‘Lekani kumbacita thupo na bzinthu bza ntsiku ya mwangwana, pakuti ntsiku ya mangwana in’dzakhala na bzinthu bzace bzakucitisa thupo.’ —MATEU 6:34.

Bzomwe bzikuthandauza: Munthu ali-wentse ambakhala na thupo. Napo bziri tenepo, mukakhala na thupo mun’funika lini kuthimizira thupo lanulo mwa kumbakumbukira bza mangwana. Tenepo, bvumani kuti bzomwe munabzo pa ntsikuyo bzikukwanireni.

• Thupo lingakucitiseni kukhala wakusunama. Tenepo dziwani ibzi: Cakuyamba, thupo mungakwanise lini kulitcenkha. Mwa ciratizo, kukumbukira bzinthu bzomwe mungakwanise lini kubzitcenkha, kungathimizire thupo lanu. Caciwiri, dziwani kuti bzinthu bzomwe mumbacita nabzo thupo kawiri-kawiri bzimbacitika lini.

‘Nzeru yakucokera kudzulu . . . njakulekerera.’—TIYAGO 3:17.

Bzomwe bzikuthandauza: Lekani kumbabziwona kukhala wakulungamiratu. Tenepo, lekani kumbadikhirira kuti imwepo ayai anzanu ambacite bzinthu mwakulungamiratu.

• Mbawonani bzinthu mwakuthemera, mbacitani bzomwe mungakwanise ndipo mbazindikirani bzomwe imwepo ne anzanu angakwanise lini kucita. Mukacita bzimwebzi, imwepo mun’dzacepesa thupo lanu na la anzanu, ndipo bzinthu bzin’dzakufambirani bwino. Ndipo kuthimizira bzimwebzi, pitirizani kukhala wakukondwa. Tenepo, mukambakhala wa ntsangala napo bzinthu bzireke kukufambirani bwino, imwepo mun’dzatsangalazidwa na kubzibva bwino mu mtima.

‘Munthu wakuzindikira ambakhala wakuderekha.’—MIMWANI 17:27.

Bzomwe bzikuthandauza: Makumbukidwe yakuphonyeka yangadzonge kakumbukidwe kanu na bzakusankhula bzanu, tenepo mbakhalani wakuderekha.

• Zindikirani bzomwe bzimbakucitisani thupo ndipo khalani tceru na momwe mumbacitira bzinthu. Mwa ciratizo, mukakhala na thupo, pendani bzomwe mukukumbuka, momwe mukubvera na momwe mungacitire bzinthu ndipo bzikakwanisika, citani kubzinemba pa tsamba. Tenepo, mukambakhala tceru na bzomwe mumbacita, imwepo mun’dzakwanisa kulimbana na thupo. Kuthimizira bzimwebzi, kumbukirani momwe mungamalisire bzinthu bzomwe bzimbakucitisani thupo pa moyo wanu. Ndipo penu mungakwanise lini kubzimalisa, pinango mungafunike kucepesa mabasa yanu ayai kudziwa kuphatisa bwino basa nthawe yanu.

• Yezerani kucinja momwe mumbawonera bzinthu. Dziwani kuti bzomwe bzingakucitiseni thupo, winango angacite lini nabzo thupo. Bzentse bzimbathemba momwe munthu ali-wentse ambawonera bzinthu. Onani malango aya:

  1. Lekani kuthamangira kukumbuka kuti munthu wakuphonyerani thangwe ra kukuwengani. Mwa ciratizo, tiyezezere kuti imwepo muli pa mfolo, ndipo munthu winango wakupitirani kutsogolo kwanu. Kodi mungabzibve tani? Mukakumbukira kuti munthuyo ngwapezi-pezi, imwepo mungacite thupo kwene-kwene. Kodi bzingakhale lini bwino kukumbuka kuti munthuyo alibe kucita utowa ndipo akhafuna lini kukupundizani?

  2. Onani mbali yabwino ya nkhaniyo. Mwa ciratizo, tiyezezere kuti mukudikhirira kuti muwonane na dotolo ayai muli pa aeroporto kwa nthawe itali kuti mupakire ndeke. Tsono kuti muleke kubva kuwawa pakudikhirapo, imwepo mungafunike kuwerenga mabukhu, mensaje na bzinthu bzinango.

