Mukafuna kudziwa munthu, comwe cingakuthandizeni ni kupfunza bzomwe munthuyo adacita na mabvuto yomwe iye adagumana nayo. Mpsibodzi-bodzimbo, mukafuna kudziwa Mulungu, imwepo mun’funika kupfunza bzomwe iye adacita. Mukacita bzimwebzo, mun’dzadabwa kwene-kwene thangwe ra kuwona kuti bzinthu bzizinji bzomwe iye adacita bzimbaticitisa kukhala wakukondwa kuyambira nthawe ino mpaka kutsogolo.

Yahova Mulungu ni Mulengi Mkulu, ndipo ‘makhalidwe [yace] yakusaya kuwoneka na maso, yankuwoneka bwino, thangwe iyo yambawonekera mu bzinthu bzomwe iye adakonza.’ (Waroma 1:20) Ndipo ‘iye ndiye Omwe adalenga dziko la pansi na mphanvu zace, omwe adakhazikisa pansi pano na nzeru zace. Ndiyembo omwe adatandika kudzulu na udziwi bwace.’ (Jeremiya 10:12) Cirengedwe ca Mulungu cimbalatizambo lufoyi lomwe iye analo kwa ifepano.

Kumbukirani momwe Yahova adatilengera mwakudabwisa ‘m’cifanikiso cace.’ (Ciyambo 1:27) Bzimwebzi bzinkuthandauza kuti iye ngwapadzulu kwene-kwene kuposa ifepano mu njira zakusiyana-siyana, iye wacitisa kuti ifepano tikhalembo na makhalidwe yace. Ndipo iye adatilenga na luso lakukwanisa kubvesesa na kuwona bzinthu ninga momwe iye ambabziwonera. Tenepo, tikacita nyongo yakumbawona bzinthu mwa njira imweyi, tin’dzakhala na moyo wakukondwa na wathandauzo. Kuthumizira bzimwebzi, iye ambatipasa mphanvu yakuti tilimbise uxamwali bwathu na iye.

Tikambanyang’anisa bzinthu bzomwe Mulungu adalenga pa dziko la pansi timbawona momwe iye ambatifunira. Pakulewa bza Mulungu mpostolo Paulo adalewa kuti: ‘Alibe kusiya kubzicitira umboni mwa kucita bzabwino, mwa [kutipasa] nvula kucokera kudzulu na nyengo yakubvuna bzinthu bzizinji, [adatipasa] cakudya cizinji ndipo adadzaza mu mtima [mwathu] na cikondweso.’ (Mabasa 14:17) Mulungu ambatipasa bzinthu bzizinji sikuti kokha bzinthu bzakufunikira kuti tikhale na moyo wakukondwa. Bzimwebzi bzimbalatiza bzomwe iye akhafuna kwa ifepano kuyambira paciyambi.

Yahova adalenga dziko la pansi kuti wanthu akhale m’mwemo kwa muyaya. Bibliya limbalewa kuti: ‘Dziko la pansi iye adalipereka kwa wana wa wanthu,’ ndipo ‘alibe kulirengera papezi, koma adalikonza kuti likhalidwe.’ (Psalymo 115:16; Zaiya 45:18) Kodi mbani angadakhala m’mwemo ndipo angadakhala kwa nthawe zingasi? Bibliya limbatawira mbvunzoyu  kuti: ‘Anyakulungama an’dzatambira dziko la pansi, acidzakhala m’mwemo mpaka kale-kale.’—Psalymo 37:29.

Yahova adalenga mwamuna na mkazi wakuyambirira, Adamu na Eva, aciwaikha m’paraizo ‘kuti ambalime m’mwemo na kulisamalira.’ (Ciyambo 2:8, 15) Mulungu adawapasa udindo buwiri bwakuti acite. Iye adati: ‘Balanani, muwande, mudzaze dziko la pansi, mucirinyang’anira.’ (Ciyambo 1:28) Tenepo, Adamu na Eva akhana cidikhiro cakukhala na moyo wakusaya kumala pano pa dziko la pansi. Koma bzakupasa nsisi mpsakuti, iwo adasankhula kuleka kubvera Mulungu ndipo na thangwe limweri adaluza mwayi wa kukhala pakati pa ‘anyakulungama’ omwe ‘an’dzatambira dziko la pansi.’ Tsono mu ndime zakutewerazi tiniwona kuti cakusankhula cawoci ciribe kucitisa kuti Yahova acinje cakulinga cace comwe anaco kwa ife na dziko la pansi. Cakuyamba, bwerani tiwone cinthu cinango comwe Mulungu adakonza.

