1. Kodi tingaphate tani basa pabodzi na Yahova?

POMWE Yahova adalenga wanthu, iye akhafuna kuti iwo akhale anyabasa anzace. Nsiku zino, wanthu wakukhulupirika angaphate basa pabodzi na Yahova, napo kuti mbakuperewera. Mwa ciratizo, timbakhala ‘anyabasa anzace wa Mulungu’ tikambapalizira bzipsa bzabwino bza Umambo na kupfunzisa wanthu cadidi ca m’Bibliya. (1 Wakolinto 3:5-9) Ndipo timbatenda kwene-kwene Mulengi wathu wamphanvu zense, thangwe ra kutisankhula kuti timbacite basa lakufunikali. Tsono, kupalizira ndiko lini kokha komwe kungaticitise kuti tiphate basa pabodzi na Yahova. Mu nkhani ino, tiniwona momwe tingaphatire basa pabodzi na iye, tikambathandiza wanthu wa m’banja mwathu na wa m’gwere, tikambatambira alendo, tikambathandizira mabasa ya m’gulu la Yahova yomwe yankucitika pa dziko lense na pomwe timbathumizira utumiki bwathu kwa Yahova.—Wakoloso 3:23.

2. N’thangwe ranyi tin’funika lini kumbandendemezera bzomwe timbacitira Yahova na bzomwe winango ambacita?

² Pomwe tinkupfunza nkhaniyi, tin’funika kukumbukira kuti munthu ali-wense ngwakusiyana na mwanzace. Mwa ciratizo, tingasiyane magole, thanzi, bzakucita pabodzi na maluso. Ndipopa  tin’funika lini kumbandendemezera bzomwe timbacitira Yahova na bzomwe winango ambacita. Mpostolo Paulo adalewa kuti: ‘Ali-wense apime mabasa yace kuti awone momwe yaliri, ndipo na tenepo iye an’dzakhala na mathangwe yakukondwa na mabasa yace, sikuti mwakubziyezezera na munthu munango.’—Wagalata 6:4.

3. N’thangwe ranyi tingalewe kuti munthu ali-wense omwe ankusamalira banja lace ankuphata basa pabodzi na Yahova?

³ Yahova ambafuna kuti timbasamalire mabanja yathu. Mwa ciratizo, pinango imwepo mungafunikire kuphata basa kuti mukwanise kusamalira banja lanu. Ndipo kawiri-kawiri azimai azinji ambakhala pa mui kuti asamalire wana wawo. Tsono wana winango ndiwo omwe ambasamalira abereki wawo akaduwala. Bzimwebzi mpsakufunika kwene-kwene. Thangwe ranyi? Thangwe Bibliya limbalewa kuti: ‘Penu munthu ambasamalira lini wanthu wace, maka-maka wa m’banja lace, iye ambalamba cikhulupiro, ndipo ngwakuipa kuposa munthu omwe alibe cikhulupiro.’ (1 Timotio 5:8) Penu imwepo muna udindo bwa kusamalira banja, pinango mungakwanise lini kucita bzizinji mu utumiki bwa Yahova ninga momwe mukhafunira. Koma lekani kumbacita thupo, thangwe Yahova ambakomedwa kwene-kwene akambawona imwepo munkusamalira banja lanu.—1 Wakolinto 10:31.

4. Kodi abereki angaphate tani basa pabodzi na Yahova, ndipo angagumane phindu liponi?

⁴ Abereki wacikristau angaphate basa pabodzi na Yahova mwa kuthandiza wana wawo kukhala na bzakulinga bza kutumikira Yahova. Bzimwebzi ndibzo bzomwe abereki azinji ambacita. Ndipo ninga bzakutewera bzace, wanawo ambadzasankhula kutumikira Yahova kwa nthawe zense, ayai kukatumikira ku mbuto zakutali. Mwa ciratizo, winango ambatumikira ninga mamisiyonario, ayai ninga apainiya komwe kunkufunikira apalizi azinji, pomwe winango ambatumikira pa Beteli. Ndipo wana akambatumikira kutali na komwe kuna abereki wawo, bzimbakhala bzakunesa kuti aberekiwo akhale na nthawe yakuceza nawo. Tsono abereki wakusaya dyera ambalimbisa wanawo kuti apitirize kutumikira Yahova komwe aliko. Thangwe ranyi? Thangwe rakuti iwo ambakomedwa kwene-kwene akawona kuti wana wawo ankuikha Umambo bwa Mulungu pa mbuto yakuyamba. (3 Juwau 4) Abereki azinji ambakhala ninga Ana, omwe adalewa kuti ‘akhadakumbiza’ mwana wace Samuyeri kuna Yahova. Ndipo iwo ambawona kuti kuphata basa pabodzi na Yahova mu njira imweyi ni mwayi ukulu kwene-kwene.—1 Samuweri 1:28.

