Khulupirani Mtsogoleri Wathu—Kristu
‘Mtsogoleri wanu ni m’bodzi yekha basi, Kristu.’—MATEU 23:10.
1, 2. Kodi ni udindo buponi bomwe Djosuwe adatambira pomwe Mozeji adafa?
POMWE Mozeji adafa, Yahova adauza Djosuwe kuti: ‘Mozeji mtumiki wangu wafa. Tsapano konzeka kuti uyambuke Joridano, pabodzi na wanthu wensewa, ndipo uyende ku dziko lomwe ndin’dzalipereka kwa Ajirayeri.’ (Djosuwe 1:1, 2) Udindo bumwebu budacinja kwene-kwene moyo wa Djosuwe, omwe adakhala mthandizi wa Mozeji kwa magole pafupi-fupi 40!
2 Mozeji adatsogolera Ajirayeri kwa magole mazinji, koma tsapano Djosuwe ndiye omwe angadawatsogolera. Tenepo, pinango Djosuwe akhana thupo lakuti wanthuwo angadamubvuma lini ninga mtsogoleri wawo. (Bzakutonga 34:8, 10-12) Ndipo pakufotokoza bza Cinembo ca Djosuwe 1:1, 2, bukhu linango lakulewa bza Bibliya limbafotokoza kuti kuyambira kale-kale mpaka nsiku zino, nthawe yomwe imbakhala yakunesa kwene-kwene kwa wanthu, ni pomwe mtsogoleri mupsa ambapita m’mbuto mwa munango.
3, 4. Kodi Yahova adasimba tani Djosuwe, ndipo ni mbvunzo uponi omwe tingabzibvunze?
3 Djosuwe akhana thangwe lakubveka lakucitira thupo. Koma iye adakhulupira Yahova na kuteweza malango yace mwakamfulumize. (Djosuwe 1:9-11) Tenepo, Mulungu adasimba Djosuweyo thangwe ra kukhulupirika kwace ndipo adaphatisa basa anjo kuti atsogolere iye pabodzi na Ajirayeri. Ndipo bzinkuwoneka kuti anjoyo akhali Mwana wa wakuyamba kubadwa wa Mulungu, omwe m’Bibliya ambacemeredwa Fala.—Kufuluka 23:20-23; Juwau 1:1.
4 Yahova adathandiza mtundu wa Jirayeri kuti ubvume Djosuwe ninga mtsogoleri wawo mupsa. Mu nsiku zathu zinombo, pana bzinthu bzizinji bzomwe bzinkucinja m’gulu la Yahova. Tenepo, pinango tingabzibvunze kuti, ‘Pakuti gulu la Mulungu linkuyenda patsogolo, kodi tina mathangwe yakukhulupira Mtsogoleri wathu wakusankhulidwa, Jezu?’ (Werengani Mateu 23:10. *) Kuti titawire mbvunzoyi, bwerani tiwone momwe Yahova adatsogolerera atumiki wace m’mbuyomu.
OMWE ADATSOGOLERA WANTHU WA MULUNGU KUKAPITA M’DZIKO LAKUPICIRIDWA
5. Kodi n’cakudabwisa ciponi comwe Djosuwe adawona pomwe akhadasala pang’ono kufika mu mzinda wa Jeriko? (Onani cithunzi-thunzi pa tsamba 16.)
5 Pomwe Ajirayeri adayambuka mkulo wa Joridano, Djosuwe adawona cinthu cinango cacirendo. Pomwe akhadasala pang’ono kufika mu mzinda wa Jeriko, iye adawona munthu omwe akhana mphanga m’manja mwace. Tenepo Djosuwe adabvunza munthuyo kuti: ‘Kodi iwepo uli ku mbali yathu ayai uli ku mbali ya anyamadulanthaka wathu?’ Tsono, Djosuwe adadabwa kwene-kwene pomwe munthuyo adamuuza kuti iye akhali ‘nduna ya gulu la anyankhondo wa Yahova,’ ayai anjo omwe akhadabwera kuti adzakhotcerere wanthu wa Mulungu. (Werengani Djosuwe 5:13-15. *) Napo kuti nkhani zinango zimbalewa kuti Yahova ndiye omwe akhalewalewa na Djosuwe, bzinkuwoneka kuti Mulungu akhaphatisa basa anjo umweyu kuti alewelewe m’mbuto mwace ninga momwe iye akhacitira maulendo manango.—Kufuluka 3:2-4; Djosuwe 4:1, 15; 5:2, 9; Mabasa 7:38; Wagalata 3:19.
