1, 2. (a) Kodi kucinja kwa bzinthu mwadzidzidzi pa moyo wathu kungatitokonye tani? (Onani cithunzi-thunzi pa tsamba lino.) (b) Mwakubverana na Psalymo kapitulo 131, kodi n’ciyani comwe cingatithandize kuti tikhale na mtendere wa mu mtima?

LIOYD NA ALEXANDRA adatumikira pa Beteli kwa magole yakupitirira 25, na kupita kwa nthawe adatumizidwa ku gawo. Pakuyamba, iwo adasunama kwene-kwene. Lloyd adalewa kuti: “Ndikhawona ninga kuti Beteli na basa lomwe ndikhacita bzikhali ninga cizindikiro cangu. M’makumbukidwe mwangu ndidatenda kwene-kwene thangwe ra kucinjako, koma pomwe pakhapita midzinga na minyezi, kawiri-kawiri yakhandibwerera makumbukidwe yakufuna kulamba.” Onani kuti pakuyamba Lloyd adakomedwa na kucinjako, koma patsogolo pace iye adadzasunama.

² Nthawe zinango, bzinthu bzingacinje pa moyo wathu mwadzidzidzi, ndipo kucinjako kungatibweresere thupo na msunamo. (Mimwani 12:25) Kodi tingacite ciyani kuti tipitirize kukhala na mtendere wa mu mtima, penu bzinkutinesa kucinja? (Werengani  Psalymo 131:1-3. *) Tsapano bwerani tiwone bziratizo bzakale na bzatsapano bza atumiki winango wa Yahova, omwe adakwanisa kukhala na mtendere wa mu mtima napo pomwe bzinthu bzidacinja mwadzidzidzi pa moyo wawo.

3. Kodi moyo wa Zuze udacinja tani mwadzidzidzi?

³ Kumbukirani ciratizo ca Zuze. Iye akhafunidwa kwene-kwene na baba wace Djakobi, kuposa abale wace wense. Bzimwebzi bzidacitisa kuti abale wacewo amuwenge. Ndipo pomwe Zuze akhana magole 17 yakubadwa, iwo adamugulisa ninga kapolo. (Ciyambo 37:2-4, 23-28) Zuze adamala magole 13 ankubonera ku Edjipito, pakuyamba ninga kapolo ndipo patsogolo pace ninga nyankawoko. Cinthu cinango n’cakuti iye akhali kutali na baba wace omwe akhamufuna kwene-kwene. Bzimwebzi bzingadamucitisa kukhala na ukali kwene-kwene na kubziwona ninga kuti alibe tsogolo, tsono iye alibe kubziwona tenepo. Kodi n’ciyani comwe cidamuthandiza?

4. (a) Kodi n’ciyani comwe Zuze adacita pomwe akhali m’kawoko? (b) Kodi Yahova adatawira tani mipembo ya Zuze?

⁴ Pomwe Zuze akhabonera m’kawoko, pinango iye adapitiriza kukumbukira momwe Yahova akhamuthandizira. (Ciyambo 39:21; Psalymo 105:17-19) Ndipo pinango iye adalimbisidwa pomwe adakumbukira bza matsomphenya yomwe adawona pomwe akhali mwana na kudziwa kuti Yahova ali naye. (Ciyambo 37:5-11) Ayai pinango iye adapemba kazinji kense kwa Yahova ndipo adamuuza bzense bzomwe bzikhali mu mtima mwace. (Psalymo 145:18) Ndipo Yahova adatawira mipembo ya Zuze mwa kumutsimikizira kuti ‘angadakhala naye,’ bziribe basa bzomwe bzingadamucitikira.—Mabasa 7:9, 10. (Onani mafala ya m’nyansi. *)

5. Kodi ‘mtendere wa Mulungu’ ungatilimbise tani kuti titumikire Yahova?

⁵ Bziribe basa kuti tinkugumana na mabvuto pa moyo wathu, ifepano tingakhale na ‘mtendere wa Mulungu’ omwe ungakhotcerere ‘luso lathu lakukumbuka’ na kukhala na mtendere wa mu mtima. (Werengani Wafiripo 4:6, 7. *) Tikakhala na thupo na wakusunama, ‘mtendere wa Mulungu’ ungatilimbise kuti tipitirize kutumikira Yahova na kuleka kubwerera mbuyo. Tsapano bwerani tiwone bziratizo bza abale na mpfumakazi wa mu nthawe yathu ino omwe adagumana na bzinthu ninga bzimwebzi.

