POMWE ndidayamba mapfunziro yangu ku xikola, ndidapfunza na anzangu abodzi-bodziwo mpaka kumaliza. Tenepo tense tikhadziwana madzina yathu, pabodzi na ya wanthu azinji mu mzindamo.

Wanthu azinji mu mzinda wa Liberty, akhana minda ndipo kawiri-kawiri iwo akhambalima cimanga. Pomwe ndidabadwa, pai wangu akhambaphatira basa munthu munango omwe akhana munda wace. Tenepo, kuyambira ndiri mwana, inepano ndidapfunza kumbafambisa trator na kumbacita mabasa manango ya ulimi.

Pomwe inepano ndidabadwa, pai wangu akhana magole 56 ndipo mai wangu akhana magole 35 yakubadwa. Koma napo bzikhali tenepo, pai wangu akhana mphanvu na thanzi labwino. Iwo akhafuna kwene-kwene kumbaphata basa ndipo adapfunzisa wana wawofe kumbacitambo bzibodzi-bodzibzo. Iwo akhali wakusauka ndipo akhalibe kobiri zizinji, koma akhatipasa bzense bzakufunikira pa moyo wathu ninga mbuto yakugona, bzakubvala na cakudya ndipo iwo akhambapambulambo nthawe yakuceza nafe. Pai wangu adafa na magole 93, ndipo mai wangu adadzafa na magole 86 yakubadwa. Awiriwo akhali lini Mboni za Yahova, koma ndina m’bale wangu m’bodzi omwe ankutumikira ninga mkulu wa gwere kucokera mu 1972.

Mai wangu akhambafuna kwene-kwene kunamata, tenepo, mdzinga uli-wense iwo akhambayenda nafe ku gereja Batista. Ulendo bwakuyamba bomwe ndidabva bza cipfunziso ca Utatu, ni pomwe ndikhana magole 12 yakubadwa. Tenepo, inepano ndidabvunza mai wangu kuti: “Mai, kodi bzingakwanisike tani kuti Jezu akhale Mwana na Baba pa nthawe ibodzi-bodziyo?” Mpaka pano ndikadakumbukira mtawiro wawo. Iwo adandiuza kuti: “Mwanangu, imweyi ni nkhani yomwe tingaibvesese lini bwino-bwino, ndipo cipo ticidzaibvesesa.” Kulewa cadidi, imweyi ikhali nkhani yomwe ndikhaibvesesadi lini. Pomwe ndidapfitsa magole 14, inepano ndidabatizidwa. Ndidabatizidwira mu mkulo munango, ndipo  nyakundibatizayo adandibvika m’madzi katatu, m’dzina la Baba, la Mwana na la mzimu wakucena.

Pomwe ndikhapfunza, ndikhana mwanzangu munango wa ku xikola omwe akhambacita masenzeka yakumenyana ndipo iye adandiuza kuti ndimbacitembo masenzekaya. Inepano ndidabvuma bzomwe mwanzanguyo adandiuza ndipo na kupita kwa nthawe, ndidadzacitambo mbali ya thimu la masenzekayo. Ndidacita masenzekaya kwa nthawe yakucepa, patsogolo pace ndidadzasiya. Na kupita kwa nthawe, ndidadzacemeredwa na boma la Estados Unidos kuti ndikakhale m’cikunda ndipo adandiyendesa ku Alemanha. Pomwe ndikhali kumweko, anyakunyang’anira wangu adawona kuti ndikhathemera kukhala mtsogoleri wa acikunda, tenepo iwo adandiyendesa ku mbuto yakukonzekeresa acikunda. Iwo akhafuna kuti ndimbaphate basa la ucikunda pa moyo wangu, koma ndibzo lini bzomwe inepano ndikhafuna, tenepo, ndidatumikira ninga m’cikunda kwa magole mawiri, ndipo mu 1956 ndidasiya. Yatandopita magole mang’ono-ng’ono ndidadzayamba basa linango.