6-8. (a) N’thangwe ranyi malango yomwe anjo adapereka kwa Djosuwe yakhawoneka ninga yakusaya basa? (b) Kodi ifepano timbadziwa tani kuti malango yale yakhali ya nzeru nakuti yadaperekedwa pa nthawe yace? (Onani mafala ya m’nyansi.)
6 Anjo ule adauza Djosuwe bzense bzomwe akhafunikira kucita kuti akwanise kukunda mzinda wa Jeriko. Pakuyamba, malango manango yangawoneke ninga yakusaya basa. Mwa ciratizo, anjoyo adauza Djosuwe kuti acikunda wense akhafunika kucita mgwatidwe. Bzimwebzi bzikhathandauza kuti acikundawo angadakwanisa lini kumenya nkhondo kwa nsiku zakucepa. Tsono kodi imweyi ikhali nthawe yabwino yakuti acikundawo acite mgwatidwe?—Ciyambo 34:24, 25; Djosuwe 5:2, 8.
7 Pinango acikundawo adabzibvunza kuti, ‘Kodi anyamadulanthaka akabwera kudzamenyana nafe, tin’dzacita tani kuti tikhotcerere mabanja yathu?’ Koma padacitika cinthu comwe iwo akhacidikhirira lini! M’mbuto mwa kubwera kudzamenyana na Ajirayeri, amuna wa mu mzinda wa Jeriko adacita mantha na Ajirayeriwo. Ndipo Bibliya limbalewa kuti: ‘Mzinda wa Jeriko ukhadafungidwa mwamphanvu thangwe ra Ajirayeri. Ndipo palibe omwe akhabula ne kupita mu mzindamo.’ (Djosuwe 6:1) Mafala yamweya yadacitisa Ajirayeri kukhulupira kwene-kwene citsogozo ca Mulungu!
8 Anjo ule adauza Djosuwe kuti Ajirayeri akhafunika lini kumenyana na Jeriko. M’mbuto mwace, iwo akhafunika kuzungulira mzindayo kabodzi pa nsiku mpaka nsiku zitanthatu ndipo pa nsiku yacinomwe iwo akhafunika kuzungulira kanomwe. Pinango acikundawo adakumbuka kuti, ‘Bzimwebzi bzin’ticitisa kumala mphanvu na nthawe yathu papezi!’ Koma Yahova Mtsogoleri wa Ajirayeri akhadziwa bzomwe iye akhacita. Kuteweza malangoyo kudacitisa kuti cikhulupiro ca Ajirayeri cikhale cakulimba, ndipo iwo alibe kumenyana na acikunda wa Jeriko.—Djosuwe 6:2-5; Wahebereu 11:30. (Onani mafala ya m’nyansi. *)
9. N’thangwe ranyi tin’funika kumbateweza malango yense yomwe timbatambira m’gulu la Mulungu? Fotokozani ciratizo.
9 Kodi tinkupfunza ciyani na cakucitikaci? Tikupfunza kuti nthawe zinango, gulu la Yahova limbacita bzinthu mu njira inango yatsapano, ndipo pinango tingabvesese lini thangwe race. Mwa ciratizo, tikhakwanisa lini kuwona kuti kungakhale kwakuthandiza kuphatisa basa mtedwe wa m’manja ayai mtcini winango wa nzeru, pa pfunziro la patekha, mu utumiki bwakumunda na pa mitsonkhano yathu. Koma tsapano timbakwanisa kuwona phindu lakuphatisira basa bzinthu bzimwebzi. Ndipo tikambawona bzakutewera bzabwino thangwe ra kucinjaku, cikhulupiro cathu cimbalimba ndipo timbakhala wakuphatana kwene-kwene na abale wathu.
KODI KRISTU ADATSOGOLERA TANI AKRISTAU WAKUYAMBIRIRA?
10. Kodi mbani omwe adatsogolera mtsonkhano ukulu omwe udacitidwa na bungwe lakutonga ku Jeruzalemu wakulewa bza mgwatidwe?
10 Akristau winango wa Cijuda akhalewa kuti mgwatidwe ukhali wakufunika, napo kuti pakhadapita magole 13 kucokera pomwe Mjuda wakusaya kugwatidwa wakucemeredwa Korneliyo adakhala Mkristau. (Mabasa 15:1, 2) Ndipo mu mzinda wa Antiyokiya, abale akhanesana kwene-kwene thangwe ra nkhani imweyi. Tenepo, akulu-akulu adacita makonzedwe yakuti Paulo ayende ku Jeruzalemu kuti akabvunze Bungwe Lakutonga bza nkhaniyi. Kodi mbani omwe adatsogolera ulendo bwacebo? Paulo adafotokoza kuti: ‘Ndidayenda kumweko thangwe ndidauzidwa m’matsomphenya kuti ndiyende.’ Kulewa cadidi, Kristu ndiye omwe adacitisa kuti nkhaniyo ikatawiridwe na bungwe lakutonga.—Wagalata 2:1-3.
