Msolo 10
Malowozi— ni Mphaso Yakucokera kwa Mulungu
‘Cingwe cakuposedwa na bzingwe bzitatu cingabwedzeke lini mwakamfulumize.’—MPALIZI 4:12.
1, 2. (a) Kodi banja lipsa limbadikhirira ciyani? (b) Kodi ni mibvunzo iponi yomwe tinicezerana mu msolo uno?
KUMBUKIRANI bza mwamuna na mkazi pa ntsiku ya malowozi yawo. Iwo ankuwoneka kuti mbakukondwa thangwe ra moyo upsa omwe aniyamba kukhala nawo. Iwo ninga banja ana bzakulinga kuti abzikwanirise ndipo ankudikhira kuti malowozi yawoyo yanikhala yakulimba na yakukondwa mpaka kale-kale.
2 Tsono, mabanja mazinji yomwe yambayamba bwino, yambapitiriza lini tenepoyo. Kuti banja likhalise, licikhala lakukondwa mpsakufunika kuti wanthu wa m’banjawo ambateweze malango yakucokera kwa Mulungu. Tenepo mbaticezeraneni mitawiro ya m’Bibliya pa mibvunzo iyi: Kodi malowozi yana phindu lanyi? Penu imwepo mun’funa kupita m’banja, kodi mungasankhule tani munthu wakuthemera? Kodi mungakhale tani mwamuna ayai mkazi wabwino? Kodi n’ciyani comwe cingathandize kuti banja likhale lakulimba?—Werengani Mimwani 3:5, 6.
KODI NIN’FUNIKA KULOWOLA AYAI KULOWODWA?
3. Kodi n’cadidi kuti munthu an’funika kukhala pabanja kuti akhale wakukondwa? Fotokozani.
3 Wanthu winango ambakhulupira kuti munthu angakhale lini wakukondwa akasaya kulowola ayai kulowodwa. Koma makumbukidwe yamweya ngacadidi lini. Jezu adalewa kuti kusaya kulowola ayai kulowodwa ingakhalembo mphaso. (Mateu 19:11, 12) Ndipo mpostolo Paulo adalewa kuti kukhala wakusaya kulowola ayai kulowodwa kuna phindu lace. (1 Wakolinto 7:32-38) Munthu ali-wentse an’funika kusankhula yekha kukhala pa banja ayai ne. Mun’funika lini kubvumiza kuti axamwali, adzinza ayai cikhalidwe bzikukakamizeni kupita m’banja.
4. Kodi kukhala na banja la bwino kuna phindu lanyi?
4 Bibliya limbalewa kuti kulowola ayai kulowodwa ni mphaso pomwe yakucokera kwa Mulungu, ndipo kuna phindu lacembo. Yahova adalewa bza Adamu kuti: ‘Bziri lini bwino kuti mwamuna apitirize kukhala yekha. Ndinimukonzera mthandizi, ninga mwanzace wakumuthemera.’ (Ciyambo 2:18) Yahova adalenga Eva kuti akhale mkazi wa Adamu, ndipo iwo adakhala banja lakuyamba. Munthu wakulowola ayai wakulowodwa kawiri-kawiri ambakhala na mwanzace wakuceza naye, ndipo ninga banja iwo ambathandizana. Ndipo banja likakhala na wana, iro limbafunika kukhala mbuto yabwino yakulerera wanawo. Tsono cakulinga ca malowozi n’cakundokhala lini na wana.—Psalymo 127:3; Wayefezo 6:1-4.
5, 6. Kodi banja lingakhale tani ninga cingwe cakuposedwa ‘na bzingwe bzitatu’?
5 Mambo Salomau adalewa kuti: ‘Awiri ambaposa m’bodzi, thangwe ambagumana mabaibai yabwino pa basa lawo lomwe ambaliphata na nyongo. M’bodzi wa iwo akagwa, munangoyo angamuthandize kuima. Tsono, n’ciyani cingacitike na munthu omwe anigwa, ndipo palibe munango kuti amuthandize kuima? . . . Ndipo cingwe cakuposedwa na bzingwe bzitatu cingabwedzeke lini mwakamfulumize.’—Mpalizi 4:9-12.
6 Banja labwino ni ciphatano ca axamwali awiri omwe ambathandizana, ambatsangalazana na kukhotcererana. Lufoyi lingacitise banja kukhala lakulimba, tsono banja limbakhaliratu lakulimba bzikakhala kuti wentse awiri mwamuna na mkazi ambanamata Yahova. Tenepo malowozi yawoyo yambakhala ninga cingwe cakuposedwa ‘na bzingwe bzitatu.’ Cingwe cimweci cimbakhala cakulimba kwene-kwene kuposa cingwe cakuposedwa na bzingwe bziwiri bzokha. Banja limbakhala lakulimba, Yahova akacitambo mbali m’banjamo.
