• Wakusankhulidwa na Mulungu. ‘Inepano ndakhazikisa mambo wangu . . . Ninkupasa mitundu ya wanthu kuti ikhale utaka bwako, ndipo ninkupasambo dziko lentse kuti likhale lako.’—Psalymo 2:6, 8.

• Omwe adapita nkhankha ya Mambo Davide. ‘Mwana wabadwa, ife tapasidwa mwana wacimuna . . . Thangwe ra kukula kwa utongi bwace na kuwanda kwa mtendere, mpando wa umambo bwa Davide bun’dzamala lini, ndipo umambo bwace bun’dzakhazikika.’—Zaiya 9:6, 7.

• Adabadwira ku Beremu. ‘Iwe Beremu . . . , kwa iwepo ndiko kun’dzacokera ule omwe an’dzakhala mtongi . . . Iye an’dzakhala mkulu mpaka kumalekezero kwa dziko la pantsi.’—Mikeya 5:2, 4.

• Adanyozedwa ndipo adaphedwa. ‘Iye adanyozedwa ndipo tikhalibe naye basa. . . . Iye akhaphaidwa thangwe ra bzakuphonya bzathu [ndipo] akhapswanyidwa thangwe ra pikado zathu.’—Zaiya 53:3, 5.

• Adalamusidwa kwa anyakufa ndipo adatumbizidwa. ‘Mun’dzasiya lini moyo wangu m’thenje. Mun’dzalekerera lini kuti nyakukhulupirika wanu awone dindi. . . . Ku boko lanu ladidi kuna cikondweso mpaka muyaya.’—Psalymo 16:10, 11.

Kuyambira kale-kale ni munthu m’bodzi yekha omwe adathemera kukhala Mtongi wa wanthu, ndipo munthuyo ni Jezu Kristu. Kuthimizira bzimwebzi, anjo m’bodzi akhadauza kale Mariya kuti: ‘Mulungu an’dzam’pasa mpando wa umambo wa Davide, babace, . . . ndipo Umambo bwace bun’dzamala lini.’—Luka 1:31-33.

Jezu alibe kukhala mtongi pano pa dziko la pantsi. M’mbuto mwace, iye an’dzatonga wanthu ninga Mtongi mu Umambo bwa Mulungu kucokera kudzulu. Thangwe ranyi Jezu an’dzakhala Mtongi wabwino? Onani bzomwe iye adacita pomwe akhali pano pa dziko la pantsi.

•   Jezu akhacita thupo na wanthu. Jezu akhathandiza wanthu wentse. Iye akhathandiza amuna, akazi, wana, mkhalamba, anyakudala na anyakusauka kubodzi. (Mateu 9:36; Marko 10:16) Pa nthawe inango, nyamapere adakumbira Jezu kuti: ‘Penu mungafune, mungandipoze.’ Jezu adamubvera ntsisi kwene-kwene ndipo adamupoza.—Marko 1:40-42.

• Jezu adatipfunzisa bzomwe tingacite kuti tikondwese Mulungu. ‘Imwepo mungakwanise lini kuphatira basa Mulungu na kuphatira basa Cuma.’ Iye adalewa pomwe kuti tin’funika kumbacitira wanthu winango bzinthu bzomwe tingadafuna kuti iwombo aticitire. Kuthimizira bzimwebzi, Jezu adalatiza kuti Mulungu ambawona lini kokha bzomwe timbacita, koma iye ambawonambo bzomwe timbakumbuka na momwe timbabvera. Tenepo kuti tikondwese Mulungu, tin’funika kumbatcenkha kukumbuka bzinthu bzakuipa. (Mateu 5:28; 6:24; 7:12) Ndipo Jezu adalewa bzomwe tingacite kuti tikhale wakukondwa. Iye adalewa kuti tin’funika kudziwa bzomwe Mulungu ambafuna kuti ticite, na kumbamubvera.—Luka 11:28.

• Jezu adapfunzisa bzomwe lufoyi limbathandauza. Mafala ya Jezu pabodzi na bzomwe iye akhacita, bzidatokonya kwene-kwene mitima ya wanthu omwe akhawapfunzisa. Bibliya limbati: ‘Mathimu ya wanthuyo yadatokonyedwa yacidabwa kwene-kwene na kapfunzisidwe kace, thangwe iye akhawapfunzisa ninga munthu wa utongi.’ (Mateu 7:28, 29) Iye adati: ‘Pitirizani kufuna anyamadulanthaka wanu.’ Mpaka iye adapembera winango mwa omwe adamupha. Iye adati: ‘Baba, alekerereni thangwe akudziwa lini bzomwe akucita.’—Mateu 5:44; Luka 23:34.

Jezu adathemera kukhala Mtongi wa wanthu thangwe iye ngwantsisi ndipo ambacita thupo na wanthu. Tsono ni lini pomwe iye an’dzayamba kutonga?