1, 2. Kodi tingacite tani kuti timbafunidwe na Mulungu?

TENTSENEFE timbafuna kukhala na thanzi labwino. Ndipopa timbacita nyongo ya kudya cakudya cabwino, kucita masenzeka ya kulimbisa thupi na kusamalirambo thupi lathu. Kucita bzimwebzi n’kwakunesa, koma timbapitiriza kucita thangwe timbadziwa kuti bzakutewera bzace mpsabwino. Tsono tin’funika kukhala na thanzi labwino mwa njira inango.

² Napo kuti tayamba kale kumudziwa Yahova, tin’funika kupitiriza kulimbisa uxamwali bwathu na iye. Pomwe Juda adalimbisa Akristau kuti ‘pitirizani kucita bzinthu bzomwe bzingacitise kuti Mulungu akufuneni,’ iye adafotokozambo momwe angacitire bzimwebzi. Iye adati: ‘Bzirimbiseni pa cikhulupiro canu cakucena.’ (Juda 20, 21) Tenepo, kodi ifepano tingacite tani kuti tirimbise cikhulupiro cathu?

3-5. (a) Kodi Sathani ambafuna kuti mumbaiwone tani mitemo ya Yahova? (b) Kodi imwepo mumbayawona tani malamulo na mitemo ya Yahova?

³ Mpsakufunika kutsimikizira kuti bzomwe Yahova ambatiuza mpsakuthandiza. Sathani ambafuna kuti timbakumbuke kuti mitemo ya Mulungu njakunesa kuibvera nakuti tingakhale wakukondwa tikambabzisankhulira tekha bzinthu bzabwino na bzakuipa. Kuyambira mu zunde la Edeni, Sathani akupumpsa wanthu kuti ambakhulupire bzimwebzi. (Ciyambo 3:1-6) Ndipo mpaka ntsiku zino iye akupitiriza kupumpsa wanthu kuti ambakhulupire makumbukidwe yamweya.

 ⁴ Kodi n’cadidi kuti malamulo ya Yahova njakunesa kuyabvera? Ne. Mwa ciratizo, yezezerani kuti mukufamba pa mbuto pomwe padabzalidwa maluwa yakudeka. Ndipo patsogolo pace mukuwona mbuto inango yomwe idafungidwa na mpanda utali wa fenzi. Pinango na mu mtima mungabzibvunze kuti, ‘Kodi adafungiranyi pamwepa?’ Koma pa nthawe imweyo, mukubva mphondolo ikubangula mkati mwa mpandayo. Kodi mungapitirize kuwona kuti mpandayo ukukuphingizani komwe mun’funa kuyendako? Ne, mungawone kuti mpandayo ukukukhotcererani kuti muleke kudyedwa na mphondoloyo. Mitemo ya Yahova iri ninga mpandayu ndipo Sathani ali ninga mphondolo. Fala la Mulungu limbaticenjeza kuti: ‘Pitirizani kukhala wakukumbuka bwino, khalani mudapenya. Nyamadulanthaka wanu, Dyabu, an’kufamba-famba ninga mphondolo yomwe inkubangula, icimbalinga munthu ali-wentse kuti imukhabvule.’—1 Pedru 5:8.

⁵ Yahova ambafuna kuti tikhale na moyo wabwino. Iye an’funa lini kuti Sathani atipumpse. Ndipopa Yahovayo watipasa malamulo na mitemo kuti imbatikhotcerere na kutithandiza kukhala wakukondwa. (Wayefezo 6:11) Tiyago adalewa kuti: ‘Ule omwe an’cinyang’anisisa na pafupi cakutonga cakulungamiratu cakubweresa ufulu, acilimbikira m’bzimwebzo, iye an’dzakondwa pakumbalicita.’—Tiyago 1:25.

6. Kodi n’ciyani comwe cingatithandize kutsimikizira kuti malango ya Yahova njakuthandiza kwene-kwene?

⁶ Tikambabvera malango ya Yahova bzinthu bzimbatifambira bwino pa moyo wathu ndipo uxamwali bwathu na iye bumbalimba. Mwa ciratizo, timbagumana phindu tikambapemba kwa iye kawiri-kawiri. (Mateu 6:5-8; 1 Watesalonika 5:17) Timbakhala wakukondwa tikambatsonkhana pabodzi kuti timunamate na kulimbisana. Ndipo timbakondwambo tikambacita bzentse bzomwe tingakwanise kuti tipalizire na kucitisa mapfunziro ya Bibliya. (Mateu 28:19, 20; Wagalata 6:2; Wahebereu 10:24, 25) Tikambakumbuka momwe bzinthu bzimwebzi bzimbalimbisira cikhulupiro cathu,  timbatsimikiza kuti malango ya Yahova njakuthandiza kwene-kwene.

