KWA MASWAKA
11: Kuphata Basa na Nyongo
THANDAUZO LACE
Munthu omwe ambaphata basa na nyongo ambalithawa lini. Kulewa cadidi, iye ambafuna kuphata basa kuti abzisamalire na kuthandizambo winango. Ndipo iye ambacita bzimwebzi napo likakhala basa lomwe winango ambaliwona kuti ndakunyozeka.
THANGWE RANYI MPSAKUFUNIKA?
Kuti tigumane bzinthu bzakufunika pa moyo wathu tin’funika kuphata basa. Napo ntsiku zino wanthu azinji ambafuna lini kuphata basa, munthu omwe ambaphata basa na nyongo bzinthu bzimbamufambira bwino.—Mpalizi 3:13.
Reyon adati: “Nimbawona kuti munthu omwe ambaphata basa na nyongo ambakhala wakukondwa na mtendere wa mu mtima. Bzimwebzi bzidandithandiza kuti nimbafune kuphata basa. Tenepo, tikambaphata basa na nyongo wanthu winango an’dzakomedwa nafe.”
NFUNDO YA M’BIBLIYA: ‘Kuphata basa liri-lentse kuna phindu lace.’—Mimwani 14:23.
BZOMWE MUNGACITE
Kuti mupitirize kuphata basa na nyongo, phatisani basa malango yakuteweraya:
Pfunzani momwe mungaphatire bwino basa lanu na kukomedwa lawo. Penu muli kubasa, pamui ayai mukunemba TPC ya kuxikola, nthawe zentse mun’funika kumbacita basalo na mtima wentse. Mukapfunza momwe mungaphatire basa liri-lentse, yezerani kumbalicite bwino na mwakamfulumize. Mukadziwa kucita bwino basa lanu, imwepo mun’dzakomedwa nalo.
NFUNDO YA M’BIBLIYA: ‘Kodi wamuwona munthu wa luso pa basa lace? Iye an’dzaima patsogolo pa wamambo; Iye andzaima lini patsogolo pa munthu ali-wentse.— Mimwani 22:29.
Kumbukirani momwe basa lanu likuthandizira wanthu winango. Nthawe zinango mukambacita bwino basa lanu, mumbacitisa kuti wanthu winango agumane phindu. Mwa ciratizo, imwepo mukambacita bwino mabasa ya pamui, mumbacepesa mabasa ya winango pamuipo.
NFUNDO YA M’BIBLIYA: ‘Kupasa kumbabweresa cikondweso cikulu kuposa kutambira.’—Mabasa 20:35.
Mbacitani bzikuthimizirika sikuti bzomwe mun’funika kucita. M’mbuto mwakumbaphata kokha basa lomwe mwauzidwa, mbacitani bzinango bzomwe mukuwona kuti bzikufunikira kucitiwa pa basalo. Mukacita bzimwebzi, imwepo mun’dzalatiza kuti mun’kwanisa kucita basalo mwekha ndipo mun’dzacita bzakuthimizirika, sikuti thangwe mwauzidwa, koma thangwe mukufuna kucita basalo.—Mateu 5:41.
NFUNDO YA M’BIBLIYA: ‘Uleke kucicita mwakukakamizika koma mwakucita kufuna na mtima wako wentse.’—Filemoni 14.
Lekani kumbapitirira malire. Wanthu omwe ambaphata basa na nyongo mbatofu lini, koma ambaphata lini basalo mpaka kudamba nalo. Iwo ambaphata basalo na malire, ambakhala na nthawe yakuphata basa na yakupuma.
NFUNDO YA M’BIBLIYA: ‘Kupuma pang’ono kuli bwino kuposa kuphata basa mwa nyongo na kuthamangisa mphepo.’—Mpalizi 4:6.
