1, 2. (a) Kodi ni basa liponi lomwe likhali lakufunika kwene-kwene pa moyo wa Jezu, ndipo thangwe ranyi? (b) Kodi tin’funika kucita ciyani kuti bzinthu bzitifambire bwino ninga ‘anyabasa anzace wa Mulungu’?

JEZU KRISTU akhali nyakusema matabwa ndipo patsogolo pace adadzakhala mpfunzisi. (Marko 6:3; Juwau 13:13) Iye adacita mabasa mawiriya mwakulondoza. Mwa ciratizo, ninga nyakusema matabwa, iye adapfunza momwe angadaphatisira basa matabwa kuti akonze bzinthu bzakufunika. Ndipo ninga mpfunzisi, iye adaphatisa basa cidziwiso cace ca Bzinembo kuti athandize wanthu omwe akhawoneka ninga wakusaya kufunika, kubvesesa cadidi ca m’Fala la Mulungu. (Mateu 7:28; Luka 24:32, 45) Pomwe akhana magole 30 yakubadwa, Jezu adasiya basa lakusema matabwa aciyamba basa lakupfunzisa wanthu pakuti akhadziwa kuti likhali lakufunika kwene-kwene. Iye adalewa kuti kupalizira bzipsa bza Umambo bwa Mulungu ndiro thangwe lomwe Mulungu akhadamutumizira pansi pano. (Mateu 20:28; Luka 3:23; 4:43) Jezu akhawona kupalizira bzipsa bzabwino kukhala cinthu cakufunika kwene-kwene pa moyo wace, ndipo iye akhafuna kuti winango acitembo bzibodzi-bodzibzo.—Mateu 9:35-38.

² Azinji wa ifepano ndife lini anyakusema matabwa, koma tensenefe ndife apfunzisi thangwe timbapfunzisa winango bzipsa bzabwino. Limweri ni basa lakufunika kwene-kwene ndipo Mulungu ambalicitambo. Ndipopa, ifepano timbacemeredwa ‘anyabasa anzace wa Mulungu.’ (1 Wakolinto 3:9; 2 Wakolinto 6:4) Ndipo timbabverana na bzomwe nyakunemba bukhu la Psalymo adalewa. Iye adati: ‘Mafala yanu yense ni cadidi.’ (Psalymo 119:159, 160) Fala la Yahova ndacadidi. Ndipopa  tin’funika kumbaphatisira ‘bwino basa fala la cadidi’ mu utumiki bwakumunda. (Werengani 2 Timotio 2:15. *) Ndipo tin’funika kucita nyongo yakuphatisa bwino basa Bibliya pabodzi na bzinthu bzomwe tinabzo kuti tipfunzise wanthu pakulewa bza Yahova, Jezu na Umambo bwa Mulungu. Ndipo gulu la Yahova latikonzera bzinthu bzakusiyana-siyana bzomwe bzimbathandiza kuti upalizi bwathu bufambe bwino, tsono tin’funika kucita nyongo kuti tidziwe momwe tingabziphatisire basa. Bzinthu bzimwebzi bzinkucita mbali ya bzomwe timbaphatisa basa pa kupfunzisa wanthu.

3. Kodi n’ciyani comwe tin’funika kucita tikakhala mu utumiki bwakumunda, ndipo cinembo ca Mabasa 13:48, cingatithandize tani kucita bzimwebzo?

