1-3. (a) Kodi ni mphaso iponi yabwino yomwe Yahova adatipasa? Ndipo ni bzinthu bziponi bzomwe bzingalatize kuti tinkuyiphatisa lini bwino basa? (b) Kodi tingayiphatise tani basa mphaso imweyi?

TIYEZEZERE kuti baba wapasa mwana wace njinga. Babayo ankukondwa pakudziwa kuti apasa mwana wace mphaso yakupambulika kwene-kwene. Tsono, kodi babayo angabve tani bzicikhala kuti mwanayo ambafambisa mwakusaya kusamala, mwakuti ntsiku inango adagudza munthu mpaka munthuyo kupwetekeka?

² Yahova ni mpasi wa ‘mphaso iri-yentse yabwino na yakulungamiratu.’ (Tiyago 1:17) Ibodzi mwa mphaso zimwezi ni mphaso ya kulewalewa. Mphaso imweyi imbatithandiza kufotokoza makumbukidwe yathu na momwe tinkubvera mu mtima. Timbakwanisambo kulewa bzinthu bzakuthandiza na bzakukondwesa wanthu. Tsono bzakulewalewa bzathu bzingapwekete ayai kusunamisa winango.

³ Mafala yana mphanvu kwene-kwene ndipopa Yahova ambatipfunzisa momwe tingambaphatisire basa mu njira yakuthemera mphaso ya kulewalewayi. Iye ambatiuza kuti: ‘Mafala yali-yentse yakubvunda yaleke kucoka pa mulomo panu, koma yali-yentse yomwe njabwino kuti yalimbise mwakubverana na momwe bzingafunikire, kuti yakondwese anyakuyabva.’ (Wayefezo 4:29) Mbatiwoneni momwe tingaphatisire basa mphaso yakucokera kwa Mulunguyi mu njira yomwe ingakondwese  Yahova na kulimbisa winango.

4, 5. Kodi tingapfunze ciyani m’bukhu la Mimwani pa nkhani ya mphanvu ya mafala?

⁴ Ninga momwe tawonera kale mafala yana mphanvu, ndipopa tin’funika kusamala na bzomwe timbalewalewa na momwe timbalewalewera. Cinembo ca Mimwani 15:4 cimbati: ‘Lirime lakuderekha ni muti wa moyo, koma mafala yakuipa yambakalipisa.’ Ninga momwe muti wa m’thunzi wabwino umbatsangalazira, mafala ya bwino yambalimbisambo munthu. Tsono, mafala yakupweteka yambakalipisa munthu ndipo yambacitisa kuti ambabziwone ninga wakusaya kufunika.—Mimwani 18:21.

⁵ Cinembo ca Mimwani 12:18 cimbati: ‘Alipo munthu omwe ambalewalewa mwakusaya kukumbuka ninga kulasa kwa mphanga.’ Mafala yakulewedwa mwakusaya kukumbuka bwino yangapweteke winango ndipo yangadzonge uxamwali. Pinango imwepo mungakumbukire pomwe munthu munango adalewalewa mafala yomwe yadakukalipisani. Tsono cinembo ca Mimwanici cimbapitiriza kulewa kuti: ‘Lirime la wanthu wanzeru limbalimbisa.’ Mafala yabwino yangapoze munthu omwe adapwetekedwa mu mtima ndipo yangacitisembo kuti wanthu omwe akhadakalipizana ayambire pomwe kubverana. (Werengani Mimwani 16:24.) Tikambakumbukira momwe mafala yathu yangatokonyere winango, tin’dzasamala pakulewalewa.

6. Thangwe ranyi bzimbakhala bzakunesa kuti timbalewelewe bzinthu bzabwino?

⁶ Thangwe linango lomwe tin’funikira kusamala na bzakulewalewa bzathu ndakuti tentse ndife wanthu wakuperewera. ‘Pakuti mtima wa munthu ngwakuipa,’ ndipo mafala yathu yambawonesa bzomwe bziri mu mtima mwathu. (Ciyambo 8:21; Luka 6:45) Ndipo bzimbakhala bzakunesa kuti timbalewelewe bwino. (Werengani  Tiyago 3:2-4.) Tsono tin’funika kucita nyongo kuti timbalewelewe bzinthu bzabwino kwa anzathu.

