1, 2. (a) Kodi mpolofeta Zakariya akhadaleweratu polofesiya iponi yakulimbisa wanthu wa Mulungu? (b)  Kodi nkhani ino intawira mibvunzo iponi? (Onani cithunzi-thunzi cakuyambirira.)

PAKULEWA bza nthawe yomwe tinkukhalayi, Yahova adaleweratu kuti: “Mu nsiku zimwezire, amuna khumi wa bzirewedwe bzense bza wanthu wa mitundu, wan’dzaphatirira mkanjo wa mwamuna m’bodzi Mjuda, waciti: ‘Tiniyenda namwe thangwe tabva kuti Mulungu anamwe.”’ (Zak. 8:23) Ninga amuna khumi wakuimira womwe wana cidikhiro ca pansi pano, wadakhalira wakukhulupirika pa ‘kuphatirira mkanjo wa mwamuna m’bodzi Mjuda.’ Iwo ali wakukomedwa kukhala ku mbali ya ‘m’Jirayeri wa Mulungu,’ pakudziwa kuti Yahova ankusimba anyakudzozedwa wace.​—Wag. 6:16.

² Ninga momwe mpolofeta Zakariya akhadalewera, Jezu adafotokoza nfundo zikulu-zikulu zomwe zimbabweresa ciphatano pakati pa wanthu wa Mulungu. Jezu adafotokozera atumiki wace bza mathimu mawiri, ‘tumabira tung’ono’ na ‘mabira yanango,’ koma iye adalewa kuti ‘yan’dzakhala thimu libodzi na m’busa m’bodzi.’ (Lu. 12:32; Ju. 10:16) Tenepo, ciphatano ca mathimu mawiriya cingacitise mibvunzo ninga iyi: (1) Kodi mpsakufunika kuti mabira yanango yadziwe madzina ya wense womwe ankudzozedwa nsiku zino? (2) Kodi Akristau wakudzozedwa wan’funika kumbabziwona tani? (3) Kodi mun’funika kumbamuwona tani munthu penu wayamba kudya bzizindikiro bza ciraliro  ca mbuya m’gwere lanu? (4) Kodi mun’funika kukhala na thupo thangwe ra kukula kwa mulewengo wa anyakudzozedwa? Mbatiwoneni mitawiro ya mibvunzoyi m’bodzi na bodzi payekha.

3. N’thangwe ranyi mpsakunesa kwa ifepano kudziwa kuti pa wanthu wa Mulungu mbani womwe an’kacita mbali ya wa 144.000?

³ Kodi mpsakufunika kuti mabira yanango yadziwe madzina ya wense womwe ankudzozedwa nsiku zino? Mtawiro wa cigwatho ngwakuti ne. N’thangwe ranyi tinkulewa tenepo? Thangwe rakuti munthu akadzozedwa, tingandolewe kuti munthuyo watambira mcemo wakuyenda kudzulu, sikuti citsimikizo ca mabai-bai yace. N’thangwe race Sathani ambacitisa kuti pakhale na ‘apolofeta wakunama . . . kuti adzapambuse napo wakusankhulidwawo.’ (Mat. 24:24) Palibe omwe angadziwe penu nyakudzozedwayo an’dzatambira mabai-bai yace kudzulu ayai ne mpaka Yahova adzayeruze munthu omwe ankuthemera kudzatambira mabai-bai yaceyo. Yahova ndiye ambadziwa penu munthuyo animupasa cidindo ca kumalizira, pambuyo pa infa yace ayai pomwe ‘citsautso cikulu’ citasala pang’ono kuyamba. (Cibv. 2:10; 7:3, 14) Tenepo, n’bza nzeru lini, kwa ifepano kufuna kudziwa kuti mbani wa anyakudzozedwa ali pansi pano omwe an’kacita mbali ya wa 144.000. ^[1]

4. Penu mpsakukwanisika lini kudziwa madzina ya Jirayeri wauzimu nsiku zathu zino, tsono kodi wa mabira yanango wangakwanise tani kuyenda nawo pabodzi?

