadidi ambacitambo bzibodzi-bodzibzo. Timbathandizira mwakukhulupirika utongi bwa Mulungu ndipo timbapitira lini nkhani za ndale.—Mateu 24:14.

4. Kodi Akristau wacadidi ambalatiza tani kuti ambathandizira Umambo bwa Mulungu?

⁴ Anyakuimikira dziko lawo akayenda kukaphatira basa ku dziko linango ambakapitira lini nkhani za ndale za m’dziko limwero. Akristau wakudzozedwa, omwe ana cidikhiro cakukatonga pabodzi na Kristu kudzulu, ambapitirambo lini nkhani za ndale. Paulo adanembera Akristau wakudzozedwa kuti: ‘Ndife anyakuimikira wa Kristu.’ (2 Wakolinto 5:20) Akristau wakudzozedwa ambaimikira Umambo bwa Mulungu. Iwo ambabzipitisa lini mu nkhani za ndale ayai kumaboma yomwe yankutonga dzikoli. (Wafiripo 3:20) M’mbuto mwace, anyakudzozedwawa ambathandiza wanthu bzulu na bzulu kuti apfunze bza Umambo bwa Mulungu. Akristau  ‘wamabira manango’ omwe ana cidikhiro cakudzakhala kwa muyaya mu dziko lipsa, iwo ambathandiza anyakudzozedwa. Akristau wamabira manangowa ambapitirambo lini nkhani za ndale. (Juwau 10:16; Mateu 25:31-40) N’cadidi kuti Akristau wacadidi wentse, ambabzipitisa lini mu ndale.—Werengani Zaiya 2:2-4.

5. Thangwe ranyi Akristau ambayenda lini kunkhondo?

⁵ Akristau wacadidi ambawona Akristau anzawo ninga wanthu omwe ali nawo m’banja libodzi, ndipo iwo mbakuphatana bziribe basa penu wanthuwo mba dziko ayai cikhalidwe cakusiyana. (1 Wakolinto 1:10) Timbayenda lini kunkhondo, thangwe timbadziwa kuti tikayenda, tingakamenyane na adzinza wathu ayai Akristau anzathu, omwe Jezu adatiuza kuti timbawafune. (Juwau 13:34, 35; 1 Juwau 3:10-12) Ndipo kuthumizira bzimwebzi, Jezu adauza anyakupfunza wace kuti ambafune napo anyamadulanthaka wawo.—Mateu 5:44; 26:52.

6. Kodi timbalatiza tani kuti timbalemekeza boma?

 ⁶ Napo kuti Akristaufe timbapitira lini nkhani za ndale, timbacita nyongo yakuti timbabvere boma. Mwa ciratizo, timbalatiza kuti timbalemekeza maboma mwa kumbabvera malamulo yawo na kulipira mtsonkho. Koma timbawonesesa nthawe zentse kuti bzinthu bza Mulungu timbapereka ‘kwa Mulungu.’ (Marko 12:17; Waroma 13:1-7; 1 Wakolinto 6:19, 20) Bzinthu ‘bza Mulungubzo’ bzimbaphatanidza lufoyi lathu kwa iye, kumubvera kwathu na kunamata kwathu. Ndife wakukonzeka mpaka kupereka moyo wathu m’mbuto mwa kusiya kubvera Yahova.—Luka 4:8; 10:27; werengani Mabasa 5:29; Waroma 14:8.

7, 8. Kodi ‘mzimu wa dziko’ n’ciyani, ndipo mzimu umweyu umbacita ciyani na wanthu?

⁷ Kukhala wakusiyana na dziko la Sathaniri kumbathandauza kusaya kubvuma kutsogoleredwa na ‘mzimu wa dziko.’ Mzimu wa dzikoli ni kakumbukidwe na kacitidwe ka bzinthu ka dziko la Sathaniri, ndipo bzimwebzi bzimbatsogolera wanthu wale omwe ambatumikira lini Yahova. Koma Akristau ambayeza kutcenkha mzimu wa dzikoyu. Paulo adati: ‘Ifepano tidatambira mzimu wa Mulungu, sikuti mzimu wa dziko.’—1 Wakolinto 2:12; Wayefezo 2:2, 3; onani Mafala Yakuthumizira 17.

⁸ Mzimu wa dziko umbacitisa wanthu kukhala wadyera, wakubzikuza, na wakusaya kubvera. Bzimwebzi bzimbacitisa wanthuwo kukumbuka kuti angafunike lini kubvera Mulungu. Sathani ambafuna kuti wanthu ambacite bzinthu bzomwe an’funa mwakusaya kukumbukira bzakutewera bzace. Iye ambafuna kuti wanthu ambakhulupire kuti ‘cikhumbo ca thupi, cikhumbo ca maso’ ni bzinthu bzakufunika kwene-kwene pa moyo. (1 Juwau 2:16; 1 Timotio 6:9, 10) Sathani ambacita nyongo kwene-kwene kuti apumpse atumiki wa Yahova na kuti ambakumbuke ninga momwe  iye ambakumbukirira.—Juwau 8:44; Mabasa 13:10; 1 Juwau 3:8.