5. Kodi mungathandize tani abale na mpfumakazi m’gwere mwanu? (Onani cithunzi-thunzi pa tsamba 21.)

⁵ Penu imwepo mulibe udindo bukulu bwa kusamalira banja, kodi mungathandize abale na mpfumakazi omwe ankuduwala ayai omwe mbakukalamba, ayai wale omwe ankufunikira thandizo liri-lense? Ayai kodi mungathandize wale omwe ankusamalira abale wawo wakukalamba na wakuduwala? Kuti mukwanise kucita bzimwebzi, mbakhalani na nthawe yakuwona omwe ankufunikira thandizo ninga limweri m’gwere mwanu. Mwa ciratizo, pinango m’gwere mwanu muna mpfumakazi yomwe inkusamalira abereki wace wakukalamba. Tsono kuti muithandize, pinango mungapambule nthawe yanu kuti mukaceze na abereki wacewo, ndipo mukacita bzimwebzo mpfumakaziyo in’dzakhala na mpata wakucita bzinthu bzinango. Ayai pinango mungathandize omwe ankuneseka kufika ku mitsonkhano thangwe ra matenda ayai kukalamba, mwa kumutenga muciyenda naye ku mitsonkhanoko, kuyenda kukamugulira bzinthu ku msika, ayai kuyenda kukazungira omwe ali ku nyumba ya ulapi. Mukacita bzimwebzi, imwepo mun’dzalatiza  kuti munkuphata basa pabodzi na Yahova na kuthandiza kuti iye atawire mipembo ya abale na mpfumakazi.—Werengani 1 Wakolinto 10:24. *

6. Kodi tingalatize tani kuti timbatambira alendo?

⁶ Anyabasa anzace wa Mulungu ambadziwika thangwe ra kutambira bwino alendo. Ndipo m’Bzinembo bza Cigirego fala lakuti ‘kutambira alendo,’ limbathandauza ‘kudekera mtima alendo.’ (Wahebereu 13:2) Mwa ciratizo, tikambawerenga m’Bibliya timbawona bziratizo bza atumiki wa Yahova omwe adadekera mtima alendo. (Ciyambo 18:1-5) Na tenepo, ifepano tingathandizembo winango mwakuphatisa basa mipata iri-yense yomwe tingagumane, bziribe basa penu ni abale wathu wauzimu ayai ne.—Wagalata 6:10.

7. N’thangwe ranyi mpsakufunika kumbatambira kumui kwathu abale omwe ankucita utumiki bwa nthawe zense?

⁷ Imwepo mungalatize kuti munkuphata basa pabodzi na Yahova, mwa kumbatambira kumui kwanu wale omwe ankucita utumiki bwa nthawe zense. (Werengani 3 Juwau 5, 8.) * Ndipo mukacita bzimwebzo, mwense mun’dzalimbisana mwauzimu. Bibliya limbatiuza kuti: ‘Timbalimbisane.’ (Waroma 1:11, 12) Ciratizo pa nkhaniyi ni Olaf. Pomwe iye akhali tswaka, gwere lace lidazungiridwa na nyakunyang’anira dera omwe akhanati kulowola, ndipo nyakunyang’anira derayo akhafunikira m’mbuto yakukhala, tsono palibe ne na m’bodzi omwe adabzipereka kuti amutambire kumui kwace. Tenepo Olaf adakakumbira abereki wace omwe akhali lini Mboni za Yahova, kuti nyakunyang’anira derayo afikire kumui kwawo. Mwa mwayi, abereki wacewo adabvuma mkumbiro waceyo koma adauza Olaf kuti angadambagona pa mpando wa sofa. Ndipo Olaf adamala mdzinga wense wakupambulika ankugona pa mpandopo, tsono iye alibe kudandaula na bzimwebzo, ndipo kwa iye mdzingayo udakhala wabwino kwene-kwene! Nsiku zense Olaf pabodzi na nyakunyang’anira derayo, akhamuka mwakamfulumize ndipo akhacezerana bzinthu bzizinji pomwe akhadya cakudya ca macibese. Nyakunyang’anira derayo adalimbisa kwene-kwene Olaf mpaka iye adasankhula kuyamba kucita utumiki bwa nthawe zense. Ndipo tsapano Olaf ankutumikira ninga misiyonario m’madziko yakusiyana-siyana, kwa magole 40.