⁴ Penu mpsakukwanisika lini kudziwa madzina ya Jirayeri wa uzimu nsiku zathu zino, tsono kodi wa mabira manango wangakwanise tani ‘kuyenda nawo’ pabodzi? Onani polofesiya ya Zakariya inkulewa wanthu wa pa ubale womwe wakuimira amuna khumi. Wanthu amwewa ‘wan’dzaphatirira mkanjo wa mwamuna m’bodzi Mjuda, waciti: ‘Tiniyenda namwe thangwe tabva kuti Mulungu anamwe.’ Napo pankulewedwa bza Mjuda m’bodzi pano, koma fala lakuti ‘namwe’ linkulewa bza wanthu wazinji sikuti m’bodzi. Tenepo Mjuda wauzimu umweyu ankuimira wanthu wazinji sikuti munthu m’bodzi! Tsono tin’funika lini kumudziwa Mjuda wauzimu umweyu penu ni mkazi ayai mwamuna kuti pambuyo pace tikwanise kumutewera. Koma tin’funika kuwadziwa ninga thimu pambuyo pace tiwathandize ninga thimulo. Palibe mbuto na ibodziyo m’Bibliya imbatiuza kuti tin’funika kumbatewera wanthu. Jezu ndiye mtsogoleri wathu.​—Mat. 23:10.

5. Kodi ni cenjezo liponi lomwe Akristau wakudzozedwa wan’funika kulikumbukira na mpembo, ndipo thangwe ranyi?

⁵ Wense womwe wambadya bzizindikiro bza pa cikumbuso wan’funika kusamala kwene-kwene na cenjezo lomwe limbagumanika pa 1 Wakolinto 11:27-29. (Werengani.) Kodi mpostolo Paulo akucenjeza mfundo iponi pamwepa? Mkristau wakudzozedwa akasaya kupitiriza kukhala pa uxamwali bwa bwino na Yahova, kudya bzizindikiro bza pa cikumbuso kumbakhala kulibe phindu. (Waheb. 6:4-6; 10:26-29) Cenjezo limweri limbathandiza Akristau wakudzozedwa kuti iwo akanati kutambira mabai-bai yawo. Iwo wan’funika kupitiriza kukhala wakukhulupirika ‘kufikira atagumana malipo ya kucemeredwa na Mulungu kuyenda kudzulu, mwa Kristu Jezu.’​—Waf. 3:13-16.

6. Kodi Akristau wakudzozedwa angalatize tani kuti wankufamba mwa kubverana na kudzozedwa kwawo?

⁶ Mwakufuliziridwa Paulo adadandaulira Akristau wakudzozedwa kuti ‘ambafambe mwakuthemera mcemo omwe adacemeredwa nawo.’ Kodi iwo wan’funika kucita tani? Paulo ankupitiriza kulewa kuti: ‘Mbakhalani wakubzicepswa m’makumbukidwe, na wakupfatsa, ndipo na wakupirira; mucimbapirirana winango na mwanzace na lufoyi. Mucimbacita nyongo ya kusunga ubodzi bwathu mwa mzimuyo, na mwa mtendere ninga cingwe cakutimangiridza.’ (Wayef. 4:1-3) Mzimu wa Yahova umbalimbisa kubzicepswa sikuti kubzikuza. (Wakol. 3:12) Mwakubzicepswa, Akristau wakudzozedwa wambazindikira kuti iwo walibe mzimu wakucena wamphanvu kuposa womwe  wana cidikhiro cakudzakhala pansi pano. Iwo wambabziwona lini kuti wan’themera kukhala na cidziwiso cakupambulika na ugo bwa kumbawona masomphenya; ayai kubziwona kuti iwo ni wapadzulu kwene-kwene kuposa winango. Ndipo iwo wambauzambo lini wanthu winango kuti adzozedwa na kuti wayambe kudya bzizindikiro bza pa cikumbuso, mbuto mwace, iwo mwakubzicepswa wambadziwa kuti womwe ambadzoza kuti munthu adzayende kudzulu ni Yahova.

7, 8. Kodi Akristau wakudzozedwa wan’funika kumbawawona tani wanthu winango, ndipo thangwe ranyi?

