1. N’thangwe ranyi batismo n’cinthu cakufunika kwene-kwene? (Onani cinthunzi-thunzi pa tsamba lino.)

GOLE liri-lense, anyakupfunza wa Bibliya azinji ambabatizidwa. Azinji wa iwo ni maswaka ndipo winango ni wana wa misinkhu yakucepa. Winango wa iwo adaleredwa na abereki omwe ni Mboni. Kodi imwepo ndimwe m’bodzi wa iwo? Penu bziri tenepo, dziwani kuti mudacita bwino kwene-kwene. Mkristau ali-wense an’funika kubatizidwa. Batismo njakufunika kwene-kwene kuti munthu adzapulumuke acidzakhala na moyo wakusaya kumala.—Mateu 28:19, 20; 1 Pedru 3:21.

2. N’thangwe ranyi mun’funika lini kugopa kubzipereka kwa Yahova?

² Pomwe mudabatizidwa, Yahova adayamba kukusimbani mwa njira zakusiyana-siyana. Koma mudayamba kukhalambo na udindo bwakuthumizirika. N’thangwe yanyi tinkulewa tenepoyo? Thangwe ndakuti pa nsiku yomwe mudabatizidwa, m’bale omwe adafotokoza nkhani ya batismo yanu adabvunza kuti: “Mwa nsembe ya Jezu Kristu, kodi imwepo mwakungula bzakuipa bzanu, mucibzipereka kwa Yahova kuti mucite kufuna kwace?” Imwepo mudatawira kuti inde ndipo  mudapicira kuti mun’dzafuna Yahova na kuikha pa mbuto yakuyamba utumiki bwace pa moyo wanu. N’cadidi, piciro limweri ni cinthu cakufunika kwene-kwene. Tsono kodi mun’funika kumbagopa thangwe ra bzimwebzi? Ne na pang’onopo! Dziwani kuti Yahova an’dzaleka lini kukutsogolerani pa moyo wanu. Wale omwe ambadziwa lini Yahova ambacita mbali ya dziko la Sathaniri. Ndipo Sathaniyo ambawasamalira lini, ne imwepombo alibe namwe basa. Kulewa cadidi, imwepo muciluza cidikhiro canu ca kudzakhala na moyo wakusaya kumala, iye angadekedwe kwene-kwene, thangwe ra kuti mwalamba Yahova mucikhala ku mbali yace.

3. Kodi Yahova adakusimbani tani thangwe rakuti mudabzipereka kuna iye?

³ Kumbukirani momwe Yahova adakusimbirani thangwe rakuti mudabzipereka kwa iye mucibatizidwa. Mudapereka moyo wanu kwa Yahova, tenepo mungalewe na mtima wense kuti: ‘Yahova ali kumbali yangu; ndin’dzacita lini mantha. Munthu wakucokera kupfumbi angandicitenyi?’ (Psalymo 118:6) Palibe cinthu cakufunika kwene-kwene kuposa kukhala ku mbali ya Mulungu mucidziwa kuti iye ambakomedwa namwe.

4, 5. (a) N’thangwe ranyi tingalewe kuti kubzipereka kwa Yahova ni udindo bwa munthu ali-wense payekha? (b) Kodi ni mabvuto yaponi yomwe Mkristau ali-wense angagumane nayo?

⁴ Maswaka, lekani kukumbuka kuti mungakhale pa uxamwali na Yahova kokha thangwe ra kuti banja lanu lense liri pa uxamwali na iye. Napo penu mumbakhala pabodzi na abereki wanu, dziwani kuti kukhala kwanu pa uxamwali na Yahova ni udindo bwanu sikuti bwa abereki wanuwo. N’thangwe ranyi mpsakufunika kukumbukira bzimwebzi? Thangwe ndakuti palibe ali-wense wa ife omwe ambadziwa mabvuto yomwe an’dzagumana nayo kutsogolo. Mwa ciratizo, pinango imwepo mudabatizidwa pomwe mukhana msinkhu wakucepa. Koma tsapano pakuti mwakhala tswaka, muna makumbukidwe yapsa na mabvuto mapsa. Mtsikana munango adalewa kuti: “Wana kawiri-kawiri ambagopa lini kukhala Mboni ya Yahova ndipo alibe nabzo basa kuti wanthu an’dzasekerera lini nsiku yawo yakubadwa ku xikola. Tsono akakula, cikhumbo cawo ca kugonana cimbakhala camphanvu, ndipo iwo ambafunika kukhala wakutsimikiza kuti kubvera malamulo ya Yahova nthawe zense, n’cinthu cakufunika.”