6, 7. Fotokozani ciratizo cakuwonesa kuti mipembo ingatithandize kukhala na mtendere wa mu mtima.

⁶ Pomwe Ryan na Juliette adaimisidwa kutumikira ninga apainiya wakupambulika, iwo adataya mtima kwene-kwene. Ryan adalewa kuti: “Tidauza Yahova mu mpembo bzense bzomwe bzikhali mu mtima mwathu.  Tikhadziwa kuti tikhana mwayi wakupambulika wakulatiza cikhulupiro cathu kuna iye. Pakuti azinji m’gwere mwathu akhali watsapano m’cadidi, tikhapemba kwa Yahova kuti atithandize kukhala ciratizo cabwino pa nkhani ya kukhulupirika.”

⁷ Kodi Yahova adatawira tani mpembo wawoyo? Ryan adati: “Pomwe ndidamala kucita mpemboyo, makumbukidwe yathu yakuphonyeka pabodzi na thupo lomwe tikhanalo pakuyamba bzidamaliratu. Mtendere wa Mulungu udakhotcerera mitima yathu na luso lathu la kukumbuka. Ndipo tidazindikira kuti tingapitirize kufunidwa na Yahova tikakhala na makumbukidwe yabwino.”

8-10. (a) Kodi mzimu wa Mulungu ungatithandize tani tikakhala na thupo? (b) Kodi Yahova angatithandize tani tikambaikha pa mbuto yakuyamba utumiki bwace?

⁸ Mzimu wa Mulungu ungatithandize kukhala na mtendere wa mu mtima, ndipo ungatitsogolerembo kuti tigumane mavesi ya m’Bibliya yomwe yangatithandize kuzindikira bzomwe mpsakufunika kwene-kwene pa moyo wathu. (Werengani Juwau 14:26, 27. *) Bzimwebzi ndibzo bzomwe bzidacitika na Philip na Mary, banja lomwe lidatumikira pa Beteli kwa magole pafupi-fupi 25. Mkati mwa minyezi minai, wense awiri adafedwa azimai pabodzi na wacibale wawo munango, ndipo iwo akhafunika kusamalira baba wa Mary, omwe akhaduwala matenda ya makumbukidwe.

⁹ Philip adalewa kuti: “Ndikhakumbuka kuti bzinthu bzense bzikhali bwino-bwino, koma ndikhadziwa lini kuti pakhana cinthu cinango comwe cikhasala. Tsono pomwe ndikhawerenga nkhani inango yakupfunza mu Nsanza ya Mulindiri ndidagumana Wakoloso 1:11. Vesiri lidandithandiza kuwona kuti ndikhapirira, koma kukhali lini kwakukwanira. Tenepo, ndikhafunikira ‘kulimbika m’bzinthu bzense na kupirira pabodzi na cikondweso.’ Iro lidandikumbusa kuti cikondweso cangu cimbathemba lini momwe bzinthu bziriri, koma momwe mzimu wa Mulungu unkuphatira basa pa moyo wangu.”

¹⁰ Pakuti Philip na Mary adaikha kutumikira Yahova pa mbuto yakuyamba, iye adawasimba mu njira zakusiyana-siyana. Pomwe iwo adlaima kutumikira pa Beteli, wense awiri adagumana mapfunziro ya Bibliya yomwe yankuyenda patsogolo kwene-kwene ndipo mapfunziroyo yakhafuna kuti pfunziro lawo limbacitike kazinji sikuti kabodzi pa mdzinga. Mary adati: “Mapfunziroyo yakhatikondwesa ndipo imweyi ikhali njira yomwe  Yahova akhatiuzira kuti bzinthu bzin’tifambira bwino.”

11, 12. (a) Kodi n’ciyani comwe Zuze adacita kuti Yahova amusimbe? (b) Kodi Yahova adasimba tani Zuze?

¹¹ Bzinthu bzikacinja pa moyo wathu mwadzidzidzi, tingakhale na thupo kwene-kwene tikambakumbukira mabvuto yomwe yangabwere. Bzimwebzi bzingadacitika na Zuze. Tsono iye adasankhula kucita bzinthu bzakufunika bzomwe angadakwanisa pa cakucitika comwe adagumana naco. Pomwe Zuze akhali m’kawoko, iye adaphata basa na nyongo pa ciri-cense comwe akhauzidwa na mkulu wa m’kawokomo, ninga momwe akhacitira pomwe akhali kumui kwa Potifari.—Ciyambo 39:21-23.