⁷ Napo kukhala na mcemo wakuyenda kudzulu ni mwayi ukulu kwene-kwene, Akristau wakudzozedwawa wambadikhira lini kulemekezedwa na anzawo. (Waf. 1:18, 19; werengani Wafiripo 2:2, 3.) Mzimu wa Yahova umbawacitira umboni ali-wense payekha. Palibe cidziwiso comwe cimbaperekedwa cakuti munthuyo wadzozedwa. Tenepo iwo wambadabwa lini pomwe wanthu winango wakukhulupira lini kuti iwo wadzozedwadi na mzimu wakucena. Iwo wambazindikira kuti bzinembo bzimbawathandiza mwakamfulumize kukhulupira kuti iwo ana mcemo wakupambulika wakucokera kwa Mulungu. (Cibv. 2:2) Mu njira iri-yense, iwo wambaphatisa lini basa kudzozedwa kwawo ninga khadi la mcemo kuti abziwonesere kwa anzawo. Azinji wa iwo, wambauza lini wanthu winango bzomwe ankugumana nabzo pa moyo wawo, kutcenkha kumbabzikumbukira iwo wokha; ndipo ambabzitumbiza lini thangwe ra mabai-bai yawo ya kutsogolo.​—1 War. 1:28, 29; werengani 1 Wakolinto 4:6-8.

⁸ Kuthumizira bzimwebzi, Akristau wakudzozedwa wambabziwona lini kukhala wanthu wakubvekera. Iwo wambanyang’ana lini winango kuti akhalembo na mcemo ubodzibo-dziyo, cidikhiro ninga cawo ayai kulimbikira kuti akonze magulu yawo ya anyakupfunza wa Bibliya. (Wag. 1:15-17) Kucita bzimwebzi kungacitise kusaya kubverana m’gwere, koma kuphata basa na mzimu wakucena, kumbabweresa mtendere na ciphatano.​—Werengani Waroma 16:17, 18.

9. Thangwe ranyi tin’funika kusamala na momwe timbacitira bzinthu na womwe wambadya bzizindikiro pa cikumbuso? (Onani kwadru yakuti: “ Lufoyi ‘limbacita lini bzinthu bzapezi.’”)

⁹ Kodi imwepo mun’funika kumbawona tani ali-wense omwe ambadya bzizindikiro pa cikumbuso? Jezu adauza anyakupfunza wace kuti: ‘Mwensenemwe ndimwe abale.’ Ndipo iye adalewa pomwe kuti: ‘Ali-wense wakubzikuza an’dzacepswedwa, koma ali-wense wakubzicepswa an’dzakuzidwa.’ (Mat. 23:8-12) Tenepo n’kuphonya kutumbiza wanthu, napo iwo acikhala abale wakudzozedwa wa Kristu. Pakulewa bza akulu, Bibliya limbatilimbisa kuti titewezere cikhulupiro cawo, tsono timbauzidwa lini kuti tiwone munthu ali-wense kuti akhale mtsogoleri wathu. (Waheb. 13:7) N’cadidi kuti Bibliya limbalewa bza wanthu winango womwe an’funika ‘kupasidwa ulemu bukulu.’ Tenepo wanthu amwewa an’funika kupasidwa ulemu, sikuti thangwe rakuti iwo mbakudzozedwa, koma thangwe rakuti ‘wambatsogolera bwino’ na kuphata ‘basa lawo na nyongo ya kulewa-lewa na kupfunzisa.’ (1 Tim. 5:17) Tenepo, bzingawacitise manyazi Akristau wakudzozedwa penu winango angawatumbize ayai kuwalemekeza mwakunyanyira. Comwe cingaipiretu n’cakuti Akristau wakudzozedwa amwewa wakapasidwa ulemu bwakunyanyira bzingakhale bzakuwanesa kupitiriza kukhala wakubzicepswa. (War. 12:3) Tenepo palibe ne na m’bodziyo wa ifepano omwe angafune kuphonyesa m’bodzi wa abale wa Kristu amwewa!​—Lu. 17:2.

