Mu nkhani yamalayi, tawona bza cizindikiro comwe Jezu adalewa. Cizindikiroco ni umboni bwakulatiza kuti Umambo bwa Mulungu budakhazikisidwa kale kudzulu ndipo mtongi wace ni Jezu Kristu.

Bibliya limbafotokoza kuti pomwe Jezu adakhala Mtongi kudzulu, iye adathamangisa Sathani pabodzi na madimonyo yace. Tsapano iwo ali pa dziko la pantsi, ndipo limweri ni thangwe linango lomwe lacitisa kuti pantsi pano bzinthu bziipiretu kuyambira mu gole la 1914.—Cibvumbulutso 12:7, 9.

Napo bzinthu bzafika pakuipiratu pa dziko la pantsi, Umambo bomwe bukutsogoleredwa na Jezu bukuthandiza wanthu azinji pa dziko lentse la pantsi. Tenepo, ninga momwe Jezu akhadalewera, wanthu azinji akupfunza ndipo akuphatisa basa mitemo ya m’Bibliya pa moyo wawo. Bzimwebzi bzikukwanisika thangwe ra makonzedwe ya pfunziro la Bibliya yomwe Mboni za Yahova zimbacitisa. (Zaiya 2:2-4) Wanthu azinji apfunza momwe angakhalire na banja lakukondwa ndipo apfunzambo kuwona basa na kobiri mu njira yakuthemera. Wanthu amwewa akupfunza momwe angakhalire na moyo wakukondwa tsapano, ndipo akupfunzambo kukhala wanthu omwe Mulungu akufuna kuti adzakhale na moyo kutsogolo mu Umambo bwace.

Jezu akutonga kale kudzulu. Tsono maboma ya wanthu yakadatonga pa dziko la pantsi. Ndipopa Mulungu adauza Jezu kuti: ‘Ndoko ukakunde anyamadulanthaka wako.’ (Psalymo 110:2) Tenepo, mwakusaya kucedwa, Jezu an’dzapha anyamadulanthaka wace wentse, ndipo an’dzatsangalaza wale omwe ambabvera Mulungu.

Ikadzafika nthawe imweyi, Umambo bwa Mulungu bun’dzapfudza:

• Bzipembedzo bzakunama. Bzipembedzo bzomwe bzimbapfunzisa bzinthu bzakunama pakulewa bza Mulungu, na kubweresa mabvuto pa moyo wa wanthu, bzin’dzafudzidwa. Bibliya limbandendemezera bzipembedzo bzakunama na hule. Wanthu azinji an’dzatokonyedwa na kupfunzidwa kwa bzipembedzobzo.—Cibvumbulutso 17:15, 16.

• Maboma ya wathu. Umambo bwa Mulungu bun’dzaphwanya, bucimalisa umambo bwentse bwa wanthu.—Cibvumbulutso 19:15, 17, 18.

• Wanthu wakuipa. Kodi n’ciyani comwe cin’dzacitikira wanthu wakuipa omwe ambafuna lini kubvera Mulungu? Bibliya limbati: ‘Anyakuipa an’dzapfudzidwa pa dziko la pantsi.’—Mimwani 2:22.

• Sathani na madimonyo yace. Sathani na madimonyo yace an’dzapumpswa lini ‘pomwe mitundu ya wanthu.’—Cibvumbulutso 20:3, 10.

Kodi ni bzinthu bziponi bzabwino bzomwe bzin’dzacitikira wale omwe ambabvera malango ya Umambo bwa Mulungu?

Bzomwe Jezu an’dzacita ninga Mtongi, bzingandendemerane lini na bzomwe atongi wa dzikoli ambacita. Jezu an’dzathandizidwa na wanthu 144.000, omwe adasankhulidwa pantsi pano kuti akatonge naye pabodzi kudzulu. (Cibvumbulutso 5:9, 10; 14:1, 3) Jezu an’dzawonesesa kuti kufuna kwa Mulungu kucitike pa dziko la pantsi. Tenepo Umambo bwa Mulungu:

• Bun’dzamalisa matenda na infa. Bibliya limbati: ‘Palibe munthu omwe an’dzakhala mdzikomo an’dzalewa kuti: “Ndikuduwala,”’ ndipo ‘infa in’dzawoneka lini pomwe.’—Zaiya 33:24; Cibvumbulutso 21:4.

• Bun’dzabweresa mtendere caiwo. Bibliya limbati: ‘Mtendere wa wanawo un’dzakhala uzinji,’ ndipo ‘ali-wentse an’dzakhala pantsi pa muti wace wa mpesa na wa nkhuyu ndipo pan’dzawoneka lini munthu wakuwagopsa.’—Zaiya 54:13; Mikeya 4:4.

• Bun’dzacitisa kuti wanthu akomedwe na mabasa yawo. Bibliya limbati: Iwo ‘an’dzapfatsa na mabasa yakuphatidwa na manja yawo. Ndipo an’dzaphatira lini basa pa pezi.’—Zaiya 65:22, 23.

• Bun’dzamalisa mabvuto ya dzikoli. Bibliya limbati: ‘Dambo na pantsi pakuuma bzin’dzakondwa, dambo lin’dzasekerera ndipo lin’dzamera maluwa yakudeka.’—Zaiya 35:1.

• Bun’dzapfunzisa wanthu bzomwe angafunikire kucita kuti adzakhale na moyo wakusaya kumala. Bibliya limbati: ‘Pakuti moyo wakusaya kumala an’dzaugumana akafika pakukudziwani bwino imwepo Mulungu yekha wacadidi na ule omwe mudamutuma Jezu Kristu.’—Juwau 17:3.

Mulungu akufunisisa kuti imwepo mudzakhale na bzisimbo bzimwebzi. (Zaiya 48:18) Nkhani yakutewera, in’fotokoza bzomwe mungacite kuti mudzakhale na tsogolo labwinoli.