1, 2. Kodi n’ciyani comwe Sathani ambaphatisa basa kuti apumpse wanthu?

BZINTHU bzinango ninga mitedwe, maluju, akanderendere na jalera bzimbacitisa kuti moyo ukhale bwino. Koma bzinthu bzinango ninga nfuti, mina, fodya, bziphuli-phuli bza nkhondo, bzimbacitisa moyo kukhala pa ngozi. Tsono pana cinthu cinango comwe cimbaposa bzinthu bzensenebzi, comwe cimbatokonya kwene-kwene moyo wa wanthu wense. Kodi cinthuco n’ciponi? Ni kunama! Kunama ni kulewa cinthu comwe tikudziwa kuti n’cadidi lini na cakulinga ca kupumpsa munthu. Kodi mbani omwe adayambisa kunama? Ni Sathani! Ndipo Jezu Kristu adalewa kuti iye ni ‘baba wa gunkha.’ (Werengani Juwau 8:44. *) Kodi ni lini pomwe iye adalewa gunkha lakuyamba?

² Iye adalewa gunkha lakuyamba mu zunde la Edeni, ndipo papita magole mazinji. Adamu na Eva akhana moyo wabwino kwene-kwene mu Paraizo omwe Yahova akhadawakonzera. Tsono Mulungu akhadawauza kuti iwo angadadya ‘muti wakudziwisa cabwino na cakuipa,’ angadafa. Napo kuti Sathani akhadziwa  bzimwebzi, iye adaphatisa basa nyoka iciuza Eva kuti: ‘Cipo un’dzafa lini.’ Limweri lidakhala gunkha lakuyamba. Sathani adalewa pomwe kuti: ‘Mulunguyo akudziwa kuti, nsiku yomwe mun’dzacidya, maso yanu yan’dzafungukiratu, mucidzakhala ninga Mulungu, mucidziwa bzabwino na bzakuipa.’—Ciyambo 2:15-17; 3:1-5.

3. N’thangwe ranyi gunkha la Sathani lidakhala lakuipa kwene-kwene, ndipo n’ciyani comwe cidacitika thangwe ra gunkhalo?

³ Gunkha la Sathani likhali lakuipa kwene-kwene thangwe iye akhadziwa kuti Eva angadamukhulupira na kudya cisapoco, angadafadi. Ndipo ndibzo bzomwe bzidacitika. Na kupita kwa nthawe Eva na Adamu adaleka kubvera mtemo wa Yahova ndipo adadzafa. (Ciyambo 3:6; 5:5) Kuthumizira bzimwebzi, thangwe ra pikado ya Adamu, ‘infayo idafikira wanthu wense.’ Tenepo, ‘infa idatonga . . . , napo kwa omwe alibe kucita pikado ninga momwe Adamu adacitira.’ (Waroma 5:12, 14) Ndipopa ifepano ndife wakuperewera ndipo timbakhala lini kwa muyaya ninga momwe Mulungu akhafunira paciyambi. Koma timbandokhala na moyo kwa ‘magole 70, ndipo tikakhala na mphanvu zakupambulika yambafika 80,’ ndipo moyo wathu ‘umbandodzaza na mabvuto na kuwawa.’ (Psalymo 90:10) Bzinthu bzensenebzi bzikucitika thangwe ra gunkha la Sathani!

4. (a) Kodi mu nkhani ino tin’cezerana mibvunzo iponi? (b) Mwakubverana na Psalymo 15:1, 2, kodi mbani omwe angakhale xamwali wa Yahova?

⁴ Jezu adalewa bza Sathani kuti: ‘Iye alibe kudimbirira m’cadidi, thangwe mwa iye mulibe cadidi.’ Sathani alibe kucinja. Iye ankupitiriza ‘kusoceresa wanthu pa dziko lense la pansi’ mwakuphatisa basa magunkha yace. (Cibvumbulutso 12:9) Koma tin’funika lini kubvuma kuti Sathani atipumpse. Tsono kuti tireke kupumpsidwa tin’funika kudziwa mitawiro ya mibvunzo mitatu iyi: Kodi Sathani ambanamiza tani wanthu nsiku zino? N’thangwe ranyi wanthu ambanama? Ndipo thangwe ranyi tin’funika kumbalewa cadidi nthawe zense, kuti tireke kuluza uxamwali bwathu na Yahova, ninga momwe Adamu na Eva adacitira?—Werengani Psalymo 15:1, 2. *

5. Kodi Sathani ambanamiza tani wanthu nsiku zino?

⁵ Ifepano tingatcenkhe kupumpsidwa na Sathani. Mpostolo Paulo adalewa kuti: ‘Timbabzidziwa bwino bziwembo bzace.’ (2 Wakolinto 2:11) Timbadziwa kuti Sathani ndiye omwe ankutonga dziko lense, kuphatanidza bzipembedzo bzakunama, maboma na anyamalonda wacinyengo. (1 Juwau 5:19) Tenepo, timbadabwa lini kuti Sathani pabodzi na madimonyo yace ndiwo omwe ambalimbisa wanthu kuti ‘ambalewe magunkha.’ (1 Timotio 4:1, 2) Mwa ciratizo, anyamalonda winango ambanamiza wanthu kuti agule bzinthu bzomwe mpsakudzongeka ayai ambawapumpsa mwa kuwatengera kobiri zawo.