¹² Nsiku inango, Zuze adapasidwa udindo bwakuti asamalire anyankawoko awiri omwe akhatumikira ku nyumba ya Farawo. Zuze adawadekera mtima, ndipo amunawo adatsudzuka naye acimuuza bza thupo lomwe akhanalo na maloto yomwe yakhawaboneresa usiku. (Ciyambo 40:5-8) Zuze akhadziwa lini bzomwe bzikhacitika, koma macezayo yadacitisa kuti iye atsudzulidwe. Pomwe padapita magole mawiri, iye adatsudzulidwa m’kawokomo ndipo adadzakhala mtongi wamphanvu m’dziko la Edjipito. Kokha Farawo ndiye akhana mphanvu zakuposa Zuze!—Ciyambo 41:1, 14-16, 39-41.

13. Kodi tingacite tani kuti Yahova atisimbe, napo tigumane na mabvuto?

¹³ Ninga Zuze, pinango tingagumane na cakucitika comwe tingakwanise lini kucimalisa. Koma tikapirira na kucita bzinthu bzakufunika bzomwe tingakwanise, Yahova an’dzatisimba. (Psalymo 37:5) Napo tigumane na mabvuto ayai tikhale na thupo, tin’funika lini kutaya cidikhiro. (2 Wakolinto 4:8) Yahova an’dzakhala nafe, tikapitiriza kuikha utumiki bwathu pa mbuto yakuyamba.

14-16. Kodi n’ciyani comwe Firipi adacita pomwe bzinthu bzidacinja pa moyo wace?

¹⁴ Firipi omwe akhali mpalizi adakhala ciratizo cabwino kwa munthu ali-wense omwe adaikha utumiki bwace pa mbuto yakuyamba, napo kuti bzinthu bzidacinja pa moyo wace. Pa nthawe inango, iye adakomedwa kwene-kwene na basa lipsa lomwe akhacita ku Jeruzalemu. (Mabasa 6:1-6) Koma na kupita kwa nthawe bzinthu bzidacinja. Pomwe Sitefano adaphedwa, Akristau adayamba kuzunzidwa mwamphanvu, ndipo iwo adathawa ku Jeruzalemuko. Ndipo thangwe ra cizunzoco, Firipi akhafunisisa kupitiriza kutumikira Yahova, tenepo iye adayenda ku mzinda wa Samariya, komwe kukhana wanthu omwe akhafunisisa kubva bzipsa bzabwino.—Mateu 10:5; Mabasa 8:1, 5.

¹⁵ Firipi akhayenda kuli-kwense komwe mzimu wa Mulungu ukhamutsogolera. Tenepo, Yahova adamuphatisa basa kuti akapalizire ku mbuto komwe wanthu akhanati kubva bzipsa bzabwino. Ajuda azinji akhambanyoza Asamariya ndipo akhawacitira bzinthu bzakuipa. Tsono Firipi alibe kuwasankhula, ndipo adawapalizira bzipsa bzabwino na mtima wense. Ndipo Asamariyawo adamutetekera ‘mwa tceru’!—Mabasa 8:6-8.

¹⁶ Na kupita kwa nthawe, mzimu wa Mulungu udatsogolera Firipi kuti akapalizire ku mizinda ya Asidode na ku Kaesarea, komwe kukhana wanthu azinji omwe akhali lini Ajuda. (Mabasa 8:39, 40) Moyo wa Firipi udacinja pomwe. Ndipo kumweko iye adakhala na  banja. Tsono napo kuti bzinthu bzidacinja pa moyo wa Firipi, iye adapitiriza kuikha utumiki bwace pa mbuto yakuyamba, ndipo Yahova adapitiriza kusimba iye pabodzi na banja lace.—Mabasa 21:8, 9.

17, 18. Kodi kuikha utumiki bwathu pa mbuto yakuyamba, kungatithandize tani bzinthu bzikacinja pa moyo wathu?

