Munthu omwe ngwakulimbikira ambabwerera lini m’mbuyo akagumana na mphitca ayai cakukhukhumudwisa. Ndipo munthu angakulise khalidweri kucokera pa bzinthu bzomwe agumana nabzo pa moyo wace. Ninga momwe bzimbacitikira na mwana, iye ambayamba kufamba pambuyo pakugwa ulendo buzinji, mpsibodzi-bodzi na munthu, iye angapfunzembo kukhala wakulimbikira pambuyo pa kugumana na mabvuto mazinji.

Wana winango ambataya mtima akaphonyesa cinthu, akagumana na mabvuto ayai akapasidwa malango. Ndipo winango ambandosiyiratu kucita cinthu ciri-cense. Tsono iwo an’funika kubvesesa nfundo zakutewerazi:

• Munthu ali-wense ambaphonya.—Tiyago 3:2.

• Munthu ali-wense ambagumana na mabvuto. —Mpalizi 9:11.

• Munthu ambapfunza akatsimulidwa.—Mimwani 9:9.

Kupfunza kukhala wakulimbikira kun’dzathandiza mwana wanu kuti bzinthu bzidzamufambire bwino akadzagumana na mabvuto akakula.

Mwana wanu akaphonya.

NFUNDO YA M’BIBLIYA: ‘Nyakulungama angagwe kanomwe kense, ndipo iye an’dzalamuka pomwe.’ —Mimwani 24:16.

Thandizani mwana wanu kupfunza momwe angalimbanire na bvuto liri-lense napo likhale likulu. Mwa ciratizo, kodi iye angacite tani penu watambira nota ing’ono ku xikola? Pinango iye angabziwone kuti ni mtazi, ndipo angalewe kuti: “Inepano palibe comwe ndimbakwanisa kucita bwino-bwino!”

Kuti mupfunzise mwanayo kufunika kwa kulimbikira, muthandizeni kuwona bzomwe angacite kuti adzakwanise kucosa nota zabwino kutsogolo. Mwa njira imweyi, iye an’dzacita nyongo yakumalisa bvutolo ndipo an’dzabziwona lini ninga mtazi.

Tsono samalani kuti muleke kukonzesa ndimwepo bvuto la mwana wanuyo. M’mbuto mwace, muthandizeni momwe angamalisire bvutolo. Pinango mungamubvunze kuti: “Kodi iwepo un’funika kucita ciyani kuti umbakwanise kubvesesa bzomwe umbapfunza ku xikola?”

Bzikacitika bzinthu bzakuipa.

NFUNDO YA M’BIBLIYA: ‘[Imwepo] mumbadziwa lini momwe moyo wanu un’dzakhalira mangwana.’—Tiyago 4:14.

 Palibe munthu omwe ambadziwa bzomwe bzin’dzacitika mangwana. Omwe ngwakudala lero mwangwana angadzaluze bzense; omwe ana thanzi labwino lero mangwana angadzaduwale. Bibliya limbati: ‘Nyakuthamanga kwene-kwene ndiye lini omwe nthawe zense ambakunda pa mapici, wanthu wamphanvu ndiwo lini omwe nthawe zense ambakunda pa nkhondo; . . . pakuti nthawe ya matsoka na bzinthu bzakusaya kudikhirika bzimbagwera wanthu wense.’—Mpalizi 9:11.

Ninga m’bereki, citani ciri-cense kuti mukhotcerere mwana wanu. Koma cadidi n’cakuti, mungakwanise lini kumukhotcerera pa mabvuto yense yomwe angagumane nayo pa moyo wace.

N’cadidi kuti mwana wanu angadziwe lini momwe bzimbawawira munthu akaluza basa ayai kugumana na mabvuto ya cuma. Tsono imwepo mungamuthandize kulimbana na mabvuto manango, ninga kumenyana na mwanzace ayai kusaikidwa wacibale wace. *

Mwana wanu akapasidwa cirango.

NFUNDO YA M’BIBLIYA: ‘Tetekera malango, . . . kuti udzakhale wanzeru kutsogolo.’—Mimwani 19:20.

Munthu akauza mwana wanu kuti acinje cinthu cinango, bzinkuthandauza lini kuti ankumugopswa ayai ankumukalipira, koma munthuyo an’funa kuthandiza mwananuyo kucinja cinthu comwe caphonyeka.

Mukambathandiza mwana wanu kubvuma cirango, mumbabzicepesera mabvuto yomwe mwense awiri mungadadzagumana nayo kutsogolo. Pai munango wakucemeredwa John adalewa kuti: “Wana akasaya kulangidwa pa bzomwe ambaphonyesa, ambapfunza lini cinthu. Ndipo iwo an’dzagumana na mabvuto mazinji pa moyo wawo ndipo imwepo ninga m’bereki ndimwe mun’dzawathandiza kumalisa mabvutoyo. Bzimwebzi bzimbabweresa mabvuto kwa abereki pabodzi na wanawo!”

Kodi mungathandize tani mwana wanu kubvuma cirango na mtima wense? Lekani kulewa kuti cirango comwe mwana wanu wapasidwa n’cakuphonyeka, bziribe basa penu cacokera ku xikola ayai ku mbuto inango. M’mbuto mwace, cezani na mwananuyo mwa kumubvunza kuti:

• “Thangwe ranyi iwo akupasa cirango?”

• “Kodi ungacite tani kuti uleke kudzacita pomwe?”

• “Kodi iwepo un’dzacita ciyani bzinthu bzimwebzi bzikadzakucitikira pomwe?”

Kumbukirani kuti, cirango cin’dzathandiza mwana wanu kuyambira tsapano mpaka moyo wace wense.