7, 8. Kodi ni cenjezo liponi lomwe Paulo ankupereka pa nkhani ya banja?
7 Wanthu akalowolana, iwo angakwanirise cikhumbo cawo ca kugonana. (Mimwani 5:18) Tsono, penu munthu angapite m’banja kokha kuti akwanirise cikhumbo cakugonana, bzingacitise kuti munthuyo aleke kusankhula bwino munthu wakulowolana naye. N’thangwe race Bibliya limbalewa kuti munthu an’funika kulowola ayai kulowodwa ‘penu wakula,’ thangwe munthu akakhala kuti akali m’ng’ono cikhumbo cakugonana cimbakhala ca mphanvu kwene-kwene. (1 Wakolinto 7:36) Mpsabwino kubakadikhirira mucidzapita m’banja pa nthawe yomwe cikhumbo cakugonana cimbakhala lini ca mphanvu kwene-kwene. Pa nthawe imweyi munthu ambakumbuka bwino ndipo ambacita cakusankhula mwanzeru.—1 Wakolinto 7:9; Tiyago 1:15.
8 Penu imwepo mun’funa kupita m’banja mun’funika kuzindikira kuti banja liri-lentse limbagumana na mabvuto. Mpostolo Paulo adalewa kuti wale omwe ambalowola ayai kulowodwa ambakhala ‘na matsautso m’thupi mwawo.’ (1 Wakolinto 7:28) Napo banja la bwino tani limbakhalambo na mabvuto yace. Tenepo mukatsimikiza kulowola ayai kulowodwa, mun’funika kusankhula mwanzeru munthu wakulowolana naye.
KODI NDINGASANKHULE MBANI KUTI NDIMANGE NAYE BANJA?
9, 10. Kodi n’ciyani comwe cingacitike penu tingalowolane na munthu omwe ambatumikira lini Yahova?
9 Mukanati kusankhula munthu omwe adzakhale mwamuna ayai mkazi wanu, mun’funika kukumbukira mtemo wa m’Bibliya wakuti: ‘Lekani kumangidwa pa djoki libodzi na omwe an’khulupira lini.’ (2 Wakolinto 6:14) There limweri lidacokera pa bzomwe alimi akhacita pomwe akhaphatisa basa bzifuwo pakulima. Mulimi akhamangirira lini bzifuwo bziwiri bzomwe bzikhali bzakusiyana kukula na mphanvu zace kuti bziphatire basa pabodzi. Kucita bzimwebzi kungadakhala kusaya kudekera mtima bzifuwobzo, thangwe bzentsenebzo bzingadabonera. Mwakundendemerana na bzimwebzi, penu munthu omwe ambanamata Yahova walowolana na munthu omwe ambanamata lini Yahova, banja lawolo lingakhale na mabvuto mazinjisa. Ndipopa Bibliya limbacenjeza kuti omwe an’funa kulowola ayai kulowodwa acite bzimwebzi ‘kokha mwa mbuya.’—1 Wakolinto 7:39.
10 Akristau winango ambakumbuka kuti bzingakhale bwino kulowolana na munthu omwe ambanamata lini Yahova m’mbuto mwa kukhala yekha. Tsono penu munthu angapulumbudze malango ya m’Bibliya kawiri-kawiri bzakutewera bzace bzimbakhala kuwawa na kusaya cikondweso. Ninga atumiki wa Yahova, kumutumikira ni cinthu cakufunika kwene-kwene pa moyo wathu. Kodi mungabve tani penu munkucitira lini pabodzi na mwamuna ayai mkazi wanu bzinthu bzakufunika kwene-kwene pa moyo wanu? Wanthu akambakumbukira bzinthu bzimwebzi, ambawona kuti bziri bwino kukhala wakusaya kulowola ayai kulowodwa m’mbuto mwa kulowolana na munthu omwe ambafuna lini Yahova ne kumutumikira.—Werengani Psalymo 32:8.