¹⁷ Abale azinji omwe ankucita utumiki bwa nthawe zense, ambalewa kuti kuikha pa mbuto yakuyamba utumiki bwawo kumbawathandiza kukhala wakukondwa na wakulimba napo bzinthu bzikacinja pa moyo wawo. Mwa ciratizo, pomwe m’bale Osborne na mkazace Polite adaimisidwa kutumikira pa Beteli ku África do Sul, iwo akhakumbuka kuti bzingadakhala bzakusaya kunesa kugumana nyumba na basa lomwe lingadawapasa mpata. Koma Osborne adalewa kuti: “Mpsakupasa nsisi kuti padatenga nthawe itali kuti tigumane basa kuposa momwe tikhadikhirira.” Ndipo Polite adalewambo kuti: “Tidamala minyezi mitatu tikanati kugumana basa, ndipo kobiri zikhadatimalira, tenepo bzinthu bzikhadafika pakuipa.”

¹⁸ Kodi n’ciyani comwe cidathandiza Osborne na Polite pa nthawe yakunesayi? Osborne adati: “Kupalizira pabodzi na gwere kudatithandiza kupitiriza kuikha makumbukidwe yathu pa bzinthu bzakufunika pa mbuto yakuyamba na kukhala wakulimba.” M’mbuto mwakundokhala kumui acimbakumbukira bza thupo lawo, iwo adasankhula kupitiriza kutanganidwa mu utumiki bwakumunda. Kucita bzimwebzi kudawabweresera cikondweso cikulu kwene-kwene. Osborne adalewa pomwe kuti: “Tidacita ciri-cense kuti tigumane basa, ndipo na kupita kwa nthawe tidadzaligumana.”

19-21. (a) Kodi n’ciyani comwe cingatithandize kukhala na mtendere wa mu mtima? (b) Kodi ni phindu liponi lomwe tingaligumane bzinthu bzikacinja mwadzidzidzi pa moyo wathu?

¹⁹ Ninga momwe tawonera, tikapitiriza kucita bzinthu bzakufunika na kukhulupira Yahova na mtima wense, napo bzinthu bzikacinja pa moyo wathu, tin’dzapitiriza kukhala na mtendere wa mu mtima. (Werengani Mikeya  7:7. *) Ndipo na kupita kwa nthawe, tin’dzawona kuti kucinjako kwatithandiza kulimbisa uxamwali bwathu na Yahova. Polite adalewa kuti kuimisidwa kutumikira pa Beteli kudamuthandiza kuwona kufunika kwa kuthemba Yahova maka-maka bzinthu bzikanesa pa moyo. Iye adalewa kuti: “Tsapano uxamwali bwangu na Yahova n’bwakulimba kwene-kwene.”

²⁰ Mary, omwe wafotokozedwa pakuyamba ule, ankupitiriza kusamalira baba wace wacikulire na kutumikira ninga mpainiya. Iye adalewa kuti: “Ndidawona kuti ndikakhala na thupo, ndin’funika kupemba na kuderekhesa mtima wangu. Ndidawona pomwe kufunika kwa kumbatulira Yahova thupo langu ndikagumana na mabvuto, ndipo ndin’dzacita bzimwebzi mpaka kale-kale.”

²¹ Lloyd na Alexandra adazindikira kuti kucinja kwa bzinthu mwadzidzidzi komwe kudacitika pa moyo wawo kudayeza cikhulupiro cawo. Koma iwo akukwanisa kuwona momwe kucinjako kwawathandizira. Tsapano cikhulupiro cawo n’cakulimba ndipo cimbawathandiza kukhala wakukondwa akagumana na mabvuto, ndipo ambawona kuti kucinjako kwawacitisa kukhala wanthu wabwino.

22. Kodi tin’funika kucita ciyani bzinthu bzikacinja mwadzidzidzi pa moyo wathu?

²² Mu dziko lakuipali, moyo wathu ungacinje mwadzidzidzi. Mwa ciratizo, pomwe tinkutumikira Yahova tingatambire udindo bupsa, tingaduwale, ayai tingafunike kusamalira wacibale wathu wakuduwala ayai wakukalamba. Tsono bziribe basa bzomwe mungagumane nabzo, mun’funika kukhulupira kuti Yahova an’dzakusamalirani na kukuthandizani pa nthawe yakuthemera. (Wahebereu 4:16; 1 Pedru 5:6, 7) Na tenepo, pitirizani kucita bzomwe mpsakufunika mukakhala na thupo. Mbapembani kwa Baba wanu Yahova, ndipo pitirizani kumbamukhulupira na mtima wanu wense. Mukacita bzimwebzi, mun’dzakhala na mtendere wa mu mtima wakucokera kwa Yahova napo bzinthu bzikacinja pa moyo wanu.