7, 8. Kodi n’ciyani comwe cingatithandize kuti tileke kucita thupo na mayezo yomwe tingadzagumane nayo kutsogolo?

⁷ Pinango tingagope kuti kutsogoloku tingadzagumane na bzinthu bzakunesa kwene-kwene bzomwe bzingadzayeze cikhulupiro cathu. Penu mumbabva tenepo mumbakumbukire mafala ya Yahova yakuti: ‘Ine Yahova, ndine Mulungu wako, Omwe ndimbakupfunzisa kuti ugumane phindu, ule Omwe ndimbakutsogolera mu njira yomwe un’funika kufamba. Ucindotetekera mitemo yangu! Mtendere wako un’dzakhala ninga mkulo, ndipo cirungamo cako cin’dzakhala ninga mabimbi ya m’nyanza.’—Zaiya 48:17, 18.

⁸ Tikambabvera Yahova mtendere wathu umbakhala ninga mkulo omwe umbauma lini ndipo cirungamo cathu cimbakhala ninga mabimbi ya m’nyanza yomwe nthawe zentse yambakhala yakufamba. Bziribe basa bzinthu bzomwe tigumane nabzo pa moyo wathu, ifepano tingakhale wakukhulupirika  kwa Yahova mpaka kale-kale. Bibliya limbalewa kuti: ‘Pereka thupo lako kuna Yahova, ndipo iye an’dzakuthandiza. An’dzabvuma lini kuti wakulungama atekenyeke.’—Psalymo 55:22.

9, 10. Kodi kukhala Mkristau wakukhwima mwauzimu kumbathandauza ciyani?

⁹ Mukambacita nyongo yakulimbisa uxamwali bwanu na Yahova mun’dzakhala ‘wakukhwima mwauzimu.’ (Wahebereu 6:1) Kodi kukhala Mkristau wakukhwima mwauzimu kumbathandauza ciyani?

¹⁰ Timbakhala lini Akristau wakukhwima mwauzimu thangwe ra kuti tidabadwa kale-kale. Koma tin’funika kucita nyongo kuti Yahova akhale mwanzathu wapamtima ndipo timbawone bzinthu ninga momwe iye ambabziwonera. (Juwau 4:23) Paulo adanemba kuti: ‘Omwe ambacita bzinthu mwakubverana na thupi ambaikha makumbukidwe yawo pa bzinthu bza kuthupi, tsono wale omwe ambacita bzinthu mwakubverana na mzimu, ambacitambo bzinthu mwa mzimu.’ (Waroma 8:5) Munthu wakukhwima mwauzimu ambaikha lini mtima wace pa masenzeka ayai cuma. M’mbuto mwace ambaikha makumbukidwe yace yentse pakutumikira Yahova, ndipo ambacita bzakusankhula bza nzeru pa moyo wace. (Mimwani 27:11; werengani Tiyago 1:2, 3.) Munthu wakukhwima mwauzimu ambadziwa bzomwe mpsabwino ndipo ambakhala wakutsimikiza kucita bzimwebzo. Iye ambatengeka lini kuti acite bzinthu bzakuipa.

11, 12. (a) Kodi Paulo adalewa ciyani pakulewa bza mphanvu zakuzindikira za Mkristau? (b) Kodi kukhala Mkristau wakukhwima mwauzimu kumbandendemera tani na kukhala munthu wakudziwa kuthamanga bwino?

¹¹ Pambafunika nyongo kuti munthu akhale wakukhwima mwauzimu. Mpostolo Paulo adanemba kuti: ‘Cakudya cakutanfuna n’ca wanthu wakukhwima mwauzimu, omwe pakuphatisa basa mphanvu zawo zakuzindikira, apfunzisa  mphanvuzo kusiyanisa cabwino na cakuipa.’ (Wahebereu 5:14) Fala lakuti ‘kupfunzisa’ lingaticitise kukumbuka bza munthu omwe akupfunza masenzeka yakuthamanga.

¹² Tikawona munthu munango omwe ambadziwa kuthamanga bwino, timbazindikira kuti padatenga nthawe itali kuti afike pa kudziwa bwino kuthamangako ndipo adafunikambo kucita nyongo. Munthu ambabadwa lini akudziwa kale kuthamanga. Mwana akabadwa, ambakhala akudziwa lini bwino momwe angambaphatisire basa manja na minyendo yace. Tsono na kupita kwa nthawe ambapfunza kuphata bzinthu pabodzi na kufamba. Akapfunzisidwa, angadziwe kuthamanga bwino. Mwakundendemerana na bzimwebzi, pambafunika nthawe pabodzi na kubzipfunzisa kuti tikhale Akristau wakukhwima mwauzimu.

