TENTSENEFE timbakhulupira kuti Yahova akutsogolera na kusamalira atumiki wace kuti akhale naye pa uxamwali bwakulimba ‘m’ntsiku zakumalizira’ zino. (2 Timotio 3:1) Kodi n’ciyani comwe timbacita Yahova akatipasa malango? Tingandendemezera bzomwe tingacite na bzomwe Ajirayeri adacita m’dambo. Iwo akhafunika kucita cinthu ciri-centse akabva kulira kwa bzimbututu.

Yahova adauza Mozeji kuti akonze bzimbututu bziwiri mwakuphatisa basa siriva. Bzimbututubzo bzikhaphata basa ‘pa kucemerera wanthu kuti abwere ku mtsonkhano na kuwadziwisa kuti ayambe kuguduka pa tsasa.’ (Mirewengo 10:2) Antsembe akhafunika kuliza bzimbututubzo mwakubverana na bzomwe wanthuwo akhafunika kucita. (Mirewengo 10:3-8) Ntsiku zinombo atumiki wa Mulungu ambatambirambo malango mu njira zakusiyana-siyana. Bzimwebzi bzikutikumbusa bzimbututu bzomwe bzikhaliziwa mu nthawe ya Ajirayeri. Mbaticezeraneni zitatu mwa njirazo: (1) tikacemerewa kuti tiyende ku mitsonkhano mikulu-mikulu, (2) akulu wa gwere akacemerewa kuti ayende kukatambira mapfunziro, ndipo (3) malango yomwe timbatambira m’gwere yakulewa bza kucinja kwa bzinthu.

M’dambo, madzinza ya Ajirayeri akhamanga matendi yawo mphepete mwa tendi la mkonkhano, koma akhayagawa m’magulu manai. Nthawe zinango, Yahova akhalewa kuti wanthu wentse akakonkhane pa nsuwo omwe ukhali kumabvadzuwa kwa tendi la mkonkhano. (Mirewengo 10:3) Kuti madzinza yentse yayende ku mtsonkhanoyo, antsembe akhafunika kuliza bzimbututu bziwiri. Ajirayeri wentse akhabva kulira kwa bzimbututubzo napo omwe akhakhala kutali. Ndipo omwe akhakhala pafupi na nsuwoyo akhakulumiza kufika. Koma omwe akhakhala kutali akhamala nthawe zizinji akufamba ndipo akhafunika kucita nyongo kuti afike. Tenepo, bziribe basa kuti akhakhala kutali ayai pafupi, Yahova akhafuna kuti Ajirayeri wentse ambatsonkhane na kubva malango yace.

Ntsiku zino, ifepano timbatsonkhana lini mu tendi la mkonkhano, koma timbauzidwa kuti timbatsonkhane pabodzi na atumiki wa Mulungu. Timbacita bzimwebzi tikambayenda ku mitsonkhano ya cigawo na mitsonkhano inango yakupambulika, komwe timbatambira malango yakufunika kwene-kwene. Pa dziko lentse la pantsi, atumiki wa Yahova ambakhala na mitsonkhano ibodzi-bodzi. Wentse omwe ambabvuma mcemo wakuyenda ku mitsonkhano, ambacita mbali ya thimu likulu la wanthu wakukondwa. Tsono kuti afike ku mitsonkhanoko, winango ambafamba mtantho utali koma winango ne. Napo bziri tenepo, wale omwe ambacita nyongo kuti afike pa mitsonkhano ambagumana phindu likulu kwene-kwene.

Tsono tani wale omwe ambakhala kutali na mbuto yomwe imbacitikira mitsonkhano? Thangwe ra kupita patsogolo kwa mitcini ya nzeru, azinji angawone mitsonkhanoyo na kubzibva kuti alipombo pa mitsonkhanoyo. Mwa ciratizo, pomwe nyakuimira Likulu Lathu la pa Dziko Lentse adazungira dziko la Benin, mthambi ya m’dzikolo idacita makonzedwe yakuti nkhani ya nyakuimirayo ifike mpaka ku mzinda unango wa  Níger omwe uli pakati pa dambo la Saara, wakucemeredwa Arlit. Ndipo wanthu wakukwana 21 adabvesera nkhaniyo, ndipo pa wanthuwo akhalipo abale, mpfumakazi na wanthu winango omwe akhafuna kudziwa bzizinji bza m’Bibliya. Napo kuti iwo akhali kutali, koma adabzibva kuti akhali mu thimu la wanthu wakukwana 44.131 omwe akhali pa mtsonkhano ukuluyo. M’bale winango adanemba kuti: “Tikutenda kwene-kwene na programayi. Bzimwebzi bzikulatiza kuti mumbatifuna kwene-kwene.”

Antsembe akaliza cimbututu cibodzi, ‘kokha akulu-akulu omwe ni atsogoleri wa bzulu na bzulu’ ndiwo akhayenda ku tendi la mkonkhano. (Mirewengo 10:4) Kumweko Mozeji akhawapasa malango na mapfunziso. Bzimwebzi bzikhawathandiza kuti akwanise kusamalira madzinza yomwe iwo akhayanyang’anira. Kulewa mwakusaya kupenukira, bzingadakhala kuti ndimwe m’bodzi wa atsogoleriwo, mungadacita ciri-centse kuti mugumanikembo pa tendipo.

