Munthu Wakupasa Ambakhala Wakukondwa
‘Kupasa kumbabweresa cikondweso cikulu kuposa kutambira.’—MABASA 20:35.
1. Kodi timbadziwa tani kuti Yahova ngwakupasa?
PAKUYAMBA Yahova akhali yekha, koma patsogolo pace, iye adalenga wanjo kudzulu pabodzi na bzakulengedwa bza moyo bzinango kuti bzikhale pansi pano. Yahova ni ‘Mulungu wakukondwa’ ndipo iye ambafuna kwene-kwene kutipasa bzinthu bzabwino. (1 Timotio 1:11; Tiyago 1:17) Iye ambafuna kuti ifepano tikhalembo wakukondwa, ndipopa ambatipfunzisa kukhala wanthu wakupasa.—Waroma 1:20.
2, 3. (a) Kodi n’thangwe ranyi tin’funika kukhala wakupasa? (b) Kodi tin’cezerana ciyani mu nkhani ino?
2 Mulungu adalenga wanthu m’cifanikiso cace. (Ciyambo 1:27) Bzimwebzi bzinkuthandauza kuti iye adatilenga na makhalidwe yakundendemerana na yace. Tsono kuti tikhale wanthu wakukondwa, ticisimbidwa na Yahova, ifepano tin’funika kumbamutewezera. Mwa ciratizo, tin’funika kumbakumbukira anzathu na kumbawapasambo bzomwe tinabzo. (Wafiripo 2:3, 4; Tiyago 1:5) Thangwe ranyi? Thangwe ni momwe Yahova adatilengera, ndipo napo kuti ndife wakuperewera, ifepano tingakwanise kutewezera Yahova, ticikhala wanthu wakupasa.
3 Mu nkhani ino tin’pfunza nfundo zinango za m’Bibliya zakulewa bza khalidwe la kupasa. Ndipo tiniwona kuti n’thangwe ranyi Yahova ambakomedwa tikakhala wakupasa na momwe kupasako kungatithandizire kucita basa lomwe iye adatipasa. Tiniwonambo kuti n’thangwe ranyi kupasa kumbaticitisa kukhala wakukondwa, nakuti n’thangwe ranyi tin’funika kupitiriza kukhala wanthu wakupasa.
YAHOVA AMBAKOMEDWA NA WANTHU WAKUPASA
4, 5. Kodi n’thangwe ranyi Yahova pabodzi na Jezu ni bziratizo bzabwino pa nkhani ya kupasa?
4 Yahova ambafuna kuti timutewezere, ndipo iye ambakomedwa kwene-kwene tikambakhala wakupasa. (Wayefezo 5:1) Iye ambafuna kuti wanthu akhalembo wakukondwa, ndipo timbadziwa bzimwebzi thangwe adatilenga m’njira yabwino kwene-kwene. Ndipo iye adalenga dziko lakudekali pabodzi na bzense bzomwe bziri m’dzikoli kuti timbapfatse nabzo. (Psalymo 104:24; 139:13-16) Tenepo, tikambacita nyongo ya kumbakondwesa anzathu, timbatumbiza Yahova.
5 Tin’funikambo kumbatewezera Jezu omwe adapereka ciratizo cabwino kwene-kwene pa nkhani ya kupasa. Iye adalewa kuti: ‘Mwana wa munthu alibe kubwera kuti adzatumikiridwe, koma kuti adzatumikire na kupereka moyo wace ninga cakulombolera wanthu azinji.’ (Mateu 20:28) Ndipo mpostolo Paulo adalimbisambo Akristau kuti akhale ‘na makumbukidwe yamweya, yomwe Jezu Kristu akhanayombo . . . Omwe adasiya bzense bzomwe akhanabzo, pakutenga mkhalidwe wa ukapolo.’ (Wafiripo 2:5, 7) Tenepo ali-wense wa ifepano angabzibvunze kuti: ‘Kodi ndimbatewezera ciratizo ca Jezu na pafupi kwene-kwene?’—Werengani 1 Pedru 2:21. *