Ndinati kupfunza cadidi ca m’Bibliya, inepano ndikhana makumbukidwe yakuphonyeka kwene-kwene pa nkhani ya bzomwe mwamuna caiye ambafunika kucita. Bzimwebzi bzikhacitika thangwe ra bzomwe anzangu akhacita na bzomwe ndikhambawona m’mafilme. Ndipo kwa inepano, mwamuna omwe akhambalewa bza Bibliya, akhali lini mwamuna caiye. Koma na kupita kwa nthawe, ndidayamba kupfunza bzinthu bzinango, bzomwe bzidacinja makumbukidwe yangu. Nsiku inango pomwe ndikhafambisa kanderendere wangu, ndidawona atsikana awiri omwe adandiimisira boko, acindicemera. Iwo akhali azibale wa tsano wangu omwe akhadalowola m’bale wangu. Atsikanawa akhali wa Mboni za Yahova, ndipo nsiku inango iwo adandipasa marevista ya Nsanza ya Mulindiri na Galamukani! Koma ndidawona kuti Nsanza ya Mulindiriyo ikhali yakunesa kuibvesesa. Tsono nsiku imweyi iwo adandicemera kuti ndikagumanike pa Pfunziro la Bukhu la Gwere, lomwe lingadacitikira kumui kwawo. Tenepo, ndidawauza kuti: “Lekani ndikakumbuke bwino bza nkhaniyi.” Iwo adamwetulira ndipo adandiuza kuti: “Picira kuti un’dzabweradi.” Inepano ndidawauza kuti: “Inde, ndin’dzabwera.”

Nditafika kumui, ndidawona kuti ndikhalibe kukumbuka bwino kupicira kuti ndingadayenda ku mtsonkhano ule, koma pakuti ndikhadapicira kale ndidawona kuti bzikhali bwino kuteweza piciro langulo. Tenepo ndidayenda ku mtsonkhanoyo. Ndidadabwa kwene-kwene na wana omwe akhalipombo pa mtsonkhanoyo. Iwo akhadziwa bzizinji bza m’Bibliya ndipo ndidawona kuti inepano ndikhadziwa lini na cinthuco, napo kuti ndikhambayenda ku gereja na mai wangu mdzinga uli-wense. Ndikhafunambo kudziwa bzizinji, tenepo ndidabvuma kupfunza Bibliya. Cinthu cakuyamba comwe ndidapfunza, n’cakuti dzina la Mulungu wamphanvu zense ni Yahova. Magole ya m’mbuyo, inepano ndikhadabvunza mai wangu bza Mboni za Yahova, koma iwo adandiuza kuti: “Iwo ni wanthu omwe ambanamata nkhalamba inango yakucemeredwa Yahova.” Tsono pomwe ndidabva bza dzinali, inepano ndidawona kuti maso yangu yakhafunguka.

Pomwe ndidawona kuti ndikhadagumana cadidi, inepano ndidapita patsogolo mwauzimu mwakamfulumize kwene-kwene. Ndidabatizidwa mu Março, 1957, itandopita minyezi mipfemba kucokera pomwe ndidagumanika pa mtsonkhano ule. Pa nthawe imweyi, makumbukidwe yangu yakhadacinjiratu ndipo ndimbatenda kwene-kwene thangwe ra kupfunza bzomwe Bibliya limbapfunzisa pa nkhani ya bzomwe mwamuna caiye ambafunikira kucita. Jezu akhali munthu wakulungamiratu ndipo akhali wamphanvu kuposa munthu ali-wense, koma iye akhaphatisa lini basa mphanvu zacezo kuti ambamenyere nazo anzace. M’mbuto mwace, ‘iye adabvuma kuti aboneresedwe,’ ninga momwe bzikhadalewedweratu kale. (Zaiya 53:2, 7) Tenepo, na ciratizo ca Jezuci, ndidapfunza kuti mteweri caiye wa Jezu ‘an’funika kukhala wakuderekha na wense.’—2 Timotio 2:24.