6, 7. (a) N’thangwe ranyi bzimbakhala bzakuipa kwene-kwene atsogoleri wa bzipembedzo akambanama? (b) Kodi ni bzinthu bziponi bzomwe atsogoleri wa bzipembedzo ambapfunzisa?

⁶ Bzimbakhala bzakuipa kwene-kwene atsogoleri wa bzipembedzo akambanama. N’thangwe ranyi? Thangwe ndakuti munthu akakhulupira bzipfunziso bzawo bzakunama acimbacita bzinthu bzomwe Mulungu  ambabziwenga, munthuyo angaluze mwayi wakudzakhala na moyo wakusaya kumala. (Ozeya 4:9) Jezu akhadziwa kuti atsogoleri wa bzipembedzo wa mu nthawe yace akhanamiza wanthu. Tenepo, iye adawatsimula mwamphanvu kuti: ‘Tsoka kwa imwe anembi na Afarisi, anyacinyengomwe! Thangwe mumbayenda ku nyanza na kuzunga dziko lense kuti mutendeuse munthu m’bodzi, ndipo mukamugumana, mumbamucitisa kuti athemere kuthusidwa m’Gehena,’ bzomwe bzikuthandauza kupfudzidwa kwa muyaya. (Mateu 23:15) Jezu adalewa kuti atsogoleri wa bzipembedzo wale akhali ninga baba wawo Sathani, omwe ‘ngwakupha.’—Juwau 8:44.

⁷ Nsiku zinombo, pana atsogoleri azinji wa bzipembedzo. Iwo ambacemeredwa abusa, anyansembe na madzina manango ya umbiri. Ninga Afarisi, atsogoleriwa ambapfunzisa lini cadidi ca m’Fala la Mulungu koma ‘ambacinjanisa cadidi ca Mulungu na kunama.’ (Waroma 1:18, 25) Iwo ambapfunzisa bzinthu bzakunama ninga, kutenthedwa na moto kwa muyaya, moyo wa munthu umbafa lini, Mulungu ambabvumiza amuna ayai akazi kulowolana okha-okha.

8. Kodi ni kunama kuponi komwe atsogoleri wa bzipembedzo anilewa tsapanopapa, tsono n’ciyani comwe tin’funika lini kucita?

⁸ Wanthu wa ndale ambaphatisambo basa kunama kuti apumpse wanthu. Ndipo kunama kukulu komwe iwo anilewa tsapanopapa n’kwakuti, an’bweresa ‘mtendere na cisungiko’ pa dzikoli. Tsono ‘pa nthawe imweyo cipasu-pasu cin’dzawafikira.’ Na tenepo, ifepano tin’funika lini kumbakhulupira bzomwe atsogoleriwa ambalewa bzakuti bzinthu bzin’cinja. Tsono cadidi n’cakuti ‘nsiku ya Yahova in’dzabwera ninga mbava, usiku.’—1 Watesalonika 5:1-4.

9, 10. (a) N’thangwe ranyi wanthu ambanama, ndipo bzakutewera bzace mpsiponi? (b) Kodi Bibliya limbalewa ciyani pakulewa bza Yahova?

⁹ Nsiku zino, wanthu azinji ambanama. Nkhani inango ya msolo wakuti, “N’thangwe Ranyi Timbanama?,” yakufotokozedwa na Y. Bhattacharjee, idalewa kuti “bzinkuwoneka kuti kunama ni njira ikulu yakupumpsira wanthu ndipo mpsakunesa kuimalisa.” Kulewa kwinango, wanthu ambakumbuka kuti kunama n’kwacibadwa ndipo munthu akanama n’kuphonyeka lini. Wanthu kawiri-kawiri ambanama kuti abzikhotcerere, abise bzinthu bzakuipa ayai ciwembo comwe adacita. Iwo ambanamambo kuti agumane kobiri ayai cinthu cinango mu njira yakusiyana. Ndipo nkhaniyo idalewa pomwe kuti wanthu winango ambawona kuti n’kuphonyeka lini kunamiza “alendo, anzawo wakubasa, axamwali na abale wawo.”