6. Kodi there la Jezu lakulewa bza Msamariya wabwino limbatipfunzisa ciyani? (Onani cithunzi-thunzi pa tsamba 15.)
6 Yahova ambakomedwa kwene-kwene tikambatewezera ciratizo cace pabodzi na ca Jezu pa nkhani ya kupasa. Ndipo tingawatewezere mwa kumbakumbukira bzakusaya bza winango na kuwathandiza. Jezu adalatiza kufunika kwa nkhani imweyi pomwe adafotokoza bza there la Msamariya wabwino. (Werengani Luka 10:29-37.) * Ndipo na thereli, Jezu adapfunzisa ateweri wace kufunika kwa kumbathandiza wanthu wense, bziribe basa kuti ni mbani ayai komwe ambakhala. Kodi munkukumbukira comwe cidacitisa Jezu kufotokoza thereli? Ni mbvunzo omwe Mjuda munango adacita, pomwe adamubvunza kuti: ‘Kodi mnansi wangu mbani?’ Tsono mtawiro wa Jezu umbatipfunzisa kuti penu tin’funa kuti Yahova akomedwe nafe, tin’funika kukhala wakupasa ninga momwe Msamariya ule adacitira.
7. Kodi tingalatize tani kuti timbakhulupira kuti bzomwe Mulungu ambatiuza mpsabwino? Fotokozani.
7 Thangwe linango lomwe limbaticitisa kuti tikhale wakupasa ni bzomwe bzidacitika mu zunde la Edeni. Sathani adalewa kuti Adamu na Eva angadakhala wakukondwa angadambacita bzinthu bzomwe iwo akufuna sikuti kubvera Yahova. Thangwe ra dyera, Eva adafunisisa kukhala ninga Mulungu, ndipo Adamu adafunisisambo kukondwesa mkazace Eva, m’mbuto mwa kukondwesa Mulungu. (Ciyambo 3:4-6) Ndipo bzakutewera bzace bzidakhala bzakuipa kwene-kwene. Kulewa cadidi, munthu wadyera angakhale lini wakukondwa. Koma tikakhala wakupasa, timbalatiza kuti timbakhulupira kuti bzomwe Mulungu ambatiuza kuti ticite mpsabwino kwene-kwene.
PHATANI BASA LOMWE MULUNGU ADATIPASA
8. N’thangwe ranyi Adamu na Eva akhafunika kukumbukira winango?
8 Napo kuti Adamu na Eva akhali awiri basi mu zunde la Edeni, iwo akhafunika kukumbukirambo winango. N’thangwe ranyi? Thangwe ndakuti Yahova akhadawapasa basa lakuti acite. Iye adawauza kuti adzaze dziko lense la pansi na wana wawo, acicitisambo dzikoli kukhala paraizo. (Ciyambo 1:28) Tenepo, Adamu na Eva akhafunika kukumbukira bza tsogolo la wana wawo kuti adzakhale wakukondwa, ninga momwe Yahova akhafunira kuti wense akhale wakukondwa. Ndipo iwo akhafunika kuphata basa pabodzi kuti dziko lense likhale paraizo. Bzinkuwonekeratu kuti basalo lingadakhala likulu kwene-kwene ndipo lingadafunika thandizo la banja lense.
9. N’thangwe ranyi tingalewe kuti wanthu angadakhala wakukondwa pakukonza dzikoli kukhala paraizo?
9 Wanthu wakulungamiratu angadaphata basa pabodzi na Mulungu kuti dzikoli likhale paraizo na kukwanirisa cakulinga cace. Ndipo mwakucita bzimwebzi, iwo angadapita mu mpumulo wace. (Wahebereu 4:11) Ndokumbukirani momwe iwo angadakhalira wakukondwa pakucita basali! Ndipo Yahova angadawasimba kwene-kwene thangwe ra kusaya dyera kwawo pabodzi na kukumbukira anzawo.
10, 11. Kodi n’ciyani comwe cingatithandize kuti timbapalizire na kupfunzisa wanthu cadidi ca Mulungu?
10 Yahova adatipasambo basa lakupambulika lakuti ticite nsiku zino. Iye ambafuna kuti tipalizire bzipsa bzabwino na kupfunzisa wanthu. Tsono kuti tikwanise kucita bzimwebzo, ifepano tin’funika kumbawakumbukira na kuwacitira thupo. Ndipo ifepano tingakwanise kucita basali kokha tikambafuna Yahova pabodzi na wanthuwo.