13. Kodi n’ciyani comwe cingatithandize kuti timbakumbuke ninga momwe Yahova ambacitira?

¹³ Mu bukhu lino, tacezerana bzomwe bzingatithandize kukumbuka ninga momwe Yahova ambakumbukira na kumbawona bzinthu ninga iye. Ndipo tapfunzambo kufunika kwa kuteweza na kufuna mitemo ya Yahova. Tikambacita bzakusankhula timbabzibvunza kuti: ‘Kodi ni lamulo liponi ayai ni mitemo iponi ya m’Bibliya yomwe ikubverana na nkhani imweyi? Kodi ningaphatise tani basa mitemo imweyi? Kodi Yahova angadekedwe ndikasankhula kucita ciyani?’—Werengani Mimwani 3:5, 6; Tiyago 1:5.

14. Kodi tingalimbise tani cikhulupiro cathu?

¹⁴ Tin’funika kupitiriza kulimbisa cikhulupiro cathu kwa Yahova. Ninga momwe cakudya cakupasa thanzi cimbalimbisira thupi lathu, kupfunza bza Yahova kumbalimbisa cikhulupiro cathu. Pomwe tidayamba kupfunza Bibliya, tidapfunza nfundo zakuyambirira zakulewa bza Yahova na bzomwe iye ambafuna. Tsono na kupita kwa nthawe, timbafunika kupfunza nfundo za kuzika. Ndipopa mpostolo Paulo adalewa kuti: ‘Cakudya cakutanfuna n’ca wanthu wakukhwima mwauzimu.’ Tikambaphatisa basa bzomwe timbapfunza timbakhala  wanthu wa nzeru. Bibliya limbati: ‘Nzeru ni cinthu cakufunika kwene-kwene.’—Mimwani 4:5-7; 1 Pedru 2:2.

15. Thangwe ranyi kufuna Yahova pabodzi na abale na mpfumakazi zathu n’kwakufunika kwene-kwene?

¹⁵ Munthu angakwanise kukhala wathanzi labwino, tsono kuti apitirize tenepo, an’funika kubzisamalira. Mwakundendemerana na bzimwebzi, munthu wakukhwima mwauzimu ambadziwa kuti an’funika kucita nyongo kuti apitirize kukhala pa uxamwali bwakulimba na Yahova. Mpostolo Paulo ambatilimbisa kuti: ‘Pitirizani kumbabzipenda kuti muwone penu mukana cikhulupiro cakulimba; pitirizani kumbabzipenda kuti mudziwe bzomwe muli.’ (2 Wakolinto 13:5) Tsono pambafunika bzizinji kuposa kundokhala na cikhulupiro cakulimba. Lufoyi lathu kwa Yahova pabodzi na kwa abale na mpfumakazi zathu lin’funika kupitiriza kukula. Mpostolo Paulo adalewa kuti: ‘Penu ndina cikhulupiro centse cakuti ndingacinje naco mapiri koma ndiribe lufoyi, ndine lini cinthu.’—1 Wakolinto 13:1-3.

16. Kodi Sathani ambafuna kuti timbakhale na makumbukidwe yaponi?

¹⁶ Sathani ambafuna kuti timbakumbuke kuti napo ticite tani nyongo tingakwanise lini kukondwesa Yahova. Iye ambafuna kutisunamisa ndipo ambafunambo kuti timbakumbuke kuti mabvuto yathu yan’dzamala lini. Iye ambafuna lini kuti timbathembe Akristau anzathu ne kuti timbakhale wakukondwa. (Wayefezo 2:2) Sathani ambadziwa kuti makumbukidwe yakuipa yangadzonge ifepano pabodzi na uxamwali bwathu na Mulungu. Tsono Yahova watipasa cinthu comwe cingatithandize kulimbana na makumbukidwe yakuipa. Iye watipasa cidikhiro.

17. Kodi cidikhiro cimbathandiza tani?

¹⁷ Pa cinembo ca 1 Watesalonika 5:8, Bibliya limbandendemezera cidikhiro na kapaseti ya mcikunda yomwe  pimbakhotcerera msolo wace pa nthawe ya nkhondo. Ndipo Bibliya limbalewambo kuti cidikhiro cimbabweresa ‘cipulumuso.’ Kudikhirira bzomwe Yahova adalewa kungakhotcerere makumbukidwe yathu ndipo kungatithandize kuti tileke kutaya mtima.

18, 19. Kodi cidikhiro cidamuthandiza tani Jezu?

