Msolo 1
Mulungu Angatifune Mpaka Kale-kale
‘Pakuti kufuna Mulungu kumbathandauza kusunga malamulo yace; ndipo malamulo yaceyo njakulemera lini.’—1 JUWAU 5:3.
1, 2. N’thangwe ranyi imwepo mumbamufuna Yahova Mulungu?
KODI imwepo mumbamufuna Mulungu? Pinango imwepo mumbamufuna kwene-kwene Mulungu ndipopa mudabzipereka kwa iye. Ndipo pinango mumbawona kuti iye ni xamwali wanu wa pa mtima. Tsono pomwe imwepo mukhanati kufuna Yahova, iye akhakufunani kale. Bibliya limbati: ‘Ifepano timbalatiza lufoyi thangwe iye ndiye omwe adayamba kutifuna.’—1 Juwau 4:19.
2 Kumbukirani njira zentse zomwe Yahova ambalatizira lufoyi lace kwa ifepano. Iye adatipasa dziko lakudekali na bzomwe timbafunikira kuti tikhale na moyo wakukondwa. (Mateu 5:43-48; Cibvumbulutso 4:11) Iye an’funa kuti tikhale naye pa uxamwali bwabwino, ndipo adacitisa kuti bzimwebzi bzikwanisike mwa kutipasa mwayi wakupfunza bza iye. Tikambawerenga Bibliya, timbakhala tikutetekera Yahova. Ndipo tikambapemba, Yahova ambakhala akutitetekerambo. (Psalymo 65:2) Iye ambatitsogolera na kutilimbisa mwa kuphatisa basa mphanvu ya mzimu wace wakucena. (Luka 11:13) Mpaka iye adatumiza Mwana wace wakufunidwa pantsi pano kuti adzatipulumuse ku pikado na infa.—Werengani Juwau 3:16; Waroma 5:8.
3. Kodi tingacite ciyani kuti uxamwali bwathu na Yahova bukhale mpaka kale-kale?
3 Kumbukirani nthawe yomwe xamwali wanu wa pa mtima omwe adakhala namwe pabodzi pa nthawe yakunesa na pa nthawe ya bwino. Bzimbafunika nyongo ikulu kwene-kwene kuti tipitirize kukhala pa uxamwali ninga bubwebu. Bzimwebzi ndibzo bzomwe bzimbacitika na uxamwali bwathu na Yahova, iye ni xamwali wa bwino omwe tingakhale naye pa moyo wathu. Uxamwali bwathu na iye bungakhale mpaka kale-kale. Tenepo Bibliya limbatiuza kuti: ‘Pitirizani kucita bzinthu bzomwe bzingacitise kuti Mulungu akufuneni.’ (Juda 21) Kodi tingacite tani bzimwebzi? Bibliya limbatawira kuti: ‘Pakuti kufuna Mulungu kumbathandauza kusunga malamulo yace; ndipo malamulo yaceyo njakulemera lini.’—1 Juwau 5:3.
BZOMWE ‘KUFUNA MULUNGU KUMBATHANDAUZA’
4, 5. (a) Kodi ‘kufuna Mulungu’ kumbathandauza ciyani? (b) Kodi lufoyi lanu kwa Yahova lidayamba tani kukula?
4 Kodi Bibliya limbakhala linkuthandauza ciyani likambalewa kuti ‘kufuna Mulungu’? Bzimwebzi bzimbathandauza lini Mulungu kufuna ifepano koma bzimbathandauza ifepano kufuna Mulunguyo. Kodi mukukumbukira pomwe mudayamba kufuna Yahova?
Imwepo mukabzipereka na kubatizidwa, mumbakhala munkulatiza kuti mumbafuna Yahova ndipo mun’funa kumubvera mpaka kale-kale
5 Kumbukirani momwe mudabvera pomwe mudapfunza pakuyamba kuti Yahova an’funa kuti imwepo mukhale mpaka kale-kale mu dziko lipsa m’paraizo. Imwepo mudapfunza bzentse bzomwe Mulungu adacita kuti bzimwebzi bzikwanisike, ndipo mudazindikira momwe iliri yakufunika kwene-kwene mphaso yomwe Yahova adatipasa pomwe adatumiza Mwana wace caiye pa dziko la Pantsi. (Mateu 20:28; Juwau 8:29; Waroma 5:12, 18) Mwakusaya kupenukira, pomwe mudapfunza kuti Yahova ambakufunani, bzimwebzi bzidakutokonyani kwene-kwene ndipo bzidacitisa kuti imwepo muyambembo kumufuna.—Werengani 1 Juwau 4:9, 10.