Ndidayamba kutumikira ninga mpainiya m’gole la 1958,  koma pambuyo pa nthawe ing’ono-ng’ono ndidaima. Thangwe ranyi? Thangwe pa nthaweyi ndikhakonzekera bza kulowola Gloria, m’bodzi mwa atsikana awiri omwe adandicemera kuti ndikagumanike ku mtsonkhano wale. Mpaka lero, ndimbadandaula lini na cakusankhula canguci. Ndimbafuna kwene-kwene mkazi wangu Gloria, ndipo kwa inepano, iye ngwakufunika kwene-kwene kuposa oro. Ndipo ndimbakondwa kwene-kwene thangwe ra iye kukhala mkazangu. Lekani kuti iye akuuzeni pang’ono bza moyo wace:

“Ndikhana azibale wakukwana 16 ndipo tense pabodzi tikhalipo wana 17. Mai wangu akhali Mboni ya Yahova, koma pai wangu akhali lini. Pai wangu adadzayamba kupfunza Bibliya pomwe mai wangu adafa, ndipo pa nthaweyo inepano ndikhana magole 14 yakubadwa. Pakuti mai akhadasaika, pai wangu adakakumbira a diretori wa ku xikola kuti m’bale wangu mkulu wacikazi pabodzi na inepano, timbayende nsiku zakusiyana ku xikola. Iwo adacita bzimwebzi kuti m’bodzi wa ifepano ambakhale pa mui kuti ambasamalire azibale wathu ang’ono-ang’ono. Tenepo, a diretoriwo adabvuma mkumbiroyo ndipo tidacita bzimwebzi mpaka m’bale wanguyo kumaliza mapfunziro yace. Ifepano tidapfunza Bibliya na Mboni za Yahova ziwiri, ndipo pa wana 17, 11 tidakhala Mboni za Yahova. Ndikhambafuna kwene-kwene kumbayenda mu utumiki bwakumunda, napo kuti ndikhana manyazi, koma bayangu Sam adandithandiza kwene-kwene kulimbana na bvuto limweri.”

Tidalowolana na Gloria mu Fevereiro, 1959. Awirife tikhafuna kwene-kwene upainiya ndipo mu Julho m’gole limweri, ifepano tidadzaza formulariyo yakukumbira kukatumikira pa Beteli, thangwe tikhafunisisa kuyenda kukatumikira ku likulu la pa dziko lense. Tsono pomwe m’bale Simon Kraker adawona formulariyo yomwe tikhadadzazayo, adabwera kudzalewalewa nafe. Iye adatiuza kuti pa nthawe imweyire, abale wakulowola akhacemeredwa lini kuti adzatumikire pa Beteli. Tidapitiriza kukhala na cikhumbo cathu cakuyenda kukatumikira pa Beteli, koma padatenga magole mazinji kuti tiyende kumweko.

Tidanembera tsamba abale wa ku likulu lathu, lakukumbira kuti atitumize ku gawo lomwe likhafunikira apalizi azinji. Iwo adatitawira ndipo adatiuza kuti tiyende ku Pine Bluff, Arkansas. Pa nthaweyo, ku Pine Bluff kukhana magwere mawiri yokha, gwere libodzi la azungu, linango la asenzi. Ifepano tidayenda kukatumikira m’gwere la asenzi lomwe likhana apalizi wakukwana 14 okha.

Pinango imwepo mungabzibvunze kuti n’thangwe ranyi pa nthawe imweyire pakhana magwere mawiri, libodzi la asenzi na linango la azungu. Mtawiro ngwakuti pa nthawe imweyire, bzikhabvumizidwa lini kuti azungu na asenzi ambatsonkhanire pabodzi m’mbuto zakunamatira, ndipo pakhanambo bvuto la ciwembo. Abale azinji akhagopa kuti angadatsonkhana wense pabodzi, Nyumba yawo ya Umambo ingadapfudzidwa. Ndipo Mboni za Yahova zikakapalizira m’mii ya azungu, zikhakwekwetedwa, zicimenyedwa. Tenepo, kuti tikwanise kucita basa lathu lakupalizira, ifepano tikhateweza malamulo yomwe yakhadaperekedwa, ticimbadikhira nthawe yomwe bzinthu bzingadacinja.