⁵ Ni maswaka lini yokha yomwe yambagumana na mabvuto yatsapano. Napo wale omwe adabatizidwa ali kale akulu, ambagumanambo na mayezo yomwe iwo akhayadikhirira lini. Mayezoyo yangakhale mabvuto ya banja, matenda ayai basa. Bziribe basa msinkhu omwe tinawo, tensenefe tin’funika kukhala wakukhulupirika kuna Yahova pa bzakucitika bziri-bzense.—Tiyago 1:12-14.

6. (a) Kodi kulewa kuti piciro lomwe tidacita kuna Yahova, n’cinthu comwe tingacinje lini kumbathandauza ciyani? (b) Kodi n’ciyani comwe tingapfunze na cinembo ca Wafiripo 4:11-13?

⁶ Kuti mupitirize kukhala wakukhulupirika, nthawe zense mun’funika kumbakumbukira kuti piciro lomwe mudacita kuna Yahova, n’cinthu comwe mungacinje lini. Bzimwebzi bzimbathandauza kuti mudapicira kutumikira Mtongi Mkululetu, bziribe basa bzomwe bzingacitikebzo, napo axamwali ayai abale wanu acisiya kumutumikira. (Psalymo 27:10) Pa cakucitika ciri-cense, mbakumbirani Yahova kuti akuthandizeni kupitiriza kuteweza piciro lomwe mudacita kuna iye.—Werengani Wafiripo 4:11-13.

7. Kodi mungacite tani kuti mupitirize kukonza cipulumuso canu ‘na mantha na kutetemera?’

⁷ Yahova ambafuna kuti mukhale xamwali wace. Koma pambafunika nyongo kuti mupitirize kulimbisa uxamwali bwanu na iye mucipitiriza  kukonza cipulumuso canu. Pa Wafiripo 2:12 pambati: “Pitirizani kukonza cipulumuso canu na mantha na kutetemera.’ Bzimwebzi bzinkuthandauza kuti tin’funika kukumbukira mwakusamala bzomwe tingacite kuti tipitirize kukhala pa uxamwali na Yahova nakuti tipitirizembo kukhala wakukhulupirika kwa iye. Ndipo tin’funika lini kumbandolewa kuti tin’cita bzimwebzo. Lekani kuyebwa kuti napo wanthu winango omwe adatumikira Yahova kwa magole mazinji alibe kupitiriza kukhala wakukhulupirika. Tsono, n’ciyani comwe cingakuthandizeni kuti mupitirize kukonza cipulumuso canu?

8. Kodi kupfunza Bibliya kumbaphatanidza ciyani? Ndipo n’thangwe ranyi kucita bzimwebzi nkwakufunika?

⁸ Kuti tikhale xamwali wa Yahova, tin’funika kumbamutetekera na kumbalewalewa naye. Njira ibodzi yakutetekera Yahova ndiyo kupfunza Bibliya. Bzimwebzi bzimbaphatanidza kuwerenga Bibliya pabodzi na mabukhu manango yomwe yambalewa bza Bibliya ticimbakumbukira bzomwe timbawerengabzo. Koma kupfunza Bibliya kumbaphatanidza bzizinji sikuti kumbandokoya nkhanizo mumsolo ninga kuti mun’funa kukacita mayezo kuxikola. M’mbuto mwace, kupfunza Bibliya kuli ninga kuti munkucita ulendo ndipo munkuyenda mucimbazindikira bzinthu bzipsa bzakulewa bza Yahova. Kucita bzimwebzi kun’dzakuthandizani kufenderera Mulungu ndipo iye an’dzakufendereranimbo.—Tiyago 4:8.