11. Kodi mungasankhule tani bwino mwanzanu wakulowolana naye?
11 Bzimwebzi bzinkuthandauza lini kuti munthu ali-wentse omwe ambatumikira Yahova angakhale mwamuna ayai mkazi wa bwino kwa imwepo. Penu imwepo munkukumbuka bza kulowola ayai kulowodwa, nyang’anani munthu omwe mun’dzabverana naye na omwe mun’dzamufunadi. Dikhirani mpaka mukadzagumana munthu omwe ana bzakulinga ninga bzanu na omwe ambayikha pa mbuto yakuyamba Umambo bwa Mulungu. Khalani na nthawe ya kuwerenga na kukumbukira malango yakulewa bza malowozi yomwe yambagumanika m’mabukhu yathu.—Werengani Psalymo 119:105.
12. Kodi abereki ankupfunza ciyani kucokera pa ciratizo ca Abalahamu pomwe iye adasankhulira mkazi mwana wace Izaki?
12 Madziko manango, kawiri-kawiri abereki ndiwo omwe ambasankhulira mwana wawo munthu wakuti alowolane naye. Wanthu amwewa ambawona kuti abereki ndiwo omwe ambadziwa munthu omwe angakhale wakuthemera kulowolana na mwana wawo. Bzimwebzi ndibzo bzomwe bzikhacitika mu nthawe za m’Bibliya. Mwa ciratizo, pomwe Abalahamu akhanyang’ana mkazi wa mwana wace Izaki, cakulinga cace cikhali lini ca kugumana mkazi wa kobiri ayai wakubvekera, koma akhanyang’ana mkazi omwe ambafuna Yahova. (Ciyambo 24:3, 67) Tenepo penu banja lanu lingasankhule kuti licite bzimwebzi, Bibliya lingathandize abereki kudziwa makhalidwe yomwe munthu omwe ankunyang’anira mwana wawoyo an’funikira kukhala nayo.—Onani Mafala Yakuthumizira 25.
KODI NDINGAKONZEKERE TANI KUTI NDIDZAKHALE NA MALOWOZIYA BWINO?
13-15. (a) Kodi mwamuna angakonzekere tani kuti adzakhale msolo wa banja wabwino? (b) Kodi mkazi angakonzekere tani kuti adzakhale mkazi wabwino?
13 Penu imwepo munkukumbuka bza kupita m’banja, tsimikizani kuti ndimwe wakukonzekadi. Pinango imwepo mungakumbuke kuti mwakonzeka, tsono mbaticezeraneni bzomwe bzimbathandauza munthu kukhala wakukonzeka kuti apite m’banja. Mtawiro wace ungakudabwiseni imwepo.
Khalani na nthawe ya kuwerenga na kukumbukira malango yakugumanika m’Fala la Mulungu yakulewa bza malowozi
14 Bibliya limbalatiza kuti mwamuna na mkazi ana udindo bwakusiyana m’banja. Bzimwebzi bzinkulatiza kuti momwe mwamuna angakonzekerere banja bzimbakhala bzakusiyana na momwe mkazi angakonzekerere. Penu mwamuna ankukumbuka bza kulowola, an’funika kubzibvunza penu ngwakukonzeka kukhala msolo wa banja. Yahova ambadikhirira kuti mwamuna ambasamalire mkazi wace pabodzi na wana wace acimbawalatizambo lufoyi. Koma cakufunika kwene-kwene n’cakuti mwamuna an’funika kutsogolera banja lace pakunamata Mulungu. Bibliya limbalewa kuti mwamuna omwe ambasamalira lini banja lace ‘ngwakuipa kuposa munthu omwe alibe cikhulupiro.’ (1 Timotio 5:8) Tenepo, penu imwepo munkukumbuka bza kulowola kumbukirani momwe mungaphatisire basa mtemo wa m’Bibliya wakuti: ‘Konzekera basa lako la panja, ndipo konza munda wako; patsogolo pace umange nyumba yako.’ Mu njira inango tingalewe kuti, pomwe mukanati kulowola, tsimikizani kuti imwepo mungakwanise kusamalira mkazi wanu ninga momwe Yahova ambafunira.—Mimwani 24:27.
15 Mkazi omwe ankukumbuka bza kupita m’banja an’funika kubzibvunza penu iye ngwakukonzeka kukhala na maudindo yomwe mkazi ambakhala nayo ayai kukonzeka kukhala mayi. Bibliya limbafotokoza bzinthu bzakusiyana-siyana bzomwe mkazi wa bwino angacite pakusamalira mwamuna wace pabodzi na wana wace. (Mimwani 31:10-31) Ntsiku zino, amuna na akazi azinji ambandokumbuka kokha bzomwe mwanzawo wa m’banja angawacitire. Tsono Yahova ambafuna kuti tikumbuke bzomwe ifepano tingacitire mwanzathu wa m’banja.