³ Bzinthu bzimwebzi bzinkuphatanidza mabukhu yomwe yambakonzedwa kuti tipfunzisire wanthu. ‘Kupfunzisa’ kumbathandauza kufotokozera munthu mafala kuti abvesese bzomwe wabvabzo ndipo na kupita kwa nthawe iye ambadzacita bzomwe wapfunzabzo. Pakuti tiri kuphampha kwa mkonzedwe uno, tin’funika kucita nyongo yakuyambisa mapfunziro na kupfunzisa wanthu cadidi ca m’Bibliya kuti akhalembo ateweri wa Kristu. Bzimwebzi bzikuthandauza kuti tin’funika kucita bzense bzomwe tingakwanise kuti tigumane wanthu ‘omwe ana makumbukidwe yabwino yomwe yangawathandize kugumana moyo wakusaya kumala,’ ticiwathandiza kuti ayambe kutumikira Yahova.—Werengani Mabasa 13:44-48. *

4. Kodi tingagumane tani wanthu omwe ‘ana makumbukidwe yabwino yomwe yangawathandize kugumana moyo wakusaya kumala’?

⁴ Kodi tingagumane tani wanthu omwe ‘ana makumbukidwe yabwino yomwe yangawathandize kugumana moyo wakusaya kumala’? Kwa Akristau wakuyambirira, njira yomwe akhaiphatisa basa kuti agumane wanthu ni kupalizira. Jezu adauza anyakupfunza wace kuti: ‘Mukapita mu mzinda ayai m’mui uli-wense, fufudzani omwe ngwakuthemera.’ (Mateu 10:11) Ifepano tin’funika kucitambo bzibodzi-bodzibzi nsiku zino. Tsono, penu wanthu omwe tinkuwapalizira mbakuthemera lini, mbakubzikuza, ayai ambafuna lini kupfunza bza Mulungu, bzingakhale bzakunesa kuti iwo atetekere bzipsa bzabwino. Ndipopa tin’funika kufufudza wanthu omwe mbakuthemera, wakubzicepswa na omwe akufunisisa kudziwa cadidi ca m’Bibliya. Tingandendemezere kufufudza wanthu mu utumiki bwakumunda komwe timbacita na bzomwe Jezu akhacitira pomwe akhali nyakusema matabwa. Kuti akonze bzinthu bzakudeka ninga, misuwo, mipando na bzinthu bzinango, iye cakuyamba akhafufudza matabwa yakuthemera. Ndipo akayagumana, akhatenga bzinthu bzomwe akhaphatisira basa, ndipo na nzeru zace akhakonza bzinthu bzakusiyana-siyana. Mpsibodzi-bodzimbo nsiku zino, cakuyamba tin’funika kufufudza wanthu wakuthemera, ndipo patsogolo pace tiphatise basa bzinthu bzomwe timbapfunzisira wanthu pabodzi na luso lathu kuti tiwathandize kukhala anyakupfunza wa Jezu.—Mateu 28:19, 20.

5. Kodi n’ciyani comwe tin’funika kumbakumbukira pa bzinthu bzomwe timbabziphatisira basa mu utumiki bwakumunda? Fotokozani ciratizo. (Onani bzithunzi-thunzi pa tsamba 9.)

⁵ Cinthu ciri-cense comwe timbaciphatisa basa pakupfunzisa wanthu mu utumiki bwakumunda, cina cakulinga cace. Mwa ciratizo, kumbukirani bzinthu bzomwe Jezu ninga nyakusema matabwa akhaphatisira basa. (Onani mafala ya m’nyansi. *)  Iye akhafunikira bzinthu bzakusiyana-siyana kuti ambapime, kugwata, kuboola, kupala na kuphatanidza matabwa. Mpsibodzi-bodzimbo na ifepano nsiku zino, bzinthu bzomwe timbabziphatisa basa mu utumiki bwakumunda, bzimbakhala na cakulinga cace. Tenepo, bwerani tiwone momwe tingaphatisire basa bzinthu bzakufunikabzi.

6, 7. (a) Kodi imwepo mumbaphatisa tani basa tumakhadi? (b) N’thangwe ranyi tin’funika kumbaphatisa basa micemo yakucemerera wanthu ku mitsonkhano yathu ya gwere?