9. Kodi mzimu wa dziko ungatitokonye tani?

⁹ Ninga mphuwe yomwe timbapuma, mzimu wa dziko udatizungulira. Tikasaya kucita nyongo yakutcenkha mzimuyo, ungatitokonyembo. (Werengani Mimwani 4:23.) Bzimwebzi bzingayambe na bzinthu bzomwe bzingawoneke ninga kuti palibe bvuto liri-lentse, ndipo tingayambe kutewezera makhalidwe ya wanthu omwe ambanamata lini Yahova. (Mimwani 13:20; 1 Wakolinto 15:33) Ayai nthawe zinango tingayambe kumbawona bzinthu bza maika, kucita upandu, ayai kucita masenzeka yomwe yambalimbisa mapici.—Onani Mafala Yakuthumizira 18.

10. Kodi tingatcenkhe tani kutsogoleredwa na mzimu wa dziko?

¹⁰ Kodi tingatcenkhe tani kutsogoleredwa na mzimu wa dziko? Tin’funika kufendererana na Yahova na kubvuma kuti nzeru zace zititsogolere. Nthawe zentse tin’funikambo kupemba kuti atipase mzimu wace wakucena na kukhala wakutanganika pa basa lace. Yahova ni munthu wa mphanvu zentse m’cirengedwe centse. Tina citsimikizo centse cakuti iye angatithandize kulimbana na mzimu wa dziko.—1 Juwau 4:4.

11. Kodi mzimu wa dziko umbacitisa kuti wanthu ambabvale mwa mtundu uponi?

¹¹ Tingalatizembo kuti timbacita lini mbali ya dziko mwa kabvalidwe na kubzidekesa kwathu. Wanthu azinji kudzikoku ambabvala kuti anyang’anisidwe na wanthu, kuti anyose bzikhumbo bzakuipa, kuti awonese kuti mbapanduki, ayai kufuna kulatiza kuti ana kobiri zizinji. Wanthu winango ambakhala alibe nabzo basa momwe iwo ankuwonekera. Ambabvala bzakubvala bzakupswipa na bzakusaya kusamalika. Tin’funika lini kulekerera kuti makhalidwe ninga yamweya yatitokonye pakusankhula bzakubvala bzathu na pakubzidekesa.

12, 13. Kodi ni mitemo iponi ya m’Bibliya yomwe ingatithandize kusankhula bwino bzakubvala?

 ¹² Ninga atumiki wa Yahova, nthawe zentse tin’funika kumbabvala bzakubvala bzabwino, bzakucena, bzakuwoneka bwino, na bzakuthemera mwakubverana na m’buto yomwe tiri na bzomwe bzinkucitika kumweko. Ifepano tin’funika kumbabvala ‘mwa ulemu na mwa nzeru,’ mwa njira imweyi timbalatiza kuti ndife ‘wakubziperekadi kwa Mulungu.’—1 Timotio 2:9, 10; Juda 21.

¹³ Kabvalidwe kathu kangacitise kuti wanthu winango akumbuke bzabwino ayai bzakuphonyeka pakulewa bza Yahova na atumiki wace. Ifepano tin’funika kucita ‘bzinthu  bzentse kuti tipase mbiri Mulungu.’ (1 Wakolinto 10:31) Kubvala mwaulemu kumbaphatanidza kulemekeza makumbukidwe na malango ya winango. Tenepo, pomwe tinkusankhula bzakubvala ayai pomwe tin’funa kubzidekesa, tin’funika kumbakumbukira kuti bzakusankhula bzathu bzimbatokonyambo wanthu winango.—1 Wakolinto 4:9; 2 Wakolinto 6:3, 4; 7:1.

14. Kodi ni mibvunzo iponi yomwe tin’funika kumbabzibvunza pomwe tin’funa kusankhula bzakubvala kuti tibvale pakuyenda ku mitsonkhano ayai mu utumiki?

¹⁴ Kodi timbabvala tani tikakhala tinkuyenda ku mitsonkhano ayai pomwe tinkuyenda mu utumiki bwakumunda? Kodi timbabvala mu njira yakuti ingaceukise winango? Kodi kabvalidwe kathu kambakhumudwisa winango? Kodi timbakumbuka kuti bzakubvalabzo mpsangu ndipo ndiribe nabzo basa momwe wanthu winango angawonere? (Wafiripo 4:5; 1 Pedru 5:6) N’cadidi kuti tin’funika kuwoneka bwino, koma comwe cimbacitisa kuti munthu awoneke bwino, ni kukhala na makhalidwe yomwe Mkristau an’funika kukhala nayo. Ni makhalidweyo yomwe Yahova ambawona akanyang’anisa ifepano. Iye ambawona ‘munthu wakubisika wa mumtima . . . , omwe ngwakufunika kwene-kwene pamaso pa Mulungu.’—1 Pedru 3:3, 4.

