“Pomwe mwana wa tiyu wangu adayamba kumenyana nane, inepano ndidamuxipa khosi. Inepano ndikhafuna kumupha.”—Paul.

“Pamui inepano ndikhakalipa na cinthu ciri-centse. Ndikhadzonga bzombo, bzinthu bzomwe ndikhasenzeka nabzo ayai cinthu ciri-centse comwe ndikhaciphata m’manja.”— Marco.

Azinji wa ifepano timbacita lini bzinthu bzaciwembo ninga bzomwe bzafotokozedwa mu bziratizo bziwiribzi. Napo bziri tenepo, nthawe zinango bzimbatinesa kukhala wakubziretsa. Thangwe likulu lomwe limbatitazisa ni pikado yomwe tidatengera kuna munthu wakuyamba, Adamu. (Waroma 5:12) Ninga Paul na Marco, wanthu winango akakalipa bzimbawanesa kubziretsa. Wanthu winango bzimbawanesa kubziretsa thangwe ra kukumbukira bzinthu bzomwe bzidawakalipisa ayai kuwasunamisa. Ndipo winango bzimbawanesa kubziretsa akayezedwa na bzinthu bzomwe bzingawacitise upombo, kumwa kwene-kwene na kumwa mankhwala yakudzungulumwisa.

Wale omwe ambalekerera kuti makumbukidwe, bzikhumbo na bzicite bzawo bziwatsogolere bzingadzonge moyo wawo. Koma ifepano tingatcenkhe kuti bzimwebzi bzireke kucitika. Mwa njira iponi? Mwa kukulisa khalidwe la kubziretsa. Kuti tibvesese momwe tingacitire bzimwebzi, nkhani ino in’tawira mibvunzo mitatu iyi: (1) Kodi kubziretsa n’ciyani? (2) Thangwe ranyi kubziretsa n’kwakufunika? (3) Kodi tingakulise tani khalidweri? (Wagalata 5:22, 23) Tikamala, tiniwona bzomwe tingacite bzikatinesa kubziretsa nthawe zinango.

Munthu wakubziretsa ambacita lini bzinthu na befu. M’mbuto mwace, iye ambabziretsa kuti aleke kulewa ne kucita cinthu comwe cingakondwese lini Mulungu.

Jezu ni ciratizo cabwino pa nkhani ya kubziretsa. Bibliya limbalewa kuti: ‘Pomwe akhatukwanidwa, iye alibe kutukwanambo. Pomwe akhabonera alibe kugopsa, koma akhabzipereka kwa ule omwe ambayeruza mwakulungama.’ (1 Pedru 2:23) Jezu adabziretsa pomwe anyamadulanthaka wace adamuseka pa nthawe yomwe iye akhali pa muti wakuzunzidwira. (Mateu 27:39-44) Iye akhadalatiza kale kuti akhali munthu wakubziretsa pomwe atsogoleri wa bzipembedzo akhamubvunza mibvunzo mizinji yomwe ingadamucitisa kuti alewe bzinthu bzakuipa. (Mateu 22:15-22) Jezu adawonesambo ciratizo cabwino, pa nthawe yomwe Adjuda winango akhafuna kumuboma na minyala. M’mbuto mwakuwabwezera, ‘Jezu adabisala acicoka mu templo.’—Juwau 8:57-59.

Kodi ifepano tingakwanise kutewezera Jezu? Inde, tingakwanise. Mpostolo Pedru adanemba kuti: ‘Kristu adabonera thangwe ra imwepo, acikusiyirani ciratizo kuti mutewere mathanya yace.’ (1 Pedru 2:21) Napo kuti ndife wakuperewera, ifepano tingakwanise kutewezera na pafupi ciratizo ca Jezu pa nkhani ya kubziretsa. Thangwe ranyi tin’funika kukhala na khalidwe limweri?

Kuti tikondwese Yahova, tin’funika kukhala wakubziretsa. Thangwe tikasaya kukhala wakubziretsa  pakulewalewa na pakucita bzinthu, tingaluze uxamwali bomwe tinabo na iye, napo penu tikumutumikira kwa magole mazinji.

Kumbukirani bzomwe bzidacitika na Mozeji. Pa nthawe yomwe iye akhana moyo, ‘akhali munthu wabwino kwene-kwene kuposa wanthu wentse wa pa dziko la pantsi.’ (Mirewengo 12:3) Mozeji adamala magole mazinji akupirira na kudandaula kwa Ajirayeri, koma ntsiku ibodzi yokha adatazira kubziretsa. Iye adakalipa kwene-kwene pomwe Ajirayeri adadandaula pomwe thangwe ra kusaya madzi. Tenepo, na ukali Mozeji adauza Ajirayeriwo kuti: ‘Tsapano bvani imwe anyakupandukamwe! Kodi mun’funa kuti ifepano tikucosereni madzi pa tsendwali?’—Mirewengo 20:2-11.

Mozeji adatazira kubziretsa. Iye alibe kulemekeza bzomwe Yahova adacita pomwe adacosa madzi mwakudabwisa pa tsendwa pale. (Psalymo 106:32, 33) Na thangwe limweri, Yahova alibe kubvuma kuti iye apite m’Dziko lomwe angadawapasa. (Mirewengo 20:12) Pinango Mozeji adakhumbula pa moyo wace wentse thangwe ra kusaya kubziretsa komwe adacita.—Bzakutonga 3:23-27.