⁶ Tumakhadi. Napo kuti tumakhaditu n’tung’ono-tung’ono, ito tumbathandiza kwene-kwene wanthu kuti atidziwe bwino ndipo tumbawatsogolera ku webisaite yathu ya jw.org. Ndipo pa webisaitiyi, iwo angapfunze bzizinji pakulewa bza ife na kukumbira pfunziro la Bibliya. Mwa ciratizo, wanthu wakupitirira 400.000 adakumbira pfunziro la Bibliya na kutali mwakuphatisa basa webisaiti, ndipo wanthu azinji ambacitambo bzibodzi-bodzibzi nsiku zense! Tenepo, mbanyamulani tumakhaditu kuti mumbaphatise basa pakuceza na wanthu omwe mungagumane nawo nsiku zense.

⁷ Micemo. Mcemo wakucemerera wanthu ku mitsonkhano yathu ya gwere umbalewa kuti: “Imwepo munkucemeredwa kuti mudzapfunze Bibliya na Mboni za Yahova.” Ndipo umbalewambo kuti munthu angapfunze bzizinji bza Bibliya “pa mitsonkhano yathu ya gwere” ayai na “mthandizi wace-wace.” Mcemoyu umbadziwisa wanthu bza ife na kucemera wale omwe ‘ambazindikira bzakusaya bzawo bzauzimu’ kuti apfunze Bibliya. (Mateu 5:3) Kulewa cadidi, wanthu omwe ambafika pa mitsonkhano yathu ambatambiridwa bwino napo kuti iwo angafune lini kupfunza Bibliya. Ndipo akafika pa mitsonkhanoyo, iwo ambawona kuti an’funika kupfunza bzizinji bza Bibliya.

8. Thangwe ranyi mpsakufunika kuti wanthu ambatsonkhane nafe? Fotokozani ciratizo.

⁸ Mpsakufunika kwene-kwene kupitiriza kumbacemerera wanthu ku mitsonkhano yathu ya gwere. Thangwe ranyi? Thangwe iwo akabwera pa mitsonkhano, ambadzawona kuti Mboni za Yahova zimbapfunzisadi cadidi ca m’Bibliya na kuthandiza wanthu kudziwa Mulungu, bzinthu bzomwe bzipembedzo bzakunama bzimbacita lini. (Zaiya 65:13) Mwa ciratizo, banja linango ku Estados Unidos lomwe madzina yawo ni Ray na Linda, lidawona kusiyana kumweku m’magole yapitaya. Iwo akhakhulupira Mulungu ndipo akhafunisisa kumudziwa bwino. Tenepo, iwo adapangana kuzungira magereja yense ya mu mzinda mwawo na cakulinga cakufuna kugumana bzinthu bziwiri. Cakuyamba, iwo akhafuna kupfunza cinthu cipsa cakusiyana na bzomwe akhadziwa kale. Caciwiri, iwo akhafuna kuwona penu wanthu wa m’magerejayo akhabvala ninga atumiki wa Mulungu. Iwo adamala magole mazinji akucita bzimwebzi kuti agumane bzinthu bziwiribzi thangwe mu mzinda mwawomo mukhana magereja mazinji. Tsono iwo akhasunama kwene-kwene, thangwe pakhalibe comwe akhapfunza ndipo wanthu wa m’magerejayo akhabvala lini mwakuthemera. Nsiku inango, pambuyo pa kuzungira gereja yakumalizira yomwe ikhali pa ndandanda yawo, Linda adayenda kubasa ndipo Ray adabwerera kumui. Tsono pomwe akhabwerera kumuiko, Ray adagwata na kandere-ndere wace kutsogolo kwa Nyumba ya Umambo. Iye adaima ndipo adakumbuka kuti: ‘Lekani ndipite m’mwemu kuti ndiwone bzomwe bzikucitika.’ Pomwe adapita, iye adawona bzinthu bzakusiyana kwene-kwene na bzomwe akhadawona m’magereja yense yomwe akhadapita pakuyamba yale! Ndipo m’Nyumba ya Umambomo munthu ali-wense, akhana nsangala na lufoyi ndipo akhadabvala bwino kwene-kwene. Ray adakhala pa mpando wakutsogolo ndipo adakomedwa kwene-kwene na bzense bzomwe adapfunza pa mtsonkhanoyo! Bzimwebzi bzikutikumbusa bzomwe  mpostolo Paulo adafotokoza pakulewa bza munthu omwe ambafika pa mitsonkhano yathu pa ulendo bwakuyamba, iye ambalewa kuti: ‘Mulungu alidi pakati panu.’ (1 Wakolinto 14:23-25) Ndipo kuyambira nsiku imweyo, Ray adayamba kuyenda ku mitsonkhano nsiku zense za Mdzinga. Na kupita kwa nthawe adayamba kumbayenda ku mitsonkhano ya pakati pa mdzinga. Ndipo Linda adayambambo kumbatsonkhana, napo kuti wense akhana magole yakupitirira 70, iwo adapfunza Bibliya acibatizidwa.