8. N’thangwe ranyi tin’funika kulatiza lufoyi kwa alendo napo penu iwo angatitende lini pakuyamba? Fotokozani ciratizo.

⁸ Pana njira zizinji zakulatizira lufoyi lathu kwa alendo, napo penu angatitende lini pakuyamba. Ciratizo pa nkhaniyi, ni mpfumakazi inango ya ku Espanha yomwe ikhapfunzisa Bibliya mkazi munango wakucemeredwa Yesica, wakucokera ku dziko la Equador. Nsiku inango pomwe akhacita pfunziro, Yesica adayamba kulira. Tsono pomwe mpfumakaziyo idamubvunza kuti thangwe ranyi ankulira, Yesica adalewa kuti akanati kufulukira ku Espanha, iye akhali wakusauka kwene-kwene, ndipo nsiku inango iye akhalibe cinthu ciri-cense cakuti angadapasa mwana wace kuti adye, koma madzi yokha. Ndipo pomwe akhapembza mwanayo kuti agone, iye adacita mpembo wakukumbira thandizo. Pomwe adamala kucita mpemboyo, padafika Mboni za Yahova ziwiri ndipo zidamupasa revista. Tsono Yesica adabva ciya kwene-kwene ndipo adang’amba revistayo acilewa kuti: “Cimweci n’cakudya comwe imwepo mun’funa kuti ndipase mwananguyu kuti adye?” Mpfumakazizo zidayezera kumunyamalisa koma iye alibe kuwabvera. Patsogolo pace, mpfumakazi zire zidakasiya budu la cakudya  pa msuwo wace. Tsono pomwe adakumbukira bzimwebzi adazindikira kuti iye akhadalamba mtawiro omwe Mulungu akhadaupereka pa mpembo wace omwe adaucita, ndipopa iye adayamba kulira pomwe akhacita pfunziro lire. Koma tsapano Yesica akhadatsimikiza kutumikira Yahova. Bzimwebzi bzidakwanisika thangwe ra mzimu wakupasa wa mpfumakazi zire.—Mpalizi 11:1, 6.

9, 10. (a) Kodi n’ciyani comwe Ajirayeri akhacita pa nkhani ya basa? (b) Kodi amuna angathandize tani mabasa ya m’gwere?

⁹ Mu nthawe ya Ajirayeri, pakhana mabasa yakusiyana-siyana yomwe yakhacitidwa na wanthu wakubzipereka. (Kufuluka 36:2; 1 Nkhani 29:5; Nehemiya 11:2) Mpsibodzi-bodzimbo na nsiku zino, pana mabasa mazinji yomwe yambatipasa mpata wakuti tiphatise basa nthawe, cuma na maluso yathu kuti tithandize abale na mpfumakazi zathu. Tikacita bzimwebzi, tin’dzakhala wakukondwa ndipo Yahova an’dzatisimba.

¹⁰ Fala la Mulungu limbalimbisa amuna omwe ali m’gwere kuti ambaphate basa pabodzi na Yahova mwa kucita nyongo kuti atumikire ninga akulu wa gwere ayai atumiki wakuthandiza. (1 Timotio 3:1, 8, 9; 1 Pedru 5:2, 3) Ndipo omwe an’funa kukhala na maudindo an’funika kukonzeka kuthandiza winango mwakuthupi na mwauzimu. (Mabasa 6:1-4) Akulu wa gwere akadzakukumbirani kuti mukhale mulindiri pa mitsonkhano ayai musamalire mabukhu ya gwere, magawo ya upalizi, kukhala mu depatimenti yakusamalira Nyumba ya Umambo ayai kucita mabasa manango, kodi mun’dzabvuma m’kumbiroyo? Abale omwe ambacita mbali zimwezi ambalewa kuti kuthandiza winango kumbabweresa cikondweso cikulu kwene-kwene.

