Kukhala na Makumbukidwe Yauzimu
Ninga momwe tawonera kumayambiriro kwa revistayi, wanthu azinji ambawona Bibliya kukhala bukhu lakulemekezeka kwene-kwene. Iwo awona kuti kuwerenga Bibliya na kuphatisa basa malango yace kwawathandiza kukhala pa uxamwali bwakulimba na Mulungu ndipo abvesesa cakulinga ca moyo wawo.
Bibliya limbaphatisa basa fala lakuti, ‘uzimu’ likambalewa bza makumbukidwe ayai mtundu unango wa moyo. (Juda 18, 19) Wanthu omwe ambafuna lini kutsogoleredwa na Mulungu ambathemba nzeru zawo; koma wale omwe ambafuna kutsogoleredwa na Mulunguyo ambawona malango yace kukhala yakufunika kwene-kwene.—Wayefezo 5:1.
CIDIKHIRO
NFUNDO YA M’BIBLIYA: ‘Ukatepa pa nthawe ya mabvuto, mphanvu zako zin’dzacepa.’ —Mimwani 24:10.
THANDAUZO LACE: Msunamo ungamalise mphanvu zathu zomwe zingatithandize kulimbana na mabvuto pa moyo wathu. Koma cidikhiro cingatipase mphanvu kuti tikwanise kupirira. Tikakhala na cidikhiro tingazindikire kuti mabvuto yathu mazinji yomwe tikugumana nayo njakusaya kukhalisa, ndipo kuzindikirako kungatithandize kukhala na mtsangalazo.
BZOMWE MUNGACITE: Kumbukirani bzinthu bzabwino bzomwe bzin’dzacitika kutsogolo. Lekani kumbandokumbukira bzomwe bzingacitike ayai kudikhira kuti bzinthubzo bzikhale bzakulungamiratu, koma citani ciri-cense kuti mukwanirise bzakulinga bzanu. N’cadidi kuti nthawe zinango bzinthu bzimbacitika mwadzidzidzi. (Mpalizi 9:11) Koma nthawe zizinji bzinthu bzimbacitika kuposa momwe tikhadikhirira. Pa nkhani imweyi, Bibliya limbalewa kuti: ‘Bzala mbeu zako macibese ndipo boko lako lireke kupuma mpaka ku maulo; pakuti un’dziwa lini kuti n’ziponi zomwe zin’phata, penu ni izi ayai zire ayai pinango ni zense.’—Mpalizi 11:6.
MITAWIRO YA MIBVUNZO YAKUFUNIKA KWENE-KWENE PA MOYO
NFUNDO YA M’BIBLIYA: ‘Ndithandizeni kubzibvesesa . . . Mafala yanu yense ni cadidi.’—Psalymo 119:144, 160.
THANDAUZO LACE: M’Bibliya muna mitawiro yomwe wanthu azinji ambaicita nsiku na nsiku. Mwa ciratizo, iro lina mitawiro ya mibvunzo iyi:
-
Kodi wanthufe tidacokera kuponi?
-
Thangwe ranyi tina moyo?
-
N’ciyani cimbacitika munthu akafa?
-
Kodi moyo ngumweyu basi?
Bibliya lathandiza wanthu azinji pa dziko lense la pansi kugumana mitawiro ya mibvunzoyi na inango, ndipo tsapano iwo ana moyo wabwino.
BZOMWE MUNGACITE: Pfunzani bzomwe Bibliya limbapfunzisa. Kumbirani m’bodzi wa Mboni za Yahova kuti akuthandizeni kubvesesa Bibliya. Pitani pa webisaite yathu ya jw.org, ayai ndokoni mukatsonkhane pabodzi na Mboni za Yahova, mitsonkhanoyo njafovolo ndipo munthu ali-wense angatsonkhane nawo.
NFUNDO ZINANGO ZA M’BIBLIYA
Onani pa jw.org vidiyo yakuti, Thangwe Ranyi Tin’funika Kupfunza Bibliya? Vidiyoyo ikugumanika m’bzirewedwe bzakupitirira 880
ZINDIKIRANI BZAKUSAYA BZANU BZAUZIMU.
‘An’kondwa ni wale omwe ambazindikire bzakusaya bzawo bzauzimu.’—MATEU 5:3.
PFUNZANI BZIZINJI BZA MULUNGU.
‘Lingani Mulungu . . . ndipo munimugumana . . . iye ali lini kutali na m’bodzi na m’bodzi wa ifepano.’—MABASA 17:27.
MBAWERENGANI BIBLIYA NDIPO MBAKUMBUKIRANI BZOMWE MWAWERENGADZO.
‘Ambakondwa na malango ya Yahova, * ndipo ambayakumbukira masikati na usiku. . . . Ndipo bzense bzomwe iye ambacita bzin’dzamufambira bwino.’—PSALYMO 1:2, 3.
^ ndi. 23 Yahova ni dzina la Mulungu ndipo limbagumanika m’Bibliya.