9, 10. (a) Thangwe ranyi tumatsamba n’twakusaya kunesa kuphatisa basa? (b) Fotokozani momwe tingaphatisire basa tsamba lakuti Kodi Umambo bwa Mulungu n’Ciyani?

⁹ Tumatsamba. Ifepano tina tumatsamba twakukwana tusere tomwe timbaphatisa basa mu utumiki bwakumunda. Ndipo ito n’twakusaya kunesa kutuphatisa basa na kuyambisa maceza. Kucokera mu 2013 pomwe tumatsambatu tudacosedwa, padindidwa kale tumatsamba twakupitirira mabidyau maxanu. Tumatsamba twense tudandendemerana. Tenepo mukapfunza kuphatisa basa kabodzi mwa tumatsambatu, imwepo mungakwanise kuphatisa basa twense. Kodi mungaphatise tani basa kabodzi mwa tumatsambatu kuti muyambise maceza na munthu mu utumiki bwakumunda?

¹⁰ Tiyezeze kuti mukufuna kuphatisa basa katsamba kakuti, Kodi Umambo bwa Mulungu n’Ciyani? Latizani munthuyo mbvunzo omwe uli kutsogolo kwa katsambaka ndipo mbvunzeni kuti: “Kodi mudabzibvunzambo kale kuti Umambo bwa Mulungu n’ciyani? Mungalewe kuti ni . . . ?” Ndipo mukumbireni kuti asankhule ubodzi mwa mitawiro mitatu yomwe iri pa tsamba lakuyamba. Tsono akasankhula, lekani kumuuza kuti mtawiro waceyo ngwakulondoza ayai ne, koma fungulani tsambalo ndipo muwoneseni pa mbali yakuti “Bibliya Limbati.” Patsogolo pace, werengani bzinembo bzomwe bziri pa tsambalo, bzomwe ni Danyeri 2:44 na Zaiya 9:6. Ndipo mukafika kuphampha kwa maceza yanuyo, mubvunzeni mbvunzo omwe uli kuseri kwa tsambalo pa mbali yakuti “Kuti Mukumbukire,” omwe umbati: “Kodi Moyo un’dzakhala tani mu utongi bwa Umambo bwa Mulungu?” Mbvunzo umweyu mungadzautawire pa ulendo bwakubwereza. Mukadzamuzungira pomwe munthuyo, dzaphatiseni basa msolo 7 wa broxura lakuti Bzipsa Bzabwino Bzakucokera kwa Mulungu!, lomwe ni libodzi mwa mabroxura yomwe timbayaphatisa basa pakupfunzisa wanthu Bibliya.