Bzikhali bzakunesa kwene-kwene kupalizira pa nthawe imweyire ndipo tikambapalizira m’gawo la asenzi, nthawe zinango bzikhacitika kuti mwa ngozi tikhambakagogodza msuwo wa azungu. Tenepo, akatifungulira msuwoyo, ifepano tikhafunika kucita cakusankhula cibodzi, kum’palizira munthuyo mwakamfulumize ayai kundom’pepesa ticiyenda ku nyumba inango.

Ninga apainiya, ifepano tikhafunikira kobiri kuti timbabzisamalire. Ndipo mabasa mazinji yomwe yakhalipo pa nthaweyo yakhalipira madolari matatu yokha pa nsiku. Tenepo, mkazangu Gloria akhambacita limpeza m’nyumba za wanthu. Pomwe iye akhaphata basa ku nyumba inango, inepano ndikhamuthandiza kuti ambamalize mwakamfulumize. Kumweko, anikacirowo akhatipasa cakudya ca masikati, comwe inepano na Gloria tikhadya tinati kubwerera kumui. Mdzinga uli-wense, inepano na Gloria tikhambaphata basa pamui pa banja linango. Iye akhambaengomari bzakubvala, ndipo inepano ndikhambatsuka majanela, kusamalira miti na maluwa na kucita mabasa manango ya pa muipo. Ku banja linango la azungu, tense awiri tikhambatsuka majanela, Gloria akhambatsuka mkati, ndipo inepano ndikhambatsuka kunja. Pakuti tikhaphata basa nsiku yense, banjali likhatipasa cakudya ca masikati. Mkazangu Gloria akhadyera m’nyumba, koma sikuti pabodzi na banjalo, ndipo inepano ndikhadyera panja. Ndikhalibe nabzo basa bzimwebzi, thangwe cakudyaco cikhakoma kwene-kwene. Banjali likhali la wanthu wabwino, koma makumbukidwe yawo yakhalibe kusiyaniratu na ya wanthu omwe akhakhala nawo pafupi. Nsiku inango pambuyo pakugula gazolina pa bomba, inepano ndidakumbira mzungu munango omwe akhaphata basa pamwepo, kuti Gloria ayendembo ku cimbudzi. Iye adandinyang’anisa ndipo adanditawira mwaukali kuti: “Cidakhiya.”

Pomwe tikhali ku Pine Bluff, ifepano tidakhala na moyo wakukondwa kwene-kwene, ndipo tikhakondwa na abale pabodzi na basa lathu lakupalizira. Mwa ciratizo, pomwe  tidafika ku Pine Bluff, tidakakhala kumui kwa m’bale munango omwe pa nthaweyo akhali mtumiki wa gwere. Mkazi wa m’baleyu akhali lini Mboni, tenepo mkazangu Gloria adayamba kupfunza naye Bibliya. Na kupita kwa nthawe, inepano ndidayamba kupfunza na mwana wacikazi wa banjali pabodzi na bayace. Mkazi wa m’baleyo pabodzi na mwana waceyo adabatizidwa, acitumikira Yahova.

Ifepano tikhana axamwali azinji mu gwere la azungu. Iwo akhambaticemera kuti tikadye kumui kwawo usiku, kucitira kuti wanthu winango aleke kutiwona pabodzi. Pa nthaweyo, pakhana thimu linango lakucemeredwa Ku Klux Klan (KKK) lomwe likhalimbisa mzimu wa tsankhulo na wa ciwembo. Ndimbakumbukira kuti nsiku inango, ndidawona mwamuna munango omwe akhadakhala kumui kwace, atabvala bzakubvala bzomwe thimu la Ku Klux Klan likhambabvalambo. Abale adagumana na bzineso bzizinji, koma bzimwebzi bziribe kuwacitisa kusiya kumbadekera mtima anzawo. Mwa ciratizo, ndimbakumbukira kuti nthawe inango, inepano na Gloria tikhafuna kobiri kuti tiyende ku mtsonkhano wacigawo, tenepo, tidagulisa kanderendere wathu kuti tigumane kobirizo. Kanderendereyo tikhadagulisira m’bale munango, koma nsiku inango patandopita mwezi ubodzi kucokera pomwe tikhadagulisa kanderendereyo, ifepano tidadabwa kwene-kwene pomwe tidafika pa mui. Nsiku imweyire tikhacokera mu utumiki bwakumunda ndipo pomwe tidafika pa mui, tidagumana kanderendere wathu ule ali pa muipo. Pa vidru yakutsogolo ya kanderendereyo pakhana katsamba komwe kakhadanemba kuti: “Ndine m’bale wanu ndipo ndinkukubwezerani kanderendere wanuyu ninga mphaso.”