  3. Idziweni bwino nkhaniyo. Bzibvunzeni kuti: ‘Kodi mangwana ayai mdzinga wa mangwana nkhani imweyi in’dzakhala lini mulandu ukulu?’ Dziwani kusiyanisa mulandu ukulu na mulandu ung’ono.

‘Bzinthu bzentse bzimbacitike mwakuthemera na mwakulongosoka.’ —1 WAKOLINTO 14:40.

Bzomwe bzikuthandauza: Mbayezerani kucita bzinthu mwakuthemera pa moyo wanu.

• Bziri bwino kuti timbabzipfunzise momwe tingacitire bzinthu mwakuthemera pa moyo wathu. Cinthu cibodzi comwe cingacitise kuti mumbacite bzinthu mwakusaya kuthemera na kukhala na thupo, ni kufuna kumbacita bzinthubzo pomwe nthawe yamala kale. Ndipo bzimwebzi, bzingakucitiseni kukhala na bzinthu bzizinji bzakucita. Yezerani kuphatisa basa malango aya:

  1. Nembani ndandanda ya bzinthu bzomwe mun’funa kucita ndipo mbacitani nyongo yakuteweza ndandandayo.

  2. Zindikirani ndipo cinjani cinthu ciri-centse comwe cingakutaziseni kucita bzomwe mwanembabzo.

‘Kupuma pang’ono kuli bwino kuposa kuphata basa na nyongo na kuthamangisa mphepo.’ —MPALIZI 4:6.

Bzomwe bzikuthandauza: Wanthu wakuzolowera kuphata basa mwakupitirira malire, ambawona lini phindu la basa lomwe ambalicita na ‘nyongo.’ Iwo ambakhala alibe mphanvu ne nthawe kuti awone phindu la basalo.

• Mbawonani mwakuthemera basa na kobiri. Kukhala na kobiri zizinji kumbathandauza lini kukhala na cikondweso kwene-kwene ayai kucepesa thupo. Ndipo Mpalizi 5:12, ambati: ‘Bzizinji bzomwe munthu wakudala anabzo bzimbamusayisa tulo.’ Tenepo, bzinthu bzomwe munabzo bzikukwanireni.

• Mbakhalani na nthawe yakupuma. Imwepo mungacepese thupo mwa kumbacita bzinthu bzomwe mumbadekedwa nabzo. Koma nthawe zinango, masenzeka yomwe mukhacita kale-kale, kuwona nkhani za pa TV, pinango bzingakuthandizeni lini kumalisa thupo.

• Phatisani basa mitcini ya nzeru mwakuthemera. Tcenkhani kumbandomala nthawe izinji mukuwona email, mensaje ayai nkhani za pa interneti. Ndipo mukakotoka kubasa, lekani kumbandotanganidwa na bzinthu bza kubasako, pokha-pokha bzikakhala kuti mpsakufunika.

‘Masenzeka yakulimbisa thupi yambabweresa phindu.’—1 TIMOTIO 4:8.

Bzomwe bzikuthandauza: Kucita masenzeka yakulimbisa thupi kawiri-kawiri, kungakuthandizeni kukhala na thanzi labwino.

• Mbacitani masenzeka yakulimbisa thupi. Masenzeka yakulimbisa thupi yangakucitiseni kukhala wakukondwa yacikuthandizani kuwona momwe mungacitire bzinthu mukakhala na thupo. Mbadyani cakudya cakupasa thanzi ndipo lekani kumbamala nthawe izinji ne kudya. Ndipo mbagonani nthawe yakukwanira.

• Tcenkhani kumbacita bzinthu bzomwe mukukumbuka kuti bzingamalise thupo, ninga kufumali, kumwa mankhwala yakudzungulumwisa, ayai kumwa kwene-kwene. Na kupita kwa nthawe, bzinthu bzimwebzi bzingathimizire thupo lanu thangwe bzingakudzongereni thanzi pabodzi na kobiri zanu.

