Kwa wanthu wentse omwe ambafuna Yahova pabodzi na Fala lace, Bibliya:

Jezu adati: ‘Mun’dzacidziwa cadidi, ndipo cadidico cin’dzakutsudzulani.’ (Juwau 8:32) Kodi mukukumbukira momwe mudabvera pomwe mudayamba kupfunza cadidi ca m’Bibliya? Imwepo mudakomedwa kwene-kwene kudziwa kuti napo ku dzikoku kuna bzinthu bzakunama, bzingakwanisike kudziwa cadidi ca m’Bibliya.—2 Timotio 3:1.

Yahova an’funa kuti imwepo mudziwe cadidi. Ndipo pakuti ifepano timbafunambo wanthu, tin’funa kukudziwisani cadidico. Tsono kuti titumikire Mulungu tin’funikambo kucita bzinthu bzinango. Tin’funika kucita nyongo ya kuteweza moyo wacikristau, pakuti timbalemekeza kwene-kwene mitemo ya Yahova. Jezu adalewa bza njira ikulu kwene-kwene ya momwe tingalatizire kuti timbafuna Mulungu. Iye adati: ‘Mukasunga bzakutonga bzangu, mun’dzakhala mu lufoyi langu, ninga momwe inepano ndasungira bzakutonga bza Baba, ndicikhala mu lufoyi lace.’—Juwau 15:10.

Jezu ambafuna kwene-kwene Baba wace, ndipo ambacita nyongo ya kuwabvera. Tikambatewezera Jezu pa moyo wathu Yahova an’dzatifuna, ndipo ifepano tin’dzakhala wakukondwa. Jezu adati: ‘Mukadziwa bzinthu bzimwebzi, mun’dzakhala wakukondwa mukambabzicita.’—Juwau 13:17.

Tin’funa kuti bukhuli likuthandizeni kukhala na moyo wakubverana na bzomwe Bibliya limbapfunzisa, mucikhala xamwali wa Mulungu. Tikupemba kuti lufoyi lanu kwa Mulungu liyende licithumizirika na kuti mupitirizembo ‘kucita bzinthu bzomwe bzingacitise kuti Mulungu ambakufuneni . . . mucidzatambira moyo wakusaya kumala.’—Juda 21.