6. Kodi kufuna munthu kumbaphatanidza ciyani? Kodi n’ciyani comwe mwacita kale kuti mulatize kuti mumbafuna Mulungu?
6 Koma kufuna Mulungu ni ciyambi basi. Mwa ciratizo, ifepano tikafuna munthu munango, timbafunika kucita bzizinji sikuti kundolewa mwa mafala kuti ‘nimbakufuna.’ Lufoyi limbaticitisa ifepano kucita cinthu ciri-centse comwe cingacitise munthuyo kukhala wakukondwa. Mwakundendemerana na bzimwebzi, lufoyi lanu kwa Yahova lakucitisani kukhala na moyo omwe ungakondwese Yahovayo. Pomwe lufoyi limweri likhakula, mwakusaya kupenukira mudabzipereka kwa iye mwa kubatizidwa. Mwa kucita bzimwebzi, mudapicira Yahova kuti mun’dzamutumikira. (Werengani Waroma 14:7, 8.) Kodi mungakwanise tani kuteweza piciro limweri?
‘KUSUNGA MALAMULO YACE’
7. Penu timbafuna Yahova n’ciyani comwe timbacita? Kodi yanango mwa malamulo yaceyo ngaponi?
7 Pakuti ifepano timbafuna Yahova, ndipopa timbasunga ‘malamulo yace.’ Kodi timbacita tani bzimwebzi? Timbamubvera Yahovayo. Bibliya limbatithandiza kudziwa bzinthu bzomwe Yahova ambayipidwa nabzo. Mwa ciratizo, Yahova ambatiuza kuti n’kuphonyeka kumwa mpaka kuledzera, kuba, kunama, kugonana na munthu omwe ni mkazi lini wathu ayai ni mwamuna lini wathu, kunamata munthu ayai kunamata cinthu m’mbuto mwa kunamata Yahova.—1 Wakolinto 5:11; 6:18; 10:14; Wayefezo 4:28; Wakoloso 3:9.
8, 9. Kodi tingadziwe tani bzomwe Yahova ambafuna kuti ticite pa nkhani yomwe Bibliya liribe kuleweratu? Perekani ciratizo.
8 Tsono kuti tikondwese Yahova, tin’funika kucita bzizinji kuposa kundobvera malamulo yace. Iye alibe kutipasa ndondomeko ikulu ya malamulo yace pa cinthu ciri-centse pa moyo wathu. Tenepo nthawe zinango, m’Bibliya mungagumanike lini lamulo lomwe lingaleweretu bzomwe tin’funika kucita. Pa nkhani imweyi, kodi n’ciyani comwe tingacite kuti tikhale na cakusankhula cabwino? (Wayefezo 5:17) M’Bibliya timbagumana mitemo ya bwino yomwe imbatithandiza kudziwa makumbukidwe ya Yahova pa nkhani zakusiyana-siyana. Tikambawerenga Bibliya timbamudziwa bwino Yahova. Timbapfunza momwe iye ambakumbukira, ndipo timbadziwambo bzinthu bzomwe iye ambafuna na bzomwe ambawenga.—Werengani Psalymo 97:10; Mimwani 6:16-19; onani Mafala Yakuthumizira 1.
9 Mwa ciratizo, kodi tingadziwe tani bzomwe tin’funika kuwona pa TV ayai pa Internet? Bibliya limbafotokoza lini bzentse bzomwe tingacite pa nkhani zimwezi. Koma Yahova watipasa mitemo yomwe imbatithandiza kucita cakusankhula cabwino. Ndipo timbadziwa kuti mbali ikulu ya bzinthu bzakusenzeka nabzo nthawi zathu zino, bzimbalimbisa kuphana pabodzi na kugonana kwa wanthu wakusaya kulowolana. Tsono m’Bibliya, Yahova ambatiuza kuti ‘iye ambawenga kwene-kwene ali-wentse omwe ambafuna ciwembo,’ ndipo iye ‘an’dzayeruza anzazi na anyaupombo.’ (Psalymo 11:5; Wahebereu 13:4) Kodi mitemoyi imbatithandiza tani kucita cakusankhula cabwino? Tikadziwa bzomwe Yahova ambabziwenga ayai bzomwe ambalewa kuti mpsakuphonyeka, ifepano tin’funika kubzitcenkha.
