Kukhala na Thanzi Labwino
Bibliya ni bukhu lini lomwe lina ndandanda wa mankhwala. Napo bziri tenepo, iro lingatithandize kukhala na thanzi labwino. Onani nfundo za m’Bibliya zomwe zingakuthandizeni.
MBASAMALIRANI THUPI LANU
NFUNDO YA M’BIBLIYA: ‘Palibe munthu omwe adawenga kale thupi lace, koma ambalidyesa na kulisamalira.’—Wayefezo 5:29.
THANDAUZO LACE: Nfundo ya m’Bibliyayi ikutithandiza kuti timbasamalire thanzi lathu. Kafukufuku munango ambalatiza kuti mabvuto mazinji ya thanzi yambabwera thangwe ra momwe timbacitira bzinthu pa moyo wathu. Tenepo, kukhala na bzakusankhula bzabwino, kungakuthandizeni kukhala na thanzi labwino.
BZOMWE MUNGACITE:
-
Kudya Cakudya Cakupasa Thanzi. Mbadyani cakudya cakupasa thanzi na kumwa madzi mazinji.
-
Kucita Masenzeka Yakulimbisa Thupi. Bziribe basa kuti muna magole mangasi, kucita masenzeka yakulimbisa thupi kungakuthandizeni kukhala na thanzi labwino napo penu muna bvuto la thupi ayai mumbaduwala kawiri-kawiri. Abale, axamwali na adotolo wanu angakupaseni malango na kukulimbisani kuti mumbacite masenzeka yakulimbisa thupi, koma kuti bzimwebzi bziphate basa bzin’themba imwepo.
-
Mbagonani Nthawe Yakukwanira. Wanthu omwe ambagona lini mwakukwanira, kawiri-kawiri ambaduwala matenda makulu. Wanthu azinji ambagona lini mwakukwanira thangwe iwo ambasankhula kucita bzinthu bzinango pa nthawe yakugona. Tenepo, imwepo mukambagona mwakukwanira, mun’dzakhala na thanzi labwino.
SIYANI KUCITA BZINTHU BZOMWE BZINGADZONGE THANZI LANU
NFUNDO YA M’BIBLIYA: ‘Mbatibziceneseni pa bzinthu bzomwe bzimbapswipiza thupi na mzimu.’—2 Wakolinto 7:1.
THANDAUZO LACE: Tin’dzakhala na thanzi labwino tikambatcenkha bzinthu bzomwe bzimbadzonga thanziro, ninga kufumali fodya, ndipo kufumaliko kumbayambisa matenda ndipo kumbapha.
BZOMWE MUNGACITE: Nembani nsiku yomwe mun’dzaleka kufumali. Ikanati kufika nsikuyo, tayani fodya, kandudu, cigarro, fosko ayai cinthu ciri-cense comwe cimbabverana na kufumaliko. Tcenkhani kucita tsansa na wanthu omwe ambafumali. Uzani abale na axamwali wanu kuti mwaleka kufumali kuti akuthandizeni.
NFUNDO ZINANGO ZA M’BIBLIYA
Mungakumbire Bibliya kuna m’bodzi wa Mboni za Yahova komwe mumbakhala
CITANI BZINTHU BZOMWE BZINGAKHOTCERERE MOYO WANU.
‘Ukamanga nyumba ipsa, umangembo mpanda padzaulu pa nsodzi ya nyumbayo, kucitira kuti paleke kukhala na mulandu wa mulopa pa nyumbayo, munthu akagwa kucokera pa nsodzipo.’—BZAKUTONGA 22:8.
MBABZIPHATANI MUKAKALIPA.
‘Omwe ambakalipa lini kamangu ni munthu wakuzindikira, koma wakusaya kupirira ambalatiza utsiru bwace.’—MIMWANI 14:29.
LEKANI KUMBADYA MWAKUPITIRIRA MALIRE.
‘Leka kukhala pakati pa . . . omwe ambadya mwakupitirira malire.’—MIMWANI 23:20.