Kodi tikupfunza ciyani? Napo kuti tikutumikira Yahova kwa magole mazinji, tin’funika lini kulewalewa mwa ukali na munthu omwe wacita bzinthu bzomwe bzatikalipisa ayai omwe akufuna kutambira malango. (Wayefezo 4:32; Wakoloso 3:12) N’cadidi kuti pomwe munthu ambakalamba, bzimbakhala bzakunesa kuti apirire. Koma lekani kuyebwa bza Mozeji. Tin’funika lini kubvuma kuti khalidwe lakusaya kubziretsa lidzonge utumiki bomwe tikucita kuyambira kale-kale. Kodi tingakulise tani khalidwe lakufunikali?

Pembani mucikumbira mzimu wakucena. Thangwe ranyi? Thangwe kubziretsa ni mbali ya cisapo ca mzimu wa Mulungu, ndipo Mulunguyo ambapasa mzimuyo wale omwe ambamukumbira. (Luka 11:13) Yahova angatipase mphanvu yomwe tikufunikira, mwakuphatisa basa mzimu wace. (Wafiripo 4:13) Iye angatithandizembo kukulisa mbali zinango za cisapo ca mzimu, ninga lufoyi lomwe lingatithandize kukhala wakubziretsa.—1 Wakolinto 13:5.

Tcenkhani cinthu ciri-centse comwe cingakutaziseni kukhala wakubziritsa. Mwa ciratizo, lekani kumbapita pa saite zakuipa ayai kucita masenzeka yomwe yangakucitiseni kukhala na makumbukidwe yakuipa. (Wayefezo 5:3, 4) Kulewa cadidi, tin’funika kutalikirana na cinthu ciri-centse comwe cingaticitise kukhala na cikhumbo cakucita bzinthu bzakuipa. (Mimwani 22:3; 1 Wakolinto 6:12) Mwa ciratizo, munthu omwe akudziwa kuti bzingamunese lini kuyezedwa kuti acite upombo, bzingakhale bwino kutcenkha kuwerenga mabukhu na kuwona mavidiyo yomwe yambalatiza wanthu akugonana.

 Kuteweza malango yamweya kungakhale kwakunesa. Koma tikacita nyongo, Yahova an’dzatipasa mphanvu yomwe tikufunikira kuti tikhale wakubziretsa. (2 Pedru 1:5-8) Iye an’dzatithandiza kuti tikhale wakubziretsa pakukumbuka, pakulewalewa na pakucita bzinthu. Paul na Marco omwe afotokozedwa pakuyamba wale, adapfunza momwe angakhalire wakubziretsa. Kumbukiranimbo bza m’bale winango omwe akhatazira kubziretsa akakhala na kanderendere wace pa nfolo wa makanderendere yanango, mpaka akhapopotezana na atekenyi anzace. Kodi n’ciyani comwe iye adacita kuti akhale wakubziretsa? Iye adati: “Ndikhapemba kwa Yahova ntsiku zentse. Inepano ndikhapfunza nkhani zomwe zikhalewa bza khalidwe lakubziretsa ndipo ndidakoya mavesi ya m’Bibliya yakufunikira. Napo kuti papita magole mazinji ndikucita nyongo kuti ndicinje, inepano ntsiku ire-yentse nimbabziuza kuti: ‘Lero ndikufuna kukhala wakugwa nfuwa.’ Kuti ndikafike na nthawe yabwino komwe ndikuyenda, nimbakulumiza kucoka. Bzimwebzi bzimbandicitisa kuti ndileke kukalipa ndikakhala ndiri pa nfolo.”

Nthawe zinango, tentsenefe bzimbatinesa kukhala wakubziretsa. Bzimwebzi bzikacitika pinango timbabva manyazi kupemba kwa Yahova. Koma imweyi imbakhala nthawe yakufunika kwene-kwene kuti timbapembe kwa Yahova kuti atithandize. Tenepo, lekani kumbacedwa kumbapemba kwa Yahova. Pa kupembapo mukumbireni kuti akulekerereni na kukuthandizani. Ndipo tsimikizirani kuleka kubwerezera pomwe comwe mwaphonyesaco. (Psalymo 51:9-11) Ndipo lekani kukumbuka kuti Yahova an’dzatetekeza lini mkumbiro wanu wakuti akulekerereni. (Psalymo 102:17) Mpostolo Juwau ambatikumbusa kuti mulopa wa Mwana wa Mulungu ‘ukuticenesa ku pikado zathu zentse.’ (1 Juwau 1:7; 2:1; Psalymo 86:5) Kumbukiranimbo kuti Yahova ambatiuza kuti timbalekerere winango mwakubwereza-bwereza. Tenepo, lekani kupenukira kuti iye an’dzacitambo bzibodzi-bodzibzi na imwepo.—Mateu 18:21, 22; Wakoloso 3:13.

Yahova alibe kukomedwa pomwe Mozeji adatazira kubziretsa. Napo bzikhali tenepo, adamulekerera. Fala la Mulungu limbalewa kuti Mozeji ni m’bodzi mwa wanthu omwe akhana cikhulupiro cakulimba omwe tingawatewezere. (Bzakutonga 34:10; Wahebereu 11:24-28) Yahova alibe kubvuma kuti Mozeji apite m’Dziko lomwe adapasa Ajirayeri, koma an’dzamutambira m’Paraizo pano pa dziko la pantsi ndipo an’dzamupasa mwayi wakukhala na moyo wakusaya kumala. Ndipo Yahova akupasa mwayi ubodzi-bodziyu wentse omwe akucita nyongo yakulatiza khalidwe lakufunika kwene-kwene lomwe ndakubziretsa.—1 Wakolinto 9:25.