9. Kodi ni bzinthu bziponi bzomwe bzimbakuthandizani pa pfunziro lanu la pamwekha?

⁹ Gulu la Yahova limbapereka bzinthu bzizinji bzomwe bzingakuthandizeni pa ndondomeko yanu ya pfunziro la pamwekha. Mwa ciratizo, mbali yakuti “Achinyamata” yomwe imbagumanika pa saite ya jw.org, pana mbali yakuti “Zoti Muchite Pophunzira Baibulo” yomwe ina  bzinthu bzomwe bzingakuthandizeni kupfunza nkhani zomwe ziri m’Bibliya. Ndipo pa saiteyi mungagumanembo mbali yakuti “Kodi Baibulo Limaphunzitsa Chiyani Kwenikweni? (Zokuthandizani Pophunzira)” Bzinthu bzimwebzi bzingakuthandizeni kulimbisa cikhulupiro canu mucikwanisa kufotokozerambo wanthu winango bzomwe mumbakhulupira. Mungagumanembo nfundo zinango zomwe zingakuthandizeni pa pfunziro lanu la pamwekha mu Galamukani! wa Abril 2009 pa msolo wakuti “Zimene Achinyamata Amadzifunsa . . . Kodi Ndingatani Kuti Kuwerenga Baibulo Kuzindisangalatsa?” Kupfunza Bibliya na kukumbukira bzomwe mwawerengabzo n’kwakufunika kuti mupitirize kukonza cipulumuso canu.—Werengani Psalymo 119:105.

10. N’thangwe ranyi Mkristau wakubatizidwa an’funika kumbapemba?

¹⁰ Pomwe tinkupfunza Bibliya, timbakhala tinkutetekera Yahova ndipo tikambapemba timbakhala tinkulewalewa naye. Tin’funika lini kuwona mpembo ninga ‘cithumwa’ comwe cingatipase mwayi wakuti bzinthu bzitifambire bwino. Koma timbawone mpembo kuti ni njira yomwe tilalewera na Mulengi wathu. Kumbukirani kuti Yahova ambafuna kubva bzomwe imwepo mun’funa kulewa! (Werengani Wafiripo 4:6.) Tenepo, mukakhala na thupo ayai mudasunama thangwe ra cinthu cinango, tewezani malango ya m’Bibliya yakuti ‘pereka thupo lako kuna Yahova.’ (Psalymo 55:22) Abale wathu azinji ambawona kuti kucita bzimwebzi kumbawathandiza kwene-kwene. Ndipo bzimwebzi bzingakuthandizenimbo!

11. N’thangwe ranyi tin’funika kumbatenda Yahova nthawe zense?

¹¹ Tin’funika lini kumbapemba kwa Yahova kokha pomwe tin’funa kukumbira thandizo. Bibliya limbatikumbusa kuti: ‘Latizani kuti ndimwe wakutenda.’ (Wakoloso 3:15) Nthawe zinango, timbakhala na thupo kwene-kwene thangwe ra mabvuto yomwe tinkugumana nayo mpaka timbayebwa bzinthu bzabwino bzomwe tinabzo. Tenepo, yezerani kucita ibzi: Nsiku zense mbakumbukirani bzinthu bzitatu bzomwe mungatendere Yahova, patsogolo pace mbacitani mpembo wakutenda bzinthu bzimwebzo. Mtsikana munango wakucemeredwa Abigail, omwe adabatizidwa na magole 12 yakubadwa, adalewa kuti ambakumbukira bza mbvunzo munango omwe adaubva wakuti: “Tani ticimuka macibese kokha na bzinthu bzomwe tidatenda kale Yahova dzulo, kodi ni bzinthu bziponi bzomwe tingadakhala nabzo?” * (Onani mafala ya m’nyansi.) Na tenepo, iye adalewa pomwe kuti: “Ndimbawona kuti Yahova ngwakuthemera kutendedwa kuposa ali-wense m’cirengedwe cense ndipo tin’funika kumbamutenda pa mphaso iri-yense yomwe iye ambatipasa.”

12, 13. (a) Kodi ni bzakucitika bziponi bzomwe bzidakucitikirani bzomwe bzimbakuthandizani kuwona kuti Yahova ngwabwino? (b) N’thangwe ranyi mpsakufunika kukumbukira momwe Yahova adakuthandizirani?