7, 8. Kodi bzakulewalewa bzathu bzingatokonye tani uxamwali bwathu na Yahova?

⁷ Tin’funikambo kusamala na bzakulewalewa bzathu na momwe timbalewalewera thangwe bzimwebzi bzimbatokonya kunamata kwathu Yahova. Cinembo ca Tiyago 1:26 cimbati: ‘Penu munthu ankubziwona ningati ambanamata Mulungu, koma ankukwanisa lini kutonga bwino lirime lace, munthu umweyo ankunamiza mtima wace, ndipo kunamata kwace n’kwapezi.’ Mafala yakuti ‘n’kwapezi’ yangathandauzembo kuti ‘n’kwakusaya basa.’ (1 Wakolinto 15:17) Tenepo tikasaya kusamala na bzakulewalewa bzathu, tingadzonge ayai tingapfudze uxamwali bwathu na Yahova.—Tiyago 3:8-10.

⁸ Kulewa cadidi, tina mathangwe yakubveka yakuti timbasamale na bzomwe timbalewalewa na momwe timbalewalewera. Tsono kuti timbaphatise basa bwino mphaso yakulewalewayi mu njira yomwe Yahova ambafuna, tin’funika kudziwa kalewelewedwe komwe tin’funikira kukatcenkha.

9, 10. (a) Kodi n’ciyani comwe wanthu azinji ntsiku zino ambafuna kulewalewa? (b) Thangwe ranyi tin’funika kutcenkha kutukwana?

⁹ Wanthu azinji ntsiku zino ambafuna kwene-kwene kutukwana ayai kulewalewa mafala yakusaya kuthemera. Wanthu azinji ambakumbuka kuti angabvedwe bzomwe ankulewa, kokha akambalewalewa mwakutukwana ayai kulewa mafala yakunyoza. Wanthu winango ambalewa nthabwala zakutukwana na cakulinga cakuti asekese wanthu. Tsono mpostolo Paulo adalewa kuti: ‘Bzentsenebzi bzitayeni kutali na imwe: ukali, uipi, mafala yakunyantsa na maceza ya kupusa yakucokera pa mulomo.’ (Wakoloso 3:8) Ndipo iye adalewambo kuti: ‘Nthabwala zakutukwana’ zilekeretu kumbalewedwa pakati pa Akristau.—Wayefezo 5:3, 4.

¹⁰ Yahova pabodzi na atumiki wace ambawenga kwene-kwene nthabwala zakutukwana. Mafala yakutukwana ni bzinthu bzakupswipa. M’Bibliya, ‘bzinthu bzakupswipa’ bzimbaphatanidza ‘mabasa ya thupi.’ (Wagalata 5:19-21) ‘Bzinthu bzakupswipabzi’ bzingaphatanidzembo pikado zakusiyana-siyana, ndipo khalidwe liri-lentse lakupswipa lingatsogolere munthu ku khalidwe linango lakupswipa. Penu munthu ana cizolowezi cakumbalewalewa mafala yakuipa ayai yamaika ndipo ankulamba kusiya, bzimwebzi bzingacitise kuti munthuyo acosedwe m’gwere.—2 Wakolinto 12:21; Wayefezo 4:19; onani Mafala Yakuthumizira 23.

11, 12. (a) Kodi magunkha n’ciyani? (b) Thangwe ranyi tin’funika kutcenkha kulewa wanthu winango pa nkhani zomwe tiribe nazo umboni?

