Msolo 15
Mbakomedwani na Basa Lanu
‘Munthu ali-wentse . . . [agumane] cikondweso pa basa lace lentse lakulimba.’—MPALIZI 3:13.
1-3. (a) Kodi wanthu azinji ambabva tani akakumbukira bza basa lomwe ambaphata? (b) Kodi mu nkhani ino tin’cezerana mibvunzo iponi?
WANTHU azinji padziko lentse la pantsi ambaphata basa mwa nyongo kuti abzisamalire na kusamalirambo mabanja yawo. Koma azinji ambakomedwa lini na basa lomwe ambaphata ndipo winango ntsiku iri-yentse ambayenda kubasa acidandaula. Penu imwepo bzimbakucitikirani, kodi mungacite tani kuti mumbakondwe na basa lanu?
2 Yahova ambatiuza kuti: ‘Munthu ali-wentse adye na kumwa, acigumana cikondweso pa basa lace lentse lakulimba. Imweyi ni mphaso ya Mulungu.’ (Mpalizi 3:13) Yahova adatilenga na cikhumbo ca kufuna kuphata basa. Bzimwebzi bzikulatiziratu padeca kuti iye ambafuna kuti timbakondwe na basa lomwe timbaphata.—Werengani Mpalizi 2:24; 5:18.
3 Tsono, n’ciyani comwe cingatithandize kuti timbakondwe na basa lathu? Ndipo ni mabasa yaponi yomwe Akristau an’funika lini kumbaphata? Kodi tingacite tani kuti mabasa yathu yaleke kutitazisa kunamata Yahova? Tsono ni basa liponi lakufunika kwene-kwene lomwe tin’funika kuliphata?
YAHOVA NA JEZU AMBAPHATA BASA MWA NYONGO
4, 5. Kodi Yahova ambaliwona tani basa?
4 Yahova ambafuna kwene-kwene kuphata basa. Pa Ciyambo 1:1 pambati: ‘Pakuyamba Mulungu adalenga kudzulu na dziko la pantsi.’ Pomwe Mulungu adamaliza kulenga dziko lapantsi na bzinthu bzentse bza pa dziko iye adalewa kuti bzomwe adalengabzo bzikhali ‘bza bwino.’ (Ciyambo 1:31) Bzimwebzi bzikulatiza kuti Mulengi wathu adakomedwa na basa lomwe iye adacita.—1 Timotio 1:11.
5 Yahova alibe kusiya kuphata basa. Jezu adati: ‘Baba wangu akupitiriza kuphata basa mpaka pano.’ (Juwau 5:17) Napo timbadziwa lini bzinthu bzentse bzakudabwisa bzomwe Yahova adalenga, koma pana bzinthu bzinango bzomwe timbadziwa. Mwa ciratizo iye akusankhula wanthu omwe an’dzatonga na Mwana wace Jezu Kristu mu Umambo bwa kudzulu. (2 Wakolinto 5:17) Yahova akuphata basa mwa nyongo pakusamalira wanthu wace na kuwatsogolera pa basa lakupalizira. Basali lacitisa wanthu bzulu na bzulu kudziwa Yahova na kukhalambo na cidikhiro ca moyo wakusaya kumala m’paraizo.—Juwau 6:44; Waroma 6:23.
6, 7. Kodi Jezu akhaphata tani basa lace?
6 Ninga Pai wace, Jezu ambafuna kuphata basa. Akanati kubwera pa dziko la pantsi pano iye akhali ‘misiri wa waluso’ wa Mulungu ndipo adalenga nawo pabodzi bzinthu bzentse bza kudzulu na bza pa dziko la pantsi. (Mimwani 8:22-31; Wakoloso 1:15-17) Pomwe akhali pa dziko la pantsi, iye adapitiriza kuphata basa mwa nyongo. Pomwe akhali tswaka, adapfunza basa la kusema matabwa ndipo pinango akhadziwambo kumanga nyumba. Jezu akhana luso pa basa laceri ndipo akhadziwika kuti akhali ‘misiri wamatabwa.’—Marko 6:3.
7 Koma basa lakufunika kwene-kwene kwa Jezu likhali kupalizira na kupfunzisa wanthu pakulewa bza Yahova. Iye akhafunika kumaliza basa laceri kwa magole matatu na pakati ndipo akhaphata basali kuyambira macibese mpaka usiku. (Luka 21:37, 38; Juwau 3:2) Jezu akhayenda ulendo butali m’miseu ya pfumbi na cakulinga cakuti apfunzise wanthu azinji.—Luka 8:1.
8, 9. Kodi tikudziwa tani kuti Jezu akhakomedwa na basa lace?