Bibliya limbadziwika kuti ni Fala la Mulungu. Thangwe ranyi Yahova adacita makonzedwe yakuti tikhale na Bibliya? Thangwe lakuyamba ndakuti ifepano tipfunze bza iye. (Mimwani 2:1-5) Koma cadidi n’cakuti, Bibliya limbatawira lini mibvunzo yense yomwe tingakhale nayo yakulewa bza Mulungu ndipo palibe bukhu linango lomwe lingakwanise. (Mpalizi 3:11) Tenepo, ciri-cense comwe ciri m’Bibliya cimbatithandiza kuti timudziwe bwino Mulungu. Timbakwanisa kuwona momwe iye aliri na momwe ambacitira bzinthu na wanthu. Ndipo m’Bibliyamo timbapfunza bzomwe ambafuna na bzomwe ambafuna lini kuti wanthu acite. (Psalymo 15:1-5) Timbapfunzambo momwe iye ambawonera nkhani ya kunamata, bzinthu bzakuthupi na makhalidwe yabwino. Bibliya limbatilatiza momwe Yahova aliri mwa mafala na bzicito bza Mwana wace, Jezu Kristu.—Juwau 14:9.

Thangwe laciwiri lomwe lidacitisa Yahova kunemba Fala lace, Bibliya, ndakufuna kutithandiza kuti tikhale na moyo wakukondwa na wathandauzo. Kucokera m’Bibliya, Yahova ambatiuza momwe tingakhalire na banja lakukondwa, moyo wakukondwa na bzomwe tingacite kuti tilimbane na thupo. Ndipo ninga momwe revistayi yafotokozera m’mbuyomu, Bibliya lina mitawiro ya mibvunzo yakufunika pa moyo wathu, ninga mwa ciratizo: Thangwe ranyi timbabonera? Kodi tingadziwe tani tsogolo lathu? Limbafotokozambo bzomwe Mulungu akucita kuti akwanirise cakulinga cace cakuyambirira.

Pana njira zinango zomwe zimbalatiza kuti Bibliya ni bukhu lakupambulika kwene-kwene ndipo mwenekaciro ni Mulungu. Iro lidanembedwa kwa magole yakupitirira 1.600 na amuna 40, napo bziri tenepo Bibliyalo limbadziwika kuti nda Mulungu thangwe iye ni mwenekaciro. (2 Timotio 3:16) Mwakusiyana na mabukhu manango yakale-kale, Bibliya lidakoyedwa bwino kwa magole mazinji ninga momwe yambafotokozera mabukhu mazinji yakulewa bza Bibliya. Kuthumizira bzimwebzi, Bibliya lapulumusidwa pa mayezo mazinji yomwe yakhaletsa kuti lisanduliziridwe, ligawiridwe na kuwerengedwa. Nsiku zino iro ni bukhu lomwe likusanduliziridwa na kugawiridwa kwene-kwene kuposa mabukhu manango. Tenepo, kugumanika kwa Bibliya kunkulatiza kukwanirisidwa kwa mafala ya m’Bibliyalo yomwe yambati: ‘Fala la Mulungu wathu lin’dzakhala mpaka muyaya.’—Zaiya 40:8.