15. Thangwe ranyi Yahova alibe kutipasa tsamba la malamulo yakulewa bzomwe tin’funika ayai bzomwe tin’funika lini kubvala?

¹⁵ Yahova alibe kutipasa tsamba la malamulo yakuleweratu bzomwe tin’funika ayai bzomwe tin’funika lini kubvala. M’mbuto mwace, iye adatipasa mitemo ya m’Bibliya yomwe ingatithandize kucita bzakusankhula bzabwino. (Wahebereu 5:14) Iye ambafuna kuti ticite bzakusankhula mwakubverana na lufoyi lomwe tinalo kwa iye na kwa winango, bziribe basa penu cakusankhulaco n’cing’ono ayai n’cikulu. (Werengani Marko 12:30, 31.) Pa dziko lentse, wanthu wa Yahova ambabvala mu njira zakusiyana-siyana mwakubverana na cikhalidwe cawo pabodzi na momwe wanthuwo akufunira. Kusiyana  kumweku n’kwabwino ndipo kumbacitisa kuti moyo ukhale wakudekeza.

16. (a) Kodi Sathani ambafuna kuti wanthu ambakumbuke tani pa nkhani ya kobiri? Tsono kodi n’ciyani comwe Jezu adapfunzisa pa nkhani ya kobiri? (b) Ni mibvunzo iponi yomwe tin’funika kumbabzibvunza?

¹⁶ Sathani ambafuna kuti wanthu ambakumbuke kuti kukhala na kobiri zizinji pabodzi na bzinthu bzakuthupi, kumbabweresa cikondweso. Koma atumiki wa Yahova ambadziwa kuti bzimwebzi mpsakunama. Ifepano timbakhulupira mafala ya Jezu yakuti: ‘Napo munthu akhale na bzinthu bzizinji, moyo wace umbacokera lini ku bzinthu bzomwe anabzo.’  (Luka 12:15) Kobiri zingatipase lini cikondweso caico. Kobirizo zingatipasembo lini axamwali wacadidi, mtendere wa mumtima ayai moyo wakusaya kumala. N’cadidi kuti timbafunikira bzinthu bzinango bzakuthupi ndipo timbafuna kukhala na moyo wacikondweso. Tsono Jezu adapfunzisa kuti tingakhale na cikondweso cacadidi, tikakhala pa uxamwali bwakulimba na Mulungu na kuwona kunamata kwathu kukhala cinthu cakufunika kwene-kwene pa moyo wathu. (Mateu 5:3; 6:22) Bzibvunzeni kuti: ‘Kodi nimbawona kobiri ninga momwe wanthu wakudziko ambawonera? Kodi ndimbamala nthawe zizinji ndikumbakumbuka na kumbalewa nkhani za kobiri?’—Luka 6:45; 21:34-36; 2 Juwau 6.

17. Kodi ni phindu liponi lomwe tingakhale nalo tikasaya kumbalinga kwene-kwene kobiri?

¹⁷ Ifepano tikasaya kulinga kwene-kwene kobiri, ticiyikha makumbukidwe yathu pa kutumikira Yahova, tin’dzakhala na moyo wa thandauzo. (Mateu 11:29, 30) Timbakhala wakukondwa na bzomwe tinabzo ndipo timbakhalambo na mtendere wa mu mtima. (Mateu 6:31, 32; Waroma 15:13) Ndipo timbacita lini thupo na bzinthu bzakuthupi. (Werengani 1 Timotio 6:9, 10.) Ifepano tin’dzawona kuti tikambathandiza winango, tin’dzakhala wakukondwa. (Mabasa 20:35) Tin’dzakhalambo na nthawe yakukwanira ya kuceza na wanthu omwe timbawafuna. Ndipo tin’dzambagona tulo twabwino.—Mpalizi 5:12.

18. Kodi n’ciyani comwe Sathani ambafuna kucita?

¹⁸ Sathani ambafuna kupfudza uxamwali bwathu na Yahova. Tenepo, ifepano tin’funika kucita ciri-centse comwe tingakwanise kuti tikhotcerere uxamwalibo. Ifepano tinkulimbana na ‘mphanvu ya mizimu yakuipa.’ (Wayefezo 6:12) Sathani na madimonyo yace ambafuna lini kuti tikhale wakukondwa nakuti tikhale na moyo wakusaya kumala. (1 Pedru 5:8) Anyamadulanthaka wathu wamphanvuwa ankulimbana  nafe, koma na thandizo la Yahova, tingakwanise kukunda!