Cinthu cinango comwe ndimbaciyebwa lini ni comwe cidacitika m’gole la 1962. M’gole limweri, inepano ndidacemeredwa kuti ndiyende ku Xikola ya Utumiki bwa Umambo ku South Lansing, mu mzinda wa Nova York. Xikolayi ikhali yakupfunzisa anyakunyang’anira magwere, madera na bzigawo, ndipo inepano ndingadakamala mwezi ubodzi ndiri kumweko. Pa nthawe imweyire, inepano ndikhaphata lini basa ndipo kobiri zathu zikhali zakucepa kwene-kwene. Tsono pakhana empreza inango ya mitedwe ku Pine Bluff yomwe ikhafuna wanthu ndipo emprezayo ikhadaceza nane kale bza basa. Ndingadabvumidwa kuphata basa konkule, inepano ndingadakhala msenzi wakuyamba kuphata basa ku emprezayo. Tenepo, emprezayo idandiuza kuti ndingadayamba kukaphata basalo. Tsono n’ciyani comwe ndingadacita? Inepano ndikhalibe kobiri zakukwanira kuti ndiyende ku Nova York. Koma pambuyo pa kuikumbukira bwino nkhaniyi ndidasankhula kuyenda ku xikolako, m’mbuto mwakubvuma basa lire. Pomwe ndikhakumbuka bzakunembera tsamba abale ku Beteli, cidacitika cinthu cinango comwe ndimbaciyebwa lini.

Nsiku inango ku macibese, kudabwera mpfumakazi inango ya m’gwere mwathu, yomwe mwamuna wace akhali lini Mboni ya Yahova. Iyo idagogodza msuwo wathu ndipo pomwe ndidafungula msuwoyo, idandipasa envelope yomwe ikhana kobiri. Iye pabodzi na wana wace, akhambayenda kukaphata basa ku munda wa thonje macibese yense. Iwo adacita bzimwebzi kuti agumane kobiri, zakuti inepano ndikwanise kuyenda ku Nova York. Iye adandiuza kuti: “Ndinkukupasani kobirizi kuti muyende ku xikola mukapfunze bzizinji, kuti mukadzabwerera mudzatipfunzisembo kuno.” Tenepo, ndidabvunza empreza ya mitedwe ire penu ndingadadzayamba kuphata basalo pambuyo pa midzinga mixanu, tsono emprezayo iribe kubvuma. Ndiribe kudandaula na bzimwebzo, thangwe inepano ndikhadacita kale cakusankhula cangu ndipo ndimbawona kuti ndidacita bwino kuleka kubvuma basalo.

Tsapano ndin’pasambo mpata Gloria kuti akuuzeni pang’ono bzinthu bzinango bzomwe bzidaticitikira ku Pine Bluff. “Kwa inepano, cinthu comwe cikhandidekera kwene-kwene ku Pine Bluff, ni basa lakupalizira. Ndikhana mapfunziro ya Bibliya yakukwana pafupi-fupi 15 ayai  20. Tenepo, macibese ifepano tikhambapalizira nyumba na nyumba, koma ku masikati tikhacitisa mapfunziro yathu ya Bibliya ndipo nthawe zinango tikhambafika mpaka pakati pa usiku. Bzimwebzi bzikhambandikondwesa kwene-kwene ndipo ndikhafuna lini kusiya basa la upainiya. Kulewa cadidi, inepano ndiribe kudekedwa pomwe tidauzidwa kuti tisiye kutumikira ninga apainiya kuti Sam akatumikire ninga nyakunyang’anira dera, tsono pakuti ndibzo bzomwe Yahova akhafuna, ifepano tidasiya upainiyabo, ticiyenda ku gawo.”