¹¹ Tin’funikambo kutcenkha magunkha. Mwacibadwa wanthufe timbafuna kudziwa momwe anzathu aliri ndipo timbafunambo kufotokozera wanthu nkhani zakulewa bza abale ayai axamwali wathu. Napo m’magole dzana yakutoma, Akristau wakuyambirira akhafuna kudziwa momwe abale na mpfumakazi akhaliri na momwe angawathandizire. (Wayefezo 6:21, 22; Wakoloso 4: 8, 9) Tsono mpsakusaya kunesa kuti maceza yakulewa bza wanthu winango yasanduke magunkha. Penu tingabwerezere magunkhayo, tingakhale tinkulewa bzinthu bzomwe mpsacadidi lini ayai bzinthu bzomwe bzikhali bzacintsintsi. Tikasaya kusamala maceza ninga yamweya, yangaticitise kuyamba kumbalewa munthu pa bzinthu bzomwe bziribe umboni. Bzimwebzi ni bzomwe Afarizi akhacita, iwo akhamulewa Jezu pa bzinthu bzomwe akhalibe nabzo umboni. (Mateu 9:32-34; 12:22-24) Nkhani zakunama zimbaipisa mbiri ya munthu, zimbacitisa wanthu kusaya kubverana ndipo zimbadzonga uxamwali.—Mimwani 26:20.

¹² Yahova ambafuna kuti tiphatise basa mafala yathu kuti tithandize na kulimbisa winango sikuti yabwerese ciwengo. Yahova ambawenga wanthu wale omwe ambayambisa ‘ndewo pakati pa abale.’ (Mimwani 6:16-19) Wakuyamba kulewa gunkha akhali Sathani Dyabu, omwe adanamizira Mulungu. (Cibvumbulutso 12:9, 10) Ntsiku zino wanthu azinji ambafuna kunamizira anzawo. Koma bzimwebzi bzin’funika lini kucitika pakati pa gwere Lacikristau. (Wagalata 5:19-21) Tenepo tin’funika kusamala na bzomwe timbalewalewa ndipo tin’funikambo kuyamba kukumbuka bwino tikanati kulewalewa. Tikanati kuuza wanthu nkhani zakulewa bza wanthu winango tin’funika kubzibvunza kuti: ‘Kodi bzomwe ndin’funa kulewabzi mpsacadidi? Kodi bzin’latiza kuti ndine walufoyi? Kodi mpsakuthandiza? Kodi munthu omwe ndinkumulewayo akabva bzin’dzakhala tani? Kodi inepano ningabve tani munthu munango acindilewa bzimwebzi?’—Werengani 1 Watesalonika 4:11.

13, 14. (a) Kodi kumbalewalewa mafala yakutukwana kumbagopswa tani? (b) Kodi kupswula n’kutani, ndipo thangwe ranyi Akristau an’funika kutcenkha kumbapswula wanthu?

¹³ Nthawe zinango tentsenefe timbalewalewa bzinthu bzomwe patsogolo pace bzimbadzatisunamisa. Tsono bziri lini bwino kukhala na cizolowezi ca kumbanyoza wanthu winango ayai kumbawalewa mafala yakuipa. Akristaufe tin’funika kutcenkha kulewalewa mafala ‘yakutukwana .’ Mpostolo Paulo adati: ‘Musiyiretu kukoya ca ku mtima, kupsa mtima, ukali, mulomo, kutukwana pabodzi na kuipa kuli-kwentse.’ (Wayefezo 4:31) Mabibliya manango ‘mafala yakutukwana’ adayasandulizira kuti ‘mafala yakuipa,’ ‘mafala yakupweteka’ na ‘mafala yakunyoza.’ Mafala yakutukwana yambacosera munthu ulemu ndipo yambacitisa kuti ambabziwone ninga wakusaya kufunika. Wana ambacedwa lini kukalipa ayai kusunama, tenepo tin’funika kusamala kwene-kwene tikambalewalewa nawo.—Wakoloso 3:21.

¹⁴ Bibliya limbaticenjeza kuti tin’funika kusamala kwene-kwene na mafala yanango yakuipa yomwe ni—kupswula. Kupswula kumbathandauza kumbalewalewa mafala yakuipa na yakunyoza na cakulinga cakuti munthu ankulewedwayo akalipe. Ndipo mpsakusunamisa penu munthu angambacitire bzimwebzi mkazi, mwamuna ayai wana wace. Kulewa cadidi, munthu omwe angalambe kusiya khalidwe lace la kupswula angacosedwe m’gwere. (1 Wakolinto 5:11-13; 6:9, 10) Ninga momwe tapfunzira kale, tikambatukwana ayai kumbalewa nkhani zakunama, tingadzonge uxamwali bwathu na Yahova pabodzi na wanthu winango.