• Mukakhala na thupo kwene-kwene, mbakumbirani dotolo kuti akuthandizeni. Ndipo mun’funika lini kucita manyazi kukumbira thandizolo.

‘[Tsimikizani] kuti mpsiponi bzinthu bzakufunika kwene-kwene.’—WAFIRIPO 1:10.

Bzomwe bzikuthandauza: Mbakumbukirani bzinthu bzomwe bzin’funika kukhala pa mbuto yakuyamba.

• Nembani cinthu ciri-centse comwe mumbacita mwakubverana na kufunika kwa cinthuco. Kucita bzimwebzi kun’dzakuthandizani kuyamba kucita bzinthu bzomwe mpsakufunika kwene-kwene. Ndipo mun’dzazindikira bzinthu bzomwe mungadzabzicite nthawe inango, bzomwe mungapase winango kuti acite na bzomwe mungawone kuti mpsakusaya kufunika kucita.

• Nembani nthawe yomwe mumbamala pa mdzinga wa thunthu. Mukamala, onani momwe mungaphatisire bwino basa nthaweyo. Mukambaphatisa bwino basa nthawe yanu, mun’dzabzibva lini kukhala wakupanikizika.

• Mbapambulani nthawe kuti mumbapume. Napo nthaweyo ikhale yakucepa, kucita bzimwebzi, kungakuthandizeni kubwezeresa mphanvu zanu na kucepesa thupo.

‘Thupo limbalemesa mtima wa munthu, tsono mafala yabwino yambakondwesa mtimayo.’—MIMWANI 12:25.

Bzomwe bzikuthandauza: Mafala yabwino ya winango, yangakucitiseni kubzibva bwino.

• Mbacezani na munthu omwe ambakubvesesani momwe mumbabvera. Munthuyo angakuthandizeni kucinja momwe mumbawonera bzinthu, mpaka kugumana thandizo lomwe mukhalikumbukira lini. Ndipo kundouza munthuyo bzomwe bziri mu mtima mwanu, kungakucitiseni kubzibva bwino.

• Kumbirani thandizo. Kodi bzingakhale lini bwino kukumbira winango kuti akuthandizeni kucita mabasa yomwe imwepo mumbacita?

• Penu mwanzanu wa kubasa wakusunamisani, kumbukirani momwe mungamalisire bvutolo. Mwa ciratizo, imwepo mwakudeka mtima, mungamufotokozere momwe mukubvera. (Mimwani 17:27) Bzimwebzi bzikasaya kukwanisika, kodi bzingakhale bwino kucepesa nthawe yomwe mumbaceza na munthuyo?

‘An’kondwa ni wale omwe ambazindikira kuti [an’funika kutsogoleredwa na Mulungu].’—MATEU 5:3.

Bzomwe bzikuthandauza: Wanthufe timbafunikira bzinthu bzizinji sikuti kokha cakudya, bzakubvala na mbuto yakukhala. Tenepo, tin’funika kuzindikira kuti mpsakufunika kutsogoleredwa na Mulungu. Tsono, kuti tikhale wakukondwa, tin’funika kuzindikira cakusaya cimweci na kucita nyongo yakucikwanirisa.

• Kupemba kwa Mulungu kungakuthandizeni kwene-kwene. Iye akukuuzani kuti ‘[mumutulire] thupo lanu lentse, thangwe iye ambakusamalirani.’ (1 Pedru 5:7) Kupemba na kumbakumbukira bzinthu bzabwino, kungakuthandizeni kukhala na mtendere wa mu mtima.—Wafiripo 4:6, 7.

• Mbawerengani mabukhu yomwe yangakuthandizeni kukhala pa uxamwali na Mulungu. Malango yomwe yali mu Revista ino yacokera m’Bibliya, bukhu lomwe lidanembedwa kuti litithandize kukhala pa uxamwali na Mulungu. Iro limbatithandizambo kukhala ‘wanzeru na wakuzindikira.’ (Mimwani 3:21) Kodi bzingakhale lini bwino mucikhala na cakulinga cakumbaliwerenga? Bukhu la Mimwani ndiro lingakhale labwino kuyamba kuliwerenga.