16, 17. Penu munkukumbuka bza kulowola ayai kulowodwa, n’ciyani comwe mun’funika kukumbukira?
16 Mukanati kupita m’banja, mun’funika kukumbukira bzomwe Yahova ambafuna kuti mwamuna na mkazi ambacite. Kukhala msolo wa banja bzinkuthandauza lini kuti mwamuna ana ugo bwa kumbazunza mkazi wace. Msolo wabwino wa banja umbatewezera Jezu, omwe nthawe zentse ambacita bzinthu mwalufoyi na mwakudeka mtima kwa wentse omwe ambawasamalira. (Wayefezo 5:23) Tsono kumbali ya mkazi, iye an’funika kukumbukira bzomwe bzimbathandauza kuthandizira bzakusankhula bza mwamuna wace acicitira pabodzi bzinthu. (Waroma 7:2) Iye an’funika kudziwa penu an’dzakwanisa kubvera mwamuna omwe ngwakusaya kulungamiratu. Penu iye ankuwona kuti angakwanise lini, pinango angasankhule kubakapitiriza kukhala wakusaya kulowodwa.
17 Mwamuna na mkazi an’funika kukumbukira kwene-kwene bzinthu bzomwe bzingakondwese mwanzace, sikuti kundokubzikondwesa yekha. (Werengani Wafiripo 2:4.) Paulo adanemba kuti: ‘Munthu ali-wentse ambafune mkazace, ninga momwe ambabzifunira iye yekha; ndipo mkazi ambalemekezembo kwene-kwene mwamuna wace.’ (Wayefezo 5:21-33) Wentse awiri an’funika kumbabzibva kuti ambafunidwa na kulemekezedwa. Tsono kuti banja lifambe bwino, mwamuna an’funika kumbabzibva kuti mkazi wace ambamulemekeza, ndipo mkazi an’funikambo kumbabzibva kuti mwamuna wace ambamufuna.
18. Thangwe ranyi mwamuna na mkazi omwe ali pa umakhadzi an’funika kukhala wakusamala kwene-kwene?
18 Nthawe ya umakhadzi in’funika kukhala nthawe yakukondwesa ali-wentse ndipo imweyi imbakhala nthawe yomwe ambadziwana bwino. Ndipo in’funikambo kukhala nthawe yakuti ambacezerane bzinthu bzanzeru na kumbacita bzinthu mwakukhulupirika. Akacita bzimwebzi bzingawathandize kuwona penu angasakhuledi kudzakhala pabodzi mpaka kale-kale. Pa nthawe ya umakhadzi, mwamuna na mkazi ambapfunza kulewalewana bwino ndipo ambayeza kupfunza mtima wa mwanzaceyo. Na kupita kwa nthawe uxamwali bwawo bukakula, ambayamba kusirirana kwene-kwene ndipo ambadzafuna kulatizana lufoyi m’njira zinango. Tsono iwo an’funika kusamala kwene-kwene momwe angacitire bzimwebzi kuti aleke kucita mkhalidwe wakusaya kuthemera. Penu ambafunana bzacadidi, an’dzakhala wakubziretsa ndipo an’dzatcenkha kucita bzinthu bzomwe bzingadzonge umakhadzi bwawobo pabodzi na uxamwali bwawo na Yahova.—1 Watesalonika 4:6.
Pa nthawe ya umakhadzi, mwamuna na mkazi angapfunze kumbalewalewana bwino
KODI NDINGACITE CIYANI KUTI MALOWOZI YANGU YADZAKHALE YAKULIMBA?
19, 20. Kodi Akristau ambawona tani Malowozi?
19 Nkhani za m’mabukhu mazinji na mafilime zakulewa bza wanthu omwe ali pa umakhadzi, zimbamalizira kulewa kuti wanthuwo adacita madyo makulu ya malowozi na yakudekeza. Tsono kulewa cadidi kucita malowozi ni ciyambi basi. Yahova ambafuna kuti wanthu wakulowolana akhale pabodzi mpaka kale-kale.—Ciyambo 2:24.
20 Ntsiku zino wanthu ambawona kuti wanthu wakulowolana an’funika lini kukhala pabodzi mpaka kale-kale. Iwo ambawona kuti kupita m’banja n’kwakusaya kunesa ndipo kumalisa n’kwakusaya kunesambo. Wanthu winango ambawona kuti m’banja mukayambika mabvuto, ni bwino kulimalisa. Tsono kumbukirani bza ciratizo ca m’Bibliya cakulewa bza cingwe cakuposedwa na bzingwe bzitatu. Cingwe ninga cimweci cimbakhala cakulimba kwene-kwene ndipo cimbanesa kubwedzeka. Tikalinga Yahova kuti atithandize banja lathu limbakhala lakulimba. Jezu adati: ‘Comwe Mulungu wacimanga pabodzi, munthu aleke kucilekanisa.’—Mateu 19:6.
