1-3. (a)  Kodi tinkupfunza ciyani kucokera pa Mimwani 13:20? (b) Thangwe ranyi tin’funika kusankhula axamwali wathu mwanzeru?

KODI mumbawona momwe mwana ambanyang’anisira abereki wace? Napo iye akanati kuyamba kulewalewa, ambakoya mu msolo bzomwe ambawona na kubva. Akadzakula iye ambayamba kutewezera abereki wacewo mwakusaya kuzindikira. Bzimwebzi bzimbacitikambo na akulu-akulu, tikakhala nthawe itali na wanthu, timbayambambo kuwatewezera.

² Pa Mimwani 13:20, timbapfunza kuti: ‘Omwe an’famba na wanthu wanzeru, an’dzakhalambo wanzeru.’ Pamwepa nkhani njakuti ‘kufamba na’ munthu kumbaphatanidza bzizinji kuposa kundokhala na munthuyo. Kumbathandauza kumala nthawe itali na munthuyo. Nyakupfunza Bibliya munango adalewa kuti kufamba na munthu kumbaphatanidza kumufuna na kukhala naye pafupi. Tikamala nthawe itali na munthu timbamalizira kumutewezera, makamaka bzikakhala kuti munthuyo timbamufuna.

³ Axamwali wathu angaticitise kufamba mu njira yabwino ayai yakuipa. Pa Mimwani 13:20 pankupitiriza kuti: ‘Omwe an’cita bzinthu na apsiru, bzin’dzamumalira kuipa.’ a M’cihebereu, kulewa kuti ‘kucita bzinthu na’ munthu kungathandauze ‘kucita phathi na’ munthuyo. (Mimwani 22:24; Wayeruzi 14:20) Xamwali omwe ambafuna Mulungu ambatilimbisa kuti tipitirize kukhala wakukhulupirika kwa Mulunguyo. Kuti tisankhule axamwali mwa nzeru, mbaticezeraneni bza axamwali wa Mulungu.

4. Thangwe ranyi ni mwayi ukulu kwene-kwene kukhala axamwali wa Mulungu? Thangwe ranyi Yahova adacemera Abalahamu kuti ‘xamwali wangu’?

⁴ Yahova ni mwenekaciro wa cirengedwe centse, koma napo bziri tenepo, iye adatipasa mwayi wakukhala axamwali wace. Umweyu ni mwayi ukulu kwene-kwene. Yahova ambasankhula axamwali wace mwakusamala kwene-kwene. Iye ambasankhula wale omwe ambamufuna na omwe ambamukhulupira. Kumbukirani bza Abalahamu. Iye akhali wakukonzeka kucita ciri-centse comwe Mulungu akhafuna. Kazinji kentse, Abalahamu adalatiza kuti akhali wakukhulupirika na wakubvera. Ndipo iye akhali wakukonzeka napo kupereka ntsembe mwana wace Izaki. Abalahamu akhakhulupira ‘kuti Mulungu akhana mphanvu za kulamusa’ mwana waceyo kwa anyakufa. (Wahebereu 11:17-19; Ciyambo 22:1, 2, 9-13) Abalahamu akhali wakukhulupirika na wakubvera, ndipo Yahova adamucemera kuti ‘xamwali wangu.’—Zaiya 41:8; Tiyago 2:21-23.

5. Kodi Yahova ambawawona tani wale omwe mbakukhulupirika kwa iye?

⁵ Yahova ambawona axamwali wace kuti mbakufunika kwene-kwene. Axamwali wace ambasamala kwene-kwene kuti apitirize kukhala wakukhulupirika kwa Mulungu kuposa cinthu ciri-centse. (Werengani 2 Samuweri 22:26.) Iwo mbakukhulupirika na wakubvera thangwe ambamufuna. Bibliya limbalewa kuti, Mulungu ni xamwali wa wanthu ‘wakulungama’ omwe ambamubvera. (Mimwani 3:32) Yahova ambacemera axamwali wace kuti akhale alendo mu ‘tendi’ mwace. Iye ambawacemera kuti adzamunamate  na kupemba kwa iye nthawe iri-yentse.—Psalymo 15:1-5.