11. Kodi n’ciponi cakulinga ca marevista yathu, ndipo n’ciyani comwe tin’funika kucita tikanati kuyagawira?

¹¹ Marevista. Nsanza ya Mulindiri na Galamukani! ni marevista yomwe yambasanduliziridwa na kugawiridwa kwene-kwene pa dziko lense la pansi. Pakuti wanthu wa m’madziko yakusiyana-siyana ambawerenga marevistaya, nkhani zomwe zimbagumanika pa tsamba lakuyamba zimbanembedwa kuti zitokonye wanthu wense. Tenepo, tin’funika kuphatisa basa marevistaya kuti tithandize wanthu kuikha bzinthu bzakufunika kwene-kwene pa mbuto yakuyamba pa moyo wawo nsiku zino. Koma tikanati kugawira revistayo cakuyamba, tin’funika kudziwa kuti ni revista iponi yomwe ingatokonye munthu ali-wense.

12. (a) Kodi Galamukani! ambanembedwera wanthu aponi, ndipo cakulinga cace n’ciponi? (b) Fotokozani cakucitika comwe mwagumana naco pomwe mukhagawira Galamukani!

¹² Galamukani! ambanembedwera wanthu omwe ambadziwa pang’ono ayai ne na pang’onopo bza Bibliya. Wanthu amwewa pinango ambadziwa lini ne cipfunziso cibodzi cakulewa bza Akristau, ayai pinango ambakhulupira lini bza cipembedzo, ndipo pinango ambadziwa lini kuti Bibliya lingawathandize pa moyo wawo. Cakulinga  ca Galamukani! n’cakuthandiza wanthu kudziwa kuti Mulungu alipo. (Waroma 1:20; Wahebereu 11:6) Ndipo revistayi imbathandizambo wanthu kukhulupira kuti Bibliya ni ‘mafala ya Mulungu.’ (1 Watesalonika 2:13) Ndipo marevista matatu ya Galamukani! ya 2018 yana misolo yakuti: “Mungatani Kuti Muzikhala Wosangalala?,” “Mfundo 12 Zothandiza Kuti Banja Liziyenda Bwino” na “Mfundo Zothandiza Amene Aferedwa.”

13. (a) Kodi Nsanza ya Mulindiri yakugawira imbanembedwera wanthu aponi? (b) Fotokozani cakucitika comwe mwagumana naco pomwe mukhagawira Nsanza ya Mulindiri.

¹³ Cakulinga ca Nsanza ya Mulindiri yakugawira ni kufotokoza mapfunziso ya m’Bibliya, kwa wanthu omwe ambadziwa kale bzinthu bzinango bza Mulungu na Fala lace. Pinango iwo ambadziwa nfundo zinango za m’Bibliya, koma ambabvesesa lini bzomwe zimbapfunzisa. (Waroma 10:2; 1 Timotio 2:3, 4) Ndipopa marevista matatu ya Nsanza ya Mulindiri yakugawira ya 2018 yankutawira mibvunzo mitatu iyi: “Kodi Baibulo Ndi Lothandizabe Masiku Ano?,” “Kodi M’tsogolomu Muli Zotani?” na “Kodi Mulungu Zimam’khudza Mukamavutika?”

14. (a) Kodi ni mavidiyo manai yaponi yomwe yali mu webusaite yathu, ndipo yana cakulinga ciponi? (b) Fotokozani cakucitika comwe mwagumana naco pomwe mukhawonesa mavidiyoyo.