Kristu akhali Mtsogoleri wa gwere lakuyamba Lacikristau (Onani ndime 10, 11)
11. (a) Kodi n’ciyani comwe Akristau winango wa Cijuda akhakhulupira pa nkhani ya mgwatidwe? (b) Kodi n’ciyani comwe cinkulatiza kuti Paulo akhali wakubzicepswa? (Onani mafala ya m’nyansi.)
11 Kristu adathandiza bungwe lakutonga kuti libvekese nfundo yakuti Akristau omwe akhali lini Ajuda akhafunikira lini kugwatidwa. (Mabasa 15:19, 20) Koma na kupita kwa nthawe, Akristau azinji wa Cijuda adapitiriza kucita mgwatidwe wana wawo. Patsogolo pace, akulu wa ku Jeruzalemu adabva kuti pakumwazidwa nkhani yakuti Paulo akulemekeza lini Cakutonga ca Mozeji. Tenepo, akuluwo adauza Paulo kuti acite ciri-cense comwe cingadalatiza kuti iye akhalemekeza Cakutongaco. (Onani mafala ya m’nyansi. *) (Mabasa 21:20-26) Iwo adamuuza kuti atenge amuna anai kuti ayende nawo ku templo na cakulinga cakuti wanthuwo akawone kuti Paulo akhalemekeza Cakutongaco. Pinango Paulo angadalewa kuti: ‘Bzimwebzi bziribe msolo! N’thangwe ranyi imwepo mukundiuza kuti ndicite bzimwebzi? Ajuda omwe alibe kubvesesa nkhani ya mgwatidweyi ndiwo ana bvuto.’ Tsono Paulo alibe kucita bzimwebzo, m’mbuto mwace, iye adabvesesa kuti cakulinga ca akuluwo cikhali cakuti Akristau wense akhale wakuphatana, tenepo mwa kubzicepswa iye adateweza malangoyo. Na tenepo, pinango tingabzibvunze kuti, thangwe ranyi Jezu adabvuma kuti nkhani yakulewa bza mgwatidwe ipitirize kukhala bvuto kwa nthawe itali, pakuti Cakutonga ca Mozeji cidaleka kuphata basa pomwe Jezuyo adafa.—Wakoloso 2:13, 14.
12. Kodi n’ciyani comwe cikhacitisa Akristau winango kuwona mgwatidwe kukhala wakufunika?
12 Pangatenge nthawe kuti munthu azolowere na kubvesesa bzinthu bzomwe bzacinja. Mwa ciratizo, Ajuda winango adatenga nthawe itali kuti abvume kuti akhali lini pomwe pansi pa Cakutonga. (Juwau 16:12) Iwo akhakumbuka kuti mgwatidwe ukhali cizindikiro cakuti munthu ali pauxamwali bwakupambulika na Mulungu. (Ciyambo 17:9-12) Winango akhacita mantha kuti angadazunzidwa m’madera yawo ya cijuda thangwe ra kukhala wakusiyana na winango. (Wagalata 6:12) Koma pa nthaweyo, Kristu adawapasa malango mazinji mwakuphatisa basa matsamba yakucokera kwa Paulo.—Waroma 2:28, 29; Wagalata 3:23-25.
KRISTU ANKUPITIRIZA KUTSOGOLERA GWERE LACE
13. Kodi Kristu ankutitsogolera tani nsiku zino, ndipo tingathandizire tani utsogoleri bwacebo?
13 Kristu ankupitiriza kutsogolera gwere Lacikristau nsiku zino. Na tenepo, penu gulu lacinja bzinthu bzomwe munkubzibvesesa lini, kumbukirani momwe Kristu adatsogolerera atumiki wa Mulungu mu nthawe zakale. Nsiku zino, Kristu ambapereka malango ya nzeru kuti akhotcerere atumiki wa Mulungu, kulimbisa cikhulupiro cawo na kuwathandiza kuti apitirize kukhala wakuphatana, ninga momwe adacitira mu nthawe ya Djosuwe na ya apostolo.—Wahebereu 13:8.
14-16. Kodi malango yomwe timbatambira kwa ‘kapolo wakukhulupirika na wanzeru’ yambalatiza tani kuti Kristu an’funa kutithandiza kupitiriza kulimbisa cikhulupiro cathu?