6. Kodi tingalatize tani kuti timbafuna Jezu?

⁶ Jezu adati: ‘Penu munthu ambandifuna, an’dzabvera mafala yangu, ndipo Baba wangu an’dzamufuna.’ (Juwau 14:23) Tenepo, kuti tikhale axamwali wa Yahova tin’funikambo kufuna Jezu na kucita bzomwe iye adatipfunzisa kuti timbacite. Mwa ciratizo, timbabvera malango ya Jezu ya kuti tipalizire bzipsa bzabwino na kukhala na anyakupfunza. (Mateu 28:19, 20; Juwau 14:15, 21) Pakuti timbafuna Jezu, timbatewera ‘mathanya yace na pafupi kwene-kwene.’ (1 Pedru 2:21) Yahova ambakondwa kwene-kwene akawona kuti tinkucita bzentse bzomwe tingakwanise kuti titewezere Mwana wace pa bzentse bzomwe timbalewa na kucita.

7. Thangwe ranyi tin’funika kutsimikiza kuti axamwali wathu ni axamwalimbo wa Yahova?

⁷ Axamwali wa Yahova mbakukhulupirika, mbakubvera ndipo ambafuna Mwana wace. Kodi tingasankhulembo axamwali wa mtundu umweyu ninga momwe Yahova adacitira? Axamwali wanu akatewezera Jezu pabodzi na kutanganika pa kupfunzisa winango bza Umambo bwa Mulungu, iwo an’dzakuthandizani kukhala munthu wabwino, mucipitiriza kufunidwa na Mulungu.

8. Kodi n’ciyani comwe cinkukudekerani pakati pa uxamwali bwa Rute na Naomi?

⁸ M’Bibliya, timbawerenga bza wanthu azinji omwe akhali pa uxamwali, ninga momwe akhaliri Rute na mibzala wace Naomi. Akazi amwewa adacokera m’madziko yakusiyana, akhana cikhalidwe cakusiyana ndipo Naomi akhali mkulu kwene-kwene kuposa Rute. Koma amwewa adakhala pa uxamwali bwakulimba thangwe wentse akhafuna  Yahova. Pomwe Naomi akhafuna kucoka ku Moabe kuti abwerere ku Jirayeri, ‘Rute adawangingimira’ kuti ayende nawo. Iye adauza Naomi kuti: ‘Wanthu wanu an‘dzakhala wanthu wangu, ndipo Mulungu wanu an’dzakhala Mulungu wangu.’ (Rute 1:14, 16) Rute akhasamalira bwino kwene-kwene Naomi. Pomwe iwo adafika ku Jirayeri, Rute akhaphata basa kwene-kwene kuti athandize xamwali wace. Naomi akhafuna kwene-kwene Rute ndipo akhamupasa malango yabwino. Rute akhabvera malangoyo, ndipo ninga bzakutewera bzace, wentse awiri adatambira bzisimbo bzizinji.—Rute 3:6.

9. N’ciyani cimbakudabwisani pa uxamwali bomwe bukhalipo pakati pa Davide na Jonatani?

⁹ Davide na Jonatani ni ciratizo cinango ca wanthu omwe akhali pa uxamwali bwabwino ndipo wentse akhali wakukhulupirika kwa Yahova. Jonatani akhali mkulu kwene-kwene kuposa Davide. Iwo akhadasiyana magole 30, ndipo Jonataniyo ndiye angadakhala mambo wakutewera wa Ajirayeri. (1 Samuweri 17:33; 31:2; 2 Samuweri 5:4) Pomwe iye adadziwa kuti Yahova akhadasankhula Davide kuti adzakhale mambo, Jonatani alibe kucita njiru ayai kukhala na mzimu wa mapici. M’mbuto mwace, Jonatani adacita cinthu ciri-centse kuti athandize Davide. Mwa ciratizo, pomwe moyo wa Davide ukhali pa ngozi, Jonatani adamulimbisa ‘kukhulupira Yahova.’ Mpaka iye akhaikhambo moyo wace pa ngozi kuti athandize Davide. (1 Samuweri 23:16, 17) Davide akhalimbo xamwali wakukhulupirika. Iye adapicira kusamalira banja la Jonatani, ndipo adakwanirisa piciro laceri napo pambuyo pa Jonataniyo kufa.—1 Samuweri 18:1; 20:15-17, 30-34; 2 Samuweri 9:1-7.