Cinthu cinango comwe Mulungu adacita ni makonzedwe yakutsimikiza kukwanirisa cakulinga comwe iye anaco na ifepano. Ninga momwe tafotokozera pakuyamba, Mulungu akhafuna kuti wanthu akhale na moyo wakusaya kumala pano pa dziko la pansi. Koma pomwe Adamu adasankhula kuleka kubvera Mulungu acimuphonyera, iye adaluza mwayi wakukhala na moyo wakusaya kumala ndipo adapha tsogolo la wana wace. Bibliya limbati: ‘Pikado idapita m’dziko thangwe ra munthu m’bodzi, idabwerambo infa thangwe ra pikado ndipo infayo idafikira wanthu wense thangwe rakuti wense ana pikado.’ (Waroma 5:12) Ndipo thangwe ra pikado ya Adamu ya kusaya kubvera Mulungu, bzikhawoneka ninga kuti cakulinga ca Mulungu catazika. Kodi n’ciyani comwe Yahova adacita?

Bzicito bza Yahova bzimbalatiza makhalidwe yace. Mwa cirungamo cace iye adapasa mulandu Adamu na  Eva thangwe ra bzicito bzawo bzakuphonyeka, koma mwalufoyi iye adacita makonzedwe yakulinganiza bza tsogolo la wana wawo. Na nzeru zace iye adatsimikizira momwe tingalimbanire tikagumana mabvuto ndipo mwakusaya kucedwa iye adatidziwisa momwe mabvutoyo yan’dzamalira. (Ciyambo 3:15) Ndipo pikado na infa in’dzamala kokha thangwe ra Mwana wa Mulungu, Jezu Kristu. Kodi bzimwebzi bzinkuphatanidza ciyani?

Kuti alombole wanthu ku bzakutewera bza kupanduka kwa Adamu, Yahova adatumiza Jezu pa dziko la pansi kuti adzapfunzise wanthu njira ya momwe angakhalire na moyo na ‘kupereka moyo wace ninga cakulombolera wanthu azinji.’ a (Mateu 20:28; Juwau 14:6) Jezu adakwanisa kupereka cakulombolera thangwe iye akhali munthu wakulungamiratu ninga Adamu. Koma mwakusiyana na Adamu, Jezu adapitiriza kukhala wakubvera mpaka infa. Pakuti Jezu akhathemera lini kufa, Yahova adamulamusa aciyenda kudzulu kukakhala pomwe na moyo. Jezu adakwanisa kucita bzomwe Adamu adatazira kucita, bzomwe ni kupereka cidikhiro ca moyo wakusaya kumala kwa wanthu wakubvera. Bibliya limbati: ‘Mwa kusaya kubvera kwa munthu m’bodzi, wanthu azinji adakhala wakuphonya; tenepombo, thangwe ra kubvera kwa Munthu m’bodzi, wanthu azinji an’dzakhala wakulungama.’ (Waroma 5:19) Na nsembe ya cakulombolera ya Jezu, Mulungu an’dzakwanirisa piciro lace lakuti wanthu adzakhale na moyo kwa muyaya pa dziko la pansi.

Tingapfunze bzizinji bza Yahova na momwe iye adalimbanira na mabvuto yomwe yadabwera thangwe ra kusaya kubvera kwa Adamu. Na bzimwebzi timbawona kuti palibe cinthu comwe cingatazise Yahova kumaliza cinthu comwe adaciyamba kale kucicita, ndipo mwakubverana na fala lace ‘bzin’dzacitikadi.’ (Zaiya 55:11) Timbawonambo lufoyi lomwe Yahova analo kwa ifepano. Bibliya limbati: ‘Lufoyi la Mulungu lidawonekera kuna ife mwa kutumiza Mwana wace wakuyamba kubadwa kubwera m’dziko, kuti tikhale na moyo mwa iye. Lufoyi limweri linkuthandauza kuti ife tiribe kumufuna Mulungu, koma iye ndiye adatifuna mwa kutitumizira mwana wace ninga msembe yakumpsinkhira pikado zathu.’—1 Juwau 4:9, 10.

Mulungu ‘alibe kutilambiza mwana wace caiye, koma adamupereka kwa tensenefe,’ tenepo tina citsimikizo cense cakuti Mulungu an’dzatipasa ‘bzinthu bzinango bzense’ [bzomwe iye adapicira] ‘mwa kudeka mtima kwace.’ (Waroma 8:32) Kodi n’ciyani comwe Mulungu adapicira kudzaticitira? Pitirizani kuwerenga.