8 Kwa Jezu, kuphata basa lomwe Mulungu adamupasa kukhali ninga cakudya kwa iye thangwe likhamupasa mphanvu. Nthawe zinango Jezu akhaphata basa kwene-kwene ndipo akhasaya nthawe yakudya. (Juwau 4:31-38) Iye akhaphata basa nthawe iri-yentse kuti athandize wanthu kudziwa bza Baba wace. Ndipopa iye adauza Yahova kuti: ‘Inepano ndidakupasani mbiri imwepo, pantsi pano, na kumaliza basa lomwe mudandipasa kuti ndiricite.’—juwau 17:4.
9 Bzimwebzi bzikulatiziratu padeca kuti Yahova na Jezu ana nyongo kwene-kwene pakuphata basa ndipo ambakomedwa na basa lawolo. Ifepano tin’funika ‘kutewezera Mulungu,’ ndipo tin’funikambo kutewera ‘mathanya ya [Jezu] na pafupi kwene-kwene.’ (Wayefezo 5:1; 1 Pedru 2:21) Ndipopa timbaphata basa mwa nyongo kwene-kwene ticicita bzentse bzomwe tingakwanise.
KODI TIN’FUNIKA KUMBALIWONA TANI BASA LATHU?
10, 11. Kodi n’ciyani cin’dzatithandiza kuti tikhale na makumbukidwe yabwino pakulewa bza basa lathu?
10 Ninga atumiki wa Yahova, ifepano timbaphata basa mwa nyongo kuti tibzisamalire nakuti tisamalirembo banja lathu. Timbafuna kuti timbakomedwe na basa lathu, tsono nthawe zinango bzimbakhala bzakunesa. Tenepo, n’ciyani comwe mungacite penu mukukomedwa lini na basa lanu?
Kukhala na makumbukidwe yabwino kun’dzatithandiza kukondwa na basa lathu
11 Khalani na makumbukidwe ya bwino. Pinango tingakwanise lini kucinja basa lomwe timbaphata ayai nthawe ya basalo, koma tingacinje makumbukidwe yathu pa nkhani ya basalo. Kukumbukira bzomwe Yahova ambafuna kuti ticite kungatithandize. Mwa ciratizo, Yahova ambafuna kuti msolo wa banja acite bzentse bzomwe angakwanise kuti asamalire banja lace. Tenepo Bibliya limbati ali-wentse omwe ambasamalira lini banja lace ‘ngwakuipa kuposa munthu omwe alibe cikhulupiro.’ (1 Timotio 5:8) Penu ndimwe msolo wa banja, mun’funika kuphata basa mwa nyongo kuti musamalire banja lanu. Pinango mumbakomedwa lini na basa lomwe mumbaphata, tsono dziwani kuti kusamalira banja lanu kumbakondwesa Yahova.
12. Kodi kuphata basa mwa nyongo na mwa kukhulupirika kumbatithandiza tani?
12 Phatani basa mwa mphanvu ndipo citani bzinthu mwa kukhulupirika. Bzimwebzi bzin’dzakuthandizani kuti mumbakondwe na basa lanu. (Mimwani 12:24; 22:29) Bzingacitisembo kuti patrau wanu ayambe kukukhulupirani. Wanthu ambapasa basa munthu wakukhulupirika thangwe angawabere lini kobiri, bzinthu bza pa basapo, ayai nthawe yawo. (Wayefezo 4:28) Ndipo cakufunika kwene-kwene n’cakuti Yahova ambawona pomwe imwepo mukuphata basa mwa nyongo na mwa kukhulupirika. Ndipo mumbakhala na ‘cikumbu-mtima cakulungama’ thangwe mumbadziwa kuti mukukondwesa Yahova omwe mumbamufuna.—Wahebereu 13:18; Wakoloso 3:22-24.
13. Kodi n’ciyani cingacitike tikambacita bzinthu mwakukhulupirika?
13 Kumbukirani kuti khalidwe lanu labwino limbacitisa kuti wanthu atumbize Yahova. Limweri ni thangwe linango lomwe limbaticitisa kuti timbakomedwe na basa lathu. (Tito 2:9, 10) Khalidwe lanu labwino lingacitise kuti wanthu winango omwe mumbaphata nawo basa ayambe kufuna kupfunza Bibliya.—Werengani Mimwani 27:11; 1 Pedru 2:12.
KODI NI MTUNDU UPONI WA BASA LOMWE TINGASANKHULE?
14-16. Kodi tin’funika kukumbukira nfundo iponi tikafuna kusankhula basa?
14 M’Bibliya mulibe mtundu wa mabasa yomwe Mkristau an’funika kuphata ayai yomwe an’funika lini kuyaphata. Koma muna malango yomwe yangatithandize kucita bzakusankhula bzabwino pa nkhani ya basa. (Mimwani 2:6) Mwakuphatisa basa nfundo za m’Bibliya, tin’funika kubzibvunza mibvunzo yakutewerayi.