14 Nsiku zino, ‘kapolo wakukhulupirika na wanzeru’ ambatipasa malango yomwe timbafunikira pa nthawe yace. (Mateu 24:45) Malangoyo ni umboni bwakulatiza kuti Jesu ankutitsogolera. Marc omwe ana wana anai, adalewa kuti: “Sathani ambayeza kutepesa magwere mwa kulimbana na mabanja. Tsono kunamata ninga banja mdzinga uli-wense kumbalimbisa, ndipo misolo ya mabanja in’funika kuteweza bzimwebzi kuti ikhotcerere mabanja yawo.”
15 Tikambawona momwe Kristu ankutitsogolerera, tin’dzabvesesa kuti iye an’funa kutithandiza kuti cikhulupiro cathu cikhale cakulimba. Mwa ciratizo, mkulu wa gwere munango wakucemeredwa Patrick adati: “Pomwe gulu lidacita makonzedwe yakuti utumiki bwakumunda timbacokere m’tumagulu tun’gono-tun’gono kuphampha kwa mdzinga, abale winango alibe kukomedwa na kucinjako.” Tsono m’baleyu adalewa kuti makonzedweya yambalatiza momwe Jezu ambasamalirira munthu ali-wense m’gwere. Mwa ciratizo, abale na mpfumakazi omwe akhana manyazi ayai akhayenda lini mu utumiki bwakumunda kawiri-kawiri, tsapano ambabziwona kukhala wakufunika kwene-kwene. Bzimwebzi bzimbalimbisa cikhulupiro cawo.
16 Kristu ambatithandizambo kuti timbaikhe basa lathu lakupalizira pa mbuto yakuyamba, lomwe ni basa lakufunika kwene-kwene ndipo linkucitidwa pa dziko la pansi nsiku zino. (Werengani Marko 13:10. *) André, omwe ni mkulu mupsa wa gwere, nthawe zense ambacita nyongo yakuteweza kucinja kuli-kwense kwa gulu la Yahova. Iye adalewa kuti: “Kupunguza abale komwe mthambi zakusiyana-siyana zidacita kumbatikumbusa kufunika kwa kuphatisa bwino basa mphanvu zathu pa basa lakupalizira thangwe nthawe yamala.”
KODI TINGATHANDIZIRE TANI CITSOGOZO CA KRISTU?
17, 18. N’thangwe ranyi tin’funika kumbakumbukira bzisimbo bza kuteweza malango ya m’gulu la Yahova?
17 Malango yomwe timbatambira kwa Jezu Kristu, omwe ni Mambo wathu, yambatithandiza kuyambira lero mpaka kutsogolo. Kumbukirani bzisimbo bzomwe mwabzigumana thangwe ra kuteweza kucinja komwe kwacitika tsapanopapa m’gulu la Yahova. Ndipo pa kunamata kwanu ninga banja, cezeranani bza phindu lomwe banja lanu lagumana thangwe ra kucinja kwa mitsonkhano ayai utumiki bwakumunda.
Kodi imwepo munkuthandiza wanthu wa m’banja mwanu na abale winango kuti ambateweze kucinja komwe kumbacitika m’gulu la Yahova? (Onani ndime 17, 18)
18 Tikambakumbukira kuti kuteweza malango ya m’gulu la Yahova kumbatibweresera bzakutewera bzizinji bzabwino, tin’dzakhala wakukondwa ndipo tin’dzaneseka lini kuyateweza. Mwa ciratizo, pakuti tinkudinda lini pomwe mabukhu mazinji ninga momwe tikhacitira m’mbuyomu, tikudzonga lini kobiri zizinji. Ndipo thangwe ra kuphatisa basa mitcini ya nzeru, tinkukwanisa kumwaza bzipsa bzabwino bza Umambo kwa wanthu azinji. Kodi timbaphatisa basa mabukhu, mavidiyo na nkhani zakundobva zomwe ziri pa webisaite ayai m’mitcini yathu ya nzeru? Imweyi ni njira ibodzi yakuthandizira Kristu, omwe an’funa kuti timbaphatise basa mwanzeru cuma ca gulu la Yahova.
19. N’thangwe ranyi tin’funika kumbathandizira citsogozo ca Kristu?
19 Tikambathandizira citsogozo ca Kristu, tin’dzathandiza abale na mpfumakazi zathu kukhala na cikhulupiro cakulimba ndipo tin’dzakhala wakuphatana kwene-kwene. Pakufotokoza bza kupunguzika kwa abale na mpfumakazi komwe kwacitika tsapanopapa mu mthambi za pa dziko lense la pansi, André adati: “Mzimu omwe abalewa adaulatiza wa kubvuma kucinja kwa bzinthu, wacitisa kuti cikhulupiro cangu kwa Kristu ninga mtsogoleri cithumizirike. Ndipo iwo adalatiza kuti ankufamba na ngolo ya Yahova, mwa kupitiriza kukondwa na basa liri-lense lomwe ambapasidwa.”