¹⁰ Kodi mpsiponi bzakutewera bza kunamaku? Wanthu ambakhulupirana lini ndipo mbverano wawo umbadzongeka. Mwa ciratizo, ndokumbukirani momwe mwamuna wakukhulupirika angabvere akadziwa kuti mkazace wacita cinthu cakuphonyeka ndipo amunamiza kuti aleke kudziwa. Ayai kumbukirani momwe mkazi na wana angabvere penu msolo wa banjalo ambawaboneresa, koma akakhala pakati pa wanthu winango, iye ambalatiza kuti ambawafuna na kuwasamalira bwino. Wanthu amwewa ambanamiza wanthu anzawo, koma tin’funika kukumbukira kuti iwo ambakwanisa lini kunamiza Yahova. Ndipo Bibliya limbalewa kuti: ‘bzinthu bzense bziri padeca, ndipo iye ambakwanisa kubziwona bwino-bwino.’—Wahebereu 4:13.

11. Kodi tingapfunze ciyani na ciratizo cakuipa ca Ananiya na Safira? (Onani cithunzi-thunzi pa tsamba 3.)

 ¹¹ M’Bibliya muna ciratizo ca banja linango Lacikristau lomwe Sathani adaliphatisa basa kuti anamize Mulungu. Banjalo ni la Ananiya na Safira omwe adanamiza apostolo. Iwo adagulisa munda wawo ndipo adapambula kobiri zomwe adagulisira mundayo acizipereka kwa apostolo. Ananiya na Safira akhafuna kubziwonesera m’gwere, tenepo iwo adauza apostolowo kuti apereka kobiri zense zomwe adagulisa mundayo. Tsono Yahova adadziwa kuti iwo akhanama, ndipo iye adawalanga.—Mabasa 5:1-10.

12. Kodi n’ciyani comwe cin’dzacitikira anyakunama wakusaya kukungula, ndipo n’thangwe ranyi?

¹² Kodi Yahova ambawawona tani wanthu omwe ambanama? Wanthu wense omwe ambanama ndipo ambakungula lini, an’dzathusidwa ‘m’nyanza ya moto,’ ninga momwe bzin’dzacitikira Sathani. Kulewa kwinango, iwo an’dzapfudzidwa kwa muyaya. (Cibvumbulutso 20:10; 21:8; Psalymo 5:6) N’thangwe ranyi? Thangwe rakuti Yahova ambawona omwe ambanama ninga momwe iye ambawonera wense omwe ambacita bzinthu bzakunyansa pamaso pace.—Cibvumbulutso 22:15.

13. Kodi n’ciyani comwe timbadziwa pakulewa bza Yahova, ndipo tinkulimbisidwa kucita ciyani?

¹³ Ifepano timbadziwa kuti Yahova ‘ni munthu lini kuti anganame’ ndipo ‘mpsakutazika kuti Mulungu aname.’ (Mirewengo 23:19; Wahebereu 6:18) ‘Yahova ambawenga . . . lirime lakunama.’ (Mimwani 6:16, 17) Penu tin’funa kumukondwesa, tin’funika kumbalewa cadidi. Tenepo, tin’funika lini ‘kumbanamizana.’—Wakoloso 3:9.

14. (a) Kodi n’ciyani comwe cimbacitisa kuti Akristau wacadidi akhale wakusiyana na wanthu wa bzipembedzo bzakunama? (b) Fotokozani nfundo yomwe imbagumanika pa Luka 6:45.

¹⁴ Kodi n’ciyani cimbalatiza kuti Akristau  wacadidi mbakusiyana na wanthu wa bzipembedzo bzakunama? Ni ‘kulewa cadidi.’ (Werengani Zakariya 8:16, 17. *) Paulo adalewa kuti: ‘Tinkubzipereka ninga atumiki wa Mulungu, . . . mwa kumbalewa cadidi.’ (2 Wakolinto 6:4, 7) Ndipo Jezu adalewa kuti munthu ‘ambalewa bza kudzala mu mtima.’ (Luka 6:45) Bzimwebzi bzikuthandauza kuti munthu wakukhulupirika ambalewa cadidi. Iye ambalewa cadidi kwa alendo, anzace wakubasa, axamwali na acibale wace. Tsapano bwerani tiwone bziratizo bzomwe bzingatithandize kukhala wakukhulupirika pa bzinthu bzense.

15. (a) N’thangwe ranyi mpsakuipa kukhala na moyo wa pawiri? (b) Kodi n’ciyani cingathandize maswaka kuleka kutengeka na bzicito bza axamwali wawo? (Onani mafala ya m’nyansi.)