10, 11. Thangwe ranyi timbabvera Yahova?
10 Thangwe ranyi timbabvera Yahova? Ni thangwe lini la kutcenkha kulangidwa ayai kusaya kufuna kubonera na bzakutewera bzomwe bzingabwere thangwe ra kucita cakusankhula cakuipa. (Wagalata 6:7) Ifepano timbabvera Yahova thangwe timbamufuna. Ninga momwe wana ambafunira kukondwesa baba wawo, ifepano timbafunambo kukondwesa Baba wathu wa kudzulu. Palibe cinthu cabwino kuposa kudziwa kuti Yahova ankukomedwa nafe!—Psalymo 5:12; Mimwani 12:2; onani Mafala Yakuthumizira 2.
11 Tin’funika lini kumbabvera Yahova kokha bzinthu bzikakhala bziri bwino ayai thangwe tiribe kwakuyenda. Ndipo tin’funikambo lini kusankhula kuti ni mtemo uponi ayai ni lamulo liponi lomwe tingalitewere. (Bzakutonga 12:32) M’mbuto mwace timbamubvera pa bzinthu bzentse, ninga momwe adalewera munembi wa Psalymo, pomwe adati: ‘Ndin’dzakondwa na bzakutonga bzanu, inde, ndimbabzifuna.’ (Psalymo 119:47; Waroma 6:17) Tin’funika kukhala ninga Nowa, omwe adalatiza kuti akhafuna Mulungu mwa kucita bzentse bzomwe Yahova adamukumbira kuti acite. Bibliya limbalewa kuti Nowa ‘adacitadi tenepoyo.’ (Ciyambo 6:22) Kodi mungafune lini kuti Yahova alewembo tenepo bza imwepo?
12. Kodi tingakondwese tani Yahova?
12 Kodi Yahova ambabva tani tikamubvera? Timbakondwesa ‘mtima wace.’ (Mimwani 11:20; 27:11) Kumbukirani bzimwebzi! Timbakondwesa Mulengi wathu tikamubvera. Tsono iye ambatikakamiza lini kuti timbamubvere. M’mbuto mwace iye ambatipasa ufulu bwakusankhula. Bzimwebzi bzinkuthandauza kuti ifepano tina ufulu bwakucita cabwino ayai cakuipa. Yahova an’funa kuti lufoyi lathu kwa iye litithandize kucita cakusankhula cabwino, comwe cingatithandize kukhala na moyo wabwino.—Bzakutonga 30:15, 16, 19, 20; onani Mafala Yakuthumizira 3.
‘MALAMULO YACEYO NJAKULEMERA LINI’
13, 14. Kodi timbadziwa tani kuti malamulo ya Mulungu njakunesa lini kuyabvera? Perekani ciratizo.
13 Apa tani ticikumbuka kuti malamulo ya Yahova njakunesa kwene-kwene kuyabvera ayai yankutiphera ufulu bwathu? Bibliya limbalewa mwakubveka bwino kuti: ‘Malamulo yaceyo njakulemera lini.’ (1 Juwau 5:3) Fala la cigirego lomwe lidasanduliziridwa kuti ‘kulemera,’ m’mavesi manango yambaphatisa basa fala limweri pakufuna kulewa bza malamulo yakunesa kwene-kwene kuyatewera, ndipo limbaphatisidwambo basa pakufuna kulewa bza wanthu omwe ambayeza kunyang’anira ayai kuboneresa anzawo. (Mateu 23:4; Mabasa 20:29, 30) Malamulo ya Yahova ‘njakulemera lini’ ayai njakunesa lini kuyabvera. Iye ambatikumbira lini kuti ticite cinthu comwe tingakwanise lini kucicita.
