Imwepo mukagumana na bvuto, mumbadikhira kuti xamwali wanu wa pa mtima akuthandizeni. Koma mwakusiyana na nfundo imweyi, wanthu winango ambalewa kuti Mulungu ni xamwali lini thangwe iwo ambakumbuka kuti Mulunguyo ambacita lini ciri-cense kuti awathandize pa mabvuto yawo. Kulewa cadidi, Mulungu alibe kundoticitira bzinthu bzizinji bzabwino, koma iye an’dzacita ciri-cense kuti amalise mabvuto yense yomwe tinkugumana nayo nsiku zino. Kodi Mulungu an’dzacita ciyani kutsogoloku?

Mulungu an’dzamalisa uipi bwense na bzomwe bzimbayambisa mabvuto. Bibliya limbalewa kuti: ‘Dziko lense liri m’manja mwa nyakuipayo.’ (1 Juwau 5:19) ‘Nyakuipa’ omwe ankulewedwa pa vesiri ni m’bodzi-bodzi na omwe Jezu adamulewa kuti ni ‘mtongi wa dziko la pansi,’ Sathani Dyabu. (Juwau 12:31) Bzomwe Sathani ambacita kuna wanthu pa dziko la pansi, bzimbacitisa kuti wanthuwo abonere. Tsono n’ciyani comwe Mulungu an’dzacita?

Tsapanopapa Yahova Mulungu an’phatisa basa Mwana wace, Jezu Kristu kuti ‘apfudze Dyabu, omwe ambabweresa infa.’ (Wahebereu 2:14; 1 Juwau 3:8) Bibliya limbalewa kuti Sathani caiyeyo ambadziwa kuti ‘ana kanthawe kakucepa’ kuti apfudzidwe. (Cibvumbulutso 12:12) Ndipo Mulungu an’dzamalisa uipi bwense na kupfudza wense omwe ambabuyambisa.—Psalymo 37:9; Mimwani 2:22.

Pambuyo pa kumalisa uipi bwense pa dziko la pansi, Mulengi wathu an’dzacita bzense bzakufunikira kuti akwanirise cakulinga cace ca kukhala na wanthu wakulungamiratu m’paraizo, pano pa dziko la pansi kwa muyaya. Kodi n’ciyani comwe tinkudikhirira kutsogoloku?

Mtentendere na cisungiko cakusaya kumala. ‘Anyakulungama an’dzatambira dziko la pansi, acidzapfatsa na mtendere muzinjisa.’—Psalymo 37:11.

Cakudya cizinji na cakupasa thanzi. ‘Pan’dzakhala bzakudya bzizinji pansi pano; pa ntsonga za mapiri bzin’dzakhala bziri mbwee.’—Psalymo 72:16.

Nyumba zabwino na basa lakutsangalaza. ‘Iwo an’dzamanga nyumba, acikhala m’mwemo; an’dzalima minda ya mipesa, acidzadya bzisapo bzace. . . . An’dzapfatsa na mabasa yakuphatidwa na manja yawo.’—Zaiya 65:21, 22.

Kodi imwepo mukufuna lini kudzawonambo bzinthu bzimwebzi bzikucitika? Dziwani kuti tsapanopapa bzimwebzi bzin’khala bza nsiku na nsiku.

Nsiku zino munthu ali-wense ambaduwala acifa, koma bzimwebzi bzin’dzacitika lini pomwe. Tsapanopapa Mulungu an’phatisa basa nsembe ya cakulombolera ya Jezu kuti ‘munthu ali-wense omwe alatize cikhulupiro kwa iye aleke kupfudzidwa, koma akhale na moyo wakusaya kumala.’ (Juwau 3:16) Kodi bzakutewera bzace bzin’dzakhala bziponi?

Matenda yan’dzamala. ‘Palibe munthu omwe an’dzakhala mdzikomo an’dzalewa kuti: “Ndikuduwala.” Wanthu wakukhala m’mwemo an’dzalekereredwa bzakuphonya bzawo.’—Zaiya 33:24.

Infa in’dzawoneka lini pomwe. ‘Iye an’dzapfudza infa kwa muyaya, ndipo Yahova Mbuya mkululetu an’dzapukuta misozi pa nkhope zense za wanthu.’—Zaiya 25:8.

Wanthu an’dzakhala na moyo wamuyaya. ‘Mphaso yomwe imbaperekedwa na Mulungu ndiyo moyo wamuyaya mwa Kristu Jezu, Mbuya wathu.’—Waroma 6:23.

Anyakufa an’dzakhala pomwe na moyo. ‘Kun’dzakhala kumuka kwa anyakulungama na wakusaya kulungama.’ (Mabasa 24:15) Tenepo anyakufa an’dzakhala pomwe na moyo thangwe ra mphaso ya Mulungu ya cakulombolera.

Kodi Mulungu an’dzakwanirisa tani bzinthu bzimwebzi?

Mulungu an’dzakwanirisa cakulinga comwe anaco na wanthu pabodzi na dziko la pansi mwakuphatisa basa boma la kudzulu, lomwe linkutongedwa na Jezu Kristu. (Psalymo 110:1, 2) Limweri ni boma, ayai umambo bomwe Jezu adauza ateweri wace kuti ambabupembere mwa kulewa kuti: ‘Baba wathu kudzuluko, . . . umambo bwanu bubwere.’—Mateu 6:9, 10.

Umambo bwa Mulungu bun’dzatonga dziko lense la pansi ndipo bun’dzamalisa mabvuto pabodzi na kubonera kwense. Umambo bumwebu ni boma labwino kwene-kwene lomwe wanthu wense an’funika kukhala nabo! Ndipopa Jezu adacita nyongo yakupalizira ‘bzipsa bzabwino bza Umambo’ pa utumiki bwace pa dziko la pansi, ndipo adauza anyakupfunza wace kuti acitembo bzibodzi-bodzibzo.—Mateu 4:23; 24:14.

Thangwe ra lufoyi likulu lomwe Yahova Mulungu analo kwa wanthufe, iye wapicira kuticitira bzinthu bzimwebzi. Tenepo, kodi imwepo mukuwona lini kuti mun’funika kumudziwa mucikhala naye pafupi? Mukacita bzimwebzi, mun’dzagumana bzisimbo bzizinji kwene-kwene. Msolo wakutewera un’fotokoza bzimwebzo.