Pomwe tikhatumikira ninga apainiya ku Pine Bluff, ifepano tikhadadzaza formulariyo ya upainiya bwakupambulika ndipo tikhapenukira lini kuti tingadakhala apainiya wakupambulika. Thangwe ranyi tikhana citsimikizo cimweco? Thangwe ndakuti ifepano tikhadziwa kuti nyakunyang’anira cigawo cathu, akhafuna kuti tikathandizire gwere linango ku Texas, ndipo iye akhafunisisa kuti tikatumikire ninga apainiya kumweko. Tenepo, tidadikhirira kwa nthawe itali mtawiro wa formulariyoyo ndipo nthawe zense tikhambakasonzokera m’kaxa yathu ya matsamba kuti tiwone penu tatambira tsamba lipsa, koma tikhawona lini cinthu. Mu Janeiro 1965, tsamba lomwe tikhalidikhirira lire lidadzafika. Tsono, m’mbuto mwakuti tikatumikire ninga apainiya, inepano ndidauzidwa kuti ndikatumikire ninga nyakunyang’anira dera ndipo m’bale Leon Weaver, omwe tsapano ni nyakubveranisa komiti ya mthambi ya ku Estados Unidos, adauzidwambo bzibodzi-bodzibzi.

Pomwe ndidauzidwa kuti ndingadatumikira ninga nyakunyang’anira dera, inepano ndidacita thupo kwene-kwene. Tenepo, m’gole lakuyamba, ndidatambira thandizo kucokera kwa m’bale James A. Thompson, Jr, omwe pa nthaweyo akhali nyakunyang’anira cigawo. Iye adandithandiza kukonzesa mbali zinango, ndipo adandiuzambo bza maluso yomwe nyankunyang’anira dera an’funika kukhala nayo, kuti ambacite bwino basa lacero. Pomwe ndidayamba basali, ndidawona kufunika kwa malangoya. M’bale Thompson adakhala nyakunyang’anira cigawo wakuyamba omwe ndidatumikira naye pabodzi pomwe ndidayamba utumiki bwangu bwa nyakunyang’anira dera ndipo ndidapfunza bzizinji na iye.

Pa nthawe imweyire, nyakunyang’anira dera akhambapfunzisidwa momwe angacitire basa lace. Tenepo, pa mdzinga wakuyamba, nyakunyang’anira dera munango adakazungira gwere, ndipo inepano ndidayenda naye pabodzi, kuti ndikawone momwe iye akhacitira. Pa mdzinga wakutewera, ine ndidakazungirambo gwere linango, ndipo m’baleyo adayendambo nane kuti akawone momwe ndingadakacitira. M’baleyo adandipasa malango manango, patsogolo pace ndidayamba kucita bzense ndekha. Nsiku yomwe m’baleyu adatigoneka, inepano ndidabvunza mkazangu Gloria kuti: “Kodi m’baleyu ankuyendadi?” Koma na kupita kwa nthawe, ndidadzazindikira kuti nthawe zense an’dzagumanika abale omwe angatithandize, tsono bzina ifepano kubvuma thandizolo ayai ne. Tenepo, ndimbatenda kwene-kwene thandizo lense lomwe ndidatambira kucokera kwa abale azinji wakukhulupirika ninga m’bale James Brown, omwe pa nthaweyo akhali nyakunyang’anira dera pabodzi na m’bale Fred Rusk, omwe akhatumikira pa Beteli.

