Mwa njira ibodzi-bodziyi, ifepano tasala pang’ono kuti tigumane na “cimphepo” comwe Jezu adacicemera na dzina lakuti ‘citsautso cikulu.’ (Mateu 24:21) N’cadidi kuti ifepano tin’dzakwanisa lini kuthawa citsautsoco. Koma pana bzomwe tingacite kuti tin’dzapulumuke pa nthawe imweyo. Kodi mpsiponi bzomwe tingacite?

Mu Nkhani yace ya pa Phiri, Jezu Kristu adati: ‘Pitirizani kuikha pakutoma, Umambo bwa Mulungu, na cirungamo cace.’ (Mateu 6:33) Kodi tingacite tani bzimwebzi?

Ikhani pa mbuto yakutoma Umambo bwa Mulungu. Bzimwebzi bzikuthandauza kuti tin’funika kumbawona Umambo bwa Mulungu kukhala bwakufunika kwene-kwene pa moyo wathu kuposa cinthu ciri-centse. (Mateu 6:25, 32, 33) N’thangwe ranyi? Thangwe ndakuti palibe munthu omwe angakwanise kumalisa mabvuto yomwe wanthufe timbagumana nayo. Tenepo, ni Umambo bwa Mulungu bokha bomwe bun’dzamalisa mabvutoya.

Lingani cirungamo ca Mulungu. Tin’funika kucita ciri-centse comwe tingakwanise kuti tikhale na moyo wakubverana na mitemo ya Mulungu. N’thangwe ranyi? Thangwe ndakuti tikambacita kubzisankhulira tekha bzomwe mpsabwino na bzomwe mpsakuipa, bzakutewera bzace bzimbakhala bzakuipa bzokha-bzokha. (Mimwani 16:25) Koma tikambabvera bzomwe Mulungu ambalewa, timbamukondwesa ndipo timbakhalambo na moyo wabwino.—Zaiya 48:17, 18.

Pitirizani kuikha pakutoma Umambo bwa Mulungu na cirungamo cace. Jezu adalewa kuti wanthu winango angadadzakhala wakufunisisa kwene-kwene kobiri acimbakumbuka kuti kobirizo zingawapase  tsogolo labwino. Ndipo adalewambo kuti winango angadadzakhala na thupo na moyo wawo mpaka kusaya nthawe yakulinga Umambo bwa Mulungu.—Mateu 6:19-21, 25-32.

Tsono, Jezu adalewambo kuti wanthu omwe ambathandizira Umambo bwa Mulungu, an’dzakhala na moyo wabwino ndipo kutsogolo iwo an’dzatambira bzisimbo bzizinji.—Mateu 6:33.

Anyakupfunza wakuyambirira wa Jezu adaikha pakutoma Umambo bwa Mulungu pabodzi na cirungamo cace. Tsono pa nthaweyo iwo alibe kuwona kumala kwa mabvuto pa moyo wawo. Koma iwo adakhala mwakukhotcerereka. Mwa njira iponi?

Iwo adakhala na moyo wakubverana na mitemo ya Mulungu. Tenepo, iwo adakwanisa kutcenkha mabvuto yomwe wanthu wakusaya kubvera Mulungu ambagumana nayo. Anyakupfunzawo akhakhulupira kwene-kwene kuti Umambo bwa Mulungu bun’dzabwera, ndipo bzimwebzi bzidawathandiza kulimbana na mabvuto yakuti bwerani mudzawone. Tenepo Mulungu adawapasambo ‘mphanvu yakuposa yacibadwa’ kuti akwanise kupirira mayezo yomwe akhagumana nayo.—2 Wakolinto 4:7-9.

Akristau wakuyambirira adabvera lamulo la Jezu lakuti ikhani pakutoma Umambo bwa Mulungu. Ndipo iwo adapalizira bzipsa bzabwino bza Umambo bwa Mulungu kuli-kwentse komwe akhagumana wanthu. (Wakoloso 1:23) Kodi ntsiku zino alipo omwe akucitambo bzibodzi-bodzibzi?

Inde alipo! Mboni za Yahova zimbadziwa kuti yandosala nthawe ing’ono-ng’ono kuti Umambo bwa Mulungu bupfudze dziko lakuipali. Ndipopa iwo ambacita ciri-centse kuti akwanirise mafala ya Jezu, yakuti: ‘Bzipsa bzabwino bza Umambo, bzin’dzapaliziridwa pa dziko lentse komwe kuna wanthu, ninga umboni kwa mitundu yentse, ndipo pamwepo cimaliziro cin’dzafika.’—Mateu 24:14.

Kodi mun’cita ciyani pomwe mwamala kubva bzipsa bzabwinobzi? Ifepano tikukulimbikisani kuti mutewezere wanthu wakale-kale omwe akhakhala mu mzinda wa Bereya, ku Masedoniya. Pomwe mpostolo Paulo adawauza mafala yakulewa bza Umambo bwa Mulungu, iwo adayatambira na ‘manja mawiri.’ Ndipo iwo ‘akhambapfunza Bzinembo mwakusamala’ kuti atsimikizire penu bzomwe akhapfunzabzo bzikhali bzacididi, ndipo patsogolo pace adayamba kuphatisira basa pa moyo wawo bzomwe akhapfunzabzo.—Mabasa 17:11, 12.

Imwepo mungacitembo bzibodzi-bodzi. Ndipo mukaikha pakutoma Umambo bwa Mulungu na cirungamo cace, imwepo mun’dzagumana mbuto yakukhotcerereka ntsiku zino, ndipo kutsogolo mun’dzakhala na mtendere caiwo pabodzi na moyo wabwino.