¹⁸ Jezu adapirira bzinthu bzizinji thangwe ra cidikhiro comwe akhanaco. Usiku bwakumalizira pantsi pano iye adagumana na mabvuto mwakutewerana. Mwanzace omwe akhafamba naye adamupereka kwa anyamadulanthaka wace. Mwanzace winango adamulamba acilewa kuti akhamudziwa lini. Ndipo winango adamusiya yekha acithawa. Wanthu wa mtundu wace adamuphindukira ndipo akhafunisisa kuti aphedwe. Kodi n’ciyani comwe cidamuthandiza kupirira bzinthu bzentsenebzi? Bibliya limbalewa kuti: ‘Thangwe ra cikondweso comwe adamuikhira patsogolo pace, iye adapirira pa muti wakuzunzidwira, iye alibe kucita thupo na manyazi, ndipo tsapano wakhala pantsi ku boko la madidi la mpando wa umambo wa Mulungu.’—Wahebereu 12:2.

 ¹⁹ Jezu akhadziwa kuti akakhala wakukhulupirika, an’citisa kuti Pai wace alemekezedwe na kulatizambo kuti Sathani ngwakunama. Cidikhiro cimweci cidamuthandiza kukhala wakukondwa. Akhadziwambo kuti pakanati kupita nthawe itali an’bwerera pomwe kudzulu acikakhala na Pai wace. Bzimwebzi bzidamuthandiza kupirira mabvuto yomwe adagumana nayo. Mwakundendemerana na Jezu, ifepano tin’funikambo kuikha makumbukidwe yathu yentse pa cidikhiro cathu. Cidikhiroci cin’dzatithandiza kupirira napo tikagumana na mabvuto ya mtundu uli-wentse.

20. Kodi n’ciyani comwe cingakuthandizeni kuti muleke kukhala na makumbukidwe yakuipa?

²⁰ Yahova ambawona mukambapirira na kumukhulupira. (Zaiya 30:18; werengani Malakiya 3:10.) Iye walewa kuti ‘an’dzakupasani bzomwe mtima [wanu] umbakhumba.’ (Psalymo 37:4) Tenepo, makumbukidwe yanu yentse yambakhale pa bzinthu bzomwe mukubzidikhirira. Sathani ambafuna kuti musiye kukhala na cidikhiro na kuti mumbawone bzomwe Yahova adalewa ninga kuti bzin’dzacitika lini. Tsono lekani  kubvuma kuti makumbukidwe yamweya yakuviringizeni. Mukawona kuti mwayamba kupenukira bzinthu bzomwe Yahova walewa, mbapembani kwa iye kuti akuthandizeni. Mbakumbukirani mafala ya pa Wafiripo 4:6, 7: ‘Lekani kumbacita thupo na cinthu ciri-centse, koma pa ciri-centse na mpembo na kudandaulira pabodzi na kutenda, bzakukumbira bzanu bzidziwike kuna Mulungu; ndipo mtendere wa Mulungu, omwe umbaposa makumbukidwe yentse un’dzakoya mitima yanu pabodzi na luso lanu lakukumbuka mwa Kristu Jezu.’

21, 22. (a) Kodi Yahova an’funa kuti dzikoli lidzakhale tani? (b) Kodi mukutsimikiza kucita ciyani?

²¹ Mbanyang’anani nthawe, yakuti mumbakumbukire bzinthu bzakudekeza bzomwe tikubzidikhirira kutsogoloku. Tsapanopapa, munthu ali-wentse omwe an’dzagumanika pantsi pano an’dzanamata Yahova. (Cibvumbulutso 7:9, 14) Ndokumbukirani momwe moyo un’dzakhalira mu dziko lipsa. Lin’dzakhala lakukondwesa kwene-kwene kuposa momwe mukukumbukirira. Sathani na madimonyo yace pabodzi na bzinthu bzentse bzakuipa bzin’dzapfudzidwa. Pa nthawe imweyo mun’dzaduwala lini pomwe ne kufa. M’mbuto mwace, ntsiku iri-yentse mun’dzamuka muna mphanvu na moyo wakukondwa. Tin’dzaphata basa pabodzi pakukonza dzikoli kuti likhale lakudeka kwene-kwene. Munthu ali-wentse an’dzakhala na cakudya cabwino na mbuto yabwino yakukhala. Wanthu an’dzakhala lini pomwe wakuipa mtima ayai waciwembo, koma an’dzakhala wakudekerana mtima. Na kupita kwa nthawe, wanthu wentse pa dzikoli an’dzakhala wakukondwa ndipo an’dzakhalambo ‘na ufulu bwa mbiri ya wana wa Mulungu.’—Waroma 8:21.

²² Yahova ambafuna kukhala xamwali wathu wa pamtima. Tenepo, citani bzentse bzomwe mungakwanise kuti mumbamubvere pabodzi na kulimbisa uxamwali bwanu na iye ntsiku na ntsiku. Ndipopa, mbatipitirizeni tentse kucita bzinthu bzomwe bzingacitise kuti Mulungu atifune.—Juda 21.