Cadidi Cakulewa bza Mulungu na Kristu
Napo wanthu ambanamata mirungu izinji, koma pana Mulungu m’bodzi yekha wacadidi. (Juwau 17:3) Iye ni ‘Mkululetu,’ Mulengi wa bzinthu bzentse ndipo ni Mwenekaciro wa camoyo ciri-centse. Ndiye yekha omwe an’themera kunamatidwa.—Danyeri 7:18; Cibvumbulutso 4:11.
Kodi Mulungu ni Mbani?
God’s name appears in the original text SOME 7,000 TIMES
JEHOVAH is God’s name
LORD, GOD, FATHER—Some of Jehovah’s titles
Kodi Mulungu Dzina Lace ni Mbani? Mulungu caiyeyo akutiuza kuti: ‘Ine ndine Yahova. Limweri ndiro dzina langu.’ (Zaiya 42:8) Dzina la Mulungu likugumanika m’Bibliya kwa maulendo yakupitirira 7.000. Tsono anyakusandulizira azinji wa Bibliya adacinja dzinali ndipo m’mbuto mwace adaikha dzina la umbiri lakuti ‘Mbuya.’ Mulungu an’funa kuti imwepo mukhale xamwali wace, ndipopa iye akukuuzani kuti ‘mumbamucemere na dzina lace.’—Psalymo 105:1.
Yahova ana Madzina Mazinji ya Umbiri. Bibliya limbalatiza kuti Yahova ana madzina mazinji ya umbiri, ninga ‘Mulungu,’ ‘Wamphanvu-zentse,’ ‘Mulengi,’ ‘Baba,’ ‘Mbuya’ na ‘Mtongi.’ Mipembo mizinji yomwe iri m’Bibliya, wanthu akhapemba kwa Mulungu mwakuphatisa basa dzina la umbiri napo dzina lace cairo lakuti Yahova.—Danyeri 9:4.
Kodi Mulungu adakhala tani? Mulungu ni mzimu ndipo ambawoneka lini. (Juwau 4:24) Bibliya limbalewa kuti ‘palibe munthu omwe adawona kale Mulungu.’ (Juwau 1:18) Bibliya limbalewambo kuti iye ana makumbukidwe. Ndipopa wanthu angamusunamise ayai ‘kukondwesa mtima wace.’—Mimwani 11:20; Psalymo 78:40, 41.
Makhalidwe Yabwino ya Mulungu. Mulungu alibe tsankhulo, ndipo iye ambabvuma wanthu wa mtundu wentse na bzikhalidwe bzentse. (Mabasa 10:34, 35) Iye ni ‘Mulungu wantsisi ndipo ambafulumiza lini kukalipa; iye ngwakudzala na lufoyi lakukhulupirika pabodzi na cadidi.’ (Kufuluka 34:6, 7) Koma pa makhalidwe yentse ya Mulungu, pana manai yomwe yambadziwika.
Mphanvu. Pakuti Yahova ni ‘Mulungu Wamphanvu zentse,’ iye ana mphanvu zakucitira ciri-centse comwe angalewe.—Ciyambo 17:1.
Nzeru. Mulungu ana nzeru kwene-kwene kuposa munthu ali-wentse. Ndipopa Bibliya limbalewa kuti iye ‘ndiye yekha wanzeru.’—Waroma 16:27.
Cirungamo. Mulungu nthawe zentse ambacita bzinthu bzabwino. Bzomwe iye ambacita mpsakulungama ndipo ‘ngwakulungama.’—Bzakutonga 32:4.
Lufoyi. Bibliya limbalewa kuti ‘Mulungu ni lufoyi.’ (1 Juwau 4:8) Bzimwebzi bzikuthandauza lini kuti Mulungu ambandolatiza lufoyi, koma iye ndiye lufoyi. Tenepo, iye ambacita bzentse bzomwe ambafuna thangwe ra lufoyi lace likululi, ndipo bzimwebzi bzimbatipasa phindu mu njira zakusiyana-siyana.
