N’thangwe ranyi mpsakubvumizidwa lini kuikha mabukhu ya Mboni za Yahova pa webisaite zinango ayai pa mbuto zakucezera za pa interneti?

Pakuti ife ninga Mboni za Yahova timbagawira mabukhu fovolo, wanthu winango ambakumbuka kuti bziribe basa kuikha mabukhu yathu pa interneti ayai pa mbuto zakucezera za pa interneti. Tsono bzimwebzi bzingabwerese mabvuto makulu kwene-kwene ndipo bzimbapitana na Mitemo Yakufunika Kuiteweza * ya pa webisaite yathu. Mitemoyi imbalewa kuti mpsakubvumizidwa lini ‘kuikha bzithunzi-thunzi, mabukhu, bzizindikiro, nyimbo, mavidiyo ayai nkhani za pa webisaite yathu pa interneti (bzomwe bzinkuphatanidza webisaite inango iri-yense mbuto zakukoyera bzinthu zomwe wanthu wense ambazipita pa interneti).’ N’thangwe ranyi mitemoyi njakufunika?

Bzinthu bzense bza pa webisaite yathu bzimbakhotcereredwa na lamulo. Lamulolo ndakufunika kwene-kwene thangwe limbathandiza wathu kuti aleke kuphatisa basa mwakuphonyeka bzinthu bza pa jw.org. Apanduki na wanthu winango omwe ambafuna kudzonga basa lathu, nthawe zinango ambaikha mabukhu yathu m’mawebisaite yawo kuti apumpse Mboni za Yahova pabodzi na wanthu winango. Ndipo m’mwemo, iwo ambaikhambo bzinthu bzinango bzomwe bzingacitise wanthu kuyamba kupenukira Mboni za Yahova. (Psalymo 26:4; Mimwani 22:5) Winango ambaphatisa basa kuipa bzinthu bzathu bzomwe bziri pa jw.org kuti atsatsire malonda yawo, ayai ambabziphatisira basa kuipa m’mitedwe yawo ya m’manja. Tsono, pakuti bzinthu bzathu mpsakukhotcereredwa mwa lamulo, tingayende ku nyumba ya mphala kuti aletse wanthuwo kucita bzimwebzi. (Mimwani 27:12) Tsono tikambandolekerera wanthu winango, ayai abale wathu kuikha pa interneti ayai pa webisaite zinango bzinthu bzathu bzomwe timbaphatisa basa pa jw.org kuti atsatsire malonda yawo, wa nyumba ya mphalawo angasiye kutithandiza.

Kucosa mabukhu yathu pa mbuto inango ya pa interneti yakusaya kukhala webisaite yathu ya jw.org, kungakhale ngozi ikulu-yense. Yahova ambatipasa cakudya cauzimu kokha mwakuphatisa basa ‘kapolo wakukhulupirika na wanzeru’ basi. (Mateu 24:45) ‘Kapoloyu’, ambaphatisa basa kokha mawebisaite yace yakubvumizidwa mwa lamulo, yomwe ni www.pr418.com, tv.pr418.com, na wol.pr418.com kuti yapereke cakudya cauzimu. Ndipo tina bzinthu bzitatu bzokha bzakuphatisira basa mu mitcini ya nzeru na m’mitedwe ya m’manja bzomwe ni JW Language^®, JW Library^®, na JW Library Sign Language^®. Pa mawebisaite yamweya na pa bzinthu bzimwebzi, tin’dzagumana lini bzinthu bza malonda ayai bzinthu bzakuipisidwa na dziko la Sathaniri. Tsono kutenga mabukhu yathu ku mbuto zinango za pa interneti, kungakhale ngozi ikulu thangwe bzinthubzo bzingakhale kuti bzidacinjidwa pang’ono.—Psalymo 18:26; 19:8.

Kuthumizira bzimwebzi, kuikha bzinthu bzathu pa mbuto za mawebisaite zomwe wanthu ambacezera, bzimbacitisa kuti apanduki na wanthu winango alewe mafala yakunyoza gulu la Yahova. Abale winango ambatawira wanthuwo pakufuna kukhotcerera gulu lathu, koma bzimwebzi bzimbacitisa kuti Yahova apitirize kunyozedwa. Maceza ya pa internetiyo, ni njira lini yabwino yakulungamizira makumbukidwe ya wanthuwo na kuwathandiza kuti abvesese cadidi pa nkhaniyo. (1 Timotio 6:3-5; 2 Timotio 2:23-25) Ndipo wanthu winango, ambakonza mawebisaite yawo na mbuto zakucezera ayai zakutumizirana mafala zomwe zingawoneke ninga za gulu lathu ayai za abale wa mu Bungwe Lakutonga. Tsono mbutozi n’zacinyengo. Palibe ali-wense wa m’Bungwe Lakutonga omwe ana webisaite yace-yace ayai mbuto yakucezera ayai yakutumizirana bzinthu pa interneti.

Tikauza munthu kuti apite pa jw.org, timbakhala tinkuthandizira basa la kupalizira ‘bzipsa bzabwino.’ (Mateu 24:14) Webisaite yathu inkuyenda icimbakonzedwa bwino kwene-kwene. Tin’funa kuti munthu ali-wense agumane phindu na webisaiteyi. Na tenepo, bziribe kuphonyeka kutumizira munthu bukhu ayai vidiyo pa e-mail, ayai kumutumizira link yomwe inimupitisa pa webisaite yathu. Mwa njira imweyi, timbakhala tinkutsogolera munthu kwa ‘kapolo wakukhulupirika na wanzeru’ omwe ni yekhayo omwe Yahova ambamuphatisa basa kuti apereke cakudya.