KWA OMWE ADALOWOLANA
1: Kukhulupirika
THANDAUZO LACE
Mamuna na mkazi akakhala wakukhulupirika pa malowozi yawo, iwo ambawona malowozi yawoyo kuti yan’funika kukhala kwa moyo wawo wentse. Ndipo bzikakhala tenepo, iwo ambapenukirana lini. Iwo ambakhulupirana kuti ali-wentse an’dzalemekeza bzomwe adapangana, bzinese bzitani.
Mabanja yanango yambapitiriza kukhala pabodzi thangwe ra kungingimizidwa na acibale ayai na wanthu winango. Tsono mpsabwino kuti kukhulupirikaku kumbacitike thangwe ra lufoyi na kulemekezana komwe kulipo pakati pa mamuna na mkazi.
NFUNDO YA M’BIBLIYA: ‘Mamunambo aleke kusiya mkazi wace.’—1 Wakolinto 7:11.
Micah adalewa kuti: “Mukambakhulupirana m’banja mwanu, imwepo mungakalipe lini kamangu mwanzanu wa m’banjamo akakuphonyerani, ndipo mungacebwe lini kumulekerera ne kuyebwa bzomwe bzacitikabzo. Pakawoneka mabvuto, imwepo mun’dzayawona ninga nkhani ing’ono, sikuti ninga cinthu comwe cingamalise malowozi yanu.”
THANGWE RANYI MPSAKUFUNIKA?
Pakawoneka mabvuto, wanthu omwe ambakhulupirana lini m’banja, ambathamangira kukumbuka kuti ‘ifepano tiribe kuthemerana.’ Ndipo ambanyang’ana njira zakumalisira banjalo.
Jean adati: “Wanthu azinji ambapita m’banja na makumbukidwe yakuti mangwana bzinthu bzikadzanesa angadzamalise banjalo. Tsono munthu akambapita m’banja na makumbukidwe yamweya, banjalo limbakhala la mbeya-mbeya.”
BZOMWE MUNGACITE
KUMBUKIRANI IBZI
Mukakhala mukukekedzana . . .
-
Kodi mumbakhumbula kuti ningadadziwa ningadalowodwa ayai ningadalowola lini mkazi umweyu?
-
Kodi mumbakumbukira nthawe inango, kudzalowodwa ayai kudzalowola mkazi winango?
-
Kodi imwepo mumbalewa mafala ninga “Kwa inepano bzamala!” ayai “Nin’nyang’ana munthu omwe angambandilemekeze”?
Penu imwepo mwatawira kuti “inde” ubodzi ayai mibvunzo yentseneyi, ndiye bzikufuna kulewa kuti imwepo mun’funika kukhala wakukhulupirika m’banja mwanu.
BZOMWE MUNGACEZERANE
-
Kodi kukhulupirika kwathu kwambombowa kuposana na kale? Penu bziri tenepo, n’ciyani cacitisa?
-
Kodi n’ciyani comwe tin’funika kucita kuti tipitirize kumbakhulupirana?
BZOMWE MUNGACITE
-
Nthawe zinango, mbanemberani bayanu ayai mkazanu mafala ya lufoyi.
-
Mukakhala kubasa, mbaikhani mafoto ya bayanu ayai mkazanu pa mbuto yakuwonekera. Bzimwebzi bzin’dzalatiza kuti mumbafunana.
-
Mukakhala kubasa ayai muli ku mbuto inango, mbapfuwirani mtedwe bayanu ayai mkazanu ntsiku zentse.
NFUNDO YA M’BIBLIYA: ‘Comwe Mulungu wacimanga pabodzi, munthu aleke kucilekanisa.’—Mateu 19:6.