¹² Yahova adathandiza Mambo Davide kulimbana na bzineso bzizinji pa moyo wace. Ndipopa iye adalewa kuti: ‘Lawidzani, muciwona kuti Yahova ngwabwino; ngwakusimbidwa munthu  wa mphanvu wakuthawira kwa iye.’ (Psalymo 34:8) Vesiri linkulatiza kuti mpsakufunika kuti munthu ali-wense payekha alawidze kudeka mtima kwa Yahova. Mukambawerenga Bibliya, pabodzi na mabukhu yathu manango na kuyenda ku mitsonkhano, mumbapfunza momwe Mulungu adathandizira wanthu winango kuti akhale wakukhulupirika. Koma pomwe uxamwali bwanu na Yahova bunkulimba, mbawonani momwe Yahova ankukuthandizirani. Kodi ni bzakucitika bziponi bzomwe bzidakucitikirani bzomwe bzimbakuthandizani kuwona kuti Yahova ngwabwino?

¹³ Njira ibodzi yomwe Mkristau ali-wense ambawonera kudeka mtima kwa Yahova njakuti iye adatisankhula kuti tikhale xamwali wace pabodzi na Mwana wace. Jezu adalewa kuti: ‘Palibe munthu omwe angabwere kuna ine pokha-pokha mwakucita kukwewedwa na Baba, omwe adandituma.’ (Juwau 6:44) Kodi imwepo mumbabzibva kuti Yahova adakusankhulani kuti mumutumikire? Ayai mubakumbuka kuti, ‘Yahova adasankhula abereki wangu koma ine ndikundowatewera basi.’ Lekani kuyebwa kuti pomwe mudabzipereka kwa Yahova mucibatizidwa, imwepo mudayamba kukhala pa uxamwali bwakupambulika na iye. Bibliya limbati: ‘Tsono penu munthu ambafuna Mulungu, munthuyo ambadziwidwa na Iye.’ (1 Wakolinto 8:3) Tenepo, nthawe zense mbatendani mwayi omwe Yahova adakupasani wa kukhala m’gulu lace.

14, 15. Kodi n’ciyani comwe cingakuthandizeni kuti mukhwimike kuuza winango bza cikhulupiro canu?

¹⁴ Imwepo mumbawona kuti Yahova ngwabwino akambakuthandizani kukhala wakukhwimika pomwe munkufotokozera winango bza cikhulupiro canu mu utumiki bwa kumunda ayai ku xikola. Bzingakhale bzakunesa kupalizira anzanu wa ku xikola. Pinango mungacite mantha mukakumbukira momwe anzanuwo angakutawirireni. Ndipo mungacitembo mantha kufotokoza bza cikhulupiro canu pamaso pa wanthu azinji. Kodi n’ciyani comwe cingakuthandizeni kuti mukhwimike kuwafotokozera bza cikhulupiro canu?

¹⁵ Kumbukirani thangwe ranyi imwepo mumbakhulupira bzomwe Bibliya limbapfunzisabzo. Ndipo penu mbali yakuti guias de estudo inkugumanika m’cirewedwe canu pa jw.org, mbaiphatisani basa. Mbali imweyi ingakuthandizeni kubvesesa bzomwe mumbakhulupira, thangwe lomwe mumbakhulupira bzimwebzo na momwe mungafotokozerere winango bzimwebzo. Mukakonzekera bwino na kutsimikiza kuti bzimwebzo mpsacadidi, mun’dzakhala wakukonzeka kuuza winango bza Yahova.—Jeremiya 20:8, 9.