Nyang’anani basa lomwe limbabverana na nfundo za Yahova
15 Kodi basali likundicitisa kuti nimbacite bzinthu bzomwe Yahova ambalewa kuti mpsakuipa? Ifepano tapfunza bza makhalidwe yomwe Yahova ambayawenga, ninga kunama na kuba. (Kufuluka 20:4; Mabasa 15:29; Wayefezo 4:28; Cibvumbulutso 21:8) Tenepo tin’funika kumbatcenkha basa liri-lentse lomwe limbabverana lini na mitemo ya Yahova.—Werengani 1 Juwau 5:3.
16 Kodi basali limbalimbisa khalidwe lomwe Yahova ambaliwenga? Mwa ciratizo, kumbukirani kuti mwagumana basa lakumanga gereja. Mpsakuphonyeka lini kucita basa la bzakumanga-manga. Tsono timbadziwa makumbukidwe ya Yahova pa nkhani ya kunamata kwakunama. N’cadidi kuti imwepo mungadakhala lini mucinamata nawo pabodzi ayai kucita bzinthu bzinango bzakubverana na kunamata kwakunama. Tsono kumanga gerejako kungakhale lini kuthandizira cinthu comwe Yahova ambaciwenga?—Cibvumbulutso 18:4.
17. Kodi n’ciyani cingatithandize kucita bzakusankhula bzomwe bzimbakondwesa Yahova?
17 Tikambaphatisa basa nfundo za m’Bibliya zin’dzatithandiza kukhala ninga wanthu omwe ambalewedwa pa cinembo ca Wahebereu 5:14, ‘omwe pakuphatisa basa mphanvu zawo zakuzindikira, apfunzisa mphanvuzo kusiyanisa cabwino na cakuipa.’ Bzibvunzeni kuti: ‘Kodi nin’dzasunamisa lini abale ndikayamba kuphata basa limweri? Kodi basa limweri lindicitisa kuti ndisiye banja langu ndiciyenda kukaphata basa ku dziko linango? Tsono bzimwebzi bzingatokonye tani banja langu?’
‘TSIMIKIZANI KUTI MPSIPONI BZINTHU BZAKUFUNIKA KWENE-KWENE’
18. Thangwe ranyi nthawe zinango bzimbakhala bzakunesa kuti timbaikhe bzinthu bzauzimu pa mbuto yakuyamba?
18 Mu ‘ntsiku zakumalizira na zakunesa’ zino bzingakhale bzakunesa kuikha pa mbuto yakuyamba kunamata kwathu Yahova. (2 Timotio 3:1) Ntsiku zino bzingakhale bzakunesambo kwene-kwene kugumana basa na kukhalisa pa basapo. Timbafunikira kusamalira mabanja yathu, koma timbadziwa kuti kunamata kwathu Yahova n’kwakufunika kukhala pa mbuto yakuyamba. Tin’funika lini kubvuma kuti kobiri ayai cuma bzikhale bzinthu bzakufunika kwene-kwene pa moyo wathu. (1 Timotio 6:9, 10) Tenepo, tingacite tani kuti ‘timbatsimikizire bzinthu bzakufunika kwene-kwene’ ndipo pa nthawe ibodzi-bodziyo ticisamalira banja lathu?—Wafiripo 1:10.
19. Kodi kukhulupira Yahova kumbatithandiza tani kuleka kucita thupo kwene-kwene na basa?
19 Khulupirani Yahova nthawe zentse. (Werengani Mimwani 3:5, 6.) Ifepano tin’dziwa kuti Mulungu ambadziwa bzomwe timbafunikira ndipo ambacita nafe thupo. (Psalymo 37:25; 1 Pedru 5:7) Bibliya limbati: ‘Moyo wanu ukhale wakusaya kufunisisa kobiri, koma mumbakomedwe na bzomwe munabzo kale pa nthaweyo. Pakuti Mulungu adati: “Ndin’dzakusiyani lini na pang’onopo ne kukuthawani.”’ (Wahebereu 13:5) Yahova ambafuna lini kuti timbakhale na thupo kwene-kwene kuti tin’samalira tani banja lathu. Iye nthawe zentse ambalatiza kuti angakwanise kusamalira wanthu wace. (Mateu 6:25-32) Bziribe basa momwe bzinthu bziriri pa moyo wathu, nthawe zentse timbacita nyongo kuti tigumane mpata wakupfunza Fala la Mulungu, kupalizira bzipsa bzabwino, pabodzi na kugumanika ku mitsonkhano.—Mateu 24:14; Wahebereu 10:24, 25.
