Wanthu angacitire tsankhulo anzawo sikuti kokha thangwe ra kusiyana nawo dziko, mtundu, dzinza ayai kusiyana nawo bzirewedwe, koma thangwe ra kusiyanambo gereja, cidzo na mapfunziro. Wanthu winango ambayeruza anzawo mwakuphonyeka thangwe ra kusiyana nawo magole, mapfunziro ayai thangwe ra mawonekedwe yawo. Napo bziri tenepo, iwo angakumbuke kuti akucita lini tsankhulo.

Kodi khalidwe limweri lingakuyambukirenimbo? Bzimbakhala bzakusaya kunesa kuzindikira kuti anzathu ana tsankhulo, tsono kuti tikwanise kubziwona tekha bzimbakhala bzakunesa. Koma cadidi n’cakuti tentsenefe timbacitirana tsankhulo pa bzinthu bzinango. Mwa ciratizo, mpfunzisi m’bodzi wakucemeredwa David Williams, adalewa kuti: “Wanthu ambalewa kuipa mtundu wa wanthu winango. Tsono akadzagumana na m’bodzi wa iwo ambadzamucitira bzinthu bzabwino ndipo ambayebwa kuti akhalewa kuipa mtundu wa munthuyo.”

Mwa ciratizo, dziko lomwe Jovica ambakhala lina mtundu wa wanthu omwe umbafunidwa lini na wanthu azinji. Iye adalewa kuti: “Inepano ndikhakumbuka kuti pa mtunduyo pakhalibe ne munthu m’bodzi wabwino. Tsono ndikhadziwa lini kuti bzomwe ndikhakumbukabzo bzikhalatiza kuti inepano ndikhana tsankhulo. Thangwe ndikhakumbuka kuti bzomwe wanthu akhacitira mtunduyo bzikhali bzabwino.”

Maboma mazinji yambakhazikisa malamulo ya kuletsa tsankhulo. Koma napo bziri tenepo tsankhulo liripo basi. Thangwe ranyi? Thangwe ndakuti malamuloyo yambandolewa bzomwe wanthu ambacita, ndipo yangakwanise lini kunyang’anira makumbukidwe ya wanthu na momwe iwo ambabvera mu mtima mwawo. Ndipo tsankhulo limbayambira m’makumbukidwe na m’mitima mwa wanthuwo. Tsono tingakwanise tani kukunda khalidwe lakuipali? Kodi pana mankhwala yomwe yangatithandize kukunda khalidweri?