1 Kodi Mulungu Ndiye Omwe Ambacitisa Kuti Tibonere?
Thangwe ranyi mpsakufunika kudziwa mtawiro wa mbvunzoyu?
Wanthu azinji ambalamba kunamata Mulungu thangwe ra kukumbuka kuti ndiye omwe ambacitisa kuti tibonere.
Kuti Mukumbukire
Kawiri-kawiri, atsogoleri wa bzipembedzo ambapfunzisa kuti Mulungu ndiye omwe ambacitisa kuti ifepano tibonere. Mwa ciratizo, winango ambalewa kuti:
-
Malengwa ya pantsi ni cirango ca Mulungu.
-
Wana ambafa thangwe Mulungu akufuna kuthimizira bongo ya anjo kudzulu.
-
Pakacitika nkhondo Mulungu ambasankhula kukhala kumbali ya gulu libodzi la anyankhondo, tsono nkhondoyo imbabweresa mabvuto mazinji.
Kodi bzomwe atsogoleriwa ambapfunzisabzi mpsacadidi? Kodi tin’funika kukhulupira bzomwe iwo ambalewa?
DZIWANI BZINANGO
Onani pa saite ya jw.org. vidiyo yakuti Thangwe Ranyi Tin’funika Kupfunza Bibliya?
Bibliya Limbati
Mulungu ndiye lini omwe ambacitisa kuti ifepano tibonere.
Mulungu ana makhalidwe yabwino, ndipopa iye angacitise lini kuti ifepano tibonere. Mwa ciratizo, Bibliya limbati:
‘Njira zace zentse ni cirungamo. . . . Iye ngwakulungama.’—BZAKUTONGA 32:4.
‘Mulungu wacadidi angacite lini bzakuipa na pang’onopo, ndipo Wamphanvu zentse angacite lini bzinthu bzakusaya kulungama!’—DJOBI 34:10.
‘Wamphanvu zentse ambapitanisa lini cirungamo.’—DJOBI 34:12.
Mulungu ambabvuma lini bzipembedzo bzomwe bzimbapfunzisa bzinthu bzakunama pakulewa bza iye.
Bzipembedzobzo bzimbaphatanidza bzire bzomwe bzimbapfunzisa kuti Mulungu ambacitisa kuti wanthufe tibonere, ndipo bzimbapfunzisambo kuti iye ambathandizira nkhondo na ciwembo.
‘Apolofetawa akulewa bzinthu bzakunama m’dzina langu. Ine ndiribe kuwatuma, ndiribe kuwauza cinthu ndipo ndiribe kulewalewa nawo. Bzomwe akukuuzanibzo ni matsomphenya yakunama . . . ndipo ambalewa bzinthu bzakunama bzomwe bzimbawabwerera mu mtima mwawo.’—JEREMIYA 14:14.
Jezu adatsimula cipembedzo cakunama.
‘Si ali-wentse omwe an’nditi: “Mbuya, Mbuya”, an’dzapita mu umambo bwa kudzulu, koma ule omwe an’cita kufuna kwa Babangu omwe ali kudzulu. Ntsiku imweyo, azinji an’dzandiuza: “Mbuya, Mbuya, kodi tiribe ife kupereka fala m’dzina lanu? Ndipo tiribe ifepano kucosa madimonyo m’dzina lanu, ticicitambo mabasa yakudabwisa m’dzina lanu?” Tsono ine nin’dzawauziratu padeca kuti: “Nin’kudziwani lini! Cokani pa maso pangu, imwe anyakucita mabasa yakusaya kubvera bzakutonga.”’—MATEU 7:21-23.