10. Kodi tingalatize tani ulemu bwa kuthemera kwa Akristau wakudzozedwa?

¹⁰ Kodi tingalatize tani ulemu bwa kuthemera kwa wale womwe Yahova wasankhula kuwadzoza? Ifepano tingadacita lini mibvunzo kuti tidziwe bza kudzozedwa kwawo. Tikacita tenepoyo tin’dzakhala tinkutcenkha kupitira nkhani zomwe zin’kutitokonya lini. (1 Wat. 4:11; 2 Wat. 3:11) Ndipo tin’funika lini kumbakumbukira kuti abereki, akazi, amuna, ayai wadzinza wa Akristau wakudzozedwa  wan’dzadzozedwambo. Ubale ayai malowozi bziribe mbali pa makonzedweya. (1 Wat. 2:12) Ifepano tin’funikambo kutcenkha kumbabvunza mkazi ayai mwamuna wa nyakudzozedwa kuti ambabva tani pakudziwa kuti wan’dzakhala lini pabodzi na mwamuna ayai mkazi wace m’paraizo pansi pano. Mbuto mwa kumbacita mibvunzo yomwe ingapweteke abale wathu, tensenefe tingakhale na cikhulupiro cakuti Yahova an’dzafuthula boko lace acikwanisa ‘cakukhumba ca bza moyo bzense.’​—Psal. 145:16.

11. Kodi womwe wambawona Akristau wakudzozedwa mwacikati-kati wan’dzatcenkha ngozi iponi?

¹¹ Wale womwe ambawona Akristau wakudzozedwa mwacikati-kati bzin’dzawathandiza kutcenkha ngozi yomwe imbabwera mwakabisira. Pakuti bzinembo bzimbatiuza kuti ‘abale wacinyengo’ wangabwere mu gwere. (Wag. 2:4, 5; 1 Ju. 2:19) Anyacinyengo an’dzanamizira kukhala wakudzozedwa. Ndipo kuthumizira bzimwebzi Akristau winango wakudzozedwa wangasiye kukhala wakukhulupirika. (Mat. 25:10-12; 2 Pe. 2:20, 21) Tikatcenkha ‘kumbatumbiza munthu’, tin’dzasiya lini cadidi thangwe ra kutewera munthuyo, ndipo tin’dzaluzambo lini cikhulupiro cathu thangwe ra wanthu womwe wakhala ankutumikira Mulungu kwa magole mazinji akasiya kukhala wakukhulupirika.​—Juda 16.

12, 13. Thangwe ranyi tin’funika lini kukhala na thupo thangwe ra kuthumizirika kwa mulewengo wa wanthu womwe wankudya bzizindikiro pa cikumbuso?

¹² Magole yano tinkuwona mulewengo wa wanthu womwe alinkudya bzizindikiro pa Ciraliro ca infa ya Kristu unkuthumizirika kwene-kwene. Bzimwebzi bzinkusiyana na mulewengo womwe tikhamuwona kwa magole mazinji m’mbuyomu. Kodi tin’funika kukhala na thupo thangwe ra kukula kwa mulewengoyu? Mtawiro ngwakuti ne. Mbatifotokozeraneni bzinthu bzinango bzomwe tin’funika kukumbukira.

¹³ ‘Yahova ambadziwa wanthu wace.’ (2 Tim. 2:19) Wale womwe wambacita mbali ya kulewenga pa cikumbuso wan’funika lini kuyeruza kuti mbani womwe ana cidikhiro ca kudzayendadi kudzulu. Pakuti mulewengo wa anyakudya bzizindikiro umbaphatanidza wale womwe mwakuphonyeka wambakumbuka kuti ni wakudzozedwa. Pana winango wadayamba kudya bzizindikiro bza cikumbuso ndipo pambuyo pace adaima kudyako. Winango mbakusaya kukwana mu msolo ndipo wambakumbuka kuti wana cidikhiro ca kukatonga pabodzi na Kristu kudzulu. Tenepo mulewengo wa wanthu womwe wambadya bzizindikiro bza pa cikumbuso bzimbalatiza lini mulewengo caiye  wa wanthu wakudzozedwa womwe akalipo pansi pano.

14. Kodi Bibliya limbalewa ciyani pa nkhani ya mulewengo wa anyakudzozedwa womwe wan’dzakhala wakalipo pansi pano pomwe citsautso cikulu cin’dzakhala casala pang’ono kuyamba?