PITIRIZANI KUKHULUPIRA MTSOGOLERI WATHU
20, 21. (a) N’thangwe ranyi tin’funika kukhulupira Kristu, Mtsogoleri wathu? (b) Kodi mu nkhani yakutewera tin’dzacezerana mbvunzo uponi?
20 Tsapanopapa Mtsogoleri wathu, Jezu Kristu, an’maliza ‘kukunda kwace’ ndipo ‘an’dzacita bzinthu bzakucitisa mantha.’ (Cibvumbulutso 6:2; Psalymo 45:4) Koma tsapano iye ankutikonzekeresa moyo omwe tin’dzakhala nawo m’dziko lipsa na basa lomwe tin’dzacita la kupfunzisa anyakulamusidwa na kucitisa dziko la pansi kukhala paraizo.
21 Tenepo, napo tigumane na mabvuto pa moyo wathu, tin’funika kukhulupira kuti, Mtsogoleri wathu an’dzatitsogolera mpaka kupita m’dziko lipsa. (Werengani Psalymo 46:1-3. *) Nsiku zino, nthawe zinango bzingatinese kubvuma kucinja, maka-maka kukaticitikira mwadzidzidzi. Tsono bzimwebzi bzikacitika, kodi n’ciyani comwe tingacite kuti tipitirize kukhala na mtendere wa mu mtima na kukhulupira Yahova? Mu nkhani yakutewera tin’dzawona mtawiro wa mbvunzoyu.
^ ndi. 4 Mateu 23:10 Lekani kumbacemeredwa atsogoleri, pakuti Mtsogoleri wanu ni m’bodzi yekha basi, Kristu.
^ ndi. 5 Djosuwe 5:13 Pomwe Djosuwe akhadasala pang’ono kufika ku Jeriko, adanyang’anisa kutsogolo kwace ndipo adawona munthu adaima, ndipo m’manja mwace akhadaphatirira mphanga. Tenepo, Djosuwe adamufenderera acimubvunza kuti: “Kodi iwepo uli ku mbali yathu ayai uli ku mbali ya anyamadulanthaka wathu?” 14 Na tenepo iye adati: ‘Ne, koma ine pakukhala nduna ya gulu la anyankhondo wa Yahova, tsapano ndabwera.’ Pomwe Djosuwe adabva mafala yamweyo, adagodama mpaka nkhope yace pansi, ndipo adamuuza kuti: ‘Lewalewani mbuya wangu kuna kapolo wanu.’ 15 Tenepo nduna ya gulu la anyankhondo wa Yahovayo idauza Djosuwe kuti: ‘Khundula xango zakozo, thangwe mbuto yomwe udaimayo njakucena.’ Nthawe ibodzi-bodziyo Djosuwe adakhundula xango zacezo.
^ ndi. 8 Mu matere ya Jeriko, anyakufufudza bzinthu bzakale, adagumana cakudya cizinji comwe wanthu wa mu mzindamo akhabvuna koma alibe kudya. Bzimwebzi bzinkuthandizira nkhani za m’Bibliya, zomwe zimbalewa kuti acikundawo akhali pafupi ndipo akhabvumiza lini Ajirayeri kudya cakudya ca mu mzindamo. Bzinkuwoneka kuti ikhali nthawe yabwino kuti Ajirayeri akunde dzikolo, thangwe m’minda mukhana cakudya cizinji.—Djosuwe 5:10-12.
^ ndi. 11 Onani kwadru yakuti “Paulo Anakumana ndi Chiyeso Modzichepetsa” mu Nsanza ya Mulindiri ya 15 Março, 2003, tsamba 24.
^ ndi. 16 Marko 13:10 Ndipo bzipsa bzabwino bzin’funika kupaliziridwa kwa wanthu wa mitundu yense cakuyamba.
^ ndi. 21 Psalymo 46:1 Mulungu ni pakuthawira pathu na mphanvu yathu, thandizo lomwe timbaligumana pa nthawe yakuthemera tikagumana na mayezo. 2 Ndipopa ifepano tin’dzacita lini mantha, napo dziko lisandulike, napo mapiri yagwere nyanza yakuzika. 3 Napo madzi ya m’nyanza yacite mabimbi na maphobvu, napo kuti kuwunga kwace kungatekenyese mapiri.