14 Mwa ciratizo, tiyezezere kuti munkuthandiza xamwali wanu omwe ankufulukira ku nyumba ipsa. Bzinthu bzentse wabzilongedza m’kaxa. Pana mitolo yomwe njakulula ndipo inganyamulidwe na munthu m’bodzi, tsono mitolo inango njakulemera, ndipo pangafunike wanthu awiri kuti ainyamule. Kodi munkumbuka kuti xamwali wanuyo angakukumbireni kuti munyamule kaixa yakulemera kwene-kwene? Mpsakudziwikiratu kuti nee. Thangwe ranyi? Thangwe iye angafune lini kuti mubzitcole pakunyamulapo. Ninga xamwali umweyu, Yahova angatikumbire lini kuti ticite cinthu comwe n’cakunesa kwene-kwene. (Bzakutonga 30:11-14) Yahova ambadziwa malire yathu. ‘Iye ambadziwa bwino kaumbidwe kathu, ambakumbukira kuti ndife pfumbi.’—Psalymo 103:14.
15. Thangwe ranyi tingakhale na citsimikizo centse cakuti malamulo ya Yahova nja ubwino bwathu?
15 Mozeji adauza mtundu wa Jirayeri kuti malamulo ya Yahova yangadapasa ‘phindu’ Ajirayeriwo ndipo kubvera malamuloyo kungadawathandiza kuti akhale ‘na moyo’ wabwino. (Bzakutonga 5:28-33; 6:24) Ndipo mpsibodzi-bodzimbo ntsiku zino. Cinthu ciri-centse comwe Yahova ambatikumbira kuti ticite cimbatithandiza kuti tikhale na moyo wabwino. (Werengani Zaiya 48:17.) Baba wathu, Yahova, ambadziwa bzomwe mpsabwino kwa ifepano. (Waroma 11:33) Bibliya limbatiuza kuti: ‘Mulungu ni lufoyi.’ (1 Juwau 4:8) Bzimwebzi bzinkuthandauza kuti bzomwe Yahova ambalewa na kucita bzimbatsogoleredwa na lufoyi.
16. Kodi timbadziwa tani kuti tingakhale wakubvera Yahova napo ndife wakuperewera ndipo tinkukhala mu dziko lakuipa?
16 Mpsakupusa lini ntsiku zentse kubvera malamulo ya Mulungu, thangwe tikukhala mu dziko lakuipa lomwe linkutongedwa na Dyabu. Iye ambayeza kupumpswa wanthu kuti acite bzakuipa. (1 Juwau 5:19) Ndipo tinkulimbana na makumbukidwe yakuperewera, ndipo nthawe zinango iyo yangaticitise kusaya kubvera Mulungu. (Waroma 7:21-25) Koma lufoyi lathu kwa Yahova limbatilimbisa kucita bzomwe mpsabwino. Iye ambawona nyongo yathu yomwe timbacita kuti timubvere, ndipo ambatithandiza mwa kutipasa mphanvu ya mzimu wace wakucena. (1 Samuweri 15:22, 23; Mabasa 5:32) Mzimu wakucena umbatithandiza kukulisa makhalidwe yomwe yangatithandize kuti kubvera Mulungu kukhale kwakusaya kunesa.—Wagalata 5:22, 23.
17, 18. (a) Kodi tin’pfunza ciyani mu bukhu lino? (b) Kodi tin’dzapfunza ciyani mu msolo wakutewera?
17 Mu bukhu lino, tin’pfunza momwe tingakhalire na moyo mu njira yomwe ingakondwese Yahova. Tin’pfunzambo momwe tingaphatisire basa mitemo ya m’Bibliya pa moyo wathu. Kumbukirani kuti Yahova ambatikakamiza lini kuti timbamubvere. Tikasankhula kubvera Yahova, timbakhala na moyo wabwino tsapano ndipo tin’dzakhala na tsogolo labwino. Kuposa bzentse, tikamubvera tin’dzalatiza kuti timbamufuna kwene-kwene.—Onani Mafala Yakuthumizira 4.
18 Kuti atithandize kudziwa cabwino na cakuipa, Yahova adatipasa cikumbu-mtima. Tikapfunzisa cikumbu-mtima cathu, cin’dzatithandiza ‘kusunga malamulo yace.’ Tenepo, kodi cikumbu-mtima n’ciyani, ndipo tingacipfunzise tani? Tin’dzapfunza bzimwebzi mu msolo wakutewera.