15. Kodi ni mafala ya mtundu wanyi yomwe yangacitise kuti wanthu akhale pa uxamwali?

¹⁵ Kodi tingaphatise tani basa mphaso yakulewalewa mu njira yomwe Yahova ambafuna? N’cadidi kuti Bibliya limbaleweratu lini ndendende bzomwe tin’funika kulewa na bzomwe tin’funika lini kulewa, koma iro limbatilimbisa kuti timbalewelewe kokha mafala ‘yomwe njabwino na yakulimbisa.’ (Wayefezo 4:29) Mafala yakulimbisa yambakhala yakucena, yakudeka mtima na yacadidi. Yahova an’funa kuti timbaphatise basa mafala yathu kuti timbathandize na kulimbisa wanthu winango. Koma bzimwebzi mpsakupusa lini. Pambafunika nyongo ikulu kwene-kwene kuti tilewe bzinthu  bzabwino kusiyana na kulewa bzinthu bzakuipa. (Tito 2:8) Mbaticezeraneni njira zinango za momwe tingalewelewere kuti tilimbise wanthu winango.

16, 17. (a) Thangwe ranyi mpsakufunika kutenda wanthu winango? (b) Kodi ni wanthu aponi omwe tingawatende?

¹⁶ Yahova na Jezu ambafuna kwene-kwene kutenda, ndipo tin’funa kuwatewezera. (Mateu 3:17; 25:19-23; Juwau 1:47) Tsono kuti tikwanise kutenda munthu m’njira yakumulimbisa, tin’funika kumbakumbuka bwino pomwe tinati kulewalewa naye ndipo tin’funikambo kumulatiza kuti timbamukumbukira. Cinembo ca Mimwani 15:23 cimbati: ‘Mafala yakulewedwa pa nthawe yakuthemera njabwino kwene-kwene.’ Timbalimbisidwa kwene-kwene munthu munango akatitenda kucokera pantsi pa mtima thangwe rakuti taphata basa mwa nyongo ayai thangwe rakuti tacita bzinthu bzinango.—Werengani Mateu 7:12; onani Mafala Yakuthumizira 27.

¹⁷ Penu mungakhale na cizolowezi cakumbawona bzinthu bzabwino kwa winango, bzingakhale bzakusaya kunesa kumbawatenda. Mwa ciratizo, pinango mungazindikire kuti m’bale munango wakonzekera bwino nkhani yace ayai ambacita nyongo yakuti ambapereke mitawiro pa mitsonkhano. Pinango pana tswaka lomwe limbakhala lakukhulupirika ku xikola, ayai wacikulire omwe ambagumanika mu utumiki nthawe zentse. Kutenda wanthu amwewa kungawalimbise kwene-kwene. Ndipo mpsakufunikambo kwene-kwene kuti mwamuna ambauze mkazi wace kuti ambamufuna na kuti ambatenda bzomwe iye ambacita. (Mimwani 31:10, 28) Ninga muti omwe umbafunikira ceza na madzi, wanthu ambafunikirambo kutendedwa kuti akhale wakukondwa. Maka-maka wana ndiwo omwe ambafunikira kutendedwa. Tenepo nyang’anani mpata wakuwatenda thangwe ra makhalidwe yawo yabwino pabodzi na  nyongo yawo. Kuwatendako kungawacitise kukhala wakukhwimika kuti apitirize kucita bzinthu bzabwino.

18, 19. Thangwe ranyi tin’funika kucita nyongo ya kumbalimbisa winango, ndipo tingacite tani bzimwebzi?