Pa nthaweyo, mzimu wa tsankhulo ukhali pense-pense. Nsiku inango pomwe tikhazungira gwere linango mu  mzinda wa Tennessee, thimu la Ku Klux Klan lidacita lonkho-lonkho. Ndipo ndimbakumbukirambo bzomwe bzidacitika nsiku inango pomwe tikhali mu utumiki bwakumunda, ifepano tidayenda ku mbuto inango yakudyera kuti tikapume pang’ono. Ndidayenda ku cimbudzi, ndipo mwamuna munango omwe akhambawenga asenzi adanditewera. Tsono kudabwera m’bale munango mzungu, omwe akhali mtali kwene-kwene kuposa mwamuna omwe akhadanditewerayo. Iye adapitambo m’cimbudzimo, acindibvunza kuti: “Tani m’bale Samuel, bzinkufamba?” Mwamuna omwe akhadanditewerayo adabula mwakamfulumize ndipo alibe kucita bzomwe akhafunabzo. Na kupita kwa nthawe, ndidadzawona kuti tsankhulo limbabwera lini thangwe ra kusiyana kwa mitundu, koma ni pikado yomwe imbacitisa. Ndipo ndidawonambo kuti m’bale ni m’bale, bziribe basa mtundu wace, ndipo bzicifunika, iye mpaka angafike pakukufera.

Ndidatumikira ninga nyakunyang’anira dera na mkazangu kwa magole 12 ndipo ninga nyakunyang’anira cigawo kwa magole 21. M’magole yamweya, tidakhala na moyo wabwino kwene-kwene na wakudzala na bzisimbo. Tsono, pakhana bzisimbo bzinango bzomwe bzikhatidikhirira. Mwa ciratizo, mu mwezi wa Agosto 1997, tidatambira mtawiro omwe tikhaudikhirira kwa magole mazinji ule. Ifepano tidacemeredwa kuti tikatumikire ku likulu la pa dziko lense, komwe tikhafunisisa kuyenda kule. Bzimwebzi bzidacitika magole 38 kucokera pomwe tidadzaza formulariyo yakuyamba ire. Tidayamba utumiki bwathu pa Beteli m’mwezi wa Setembro. Pakuyamba ndikhakumbuka kuti abalewo akhadandicemera kuti ndikatumikire kwa kanthawe kakucepa kokha, koma ndibzo lini bzomwe bzidacitika.

Pakuyamba, ndidatumikira mu Depatimenti ya Utumiki. Ndidapfunza bzinthu bzizinji kumweko. Mwa ciratizo, abale akhambatambira mibvunzo mizinji yakucokera kwa mabungwe ya akulu na kwa anyakunyang’anira dera wa dziko lense la Estados Unidos. Ndimbatenda kwene-kwene kuti abalewo adandithandiza na kupirira nane pakundipfunzisa. Ndingadapasidwa mwayi wakukatumikira pomwe mu Depatimenti imweyi, ndingadapfunza pomwe bzizinji na abalewo.

Inepano na mkazangu Gloria, timbafuna kwene-kwene kutumikira pa Beteli. Tidazolowera kumbamuka macibese ndipo bzimwebzi bzimbatithandiza kwene-kwene pa Beteli pano. Na kupita kwa nthawe, ndidayamba kutumikira ninga m’thandizi wa Komiti ya Utumiki ya Bungwe Lakutonga la Mboni za Yahova. Patsogolo pace, mu 1999, ndidasankhulidwa kuti ndikhale m’bodzi wa Bungwe Lakutonga. Ndidapfunzambo bzinthu bzizinji, koma cinthu cibodzi cakufunika kwene-kwene comwe ndidapfunza, n’cakuti msolo wa gwere Lacikristau ni Jezu Kristu, sikuti munthu.

Ndikakumbukira bza moyo wangu, nthawe zinango ndimbabzibva ninga mpolofeta Amosi. Amosi akhali m’busa wa mabira, ndipo nthawe zinango akhambasamalira nkhuyu, cakudya comwe cikhadyedwa kokha na wanthu wakusauka. Tsono Yahova adasankhula Amosiyo kuti akhale mpolofeta wace, acimusimba kwene-kwene pa basa limweri. (Amosi 7:14, 15) Ninga Amosi, Yahova adawonambo ine, mwana wa mulimi wakusauka wa mu kamzinda ka Liberty ku Indiana, acindisimba na bzisimbo bzizinji kwene-kwene. (Mimwani 10:22) Pakuyamba ndikhali wakusauka ndipo ndikhalibe bzizinji, koma tsapano, ndimbawona kuti ndina moyo wabwino kwene-kwene ndipo ndine wakudala kuposa pakuyambapo.