10. Kodi mwapfunza ciyani kucokera pa ciratizo ca maswaka matatu yacihebereu?

¹⁰ Sadraki, Mesaki na Abedinego yakhali maswaka yacihebereu yomwe yakhali pa uxamwali ndipo iyo yadayendesedwa  kutali na kumui kwawo pomwe akhali wana. Pomwe akhali kutali na wanthu wa m’banja mwawo, iwo akhathandizana wokha-wokha kuti apitirize kukhala wakukhulupirika kwa Yahova. Patsogolo pace, pomwe adakula, cikhulupiro cawo cidayezedwa na Mambo Nabukadinazori pomwe adawatonga kuti anamate cifanikiso ca oro. Sadraki, Mesaki na Abedinego adalamba kunamata cifanikisoco ndipo adauza mamboyo kuti: ‘Ifepano tin’tumikira lini milungu yanu ne kunamata cifanikiso ca oro comwe imwepo mwaciimisaci.’ Pomwe cikhulupiro cawo cikhayezedwa, axamwali atatuwa adapitiriza kukhala wakukhulupirika kwa Mulungu.—Danyeri 1:1-17; 3:12, 16-28.

11. Kodi timbadziwa tani kuti Paulo na Timotio akhali pa uxamwali bwabwino?

¹¹ Pomwe mpostolo Paulo adagumana na mulumbwana Timotio, iye adawona kuti Timotioyo akhafuna Yahova ndipo akhasamalira gwere. Tenepo Paulo adapfunzisa Timotio kuti ambathandize abale na mpfumakazi pa bzinthu bzakusiyana-siyana. (Mabasa 16:1-8; 17:10-14) Timotio akhaphata basa kwene-kwene mwakuti Paulo adalewa kuti: ‘Iye adaphata basa ninga kapolo pabodzi na ine pa kuyendesa patsogolo bzipsa bzabwino.’ Paulo akhadziwa kuti Timotio ‘angadasamaliradi’ bwino abale na mpfumakazi. Pakuti iwo adaphata basa pabodzi mwa nyongo pa kutumikira Yahova ndipo Paulo na Timotio adakhala pa uxamwali bwabwino.—Wafiripo 2:20-22; 1 Wakolinto 4:17.

12, 13. (a) Thangwe ranyi tin’funika kukhala wakusamala pakusankhula axamwali napo mu gwere? (b) Thangwe ranyi mpostolo Paulo adapereka mcenjezo omwe umbagumanika pa 1 Wakolinto 15:33?

¹² Ifepano tingapfunze bzizinji kucokera kwa abale wathu na mpfumakazi zathu m’gwere, ticimbathandizana winango na mwanzace kukhala na cikhulupiro cakulimba. (Werengani Waroma 1:11, 12.) Koma, napo m’gweremo, tin’funika kukhala wakusamala kwene-kwene pa kusankhula munthu kuti akhale xamwali wathu wapamtima. Ifepano tina abale na mpfumakazi zizinji zomwe zina cikhalidwe cakusiyana-siyana. Winango adapfunza tsapanopa cadidi, ndipo winango ankutumikira Yahova kwa magole mazinji. Ninga momwe cisapo cimbatengera nthawe itali kuti cifuire, mu njira ibodzi-bodziyi pambatengambo nthawe kuti munthu akulise uxamwali bwace na Yahova. Tenepo, tin’funika kukhala wakudeka mtima, ticimbalatizana lufoyi winango na mwanzace ndipo timbasankhule axamwali mwanzeru.—Waroma 14:1; 15:1; Wahebereu 5:12–6:3.

¹³ Nthawe zinango mungagumanike bvuto likulu mu gwere, ndipo ifepano tin’dzafunikira kukhala wakusamala  kwene-kwene. Bvutolo lingakhale lakuti m’bale ayai mpfumakazi yacita cinthu comwe Bibliya limbalewa kuti n’cakuphonyeka. Ayai pinango munthu munango angambakhale acimbadandaula pa cinthu ciri-centse m’gwere, ndipo bzimwebzi bzingapswipize gwerelo. Bzimwebzi mpsakudabwisa lini kwa ifepano, thangwe bzikhacitikambo mu gwere la Akristau wa m’magole dzana yakuyambirira. Ndipopa mpostolo Paulo adawacenjeza kuti: ‘Lekani kupumpsika. Kubverana na wanthu wakuipa kumbadzonga makhalidwe yabwino.’ (1 Wakolinto 15:12, 33) Paulo adacenjezambo Timotio kuti akhale wakusamala pakusankhula munthu kuti akhale xamwali wace wapamtima. Ifepano tin’funikambo kucita bzibodzi-bodzibzo ntsiku zino.—Werengani 2 Timotio 2:20-22.