20. Kodi tingakhale tani na moyo wakusaya kufuna bzinthu bzizinji?
20 Timbakhale na diso la kunyang’anisa pa cinthu cibodzi. (Werengani Mateu 6:22, 23.) Bzimwebzi bzikuthandauza kukhala na moyo wakusaya kufuna bzinthu bzizinji kuti makumbukidwe yathu yakhale pa kutumikira Yahova. Tikudziwa kuti kungakhale kupusa kubvuma kuti kobiri, moyo wa bwino, ayai bzinthu bzipsa bzikhale bzakufunika kwene-kwene kwa ifepano kuposa uxamwali bwathu na Yahova. Kodi tingacite tani kuti bzinthu bzakufunika kwene-kwene bzimbakhale pa mbuto yakuyamba? Timbacite nyongo yakutcenkha kugwera m’mangawa. Penu mwagwera kale m’mangawa, citani nyongo yakucepesa mangawayo ayai kuyamalisa. Tikasaya kusamala, tingamale nthawe izinji pabodzi na mphanvu zathu pa bzinthu bzakusaya kufunika ndipo bzingatinese kumbakhala na nthawe yakumbacita mpembo, kupfunza Bibliya na kupalizira. M’mbuto mwakuti bzinthu bzakuthupi bzidzonge moyo wathu wauzimu, tin’funika kumbakomedwa na bzinthu bzomwe tinabzo kale ninga ‘cakudya na bzakubvala.’ (1 Timotio 6:8) Bziribe basa momwe bzinthu bziriri pa moyo wathu, mpsabwino kuti nthawe zentse timbakumbukire bzomwe tingacite kuti timbagumane nthawe yakutumikira Yahova.
21. Thangwe ranyi tin’funika kusankhula bzinthu bzakufunikira kukhala pa mbuto yakuyamba pa moyo wathu?
21 Bzinthu bzakufunika kwene-kwene bzimbakhale pa mbuto yakuyamba. Tin’funika kuphatisa basa mwa nzeru nthawe, mphanvu pabodzi na cuma cathu. Tikasaya kusamala, tingambadzonge nthawe izinji pa bzinthu bzakusaya kufunika kwene-kwene, ninga mapfunziro yapadzulu ayai kufuna kobiri. Jezu adati: ‘pitirizani . . . kuikha pakutoma, Umambo.’ (Mateu 6:33) Bzinthu bzomwe timbacita ntsiku zentse, bzakulinga bzathu na bzakusankhula bzathu pabodzi na bzomwe timbafuna, bzimbalatiza bzinthu bzomwe timbawona kuti mpsiponi bzakufunika kwene-kwene pa moyo wathu.
BASA LAKUFUNIKA KWENE-KWENE LOMWE TIN’FUNIKA KULIPHATA
22, 23. (a) Kodi ni basa liponi lakufunika kwene-kwene lomwe Akristau an’funika kuliphata? (b) Kodi n’ciyani comwe cingatithandize kuti timbakondwe na basa lathu?
22 Basa lakufunika kwene-kwene lomwe tin’funika kuliphata ni kutumikira Yahova na kupalizira bzipsa bzabwino. (Mateu 24:14; 28:19, 20) Mwakundendemerana na Jezu, timbafunisisa kucita bzentse bzomwe tingakwanise kuti ticite basali. Winango afulukira ku mbuto komwe kukufunikira apalizi azinji wa Umambo. Ndipo winango akupfunza cirewedwe cipsa na cakulinga cakuti apalizire wanthu omwe ambalewalewa cirewedweco. Cezani na wanthu ninga amwewa, ndipo abvunzeni bzomwe adacita kuti akwanise kucita bzimwebzo. An’dzakuuzani kuti iwo mbakukondwa kwene-kwene pa moyo wawo.—Werengani Mimwani 10:22.
Kutumikira Yahova ni basa lakufunika kwene-kwene lomwe tingacite
23 Ntsiku zino, ifepano timbafunikira kuphata basa maora mazinji ayai kuthumizira pomwe mabasa yanango na cakulinga ca kusamalira banja lathu. Yahova ambadziwa bzimwebzi, ndipo ambatendambo nyongo iri-yentse yomwe timbacita pakusamalira banja lathu. Bziribe basa mtundu wa basa lomwe timbaphata, mpsakufunika kupitiriza kutewezera Yahova pabodzi na Jezu pakuphata basa mwa nyongo. Ndipo mpsakufunika kukumbuka kuti basa lakufunika kwene-kwene ni kutumikira Yahova na kupalizira bzipsa bzabwino bza umambo bwa Mulungu. Tikambacita tenepo tin’dzakhala wakukondwa.