21. Kodi n’ciyani comwe cingathandize mwamuna na mkazi kuti ambafunane?
21 Munthu ali-wentse ana makhalidwe yabwino na bzakuphonya bzace. Ndipo mpsakusaya kunesa kumbandokumbukira bzakuphonya bza winango, maka-maka akakhala kuti ni mkazi wathu ayai mwamuna wathu. Tsono tikambacita bzimwebzi, tingakhale lini wakukondwa. Koma tikambakumbukira makhalidwe yabwino ya mwanzathuyo, banja lathu lingakhal elakukondwa. Kodi bzimwebzi bzingakwanisikedi pakati pa wanthu wakuperewera? Inde bzingakwanisike! Yahova ambadziwa kuti ndife wanthu wakuperewera, ndipo iye ambanyang’anisisa bzinthu bzabwino bzomwe timbacita. Kodi munkukumbuka kuti bzingadakhala tani angadakhala kuti ambandonyang’anisisa bzomwe timbaphonyesa? Munembi wa Psalymo adati: ‘Imwe Yah, bzingadakhala kuti mumbanyang’anisa bzakuphonya bzathu, mbani omwe angadaima pa maso panu, imwe Yahova?’ (Psalymo 130:3) Mwamuna na mkazi an’funika kutewezera Yahova mwa kumbawona bzinthu bzabwino bzomwe mwanzace ambacita acikhalambo wakukonzeka kumbalekererana.—Werengani Wakoloso 3:13.
22, 23. Thangwe ranyi tingalewe kuti Abalahamu na Sara ni ciratizo cabwino kwa wanthu wakulowolana?
22 Na kupita kwa nthawe malowozi yangakhale yakulimba. Abalahamu na Sara adakhala na malowozi yakukhalisa na yakukondwa. Pomwe Yahova adauza Abalahamu kuti acoke mu mzinda wa Uri, bzinkuwoneka kuti Sara akhana magole yakupitirira 60. Ndokumbukirani momwe bzikhaliri bzakunesa kwa Sara kusiya nyumba yace yabwino aciyenda kukakhala matendi. Sara akhali mwanzace na xamwali wabwino kwa mwamuna wace, ndipo iye akhalemekeza kwene-kwene mwamuna waceyo. Tenepo, Sara adabverana na cakusankhula ca Abalahamu ndipo adathandizira kuti bzikwanisike.—Ciyambo 18:12; 1 Pedru 3:6.
23 Tsono kukhala na banja labwino kumbathandauza lini kuti mwamuna na mkazi ambabverana pa cinthu ciri-centse. Ntsiku inango Abalahamu alibe kubverana na bzomwe Sara adalewa pa nkhani inango ndipo Yahova adauza Abalahamuyo kuti: ‘Mutetekere.’ Abalahamu adabveradi ndipo adakhala na bzakutewera bzabwino. (Ciyambo 21:9-13) Penu imwepo ntsiku inango mungabvesesane lini na mwanzanu wa m’banja, lekani kutaya mtima. Cakufunika kwene-kwene n’cakuti napo pomwe mulibe kubvesesana, mumbapitirize kucita bzinthu bzakulatiza kuti mumbafunana na kulemekezana.
Onesesani kuti Fala la Mulungu linkucita mbali m’banja mwanu kucokera paciyambi
24. Kodi malowozi yathu yangatumbizise tani Yahova?
24 Mu gwere Lacikristau muna mabanja mazinji yakukondwa. Penu imwepo mun’funa kulowola ayai kulowodwa, kumbukirani kuti kusankhula munthu wakumanga naye banja n’cibodzi mwa bzakusankhula bzikulu kwene-kwene bzomwe imwepo mun’funika kucita. Bzomwe mungasankhule bzin’dzatokonya moyo wanu wentse, tenepo mun’funika kukhulupira Yahova kuti akuthandizeni. Mukacita tenepo mun’dzakwanisa kusankhula munthu wakulowolana naye mwanzeru, mun’dzakonzekera bwino malowozi, ndipo mun’dzakhala na banja labwino lomwe lin’dzatumbizisa Yahova.