14. Kodi n’ciyani comwe cingacitike tikasaya kusankhula mwanzeru axamwali wakuceza nawo?

¹⁴ Ifepano tin’funika kukhotcerera uxamwali bwathu na Yahova, thangwe ni cinthu cakupambulika kwene-kwene comwe tinaco. Tenepo, tin’funika kutcenkha kukhala pa uxamwali bwa ponde-mpondembo na munthu omwe angatepese cikhulupiro cathu ayai omwe angadzonge uxamwali bwathu na Yahova. Ifepano tingaikhe lini cixambo ca gonsalinya mu vinagre ticidikhirira kuti cingakwewe madzi. Mu njira ibodzi-bodziyi, tingakhale lini na xamwali omwe ambacita bzinthu bzakuipa ticimbadikhirira kuti ifepano tin’kwanisa kupitiriza kumbacita bzinthu bzabwino. Ndipopa tin’funika kusankhula axamwali wathu mwakusamala.—1 Wakolinto 5:6; 2 Watesalonika 3:6, 7, 14.

15. Kodi n’ciyani comwe mun’funika kucita kuti mukhale na axamwali wabwino mu gwere?

¹⁵ Mu gwere, imwepo mungagumane wanthu omwe ambafunadi Yahova. Amwewo ndiwo wakuthemera kukhala axamwali wanu wa ponde-mpondembo. (Psalymo 133:1) Lekani kundonyang’ana axamwali wa msinkhu wanu ayai omwe ana cikhalidwe ninga canu basi. Kumbukirani kuti Jonatani akhali mkulu kwene-kwene kuposa Davide,  ndipo Rute akhali m’ng’ono kwene-kwene kusiyana na Naomi. Tin’funika kubvera bzomwe Bibliya limbalewa kuti: ‘Fungulani kwene-kwene mitima yanu.’ (2 Wakolinto 6:13; werengani 1 Pedru 2:17.) Imwepo mukambatewezera Yahova, wanthu azinji an’dzawona makhalidwe yanu ndipo an’dzafuna kukhala axamwali wanu.

16, 17. N’ciyani comwe tin’funika lini kucita munthu munango akatikhumudwisa m’gwere?

¹⁶ Banja liri-lentse limbakhala na wanthu wa makhalidwe, makumbukidwe na kacitidwe ka bzinthu kakusiyana-siyana. Bzimwebzi ndibzo bzomwe bzimbacitikambo m’gwere. Kusiyana kumweku kumbacitisa kuti moyo ukhale wakudekeza, ndipo tingapfunze bzizinji kucokera kwa winango na mwanzace. Tsono nthawe zinango kusiyana kwathuku kumbacitisa kusaya kubvesesana pakati pa abale na mpfumakazi zathu. Ndipo nthawe zinango timbakalipa thangwe ra bzakucita na bzakulewa bzawo. (Mimwani 12:18) Kodi ni bwino kusiya kutsonkhana ayai kucita bzinthu bzinango pabodzi na gwere thangwe ra mabvuto yamweya?

¹⁷ Nee. Napo m’bale acitikalipisa, tin’funika lini kusiya kutsonkhana. Ni Yahova lini omwe watikalipisa. Iye adatipasa moyo pabodzi na bzinthu bzinango bzentse. Ndipopa, ifepano tin’funika kumbamufuna na kukhala wakukhulupirika kwa iye. (Cibvumbulutso 4:11) Kuthumizira bzimwebzi, gwere ni mphaso yakucokera kwa Yahova pakuti limbathandiza kuti cikhulupiro cathu cipitirize kukhala cakulimba. (Wahebereu 13:17) Na tenepo, tin’funika lini kusiya kutsonkhana thangwe rakuti munthu munango watikalipisa.—Werengani Psalymo 119:165.

18. (a) Kodi ni khalidwe liponi lomwe lingatithandize kuti timbabverane na abale na mpfumakazi zathu? (b) Thangwe ranyi tin’funika kumbalekerera abale wathu?