11. Kodi mpfumakazi inango idagumana phindu liponi pomwe ikhaphata basa lakumanga Nyumba za Umambo?

¹¹ Abale omwe ambabzipereka kuti atumikire pa basa lakumanga-manga kawiri-kawiri ambakhala na axamwali wapsa. Ciratizo pa nkhaniyi, ni mpfumakazi Margie yomwe idatumikira pa basa lakumanga Nyumba za Umambo kwa magole  18. Mkati mwa magole yamweya, mpfumakaziyi idafunisisa kupfunzisa atsikana ndipo idakhala na mwayi wakulimbisa winango ndipo idalimbisidwambo. (Waroma 1:12) Ndipo, pomwe mpfumakaziyi idagumana na mabvuto pa moyo wace, axamwali omwe akhaphata nawo basa lakumanga Nyumba za Umambo wale adaithandiza. Kodi imwepo mumbakumbukirambo kubzipereka pa basa lakumanga-manga? Dziwani kuti imwepo mungaphatembo basa lakumangali, napo kuti mulibe luso liri-lense pa nkhani yakumanga.

12. Kodi tingacite tani kuti tithandize abale wathu omwe agwedwa na malengwa ya pansi?

¹² Tingaphatembo basa pabodzi na Yahova mwa kuthandiza abale wathu omwe agwedwa na malengwa ya pansi. Njira ibodzi yakucitira bzimwebzi ni kuwathandiza mwa kuwapasa kobiri. (Juwau 13:34, 35; Mabasa 11:27-30) Ndipo njira inango ni kucenesa ayai kukonza-konza nyumba zomwe zadzongeka na malengwayo. Mwa ciratizo, mpfumakazi inango ya ku Polônia yakucemeredwa Gabriela, nyumba yace idagwa thangwe ra kusefukira kwa madzi, tsono idakomedwa pomwe idawona abale wa m’magwere ya pafupi adabwera kudzaithandiza. Ndipo tsapano akambakumbukira bza ngoziyo, mpfumakaziyo imbalewa kuti imbacita lini thupo na bzinthu bzakuthupi bzomwe idaluza, koma imbandokumbukira bzomwe idagumana. Mpfumakaziyo idalewa kuti: “Bzomwe bzidandicitikira bzimbanditsimikizira kuti ndinkucita mbali ya gwere la Akristau wa pa dziko lense, ndipo ni mwayi wakupambulika omwe ndinawo, ndipo bzimwebzi bzimbandikondwesa kwene-kwene.” Mafala yamweya yambalewedwambo na abale azinji omwe ambathandizidwa akagwedwa na malengwa ya pansi. Ndipo wale omwe ambaphata basa pabodzi na Yahova ambakhalambo wakukondwa akambathandiza omwe agwedwa na malengwayo.—Werengani Mabasa 20:35; * 2 Wakolinto 9:6, 7. *

13. Kodi tingalimbise tani lufoyi lathu kwa Yahova? Fotokozani ciratizo.

¹³ Mpfumakazi inango yakucemeredwa Stephanie pabodzi na apalizi winango wa m’dera lace adaphata basa pabodzi na Mulungu mwa kuthandiza Mboni za Yahova zomwe zidabwera kudzapotera ku Estados Unidos thangwe ra kuthawa nkhondo ku dziko lawo. Mpfumakazizo zidathandiza abalewo kugumana nyumba na bzinthu bzinango. Stephanie adalewa kuti: “Cikondweso pabodzi na kutenda kwa abalewo kudatidabwisa kwene-kwene. Iwo ambakumbuka kuti ifepano tidawathandiza, koma cadidi n’cakuti iwo ndiwo adathandiza ife. Ifepano  tidakwanisa kuwona lufoyi, ciphatano, cikhulupiro comwe abalewo anaco kwa Yahova. Bzimwebzi bzidalimbisa lufoyi lathu kwa Yahova na kuticitisa kutenda bzinthu bzense bzomwe iye ambatipasa mwakuphatisa basa gulu lace.”

14, 15. (a) Kodi mpolofeta Zaiya adalatiza tani kuti akhana mzimu wakubzipereka? (b) Kodi Akristau angatewezerembo tani mpolofetayu?

