Anyakunamata cipembedzo ca cihindu ambakhulupira kuti munthu ambabonera thangwe ra bzakuipa bzomwe adacita kale-kale. Cakulinga n’cakuti iye afike pakusiya moyo wa kumbafa, acimbamuka. Kuti bzimwebzi bzikwanisike, munthuyo ambafunika kutcenkha makumbukidwe yomwe yambabverana na bzinthu bza m’dzikoli.

Amwenye ambawona kubonera ninga cirango cakuti munthu wacita pikado ayai akuyezedwa cikhulupiro cace. Dr. Sayyid Syeed, omwe ni mtsogoleri wa Sociedade Islâmica ku América do Norte adalewa kuti: “Kubonera kumbatikumbusa kuti nthawe zentse tin’funika timbatende Mulungu thangwe ra bzisimbo bzathu, ndipo kumbatikumbusambo kuti tin’funika kumbathandiza wanthu omwe akubonera.”

Iwo ambakhulupira kuti wanthu ambabonera thangwe ra bzicito bzawo. Adjuda winango ambakhulupira kuti anyakufa an’dzalamusidwa, ndipo omwe adabonera uko alibe kuphonya an’dzacitiridwa cirungamo. Tsono gulu linango la Adjudawo, limbapfunzisa kuti munthu akafa, ambakabadwa papsa ku dziko linango kuti akapasidwe mpata wakuzindikira bzakuphonya bzace.

Iwo ambakhulupira kuti munthu ambafa, acimuka mwakubvereza-bweza mpaka kufika pakudzasiya kukhala na makumbukidwe na bzikhumbo bzakuipa. Tenepo munthuyo akakhala na nzeru, kucita bzinthu bzabwino na kumbabziphata, ambadzakwanisa kufika pa kuleka kubonera pomwe.

Bukhu linango lakulewa bza bzipembedzo, limbalewa kuti wanthu amwewa ambakhulupira kuti timbabonera thangwe ra “bzakuphonya bza wanthu.” Iwo ambakhulupira kuti kubonera kungapunguzike wanthu akambacita bzinthu bzabwino. Tsono ambakhulupirambo kuti mbali ikulu ya kubonerako imbacitisidwa na “bzakulengedwa bzauzimu, ndipo palibe comwe ifepano tingacite, koma kundobvuma basi bzomwe bzicitikebzo.” —A Dictionary of Comparative Religion.

Omwe ambanamata bzipembedzo bzimwebzi ambakhulupira kuti munthu ambabonera thangwe ra kulodzewa. Iwo ambakhulupira kuti nfiti zingathandize ayai kudzonga munthu, ndipo angafunikire kuteweza miyambo inango kuti aleke kuboneresedwako. Mwa ciratizo, munthu akaduwala, iwo ambayenda naye kwa anyabezi na cikhulupiro centse cakuti anyabeziwo anim’poza matendayo.

Akristau ambakhulupira kuti kubonera kudayamba na pikado ya Adamu na Eva, ninga momwe limbafotokozera bukhu la m’Bibliya la Ciyambo (Gênesis). Tsono bzipembedzo bzizinji bzidathimizira nzeru zawo pa cipfunzisoci. Mwa ciratizo, winango wa m’cipembedzo ca Cikatolika ambalewa kuti ‘Mulungu angapasidwe’ kubonera. Ndipo iye angaphatisire basa kubonerako kuti asimbe gereja ayai apulumuse wanthu winango.