19. Mwakubverana na cinembo ca Wayefezo 6:14-18, kodi ‘bzifuzo bzankhondo’ mpsiponi?

¹⁹ Kale-kale acikunda akhaphatisa basa cakukhotcera, kapaseti na bzinango kuti abzikhotcerere ku nkhondo. Mu njira ibodzi-bodziyi, ifepano tin’funikambo kubvala ‘bzifuzo bzentse bza nkhondo’ bzomwe Yahova adatipasa. (Wayefezo 6:13) Bzifuzobzo bzin’dzatikhotcerera. Timbawerenga bza bzifuzo bzimwebzi mu cinembo ca Wayefezo 6:14-18 comwe cimbati: ‘Tenepo, khalani wakulimba, mucimanga bwino cadidi m’ciuno mwanu, mucibvala cakukhotcerera pa cifuwa ca cirungamo, ndipo mubvale ntsapato ku nzayo zanu kuti mukhale wakukonzeka kuyenda kukapalizira bzipsa bzabwino bza mtendere. Kuposa bzentse, tengani mkhotco mkulu wa cikhulupiro omwe mun’dzathimisira misewe yakugaka ya nyakuipayo. Ndipo ibvumenimbo kapaseti ya cipulumuso pabodzi na mphanga ya mzimu, yomwe ni Fala la Mulungu. Pomwe munkucita tenepo, mwa mtundu uli-wentse wa mpembo na dandaulo mumbapembe pa cakucitika ciri-centse mu mzimu.’

20. Kodi n’ciyani comwe tin’funika kucita kuti ‘bzifuzo’ bzitikhotcerere?

²⁰ Mcikunda akayebwa kubvala cifuzo cibodzi, mbali yathupi yomwe alibe kubvalayo ingakhale yakusaya kukhotcerereka. Penu tin’funa kuti ‘bzifuzo’ bzitikhotcerere, tin’funika lini kuyebwa kubvala kacifuzo kali-kentse. Nthawe zentse tin’funika kubvala bzifuzo bzentse na kubzisamalira bwino. Nkhondo yathu in’pitiriza mpaka dziko la Sathaniri likadzapfudzidwa, na pomwe Sathaniyo na madimonyo yace an’dzacosedwa. (Cibvumbulutso 12:17; 20:1-3) Tenepo, tin’funika kupitiriza kulimbana na bzikhumbo bzakuipa ayai bzakutepa bzathu, ndipo tin’funika lini kubwerera m’mbuyo!—1 Wakolinto 9:27.

21. Kodi tingakunde tani Sathani?

 ²¹ Na mphanvu zathu zokha tingakwanise lini kukunda Sathani. Koma na thandizo la Yahova tingakwanise kumukunda! Kuti tipitirize kukhala wakukhulupirika, tin’funika kupemba kwa Yahova, kupfunza Fala lace, na kukhala wakufendererana na abale na mpfumakazi zathu. (Wahebereu 10:24, 25) Bzinthu bzimwebzi bzin’dzatithandiza kupitiriza kukhala wakukhulupirika kwa Mulungu na kukhala wakukonzeka kukhotcerera cikhulupiro cathu.

22, 23. (a) Kodi tingakhale tani wakukonzeka nthawe zentse kuti tikhotcerere cikhulupiro cathu? (b) Kodi tin’dzacezerana ciyani mu msolo wakutewera?

²² Tin’funika kukhala wakukonzeka kukhotcerera cikhulupiro cathu nthawe zentse. (Juwau 15:19) Pa nkhani zinango, Mboni za Yahova zimbacita bzinthu mwakusiyana na wanthu azinji. Tenepo bzibvunzeni kuti: ‘Kodi ndimbabvesesa thangwe ranyi timbacita bzinthu mwakusiyana na wanthu winango? Kodi ndimbakhulupira kuti bzomwe Bibliya na kapolo wakukhulupirika na wanzeru ambalewa mpsacadidi? Kodi ndimbadekedwa thangwe ra kukhala Mboni ya Yahova? (Psalymo 34:2; Mateu 10:32, 33) Kodi ndingakwanise kufotokozera wanthu winango bzomwe ndimbakhulupira?’—Mateu 24:45; Juwau 17:17; werengani 1 Pedru 3:15.

²³ Pa bzinthu bzizinji, timbadziwiratu bzomwe tingacite kuti tikhale wakusiyana na dzikoli. Tsono nthawe zinango, bzimbadziwika lini. Sathani ambaphatisa basa bzinthu bzakusiyana-siyana kuti atipumpswe. Cinthu cinango comwe ambaphatisa basa ni masenzeka ayai bzinthu bzomwe timbasenzeka nabzo. Kodi tingasankhule tani masenzeka yathu mwanzeru? Mu msolo wakutewera tin’dzacezerana bzimwebzi.