Uxamwali bomwe Mulungu anabo na Wanthu. Mulungu ni Baba wathu wakudzulu. (Mateu 6:9) Ifepano tikamukhulupira, tin’dzakhala naye pa uxamwali. (Psalymo 25:14) Kulewa cadidi, Mulungu akukucemerani kuti mumufenderere mwakuphatisa basa mpembo, na kumutulira ‘thupo lanu lentse, thangwe iye ambakusamalirani.’—1 Pedru 5:7; Tiyago 4:8.
Kodi ni Kusiyana Kuponi Komwe Kulipo Pakati pa Mulunguna Kristu?
Jezu ni Mulungu Lini. Jezu ngakupambulika kwene-kwene thangwe ndiye yekha omwe adalengedweratu na Mulungu. Ndipopa Bibliya limbamucera kuti Mwana wa Mulungu. (Juwau 1:14) Pambuyo pakulenga Jezu, omwe ni mwana wace wakuyamba kubadwa, Yahova adaphatisa basa mwanayo ninga ‘misiri’ kuti alenge wanthu winango na bzinthu bzentse.—Mimwani 8:30, 31; Wakoloso 1:15, 16.
Jezu Kristu Alibe Kulewa Kuti ni Mulungu. Koma adalewa kuti: ‘Ndine nyakumuyimira [Mulungu], ndipo ndiye omwe adandituma.’ (Juwau 7:29) Ntsiku inango pomwe akhalewalewa na anyakupfunza wace, Jezu adacemera Yahova kuti ‘Baba wangu omwe ni Baba wanumbo’ na ‘Mulungu wangu omwe ni Mulungu wanumbo.’ (Juwau 20:17) Pomwe Jezu adafa, Yahova adamulamusa kuti akakhale na moyo kudzulu ndipo adamupasa mphamvu yakutonga, ndipo adamuuza kuti akhale ku boko lace lamadidi.—Mateu 28:18; Mabasa 2:32, 33.
Jezu Kristu Angakuthandizeni Kuti Mukhale pa Uxamwali na Mulungu
Jezu adabwera pa dziko la pantsi kuti adzatipfunzise bza Baba wace. Yahova caiyeyo adalewa bza Jezu kuti: ‘Uyu ni Mwana wangu, wakufunidwa. Mbamubverani.’ (Marko 9:7) Jezu ambamudziwa bwino Mulungu kuposa munthu ali-wentse. Iye adalewa kuti: ‘Palibe munthu omwe ambamudziwa bwino Baba, kupambula Mwana na omwe Mwanayo angafune kumuuza bza Babayo.’—Luka 10:22.
Jezu adatewezera ndendende makhalidwe ya Mulungu. Jezu adatewezera bwino-bwino makhalidwe ya Baba wace, ndipopa iye adalewa kuti: ‘Ule omwe an’ndiwona ine ambakhala akuwonambo Baba.’ (Juwau 14:9) Thangwe ra kutewezera lufoyi la Baba wace, m’mafala na bzicito, Jezu adacitisa wanthu kufunisisa kufenderera Mulungu. Iye adati: ‘Inepano ndine njira, cadidi na moyo. Palibe omwe angafike kuna Baba, acisaya kupita na mwa inepano.’ (Juwau 14:6) Ndipo iye adalewa pomwe kuti: ‘Anamati wacadidi an’dzanamata Baba mu mzimu na cadidi, pakuti Babayo akunyang’ana wanthu ninga amwewo kuti am’namate.’ (Juwau 4:23) Kodi imwepo mudakumbukambo kale bzimwebzi? Yahova akunyang’ana wanthu ninga imwepo, omwe mukufuna kupfunza cadidi cace.
Imwepo Mungakomedwembo na
NTSANZA YA MULINDIRI
Kodi Mulungu ni Mbani?
Kudziwa Mulungu ni cinthu cakuyamba comwe cingatithandize kukhala naye pa uxamwali. Kodi mungacite tani bzimwebzo?
MITAWIRO YA MIBVUNZO YAKULEWA BZA BIBLIYA
Kodi Yahova ni Mbani?
Kodi iye ni Mulungu wa thimu la wanthu ninga momwe bzikhaliri na Ajirayeri?