16. Kodi n’ciyani comwe tswaka linango lidacita kuti likwanise kupalizira kuxikola?

¹⁶ Napo mutakonzekera bwino, mungapitirize kukhala na mantha kuuza winango bzomwe mumbakhulupira. Onani bza mpfumakazi inango yomwe ina magole 18 yakubadwa, ndipo idabatizidwa pomwe ikhana magole 13, idalewa kuti: “Ndimbadziwa bzomwe ndimbakhulupira, koma nthawe zinango ndimbasaya momwe ndingalewere bzinthubzo.” Tsono kuti amalise bvuto laceri, iye ambacita nyongo yakulewalewa bzomwe ambakhulupira mwacibadwa na mwakugwa nfuwa. Iye adati: “Anzangu wa kuxikola ambalewalewa mwakusaya kuneseka bzomwe iwo ambacita. Tenepo, inepano ndimbatewezerambo bzibodzi-bodzibzo. Koma pakati pa macezayo, ndimbadzalewa cinthu cinango, ninga mafala yakuti, ‘Nsiku inango ndikhacitisa pfunziro la Bibliya, ndipo . . . ’ Patsogolo pace, ndimbapitiriza na bzomwe ndikhafuna kulewabzo. Napo kuti ndikacita bzimwebzi,  ndimbafika lini pa kuleweratu bza Bibliya, koma kawiri-kawiri bzimwebzi bzimbacitisa anzanguwo kundibvunza bzomwe ndimbacita ndikambapfunzisa Bibliya. Ndipo ndikambacita bzimwebzi mwakubwereza-bwereza, bzimbadzakhala bzakusaya kunesa kuwafotokozera, ndipo ndimbadekedwa kwene-kwene!”

17. Kodi n’ciyani comwe cingakuthandizeni kuti mupalizire wanthu winango?

¹⁷ Wanthu akambawona kuti imwepo mumbawatetekera na kuwalemekeza, bzimbakhala bzakusaya kunesa kuti iwo akulemekezenimbo pabodzi na bzomwe mumbakhulupira. Olivia omwe ana magole 17 ndipo adabatizidwa pomwe akhali mwana, adalewa kuti: “Nthawe zense ndikhacita mantha kuceza nkhani za Bibliya kuti wanthu aleke kundiwona ninga wamakani.” Kodi n’ciyani comwe cidathandiza Olivia kucinja makumbukidwe yace? Iye adati: “Maswaka mazinji yambadziwa lini cinthu ciri-cense pakulewa bza Mboni za Yahova. Tsono ndife basi omwe tingawathandize kudziwa. Na tenepo momwe iwo angatawirire bzimbathemba momwe tingawapalizirire. Kodi iwo angatiwone tani, penu tinkutazira kufotokoza bzomwe timbakhulupira ayai tinkucita manyazi, ayai pinango tinkulewalewa nawo pomwe tidatsulima? Kulewa cadidi, iwo angatiwone ninga kuti tina manyazi thangwe ra kukhala Mboni ya Yahova. Ndipo pinango iwo angatilewe kuipa thangwe ra kusaya kwathu citsimikizo pa bzomwe timbakhulupira. Koma tikambalewalewa nawo mwakutsudzuka na mwa citsimikizo, bzin’dzathandiza kuti iwo ambatilemekeze.”

18. Kodi mun’funika kucita ciyani kuti mukonze cipulumuso canu?

¹⁸ Tawona kuti munthu ali-wense ana udindo bukulu kwene-kwene bwa kupitiriza kukonza cipulumuso cace. Tsono kuti bzimwebzi bzikwanisike, imwepo mun’funika kuwerenga Bibliya na kukumbukira bzomwe mumbawerengabzo, kupemba kwa Yahova, mucimbakumbukira bzinthu bzense bzomwe iye ambakucitirani. Kucita bzimwebzi kun’dzakuthandizani kutsimikiza kuti Yahova ni Xamwali wanu. Ndipo bzin’dzakucitisanimbo kufuna kuuza winango bzomwe mumbakhulupira.—Werengani Psalymo 73:28.

19. N’thangwe ranyi mpsakufunika kucita nyongo yakupitiriza kukonza cipulumuso canu?

¹⁹ Jezu adati: ‘Penu munthu akufuna kunditewera inepano, abzilambe yekha, anyamule muti wace wakuzunzidwira, acinditewera mwakusaya kulekeza.’ (Mateu 16:24) Tenepo, kuti Mkristau atewere Jezu, an’funika kubzipereka kwa Yahova acibatizidwa. Ndipo kucita bzimwebzi, kun’dzakuthandizani kukhala na moyo wabwino tsapano ndipo kutsogolo mucidzatambira moyo wakusaya kumala m’dziko lipsa la Mulungu. Tenepo, citani ciri-cense comwe mungakwanise kuti mupitirize kukonza cipulumuso canu!