¹⁸ Timbafuna kwene-kwene abale na mpfumakazi zathu ndipo timbafuna kuti   akhale anzathu wa pamtima. Yahova ambadikhirira lini kuti wanthufe tikhale wakulungamiratu, ndipo ifepano tin’funikambo lini kumbadikhirira kuti abale na mpfumakazi zathu akhale wanthu wakulungamiratu. (Mimwani 17:9; 1 Pedru 4:8) Tentsenefe timbaphonya, koma lufoyi limbatithandiza kuti tipitirize ‘kulekererana na mtima wentse.’ (Wakoloso 3:13) Lufoyi lin’ticitisa kuti tileke kumbatenga kabvuto kang’ono-ng’ono kukacitisa kukhala cintolo cikulu. N’cadidi kuti, munthu akatiphonyera, bzimbanesa kusiya kukumbukira bzimwebzo, koma bzimbakhala bzakupusa kukhala nthawe itali tidakalipa na munthuyo. Tsono bzimwebzi bzimbandotisayisa mtendere ticikhala wakusunama. Kumbali inango, tikalekerera munthu omwe watikalipisa, timbakhala na mtendere wa m’mtima, timbakhala wakuphatana m’gwere ndipo kuposa bzentse timbakhala pa uxamwali bwakulimba na Yahova.—Mateu 6:14, 15; Luka 17:3, 4; Waroma 14:19.

19. Kodi n’ciyani comwe cingacitise kuti tisiye kucita bzinthu na munthu munango wa m’gwere?

¹⁹ M’banja mwa lufoyi, munthu ali-wentse ambacita mbali yace kuti wanthu wentse m’banjamo akhale wakukondwa. Koma kumbukirani munthu m’bodzi akasaya kubvera. Munthu ali-wentse m’banjamo ambayeza kazinji kentse kumuthandiza, koma iye ankulamba thandizolo. Ndipo pinango iye angasankhule kucoka pamui ayai msolo wa banja angamuuze kuti acoke pamuipo. Bzimwebzi bzingacitikembo m’gwere. Munthu angasankhule kumbacita bzinthu bzomwe bzimbakalipisa Yahova ndipo bzingadzonge gwere.  Iye ankulamba thandizo ndipo na bzicito bzace ankulatiza kuti an’funa lini pomwe kucita mbali ya gwere. Pinango ankusankhula yekha kusiya gwere ayai ankucosedwa. Bzimwebzi bzikacitika, Bibliya limbalewa mwakubveka bwino kuti lekani ‘kubverana’ na munthu umweyo. (Werengani 1 Wakolinto 5:11-13; 2 Juwau 9-11) Bzimwebzi bzimbakhala bzakunesa kwene-kwene munthu wakucosedwayo akakhala xamwali wathu ayai akakhala munthu wa m’banja mwathu. Tsono pa cakucitika ninga cimweci, kukhulupirika kwathu kwa Yahova kun’funika kukhala kwamphanvu kuposa kukhala wakukhulupirika kwa munthu ali-wentse.—Onani Mafala Yakuthumizira 8.

20, 21. (a) Thangwe ranyi kucosedwa kwa munthu m’gwere ni makonzedwe ya lufoyi la Mulungu? (b) Thangwe ranyi mpsakufunika kwene-kwene kusankhula bwino axamwali wathu?

²⁰ Kucosa munthu m’gwere ni makonzedwe ya lufoyi yakucokera kwa Yahova. Makonzedweya yambakhotcerera gwere kwa wanthu omwe an’funa lini kubvera mitemo ya Yahova. (1 Wakolinto 5:7; Wahebereu 12:15, 16) Bzimwebzi bzimbatithandiza kulatiza lufoyi kwa Yahova, pa dzina lace lakucena pabodzi na mitemo yace. (1 Pedru 1:15, 16) Kupambula bzimwebzi, makonzedwe ya kucosa munthu yambalatiza lufoyi kwa munthuyo. Tinkulewa tenepo thangwe bzimwebzi bzingacitise kuti munthuyo azindikire kuphonya kwace acicinja. Ndipo azinji omwe akhadacosedwa kale, adabwerera kwa Yahova ndipo adatambiridwa bwino na wanthu wa m’gwere.—Wahebereu 12:11.

²¹ Ninga momwe tawonera kale, axamwali wathu angaticitise kuti ticite bzabwino ayai bzakuipa. Ndipopa mpsabwino kwene-kwene kusankhula bwino axamwali wathu. Ndipo tikafuna wanthu omwe Yahova ambawafunambo, tin’dzakhala na axamwali omwe an’dzatithandiza kupitiriza kukhala wakukhulupirika kwa Yahovayo mpaka kale-kale.