KWA OMWE ADALOWOLANA
3: Kulemekezana
THANDAUZO LACE
Mamuna na mkazi omwe ambalemekezana, ambafunana napo akapitana mafala. Bukhu linango lomwe limbalewa bza mabanja yomwe yambalemekezana limbati: “Mabanja yamweya, anyakulowolanawo ambandongingimira lini pa nzeru zawo basi . . . M’mbuto mwace, iwo ambacezerana bzomwe apitanabzo mwakugwa nfuwa. Ndipo ambadzafika pakubverana.”—Ten Lessons to Transform Your Marriage.
NFUNDO YA M’BIBLIYA: ‘Lufoyi . . . limbandosamala lini bzace bzokha.’—1 Wakolinto 13:4, 5.
Micah adati: “Nimbawona kuti kulemekeza mkazangu kumbathandauza kumuona kukhala wakufunika na kutcenkha kucita cinthu comwe cingamukalipise cicidzonga malowozi yathu.”
THANGWE RANYI MPSAKUFUNIKA?
Mamuna na mkazi akasaya kumbalemekezana, ambandokhalira kupopotezana, kulewana mafala yakuipa na kunyozana. Bzikakhala tenepo, mwakubverana na anyakufufudza nkhani winango cimweci cimbakhala cizindikiro cakuti iwo an’malizira kulambana.
Brian adalewa kuti: “Kulewalewa mafala yakuipa, yakunyoza na yakusinjirira, bzingacitise mkazanu kubziwona kukhala wakusaya kufunika kwene-kwene, ndipo bzingacitisembo kuti aleke kumbakukhulupirani ndipo bzingadzonge banja lanu.”
BZOMWE MUNGACITE
KUMBUKIRANI IBZI
Kwa sumana ibodzi, khalani tceru pa bzomwe mumbalewa na kucita. Ndipo mukamala tawirani mibvunzoyi:
-
‘Kodi inepano ndanesaya kangasi na bayangu ayai mkazangu? Kodi ndamutenda kangasi?’
-
‘Kodi n’ciyani comwe ndacita comwe calatiza kuti nimbamulemekeza?’
BZOMWE MUNGACEZERANE
-
Kodi ni bzicito na mafala yaponi bzomwe bzimbakucitisani kubzibva kuti mukulemekezedwa?
-
Kodi ni bzicito na mafala yaponi bzomwe bzingakucitiseni kubzibva kuti mukulemekezedwa lini?
BZOMWE MUNGACITE
-
Nembani bzinthu bzitatu bzomwe bayanu ayai mkazanu, angacite kuti mubzibve kuti mukulemekezedwa. Ali-wentse anembe tsamba lace acipasa mwanzace. Mukamala, citani nyongo kuti muteweze bzomwe mwanzanuyo wakumbirabzo.
-
Nembani makhalidwe yabwino yomwe mumbadekedwa nayo kwa bayanu ayai mkazanu. Mukamala, uzanani momwe mumbakomedwera na makhalidweyo.
Megan adati: “Nimbalatiza kuti nimbalemeza bayangu na kumuwona kuti ngwakufunika kwene-kwene na bzomwe nimbacita, ndipo nimbafuna kuti iye akhale wakukondwa. Mpsakufunika lini kucitiratu cinthu cikulu kwene-kwene. Nthawe zinango, tingalatize kuti timbalemekeza munthu mwakumucitira tubzinthu tung’ono-tung’ono.”
Nfundo ikulu njiyi, sikuti mubziwone kuti mumbalemekeza, koma mwanzanuyo abzibve kuti ambalemekezedwa.
NFUNDO YA M’BIBLIYA: ‘Bvalani lufoyi likulu, kucitira winango ntsisi, kudeka mtima, kubzicepesa m’makumbukidwe, kuderekha na kupirira.’—Wakoloso 3:12.