¹⁴ Mavidiyo. Mu nthawe ya Jezu, nyakusema matabwa akhaphatisa basa kokha bzinthu bza manja. Koma tsapano, anyakusema matabwa ambaphatisa basa bzinthu bzomwe bzimbaphata basa na maluju, ninga bzakucekera, bzakuboolera, bzakupukutira na bzinango. Nsiku zinombo tikambapalizira bzipsa bzabwino, timbaphatisa basa mavidiyo kuti tilatize wanthu mu utumiki bwakumunda, sikuti kokha kugawira mabukhu yakudidwidwa. Ndipo mu webusaite yathu muna mavidiyo manai yakuti: Thangwe Ranyi Tin’funika Kupfunza Bibliya?, Kodi Pfunziro la Bibliya Limbacitidwa Tani?, N’ciyani Cimbacitika mu Nyumba ya Umambo? na Mboni za Yahova—Kodi Ndife Yani? Mavidiyoya yana mphindi ziwiri ndipo tingayaphatise basa pa ulendo bwakuyamba. Koma mavidiyo yomwe yana mphindi zizinji tingayaphatise basa pa ulendo bwakubwereza ayai kwa wale omwe ana nthawe izi yakuti ticeze nawo. Ndipo mavidiyoya njabwino kwene-kwene kuyaphatisa basa mu utumiki bwakumunda, thangwe yangacitise wanthu kufuna kupfunza Bibliya na kubwera ku mitsonkhano yathu.

15. Kodi kulatiza wanthu mavidiyo m’cirewedwe cawo kumbawatokonya tani? Fotokozani bziratizo.

¹⁵ Mwa ciratizo, mpfumakazi inango idagumana na mkazi munango omwe akhadafulukira ku Micronésia ndipo cirewedwe cace cakubadwa naco cikhali Ciyapese. Mpfumakaziyo idalatiza mkaziyo vidiyo yakuti Thangwe Ranyi Tin’funika Kupfunza Bibliya? mu cirewedwe caceco. Pomwe vidiyoyo idayamba, mkaziyo adalewa kuti: “Ndikukhala ninga kuti ndikulota! Cimweci n’cirewedwe cangu! Ndipo munthu omwe ankulewalewayu ankubveka ninga wa kwathu komwe ndimbakhala. Ndipo ankulewalewa cirewedwe cangu!” Pambuyo pa kuwona vidiyoyo, mkaziyo adalewa kuti angadakawerenga na kuwona bzense bzomwe bziri pa jw.org m’cirewedwe cace. (Onanimbo Mabasa 2:8, 11.) Ciratizo cinango n’ca mpfumakazi ya ku Estados Unidos yomwe ina m’bale wace mkulu wacimuna omwe ambakhala ku dziko linango. Mpfumakaziyo idatumizira m’bale waceyo link ya vidiyo ibodzi-bodziyi m’ciredwe cace. Pomwe iye adawona vidiyoyo, adatumizira tsamba mpfumakazi yaceyo lakulewa kuti: “Mbali ire yomwe inkulewa bza mphanvu yakuipa yomwe inkutonga dzikoli yanditokonya kwene-kwene, ndipo ndakumbira pfunziro la Bibliya mwakuphatisa basa webisaite.” Bzimwebzi mpsakudabwisa kwene-kwene thangwe mwamunayu ambakhala ku dziko lomwe basa lathu lakupalizira limbaletsedwa.

16. Fotokozani cakulinga ca mabroxura aya: (a) Tetekerani Mulungu Ndipo Khalani na Moyo Wakusaya Kumala. (b) Bzipsa Bzabwino Bzakucokera kwa Mulungu! (c) Mbani Ankucita Kufuna kwa Yahova Lero Lino?

¹⁶ Mabroxura. Kodi tingapfunzise tani cadidi ca m’Bibliya munthu omwe ambadziwa lini kuwerenga bwino ayai omwe alibe bukhu liri-lense lakulewa bza Bibliya m’cirewedwe cace? Tingaphatise basa broxura lakuti Tetekerani Mulungu Ndipo Khalani na Moyo Wakusaya Kumala. (Onani mafala ya m’nyansi. *) Ndipo broxura linango lomwe tingaliphatise basa kuti tiyambise pfunziro la Bibliya ndakuti Bzipsa Bzabwino Bzakucokera kwa Mulungu! Mungalatize munthuyo misolo 14 yomwe iri pa tsamba lakumalizira ndipo mukumbireni kuti asankhule msolo omwe wamudekera. Patsogolo pace, yambisani pfunziro la Bibliya pa msolo omwe munthuyo wasankhula. Kodi imwepo mudacita kale bzimwebzi pa ulendo bwanu bwakubwereza? Broxura lacitatu lomwe timbaliphatisira basa mu utumiki bwakumunda ni lakuti Mbani Ankucita Kufuna kwa Yahova Lero Lino? Iro lidakonzedwa kuti lithandize anyakupfunza Bibliya kudziwa momwe gulu lathu limbaphatira basa. Kuti mudziwe momwe mungaphatisire basa broxura limweri pa pfunziro la Bibliya, onani Moyo Wathu Wacikristau na Utumiki—Kabukhu ka Mitsonkhano ka Março 2017.