Ntsiku zino, akulu wa gwere ‘mbatsogoleri’ lini. Ndipo iwo ambayezera lini kuponderera mabira ya Mulungu. (1 Pedru 5:1-3) Koma iwo ambacita bzomwe angakwanise kuti asamalire mabirayo. Ndipopa akacemeredwa kuti ayende kukatambira mapfunziro ku Xikola ya Utumiki bwa Umambo, iwo ambakhala wakukonzeka kuyenda. Ku xikolako, akuluwo ambapfunzisidwa bzomwe angacite kuti asamalire bwino nkhani za m’gwere. Thangwe ra mapfunzisoyo, akuluwo pabodzi na abale na mpfumakazi wa m’gwere ambakhala pa uxamwali bwakulimba na Yahova. Pinango imwepo mukanati kuyenda ku xikolayi, koma mukugumanambo phindu na wale omwe adapita kale xikolayo.

Nthawe zinango antsembe akhaliza bzimbututu mwakucinja-cinja. Tenepo, wanthu akhadziwa kuti Yahova akufuna kuti iwo acoke pa tsasa kuti ayambe ulendo bwawo. (Mirewengo 10:5, 6) Ajirayeriwo akhafunika kucoka pa tsasapo mwakulinganizika bwino. Tsono kuti bzimwebzi bzikwanisike wentse akhafunika kucita nyongo. Pinango akhagumanika Ajirayeri winango omwe bzikhawanesa kubvuma kuti bzinthu bzacinja. Thangwe ranyi?

Winango pinango akhakumbuka kuti bzimbututubzo bzikhalizidwa mwakubwereza-bwereza pa nthawe yomwe iwo akhaidikhirira lini. ‘Nthawe zinango, mtambo ukhaima kucokera usiku mpaka ku macibese.’ Ndipo nthawe zinango mtamboyo ukhaima ‘ntsiku ziwiri, mwezi, ayai ntsiku zizinji;’ ndipo iwo akhafunikambo kukhala basi. (Mirewengo 9:21, 22) Kodi ni maulendo mangasi yomwe Ajirayeri adafulusa matsasa yawo? Bukhu la Mirewengo kapitulo 33, limbafotokoza mbuto zakukwana 40 zomwe Ajirayeri adamanga matsasa yawo.

Nthawe zinango, pomwe Ajirayeri akhali ‘m’dambo likulu na lakugopswa kwene-kwene,’ winango akhagumana m’thunzi. Ndipo iwo akhakomedwa kwene-kwene kumangira matsasa yawo pa m’thunzipo. (Bzakutonga 1:19) Ajirayeriwo angadakumbuka kuti bzikhali lini bwino kucinja mbutoyo, yamweya yangadakhala mayezo kwa iwo.

Pomwe madzinza yakhayamba ulendo bwawo, winango bzikhawanesa kudikhira kuti nthawe yawo ikwanembo. Wentse akhabva bzimbututu bzomwe bzikhalizidwa mwakucinja-cinja, koma bzingadakwanisika lini kuti wentse acoke pa nthawe ibodzi-bodziyo. Bzimbututu bzikalira kakuyamba, omwe akhayamba kucita ulendo ni madzinza yomwe yakhakhala kumabvadzuwa, yomwe yakhali Djuda, Isakari na Zebulani. (Mirewengo 2:3-7; 10:5, 6) Madzinza matatuyo yakacoka pa tsasapo, antsembe akhaliza pomwe kaciwiri bzimbututubzo. Cikhali cizindikiro cakuti madzinza matatu ya kummwera yacokembo. Antsembe akhapitiriza kucita bzimwebzi mpaka Ajirayeri wentse kucoka pa tsasapo.

Bzinthu bzinango bzikacinja m’gulu la Yahova pinango bzingatinese kubvuma kucinjako. Pinango imwepo mungawone ninga kuti mwatayika thangwe ra kuwona kucinja kwa bzinthu bzizinji bzomwe mukhabzidikhirira lini. Ayai pinango imwepo mukhakomedwa na momwe bzinthu bzikhafambira ndipo mukhafuna lini kuti bzicinje. Pinango mwawona kuti kupirira kwanu kwayezedwa mpaka kupitirira malire, ndipo mwatenga nthawe kuti muzolowere kucinjako. Napo bziri tenepo, ifepano tikacita nyongo yakucita bzinthu bzomwe tikudziwa kuti mpsabwino, Mulungu an’dzatisimba kwene-kwene.

Mu nthawe ya Mozeji, Yahova adatsogolera bzulu na bzulu bza amuna, akazi na wana m’dambo. Bzingadakhala kuti Yahova alibe kuwatsogolera na kuwasamalira, bzinthu bzingadawafambira lini bwino. Ndipo mu ntsiku zakumalizira zino, Yahova akutitsogolera mwakuphatisa basa mzimu wace wakucena. Iye akutithandiza kuti tikhale naye pa uxamwali nakuti tipitirize kukhala na cikhulupiro cakulimba! Ndipopa, mukabva kulira kwa bzimbututu lekani kuzeza, citani bzinthu mwakanfulumize ninga momwe akhacitira Ajirayeri wakukhulupirika wale!