KWA MASWAKA
9: Mbiri Yanu
THANDAUZO LACE
Mbiri yanu imbaphatanidza bzinthu bzizinji sikuti dzina na kawonekedwe kanu basi. Iyo imbaphatanidza makhalidwe yanu, bzinthu bzomwe mumbakhulupira, unthu bwanu na momwe mumbacitira bzinthu na wanthu winango.
THANGWE RANYI MPSAKUFUNIKA?
Imwepo mukabzidziwa bwino, mun’dzaleka lini kukhulupira bzomwe mumbadziwa ne kubvuma kuti anzanu ambandokuuzeni bzakucita.
Adrian adati: “Wanthu azinji ali ninga maboneko ya m’maloja yomwe yambathemba munthu kuti ayasankhulire bzakubvala.”
Courtney adati: “Ine ndidapfunza momwe ningambacitire bzinthu bzabwino napo pa nthawe zakunesa. Nimbakwanisa kudziwa omwe mbanzangu wacadidi ndikawona momwe ambacitira bzinthu na momwe nimbacitira bzinthu na iwo mwakutsudzuka.”
NFUNDO YA M’BIBLIYA: ‘Lekani kutewezera [makumbukidwe ya m’dzikoli,] koma sandulikani mwa kucinja makumbukidwe yanu.’—Waroma 12:2.
BZOMWE MUNGACITE
Mun’funika kubzifufudza kuti mudziwe kuti ndimwe mbani tsapano nakuti mukufuna kudzakhala mbani kutsogolo. Mungacite bzimwebzi mwa kuwona bzomwe mukucita bwino, bzomwe mumbakwanisa lini kucita na bzomwe mumbakhulupira. Njira yabwino yomwe ingakuthandizeni kudziwa bzimwebzi ni kutawira mibvunzo yakutewerayi.
Bzomwe mumbakwanisa kucita: Kodi ni bzinthu bziponi bzabwino bzomwe nimbakwanisa kucita? Kodi ni bzinthu bziponi bzomwe nimbacita bwino? Mwa ciratizo, kuti muzindikire bzomwe mumbakwanisa kucita bwino, mungabzibvunze kuti: ‘Kodi nimbabziphata? Kodi nimbaphata basa na nyongo? Kodi ndine munthu wakupasa? Ndikakhala ndapangana na munthu kuti pa nthawe yakuti tinicita cakuti, kodi nimbateweza nthaweyo? Ndipo pa nthawe ino, ni bzinthu bziponi bzabwino bzomwe ndikucita?
YEZERANI KUCITA IBZI: Penu mukutazira kugumana bzinthu bzabwino bzomwe mukucita ayai kulewa, mbvunzani abereki wanu ayai xamwali wanu wa ponda ndipondemo kuti akuuzeni bzinthu bzabwino bzomwe ambawona kwa imwepo ndipo afotokoze thangwe race.
NFUNDO YA M’BIBLIYA: ‘Ali-wentse awone momwe mabasa yace yaliri, akacita tenepo, an’dzakhala na mathangwe yakukondwa thangwe ra mabasa yaceyo, sikuti mwakubzindendemezera na munthu munango.’—Wagalata 6:4.
Bzomwe mumbakwanisa lini kucita: Kodi ni bzinthu bziponi bzomwe nin’funika kubzikonzesa? Kodi nimbayezedwa kucita bzinthu bzakuipa pa nthawe iponi? Kodi nin’funika kubziphata kwene-kwene pa bzinthu bziponi?
NFUNDO YA M’BIBLIYA: ‘Ifepano tikalewa kuti “Tiribe pikado,” tikubzinamiza tekha.’—1 Juwau 1:8.
Bzomwe nimbakhulupira: Kodi nimbakhulupira bzinthu bziponi, ndipo thangwe ranyi nimbabzikhulupira? Kodi nimbakhulupira Mulungu? N’ciyani cimbandicitisa kukhulupira kuti iye alipo? Kodi ni bzinthu bziponi bzomwe nimbawona kuti mpsakusaya cirungamo, ndipo thangwe ranyi nimbawona tenepoyo? Kodi nimbakhulupira kuti kutsogolo kun’dzacitika bzinthu bziponi?
NFUNDO YA M’BIBLIYA: ‘Kukumbuka bwino kun’dzakunyang’anira ndipo kuzindikira kun’dzakukhotcerera.’—Mimwani 2:11.
Imwepo Mungakomedwembo na
MITAWIRO YA MIBVUNZO 10 YA MASWAKA
Kodi Inepano Ndine Munthu wa Mtundu Wanyi
Kubzidziwa bzinthu bzomwe mumbakhulupira, bzinthu bzomwe mumbacita bwino, bzinthu bzomwe mumbacita lini bwino pabodzi na bzakulinga bzanu kun’dzakuthandizani kucita bzakusankhula bzabwino pomwe anzanu an’dzafuna kukupumpsani.