11 Paulo adalewa kuti iye na Akristau anzace wa m’magole dzana yakuyambirira akhali ‘anyabasa anzace wa Mulungu,’ thangwe iwo akhapalizira na kupfunzisa wanthu cadidi ca Mulungu. (1 Wakolinto 3:6, 9) Nsiku zino, ifepano tingakhalembo ‘anyabasa anzace wa Mulungu’ mwa kumbapereka nthawe, mphanvu pabodzi na bzinthu bzakuthupi pakucita basa lakupalizira lomwe Mulungu adatiuza kuti ticite. Kulewa cadidi, umweyu ni mwayi ukulu kwene-kwene!
Palibe cinthu comwe cimbakondwesa kwene-kwene kuposa kupfunzisa munthu cadidi ca m’Bibliya (Onani ndime 12)
12, 13. N’thangwe ranyi kupfunzisa wanthu cadidi ca m’Bibliya kumbabweresa cikondweso?
12 Kuphatisa basa nthawe pabodzi na mphanvu zathu pakupalizira na kupfunzisa wanthu bzipsa bzabwino kumbaticitisa kukhala wakukondwa. Ndipo bzimwebzi ndibzo bzomwe abale azinji omwe ambapfunzisa wanthu Bibliya ambalewa. Mwa ciratizo, ifepano timbakomedwa kwene-kwene tikawona kuti anyakupfunza wathu wa Bibliya abvesesa bzomwe Bibliya limbatipfunzisa, akukhulupira bzomwe apfunza, acinja bzinthu pa moyo wawo ndipo ayambambo kuuza winango bzomwe ankupfunzabzo. Jezu adadekedwambo kwene-kwene pomwe apalizi 70 omwe iye akhadawatumiza, ‘adabwerera wankukondwa’ thangwe rakuti bzinthu bzikhadawafambira bwino.—Luka 10:17-21.
13 Abale na mpfumakazi ambadekedwa kwene-kwene akambawona momwe bzipsa bza m’Bibliya bzinkuthandizira wanthu kucinja moyo wawo. Mwa ciratizo, mpfumakazi inango yakucemeredwa Anna ikhafunisisa kucita bzizinji pakutumikira Yahova. * (Onani mafala ya m’nyansi.) Tenepo mpfumakaziyi idayenda ku gawo linango la ku Europa lomwe likhafunikira apalizi azinji. Iye adanemba kuti: “Comwe cimbandidekera kwene-kwene kuno, n’cakuti ndina mwayi wakucitisa mapfunziro ya Bibliya mazinji. Basa langu limbandikondwesa kwene-kwene ndipo ndikafika kumui, ndimbakhala ndiribe nthawe yakukumbukira bza mabvuto yangu. Koma ndimbakumbukira bza mabvuto yomwe anyakupfunza wangu wa Bibliya ankugumana nayo, ndiciwona momwe ndingawalimbisire na kuwathandiza. Ndipo tsapano ndimbawonadi kuti ‘kupasa kumbabweresa cikondweso cikulu kuposa kutambira.’”—Mabasa 20:35.
14. Kodi n’thangwe ranyi tingakhale wakukondwa pa basa lathu lakupalizira napo penu wanthu an’tetekera lini?
14 Napo penu wanthu ambatitetekera lini, ifepano tingakhale wakukondwa tikambawapalizira bzipsa bzabwino. Ndipo Yahova ambafuna kuti ifepano ticite bzibodzi-bodzi na bzomwe iye adauza Zakiyeri kuti acite. Iye adamuuza kuti: ‘Ukawauze mafala yanguya, bziribe basa penu ankabva ayai ne.’ (Zakiyeri 2:7; Zaiya 43:10) Tenepo, bziribe basa penu wanthu an’tetekera ayai ne, Yahova ambadekedwa na nyongo yomwe timbacita pa basali. (Werengani Wahebereu 6:10.) * Pakufotokoza bza basa lace lakupalizira, m’bale munango adalewa kuti: “Ifepano timbabzala, timbathirizira ndipo timbakumbira Yahova mu mpembo kuti athandize wanthu omwe tawapalizirawo kukulisa cikhumbo cawo cakufuna kudziwa cadidi ca m’Bibliya.”—1 Wakolinto 3:6.