¹⁴ Anyakudzozedwa wan’dzakhala ali kumbali zense za dzikoli pomwe Jezu an’dzabwera aciwakonkhanisa kuti wadzayende kudzulu. Pakulewa bza nthawe imweyi, Bibliya limbalewa bza Jezu kuti: ‘Iye an’dzatumiza wanjo wace na kulira kwa mphanvu kwa cimbututu, ndipo iwo wan’dzakonkhanisa anyakusankhulidwa kucokera ku mbali zinai za mphepo, kuyambira ku phampha kwa kudzulu mpaka ku phampha kunango.’ (Mat. 24:31) Bibliya limbalewa kuti anyakudzozedwa wakucepa wan’dzakhala wakalipo pansi pano pa nsiku za kumalizira zino. (Cibv. 12:17) Tenepo Bibliya limbalewa lini kuti anyakudzozedwawo wan’dzasala wangasi pomwe citsautso cikulu cin’dzakhala casala pang’ono kuyamba.

15, 16. Kodi tin’funika kukumbukira ciyani bza wale womwe wasankhulidwa na Yahova kukhala m’thimu la 144.000?

¹⁵ Yahova ambasankhula munthu wakudzozedwa mwakubverana na bzomwe iye adacita. (War. 8:28-30) Yahova adayamba kusankhula wanthu kuti wakatonge kudzulu pambuyo pa infa na kulamusidwa kwa Kristu, ndipo bzinkuwoneka kuti Akristau wa m’magole dzana yakuyambirira wense wakhali wakudzozedwa. Kuyambira magole dzana yakutoma kufikira kumayambiriro ya nsiku za kumaliza, azinji womwe wakhambabziti ni ateweri wa Kristu, akhali Akristau wacinyengo, ndipo Jezu adawandendemezera na ‘nyansongole.’ Napo bziri tenepoyo Yahova adapitiriza kudzoza wanthu winango wakukhulupirika nthawe imweyi, ndipo wadalatiza kukhala ‘trigu’ ninga momwe Jezu akhadalewera. (Mat. 13:24-30) Nthawe yakumalizira ino Yahova ankupitiriza kusankhula wanthu womwe wan’kacita mbali ya 144.000. ^[2] Penu iye ankupitiriza kusankhula wanthu winango kuti wadzayende kudzulu mu nthawe yakumalizira ino, kodi ndife yani kuti tipenukire nzeru zace? (Zai. 45:9; Dan. 4:35; werengani Waroma 9:11, 16.) ^[3] Tin’funika kusamala pakuti tingayambe kucita bzinthu ninga anyabasa wakuipidwa, wale womwe wadayamba kung’ung’udza thangwe ra momwe bwana wawo adawalipira mwakundendemerana na nyabasa omwe adaphata basa kwa ora ibodzi ule.​—Werengani Mateu 20:8-15.

¹⁶ Si wense womwe wana cidikhiro ca kudzulu wambacita mbali ya ‘kapolo wakukhulupirika na wanzeru.’ (Mat. 24:45-47) Ninga Akristau wa m’magole dzana yakutoma, Yahova pabodzi na Jezu nsiku zino wankudyesa wanthu wazinji mwa kuphatisa basa wanthu wang’ono-ng’ono. M’magole dzana yakutoma ni Akristau wakucepa wokha womwe wadaphatisidwa basa kunemba bzinembo bza Cigirego bza Cikristau. Mpsakundendemeranambo na nsiku zino, anyakudzozedwa wakucepa wokha ndiwo womwe waikhidwa kuti wambapereke cakudya cauzimu ‘ca pa nthawe yace.’

17. Kodi mu nkhani ino tapfunza ciyani?

¹⁷ Kodi tapfunza ciyani mu nkhani zimwezi? Yahova wasankhula kutipasa mitundu miwiri ya mabai-bai, kwa Ajuda wauzimu, an’dzatambira moyo kudzulu, kwa amuna khumi wakuimira wan’dzatambira dziko lapansi. Tenepo Yahova akufuna kuti tense tikhale wakukhulupirika mu njira ibodzi-bodzi bziribe basa penu tina cidikhiro cakuyenda kudzulu ayai ca pansi pano. Magulu yense mawiri yan’funika kukhala yakubzicepswa. Magulu yense mawiri yan’funika kukhala pa ciphatano. Magulu yense mawiri yan’funika kulimbisa mtendere m’gwere. Pakuti nsiku zakumalizira zinkufika kuphampha, tenepo tense tikhale wakutsimikiza kutumikira Mulungu ninga gulu libodzi la mabira mwa kutsogoleredwa na Kristu.