¹⁴ Kodi mungafune kuphata basa pabodzi na Yahova mu njira zinango zakuthumizirika? Kodi mungafune kukatumikira ku mbuto komwe kunkufunikira apalizi azinji? Napo kuti tin’funika lini kuyenda kutali kuti tilatize kuti ndife wakupasa, koma pana abale na mpfumakazi omwe ambacita bzimwebzo. Ndipo bzomwe iwo ambacita bzimbandendemerana na bzomwe mpolofeta Zaiya adacitambo. Pomwe Yahova adabvunza kuti: ‘Kodi ndin’tuma mbani ndipo mbani aniyenda m’mbuto mwathu?’ iye adatawira kuti: ‘Ndiri pano ine! Nditumizeni!’ (Zaiya 6:8) Apa tani imwepombo? Kodi mudakonzeka kuthandiza gulu la Yahova? Kodi mpsiponi bzomwe mungathandize mu gulu la Yahovali?

¹⁵ Pakulewa bza basa lakupalizira na kupfunzisa wanthu, Jezu adati: ‘Bzakubvuna mpsizinji, tsono anyabasa mbang’ono-ng’ono. Tenepo, kumbirani kuna Mweneciro kubvuna kuti atumize anyabasa adzam’bvunire.’ (Mateu 9:37, 38) Kodi imwepo mungayende kukatumikira ku mbuto komwe kunkufunikira apalizi azinji, ayai kutumikira ninga mpainiya? Ayai kodi mungathandize m’bale ayai mpfumakazi kuti icite bzimwebzo? Abale azinji ambawona kuti njira yabwino yakulatizira lufoyi lawo kwa Mulungu na anzawo, ni kukatumikira ninga apainiya ku mbuto komwe kunkufunikira apalizi azinji. Kodi mukukumbukira njira zinango zomwe mungaziphatise basa kuti muthumizire utumiki bwanu? Kulewa cadidi, mukacita bzimwebzi mun’dzakhala wakukondwa kwene-kwene.

16, 17. Kodi ni njira ziponi zomwe zingakuthandizeni kuti muthumizire utumiki bwanu kwa Yahova?

¹⁶ Kodi imwepo mungafune kukatumikira pa Beteli ayai kukathandizira basa lakumanga-manga kwa minyezi yakucepa ayai kwa nsiku ibodzi ayai zakupitirira pa mdzinga uli-wense? Gulu la Yahova nthawe zense limbafuna wanthu omwe ambabzipereka na mtima wense kuyenda kukacita basa liri-lense ku mbuto iri-yense komwe kunkufunikira thandizo, napo kuti iwo ana maluso yakusiyana-siyana pa nkhani ya basa. Yahova ambatenda kwene-kwene ali-wense omwe ana mzimu wakubzipereka na omwe ambatumikira ku mbuto komwe kunkufunikira thandizo.—Psalymo 110:3.

¹⁷ Kodi mungafune thandizo kuti mutumikire Yahova mwakukwanira? Penu bziri tenepo, pinango mungafunikire kuyenda ku Xikola ya Apalizi wa Umambo. Xikolayi imbapfunzisa abale na mpfumakazi wakukhwima mwauzimu omwe ankucita kale utumiki bwa nthawe zense na cakulinga cakuti acite bzizinji mu gulu la Yahova. Ndipo omwe ambayenda ku xikolayi ambafunika kukonzeka kukatumikira ku mbuto iri-yense komwe angatumizidwe. Kodi imwepo muna cakulinga cakuyendambo ku xikolayi? Mukacita bzimwebzi, mun’dzakwanisa kucita bzizinji m’gulu la Yahova.—1 Wakolinto 9:23.

18. Kodi kuphata basa pabodzi na Yahova nsiku zense kumbabweresa phindu liponi?

¹⁸ Pakuti ifepano ndife atumiki wa Yahova, timbapfunzisidwa kukhala wakupasa, wakudeka mtima na wa lufoyi, ndipo nsiku zense timbakumbukirambo bzakusaya bza winango. Ndipopa timbakhala wakukondwa na wa mtendere. (Wagalata 5:22, 23) Tenepo, bziribe basa bzomwe munkugumana nabzo pa moyo wanu, imwepo mun’dzakhala wakukondwa mukatewezera khalidwe la Yahova la kupasa na kukhala m’gulu la anyabasa anzace wakufunidwa!—Mimwani 3:9, 10.