¹⁸ Tikambalimbisa na kutsangalaza winango, timbakhala tinkutewezera Yahova. Ndipo Yahovayo ambasamalira wanthu ‘wakupanikizika’ na ‘wentse omwe ana mitima yakusweka.’ (Zaiya 57:15) Yahova ambafuna kuti tipitirize ‘kumbalimbisana’ na kuti timbalewelewe mafala yakutsangalaza ‘anyakusunama.’ (1 Watesalonika 5:11, 14) Tikambayeza kucita bzimwebzi na nyongo, Yahova ambawona ndipo ambatenda nyongo yathuyo.

 ¹⁹ Pinango mungazindikire kuti munthu munango wa m’gwere adasunama ayai ana thupo kwene-kwene. Kodi mungalewelewe ciyani kuti mumuthandize? Pinango mungakwanise lini kumalisa bvutolo, koma imwepo mungalatize munthuyo kuti mumbacita naye thupo. Mwa ciratizo, munganyang’ane nthawe yakuti muceze naye na kumulimbisa. Pinango mungawerenge naye cinembo cakulimbisa ayai mungamukumbire kuti mupembe naye pabodzi. (Psalymo 34:18; Mateu 10:29-31) Mutsimikizireni kuti abale na mpfumakazi wa m’gwere ambamufuna kwene-kwene. (1 Wakolinto 12:12-26; Tiyago 5:14, 15) Ndipo pakulewalewapo mutsimikizireni kuti bzomwe munkulewabzo mpsacadidi na kuti munkubzikhulupira.—Werengani Mimwani 12:25.

20, 21. Kodi n’ciyani comwe cimbacitisa wanthu kubvuma malango mwakusaya kunesa?

²⁰ Tingalimbise wanthu winango mwa kuwapasa malango yabwino. Pakuti ndife wanthu wakuperewera, kawiri-kawiri timbafunikira malango. Cinembo ca Mimwani 19:20  cimbati : ‘Tetekera malango, ndipo bvuma kulangidwa, kuti udzakhale wanzeru kutsogolo.’ Ni akulu lini wokha wa m’gwere omwe angapereke malango. Abereki an’funika kuperekambo malango kwa wana wawo. (Wayefezo 6:4) Mpfumakazi zokha-zokha zingapasanembo malango yabwino. (Tito 2:3-5) Pakuti timbafuna mpfumakazi na abale wathu, tin’funika kutsimikiza kuti tinkuwapasa malango mu njira yakusaya kuwakalipisa. Kodi tingacite tani bzimwebzi?

²¹ Pinango imwepo munkukumbukira nthawe yomwe munthu munango adakupasani malango yabwino yomwe mulibe kuneseka kuyabvuma. Kodi n’ciyani comwe cidakucitisani kuwona kuti malangoyo yakhali yakuthandiza? Mpsakusaya kupenukisa kuti mudawona kuti munthuyo ambakukumbukirani. Pinango adapereka malangoyo mwa lufoyi na mwa kudeka mtima. (Wakoloso 4:6) Mpsakuwonekeratu kuti malangoyo yadacokera m’Bibliya. (2 Timotio 3:16) Penu tin’cita kuwerenga cinembo ayai kufotokoza nfundo yace, tin’funika kutsimikizira kuti malango yomwe tinkuperekayo yankucokeradi m’Bibliya. Tin’funika lini kungingimiza wanthu kuti atewere makumbukidwe yathu ndipo ne tin’funikambo lini kufotokoza bzinembo mu njira inango na cakulinga cakuti bzibverane na makumbukidwe yathuyo. Kukumbukira momwe munthu munango adakupasirani malango, kungakuthandizeni mukakhala munkuperekambo malango kwa winango.

22. Kodi imwepo mun’funa kumbaphatisa tani basa mphaso yanu yakulewalewa?

²² Kulewalewa ni mphaso yakucokera kwa Mulungu. Lufoyi lathu kwa iye limbaticitisa kuphatisa basa bwino mphaso imweyi. Ndipo kumbukirani kuti mafala yana mphanvu yakupweteka ayai yakukondwesa munthu. Tenepo, mbaticiteni bzentse bzomwe tingakwanise kuti tiphatise basa mafala yathu kuti tilimbise na kutsangalaza winango.