GOLE lamalali, abale azinji wa pa dziko lense adasankhulidwa kuti akhale akulu wa gwere na atumiki wakuthandiza. Penu imwepo ndimwe m’bodzi wa iwo, tina citsimikizo cense cakuti munkukomedwa kwene-kwene thangwe ra kutumikira Yahova na abale wanu pa udindobu.

Pakuyamba pinango imwepo mukhana thupo kuti munisamalira tani udindobo. Bzimwebzi mpsacibadwa, ndipo bzidacitikambo na Jason, tswaka lomwe linkutumikira ninga mkulu wa gwere, iye adati: “Pomwe ndidaikhidwa ninga mkulu, ndidawona ninga kuti ndine wakupanikizika kwene-kwene thangwe ra udindo bupsabo.” Ndipo Mozeji na Jeremiya adabzibva kuti akhali lini wakuthemera pomwe adapasidwa udindo bupsa na Yahova. (Kufuluka 4:10; Jeremiya 1:6) Penu imwepo mumbabzibvambo tenepoyo, kodi n’ciyani comwe mungacite kuti mupitirize kucita bwino udindo bwanubo? Mungapfunze bzizinji na bzomwe bzidacitika na Timotio.—Mabasa 16:1-3.

Pomwe Timotio adayamba kucita ulendo na mpostolo Paulo pinango akhana magole 20 yakubadwa. Ndipo pomwe iye adatambira mcemo umweyu, pinango adawona kuti angadakwanisa lini kupfunzisa na kupereka malango kwa wanthu winango thangwe rakuti akhali mng’ono. (1 Timotio 4:11, 12; 2 Timotio 1:1, 2, 7) Tsono iye adapitiriza kukhwima mwauzimu, ndipo pomwe padapita magole khumi Paulo adauza abale wa ku Firipi kuti: ‘Ndikudikhira Mbuya Jezu kuti mwakusaya kucedwa, atumize Timotio kwa imwepo.’ N’thangwe ranyi Paulo adalewa bzimwebzi? Iye adalewa kuti: ‘Ndiribe pomwe munango wakubzipereka ninga iye.’—Wafiripo 2:19, 20.

N’thangwe ranyi Timotio ni ciratizo cabwino kwa akulu wa gwere? Mbatiwoneni mathangwe matanthatu.

1. Iye akhafunisisa kusamalira wanthu. Paulo adauza abale wa ku Firipo kuti Timotio ‘angadasamalira’ nkhani zawo. (Wafiripo 2:20) Timotio akhafuna kuti abalewo apitirize kukhala pauxamwali bwakulimba na Yahova, ndipo iye akhacita nyongo kuti awathandize mwakuphatisa basa nthawe na mphanvu zace.

William, omwe ankutumikira ninga mkulu wa gwere kwa magole yakupitirira 20, nthawe zense ambauza abale omwe ambaikhidwa ninga akulu kuti: “Mbafunani abale, ndipo mbaikhani patsogolo bzakusaya bzawo sikuti kundokumbukira momwe bzinthu bzingafambire.” Tenepo, lekani kukhala ninga nyakufambisa kanderendere omwe ambandokumbukira kokha bza nthawe ya kufika ku mbuto yakupakirira akanderendere, m’mbuto mwa kukumbukira bza kupakiza wanthu.

2. Iye akhaikha utumiki bwa Yahova pa mbuto yakuyamba. Paulo adalewa kuti Timotio akhali wakusiyana kwene-kwene na wale omwe akhacita ‘bzakufuna bzawo, si kuti bza Jezu Kristu.’ (Wafiripo 2:21) Paulo adawona kuti abale azinji akhafunisisa kukhala na bzinthu bzakuthupi pa moyo wawo. Ndipo nthawe zinango, bzimwebzi bzikhawacitisa kuti ambaikhe bzakufuna bzawo pa mbuto yakuyamba m’mbuto mwa kutumikira Yahova. Koma Timotio akhali wakusiyana na iwo! Ndipo pomwe adakhala na mwayi wakucita bzizinji mu utumiki bwa Mulungu, iye adacita bzinthu mwakundendemerana na Zaiya, omwe adalewa kuti: ‘Ndiri pano ine! Nditumizeni!’—Zaiya 6:8.

Kodi mungacite tani kuti mukwanise kusamalira bzakusaya bzanu na bzakusaya bza gwere? Cakuyamba, tewezerani malango ya Paulo yakuti: ‘Mutsimikize kuti mpsiponi bzinthu bzakufunika kwene-kwene.’ (Wafiripo 1:10) Mbaikhani pa mbuto yakuyamba utumiki bwa Yahova. Caciwiri, mbatcenkhani bzinthu bzomwe bzingakudzongereni nthawe na mphanvu zanu. Paulo adauza Timotio kuti: ‘Thawa bzikhumbo bza utswaka ndipo tewera cirungamo, cikhulupiro, lufoyi, mtendere.’—2 Timotio 2:22.