Tikambazungira wanthu m’mii mwawo mu utumiki bwakumunda, ifepano timbawapasa mpata wakubva bzipsa bzabwino bza Umambo
(Onani ndime 14)
BZOMWE TINGACITE KUTI TIKHALE WAKUKONDWA
15. N’thangwe ranyi tin’funika kukhala wakupasa napo penu wanthu ambatitenda lini?
15 Jezu ambafuna kuti ifepano tikhale wakupasa thangwe kumbatikondwesa. Ndipo tikakhala wakupasa, wanthu azinji an’dzaticitirambo bzibodzi bodzi. Tsono Jezu ambatiuza kuti: ‘Khalani wakupasa, ndipo wanthu an’dzakupasanimbo. Iwo an’dzakukhuthulirani pa khanza lanu na mphimo yabwino, yakutsindira bwino na yakutaikira mwa mpololo. Thangwe mphimo yomwe mun’pimira nayo anzanu, ndiyo yomwe iwo an’dzakupimiranimbo.’ (Luka 6:38) N’cadidi kuti ni wanthu lini wense omwe ambatitenda tikakhala wakupasa, tsono napo bziri tenepo, ifepano tin’funika kupitiriza kukhala wakupasa. Tenepo, mbatipitirizeni kukhala wakupasa bziribe basa penu wanthu an’titenda ayai ne, thangwe timbadziwa lini momwe khalidwe lathu lakupasa lingatokonyere winango.
16. Kodi n’ciyani comwe Jezu adalewa pa nkhani ya kupasa, ndipo n’thangwe ranyi?
16 Munthu omwe ana mtima wakupasa, ambadikhira lini kubwezeredwa cinthu. Ndipo Jezu adati: ‘Ukacita madyo, cemera anyakusauka, anyakulemala, anyakugwinthoma na azimola ndipo un’dzakondwa, pakuti iwo alibe cinthu comwe angakubwezere.’ (Luka 14:13, 14) Bibliya limbalewambo kuti: ‘Mpasi an’dzasimbidwa,’ ndipo ‘An’kondwa ni ule omwe ambacita bzinthu acikumbukira munthu wakunyozeka.’ (Mimwani 22:9; Psalymo 41:1) Ifepano timbakhala wakupasa thangwe ra kufunisisa kuthandiza winango.
17. Kodi ni njira zinango ziponi zomwe tingalatizire kuti ndife wakupasa?
17 Pomwe Paulo adalewa mafala ya Jezu yakuti ‘kupasa kumbabweresa cikondweso cikulu kuposa kutambira,’ iye akhandolewa lini bza kupasa munthu bzinthu bzakuthupi. Mwa ciratizo, tingalatize kuti ndife wakupasa mwa kulimbisa winango, kuwapasa malango kucokera m’Bibliya na kuwathandiza akafunikira thandizo. (Mabasa 20:31-35) Ndipo mwa mafala na bzicito, Paulo adalatiza kufunika kwa kumbapasa wanthu nthawe, mphanvu pabodzi na lufoyi lathu.
18. Kodi n’ciyani comwe adziwi azinji ambalewa pa nkhani yakukhala wakupasa?
18 Adziwi omwe ambapfunza bza makhalidwe ya wanthu, adawona kuti kupasa kumbacitisa munthu kukhala wakukondwa. Ndipo mwakubverana na kafukufuku munango, wanthu adalewa kuti ambakhala wakukondwa kwene-kwene akacitira anzawo bzinthu bzabwino. Ndipo adziwiwo ambalewa kuti tikambathandiza winango, ifepano timbawona kuti moyo wathu una cakulinga na thandauzo. Tenepo, adziwi winango ambauza wanthu kuti ambacite mabasa manango yakubzipereka kuti akhale na thanzi labwino na wakukondwa. Tsono bzomwe adziwiwa ambalewa bzimbatidabwisa lini, thangwe Mulengi wathu Yahova ambatiuza kale m’Bibliya kuti kupasa kumbaticitisa kukhala wakukondwa.—2 Timotio 3:16, 17.
PITIRIZANI KUKHALA WAKUPASA
19, 20. Kodi n’thangwe ranyi imwepo mun’funa kukhala wakupasa?