17. (a) Kodi mabukhu yomwe timbayaphatisa basa pakupfunzisa wanthu Bibliya yana cakulinga ciponi? (b) Kodi n’ciyani comwe munthu omwe wabatizidwa koma akanati kumaliza mabukhu yense yakupfunzisira an’funika kucita, ndipo n’thangwe ranyi?

¹⁷ Mabukhu. Mukamaliza pfunziro la Bibliya na munthu mwakuphatisa basa broxura, nyang’anani nthawe yabwino kuti muyambe naye bukhu lakuti Bzomwe Bibliya Limbapfunzisa. Bukhuli limbathandiza wanthu kupfunza bzipfunziso bzizinji bzakuyambirira bza m’Bibliya. Tsono nyakupfunzayo akamaliza bukhu limweri ndipo penu ankuyenda patsogolo mwauzimu, mungapitirize pfunzirolo mwakuphatisa basa bukhu lakuti Pitirizani Kufunidwa na Mulungu. Bukhuli limbapfunzisa momwe nyakupfunzayo angaphatisire basa nfundo za m’Bibliya pa moyo wace. Ndipo kumbukirani kuti, napo iye wabatizidwa, mpsakufunika kuti mupitirize kupfunza naye mpaka kumaliza mabukhu yense mawiri. Kucita bzimwebzi kun’dzamuthandiza kuti akhale na cikhulupiro cakulimba kwa Yahova na kupitiriza kukhala wakukhulupirika kwa iye.—Werengani Wakoloso 2:6, 7. *

 18. (a) Kodi 1 Timotio 4:16 ambatilimbisa kucita ciyani, ndipo bzakutewera bzace bzin’dzakhala bziponi? (b) Kodi cakulinga cathu cin’funika kukhala ciponi tikambapfunzisa wanthu Bibliya?

¹⁸ Ifepano ninga Mboni za Yahova, tina udindo bwakupfunzisa wanthu ‘bzipsa bzabwino’ kuti adziwe bzomwe angacite kuti adzakhale na moyo wakusaya kumala. (Wakoloso 1:5; werengani 1 Timotio 4:16. *) Ndipo kuti tikwanise kucita bzimwebzi, gulu lathu latikonzera bzinthu bzakusiyana-siyana, bzomwe bzina bzense bzakufunikira. (Onani kwadru yakuti “ Bzinthu Bzomwe Timbapfunzisira.”) Tenepo, bwerani timbaphatise basa bzinthu bzimwebzi mwakuthemera. Ndipo mpalizi ali-wense angasankhule momwe angabziphatisire basa pa bzakuticika bzakusiyana-siyana. Ndipo lekani kuyebwa kuti, cakulinga cathu n’cakundogawira lini mabukhu, ayai kundoyapereka kwa wanthu omwe an’funa lini kubva mafala yathu. Koma cakulinga cathu n’cakufuna kupfunzisa wanthu wakuthemera, wakubzicepswa na wakufunisisa kudziwa Mulungu pabodzi na wale omwe ana ‘makumbukidwe yabwino yomwe yangawathandize kudzagumana moyo wakusaya kumala.’—Mabasa 13:48; Mateu 28:19, 20.