¹⁵ Penu imwepo ndimwe tswaka, pinango mumbafuna kuti anzanu ambakufuneni. Ndipo thangwe ra cikhumbo cimweci, maswaka manango yambakhala na moyo wa pawiri. Iwo ambalatiza makhalidwe yabwino akakhala pakati pa acibale wawo na abale wa m’gwere, koma akakhala pawokha ayai pakati pa wanthu omwe ambatumikira lini Yahova iwo ambalatiza makhalidwe yakusiyana kwene-kwene. Iwo ambalewa mafala yakuipa, kubvala bzakubvala bzakusaya kuthemera, kubvesera nyimbo zomwe zina mafala yakuipa, kuledzera, kumwa mankhwala yakudzungulumwisa, kusekerere nsiku za feriado, ayai kucita bzinthu bzinango bzakuipa. Iwo ambanamiza abereki wawo, abale wa m’gwere pabodzi na Yahova. (Psalymo 26:4, 5) Koma Yahova ambafuna lini kuti timbamulemekeze ndipo pa nthawe ibodzi-bodziyo timbacite bzinthu bzomwe iye ambabziwenga. (Marko 7:6) Tin’funika kumbacita bzomwe Bibliya limbalewa kuti: ‘Mtima wako uleke kumbacitira njiru anyapikado, koma mbagopa Yahova nsiku yense.’—Mimwani 23:17. (Onani mafala ya m’nyansi. *)

16. Kodi n’ciyani comwe tin’funika kucita tikambadzaza formulariyo?

¹⁶ Penu imwepo mun’funa kukhala mpainiya wakukhazikika ayai kuyamba utumiki bwa nthawe zense, mwa ciratizo, kutumikira pa Beteli mun’funika kudzaza formulariyo. Tsono mpsakufunika kwene-kwene kumbalewa cadidi pa mitawiro ya mibvunzo yomwe imbagumanika mu formulariyo yakulewa bza thanzi lanu, masenzeka na khalidwe lanu. (Wahebereu 13:18) Tsono tani penu mudacita cinthu cinango comwe Yahova ambaciwenga ayai cinthu comwe cimbaboneresa cikumbu-mtima canu ndipo mulibe kuwafotokozera akulu wa gwere? Mungacite bwino kukumbira thandizo akuluwo kuti akuthandizeni kutumikira Yahova na cikumbu-mtima cakucena.—Waroma 9:1; Wagalata 6:1.

17. Kodi n’ciyani comwe tingacite akulu-akulu wa boma akatibvunza mibvunzo yakulewa bza abale wathu?

¹⁷ Kodi mungacite ciyani penu basa lathu laletsedwa komwe mumbakhala ndipo akulu-akulu wa boma akuphatani, ndipo akukubvunzani mibvunzo kuti adziwe bza abale wanu? Kodi mungawauze bzense bzomwe  mukudziwa pakulewa bza abale wanuwo? Kodi n’ciyani comwe Jezu adalewa pomwe mtongi wa Roma adamubvunza? Mwakuphatisa basa malango ya M’Bibliya yakulewa kuti pana ‘nthawe yakunyamala na nthawe yakulewa-lewa,’ Jezu adandonyamala. (Mpalizi 3:1, 7; Mateu 27:11-14) Tenepo, penu tagumana na cakucitika ninga cimweci, ifepano tin’funika kucenjera kuti tireke kuikha moyo wa abale wathu pa ngozi.—Mimwani 10:19; 11:12.

18. Kodi tin’funika kucita ciyani akulu wa gwere akatibvunza bza m’bale omwe wacita pikado?

¹⁸ Kodi mun’funika kucita ciyani penu m’bale m’gwere wacita pikado ikulu ndipo imwepo mwadziwa bza pikadoyo? Akulu wa gwere ana udindo bwakusamalira gwere kuti likhale lakucena, na tenepo iwo angakubvunzeni kuti muwauze bzomwe mukudziwa pa nkhaniyo. Kodi mungacite ciyani penu munthuyo ni xamwali wanu wa pa mtima ayai wacibale wanu? Bibliya limbati: ‘Mboni yakukhulupirika imbalewa cadidi.’ (Mimwani 12:17; 21:28) Tenepo mun’funika kufotokozera akuluwo cadidi cense mwakusaya kuwabisira na cibodzico. Ndipo akuluwo akakhala na umboni bwakukwanira pa nkhaniyo, iwo angakwanise kuthandiza munthuyo kubwezeresa uxamwali bwace na Yahova.—Tiyago 5:14, 15.

19. Kodi tin’dzapfunza ciyani mu nkhani yakutewera?

¹⁹ Davide adapemba kuna Yahova kuti: ‘Imwepo mumbakomedwa na cadidi comwe mumbacigumana mu mtima mwa munthu.’ (Psalymo 51:6) Davide akhadziwa kuti cakufunika ni unthu bwathu bwankati. Kuyambira kale-kale, Akristau wacadidi ‘ambalewa cadidi.’ Njira inango yakulatiza kuti ndife wakusiyana na wanthu wa bzipembedzo bzakunama ni kupfunzisa cadidi ca M’Bibliya. Mu nkhani yakutewera, tin’dzapfunza momwe tingacitire bzimwebzi mu utumiki bwakumunda.