19 Nthawe zinango, bzingatinese kukhala wakupasa penu wanthu omwe timbakhala nawo pafupi ambandokumbukira bza iwo okha basi. Tsono tireke kuyebwa kuti Jezu adalewa kuti timbafune Yahova na mtima wathu wense, na moyo wathu wense, na nzeru zathu zense pabodzi na mphanvu zathu zense, nakuti timbafune mwanzathu ninga momwe timbabzifunira tekha. (Marko 12:28-31) Ndipo ninga momwe tawonera mu nkhani ino, wale omwe ambafuna Yahova ambamutewezerambo. Yahova na Jezu mbakupasa. Iwo ambatilimbisa kuti titewezere ciratizo cawo thangwe ambadziwa kuti kucita bzimwebzi kun’dzaticitisa kukhala wakukondwa. Tikakhala wakupasa pakutumikira Mulungu na kumbacitira bzinthu bzabwino anzathu, tin’dzalemekezesa Yahova ndipo ifepano tin’dzagumana phindu pabodzi na winango.
20 Mwakusaya kupenukira imwepo munkucita kale nyongo yakukhala wakupasa na kuthandiza winango, maka-maka abale pabodzi na mpfumakazi zanu. (Wagalata 6:10) Ndipo mukapitiriza kucita bzimwebzi, wanthu an’dzakutendani na kukufunani, bzomwe bzin’dzakucitisani kukhala wakukondwa kwene-kwene. Bibliya limbati: ‘Munthu wakupasa, an’dzasimbidwa, ndipo omwe ambatsangalaza winango, an’dzatsangalazidwambo.’ (Mimwani 11:25) Pana njira zizinji zomwe tingalatizire kuti ndife wakupasa na wakudeka mtima mu utumiki na pa moyo wathu wa nsiku na nsiku. Mu nkhani yakutewerayi tiniwona zinango mwa njira zimwezi.
^ ndi. 5 1 Pedru 2:21 Ndipo adakucemererani ku moyo umweyu, pakuti napo Kristu adabonera thangwe ra imwepo, acikusiyirani ciratizo kuti mutewere mathanya yace na pafupi kwene-kwene.
^ ndi. 6 Luka 10:29 Tsono pakufuna kubziwonesa ninga wakulungama, munthuyo adabvunza Jezu kuti: “Kodi mnansi wangu mbani?” 30 Jezu adatawira aciti: “Munthu munango akhapolika kucokera ku Jeruzalemu kuyenda ku Jeriko, ndipo adagumana na akapondo omwe adamukhundula, acimumenya, ndipo adayenda acimusiya atasala pang’ono kufa. 31 Ndipo bzidacitika kuti wansembe munango akhapolika na mseu umweyo, tsono pomwe adawona munthuyo adandomupitirira. 32 Mpsibodzi-bodzimbo na Mlevi, pomwe iye adafika pa mbutoyo acimuwona, adandomupitirirambo. 33 Koma padafika Msamariya munango omwe akhafamba mu msewumo, ndipo pomwe adamuwona adabva nsisi. 34 Tenepo adamufenderera, acimumanga bzironda bzace. Adaikha mafuta na vinyu m’bzirondabzo acimutakula pa cifuwo cace aciyenda naye ku nyumba ya alendo komwe adakamusamalira. 35 Mangwana yace, iye adacosa madinario mawiri, acipasa mweneciro nyumbayo acimuuza kuti: ‘Musamalireni bwino, mukadzonga kobiri zinango zakuthumizirika, ndin’dzakubwezerani ndikadzabwerera.’ 36 Mbani pa atatuwa omwe iwepo unkuwona kuti adakhala mnansi wa munthu omwe adagumana na akapondoyo?” 37 Iye adatawira kuti: “Ni munthu omwe adam’bvera nsisiyo,” Jezu adamuuza kuti: “Ndoko ukacitembo bzibodzi-bodzibzo.”
^ ndi. 13 Dzinali lacinjidwa.
^ ndi. 14 Wahebereu 6:10 Pakuti Mulungu si wakusaya kulungama kuti angayebwe basa lanu na lufoyi lomwe mudalatiza pa dzina lace mwa kutumikira wakucena na kupitiriza kuwatumikira.