3. Iye akhaphata basa na nyongo mu utumiki bwa Yahova. Pakulewa bza Timotio Paulo adati: ‘Iye adaphata basa ninga kapolo pabodzi na ine pa kuyendesa patsogolo bzipsa  bzabwino, ninga mwana omwe ali pabodzi na baba wace.’ (Wafiripo 2:22) Timotio akhali lini mtofu. Iye adaphata basa na nyongo pabodzi na Paulo, ndipo bzimwebzi bzidacitisa kuti uxamwali bwawo bukhale bwakulimba kwene-kwene.

Nsiku zino gulu la Yahova linkucita mabasa mazinji. Ndipo mukambacitambo mabasayo mun’dzakhala wakukondwa kwene-kwene ndipo mun’dzakhala pauxamwali bwakulimba na abale pabodzi na mpfumakazi zanu. Tenepo, tsimikizani kuti nthawe zense muna ‘bzakucita bzizinji pa basa la Mbuya.’—1 Wakolinto 15:58.

4. Iye akhaphatisa basa bzomwe akhapfunza. Paulo adauza Timotio kuti: ‘Iwepo watewera mwapafupi mapfunziso yangu, bzomwe ndimbacita pa moyo wangu, bzakulinga bzangu, cikhulupiro cangu, kupirira kwangu, lufoyi langu na kulimbikira kwangu.’ (2 Timotio 3:10) Timotio akhaphatisa basa bzomwe akhapfunza, ndipopa iye adapasidwa udindo buzinji.—1 Wakolinto 4:17.

Kodi mungagumane tani mkulu wa gwere wa ciratizo cabwino kuti mumutewezere? Ciratizo pa nkhaniyi ni Tom, omwe ankutumikira ninga mkulu wa gwere kwa magole mazinji, iye ambakumbukira bza thandizo lomwe mkulu munango adamupasa. Iye adati: “Kawiri-kawiri ndikhamukumbira malango ndipo ndikhayaphatisa basa. Mwakusaya kucedwa, bzimwebzi bzidandicitisa kuti ndidziwe bzizinji bza momwe ndingasamalirire udindo bwangu.”

5. Iye akhapitiriza kupfunza bzinembo. Paulo adalangiza Timotio kuti: ‘Ubzizoloweze kucita bzithu bzomwe bzin’dzakuthandiza kukhala wakubzipereka kwa Mulungu.’ (1 Timotio 4:7) Mwa ciratizo, omwe ambacita mapici yakuthamanga ambakhala na mpfunzisi, tsono mpfunzisiyo ambafunika kubzipfunzisambo. Paulo adalimbisa Timotio kuti: ‘Pitiriza kukhala wakubzipereka pa kuwerenga pa maso pa wanthu, pa kuwadandaulira na pa kuwapfunzisa. . . . Mbabzikumbukira bzinthu bzimwebzi; ucibzipereka kuti kuyenda kwako patsogolo kuwonekere kwa wense.’—1 Timotio 4:13-15.

Imwepo mun’funikambo kupitiriza kuthumizira luso lanu. Mbacitani nyongo ya kupfunza Bibliya, mucimbateweza citsogozo ca gulu la Yahova. Lekani kumbabzithemba. Lekani kumbakumbuka kuti ndimwe m’dziwi wa bzinthu bzizinji mwakuti mungamalise bvuto liri-lense mwekha mwakusaya kufufudza bzinembo. Ninga Timotio, ‘mbasamalani nthawe zense na bzomwe mumbacita pabodzi na bzomwe mumbapfunzisa.’—1 Timotio 4:16.

6. Iye akhathemba mzimu wa Yahova. Pakulewa bza utumiki bwa Timotio, Paulo adamucenjeza kuti: ‘Na thandizo la mzimu wakucena omwe uli pakati pathu, sunga cuma cakupambulika comwe udapasidwaco.’ (2 Timotio 1:14) Mafalaya yankulatiza kuti Timotio akhafunikira mzimu wa Mulungu kuti utumiki bwace bufambe bwino.

Donald, omwe ankutumikira ninga mkulu wa gwere kwa magole mazinji, adati: “Amuna omwe ambaikhidwa pa udindo an’funika kumbatenda kwene-kwene uxamwali bwawo na Mulungu. Ndipo omwe ambacita bzimwebzi mphanvu zawo zin’dzathumizirika. Ndipo iwo akambakumbira mzimu wa Mulungu kuti uwathandize na kukulisa makhalidwe yabwino, an’dzakhala bzisimbo bzabwino kwa abale m’gwere.”—Psalymo 84:7; 1 Pedru 4:11.

Mpsakulimbisa kwene-kwene kuwona atumiki wakuthandiza na akulu wa gwere watsapano ninga imwepo, tenepo pitirizani kusamalira bwino utumiki bwanu kwa Yahova. Jason, omwe wafotokozedwa kumayambiriro ule adati: “Kucokera pomwe ndidayamba kutumikira ninga mkulu wa gwere, ndapfunza bzinthu bzizinji ndipo luso langu lathumizirika. Ndipo tsapano ndimbakomedwa kwene-kwene na udindo bwangu ndipo ndimbawona kukhala mwayi ukulu omwe ndinawo!”

Kodi imwepombo munkupitiriza kuthumizira luso lanu? Mukatewezera ciratizo ca Timotio, imwepo mun’dzakhala cisimbo kwa abale wanu wa m’gwere.